Коми вежаясӧс нимӧдан лун
| Коми вежаясӧс нимӧдан лун | |
|---|---|
 | |
| Мӧд ногӧн | День Собора Коми святых |
| Пасйӧны | урасьӧм тӧлысь 11-ӧд лунӧ |
| Кадпас | 2016 восянь |
| Йитчӧма | Коми муын вежаясӧс казьтылӧмкӧд |
Коми вежаясӧс нимӧдан лун (рочӧн День Собора Коми святых) — Коми муын вежаясӧс казьтылан лун, пыртӧма 2015 вося рака тӧлысь 23-ӧд лунӧ Москваса да став Россияса Святейшӧй Патриарх Кириллӧн бласлӧвитӧм серти, пасйӧны урасьӧм тӧлысь 11-ӧд лунӧ 2016 восянь. Тайӧ лунӧ казьтылӧны вежа Степанӧс, Питиримӧс, Герасимӧс, Ионаӧс, а сідзжӧ 40 выль мученикӧс. Гажсӧ пыртӧма Роч Православнӧй вичколӧн ӧтувъя вичко календарӧ[1][2].
История
Медводдзаысь гажсӧ Коми Республикаын пасйисны 2016 вося урасьӧм тӧлысь 11-ӧд лунӧ[3]. Гаж нуӧдан лунсӧ, урасьӧм тӧлысь 11-ӧд лунсӧ, бӧрйӧма тӧдӧмӧн: тайӧ лунӧ Коми муын казьтылӧны ӧтпырйӧ куим вежа мортӧс: Герасимӧс, Питиримӧс да Ионаӧс[4].
Коми вежаяс лыддьӧгӧ пыртӧма нёль коми вежаӧс-бурсьылысьӧс да вичкоын служитысьясӧс, кодъяс сетісны ассьыныс олӧмсӧ эскӧм понда да сюрисны репрессияяс улӧ.
Медводдза вежаясӧн лоисны Перымса Степан, Герасим, Питирим да Иона. На отсӧгӧн XV нэмын комиясӧс пыртӧдісны Кристос эскӧмӧ. Вежа Герасим лоис Комиын медводдза вежа мученикӧн. Предание серти сійӧс джагӧдӧма аслас манси слугаыс 1441 воын. Вежа мортлысь колясъяссӧ видзӧны Емдін сиктса Благовещенньӧ вичкоын. Вежа Герасимӧс вежысьӧн лои учёнӧй архимандрит Питирим. Кольӧмаӧсь гижӧдъяс, мый аслас проповедьӧн вежа морт пыртчӧдӧма уна мансиӧс, кодъяс овлӧмаӧсь Печӧра ю вожъясын[5]. Мансилӧн вождь Асыка лӧгасьӧма Питирим вылӧ да виӧма сійӧс 1455 воын Емдінсянь неылын ва вежалігӧн. Вежа Питирим бӧрын ентӧдтӧмъясӧс велӧдны мӧдӧдчӧ епископ Иона. Сійӧ пыртіс Ыджыд Перымлысь мукӧд юкӧнсӧ: языческӧй племяясӧс, кодъяс олісны Висер, Кама, Чусовӧй да мукӧд юяс пӧлӧн. Пу енлы юрбитанінъясын вежа морт кыпӧдіс храмъяс, восьтіс челядьлы школаяс. Вежа Иона кувсьӧма 1470 воын[6].
Водзті Коми вежаяслӧн Соборӧ пырис 21 ним — тайӧ нёль вежа морт, на лыдын медводдза коми епископ Перымса Степан, да Россияса 17 выль мученик да висьтасьысь.
2019 вося кӧч тӧлысьын Москваса да став Россияса Святейшӧй Патриарх Кирилл пыртӧма Соборлӧн лыддьӧгӧ выль мученикъяслысь нӧшта 23 ов. Ӧні сэні 44 ним[7][8].
Пасйӧм
Тайӧ лунлы сиӧма уна мероприятие вичкоын и небӧгаинъясын.
Сыктывкарса Вежа Степан кафедральнӧй соборын Сыктывкарса да Коми-зыряна Архиепископ Питирим нуӧдіс Енлы сиӧм литургия, а Коми Республикаса медшӧр вичколӧн кӧлӧкӧльня залын нуӧдісны кыпыд концерт[2].
2018 воын Коми Республикаса национальнӧй библиотека, «Православнӧй водзмӧстчӧм» войтыркостса грант конкурслӧн сьӧм отсӧгӧн, петкӧдліс «Коми мулӧн выль мученикъяс» интерактивнӧй передвижнӧй выставка-мӧвпалӧм[9].
2020 воын Коми Республикаса национальнӧй библиотека тӧдмӧдіс Коми Республикаса олысьясӧс репрессируйтӧм духовенстволӧн выль нимъясӧн, кодъясӧс пыртӧма Коми Соборлӧн вежаяс лыддьӧгӧ да кодъяс помалісны ассьыныс олӧмсӧ Коми муын[4].
Ыстӧгъяс
- ↑ Православный церковный календарь. Собор Коми святых
- ↑ 1 2 День Собора Коми святых отмечается 11 февраля
- ↑ В Коми впервые празднуют День Собора Коми святых
- ↑ 1 2 День Собора Коми святых
- ↑ Карцев А., Казанцев А. Покинутый мир чердынских манси
- ↑ Православные верующие Коми 11 февраля празднуют Собор Коми святых
- ↑ Жизнеописания новомучеников: новые лица, новые судьбы
- ↑ Сегодня православные отмечают Собор КОМИ Святых
- ↑ Новомученики земли Коми
Литература
• Новомученики и исповедники, в земле Коми просиявшие/ Русская Православная Церковь, Московский Патриархат, Сыктывкарская епархия; [ред. архиепископ Сыктывкарский и Коми-Зырянский Питирим (Волочков); предисл. М. Б. Рогачёва]. — Сыктывкар: Коми республиканская типография, 2017. — 103 с.