Печӧра (ю)
| Печора | |
|---|---|
 Печӧра ю вылын пыж, 2010 вося гожӧм | |
| Характеристика | |
| Кузьта | 1809 км |
| Ковтыс | 322 000 км² |
| Ва рӧскод | 4100 м³/с (вом) |
| Ва визлас | |
| Ю йыв | |
| • Ин | Войвыв Урал |
| • Джуджда | 675 м |
| • География координатаяс | 62°12′06″ с. ш. 59°25′55″ в. д.GЯO |
| Ю вом | Печӧра лайкола |
| • Джуджда | 0 м |
| • География координатаяс | 68°18′27″ с. ш. 54°25′00″ в. д.GЯO |
| Ю пӧкат | 0,37 м/км |
| Ин | |
| Ва система | Баренц саридз |
|
|
|
| Страна | |
| Регионъяс | Коми Республика , Яран асвеськӧдлан кытш |
| Канму ва реестрын код | 03050100112103000057306[1] |
| Географическӧй нимъяслӧн канму каталогын номер | 0183075 |
|
|
|
 Медиафайлы на РУВИКИ.Медиа | |
Печӧра (Печера, рочӧн Печора) - тайӧ Коми Республикаын да Яран асвеськӧдлан кытшын ю (1809 км).
Этимология
Юыслӧн нимыс, тыдалӧ, артмӧма печора (печера) племя нимсянь, мый йылысь гижӧма тані роч летописьясын.
Этнограф Б. О. Долгих чайтіс, мый нимыс лоӧ яран пэо, либӧ яран пя - "вӧр" да яран тер, либӧ яран дер - "олысь", мый лоӧ "вӧрын олысь".
Манси шуӧны юсӧ Песеръя, ӧти версия серти гидроним лоӧ "печора (племяяслӧн) ю" (манс. я – ю). Сідзкӧ, сійӧ тшӧтш вермис лоны ӧнія ю нимлӧн подулӧн[2].
Л.В.Хомич чайтӧ, мый печера этнонимсӧ бурджык вуджӧдны кыдзи «гӧравывса олысь» (пэ «гӧра»), Урал гӧраяс дорын кӧялысь яранъясӧс тӧд вылын кутӧмӧн. Но стӧча позьӧ шуны ӧтитор: Печӧра гидронимын тыдовтчӧ важъя самодий войтырлӧн ним, кодлӧн кывйыс вӧлі зэв матын яран кыв дорӧ. Но асьныс яранъяс Печӧрасӧ тадзи оз шуны, а шуӧны Санэроʼʼяха либӧ Санэроʼʼям, кӧні яха и ям «ю»[3].
География
Кузьтаыс - 1809 км, ва чукӧртан бассейнлӧн ыдждаыс - 322 сюрс км². Заводитчӧ Войвыв Уралын, Коми Республика асыв-лунвыв юкӧнын, да визувтӧ медводз ёнджыкасӧ рытыв-лунвылӧ. Ю заводитчанінлӧн джудждаыс - саридз веркӧссянь 675 м. 1981 воын Иван Просвирнинлӧн экспедицияӧн аддзӧм ю вож дорӧ вӧлі сувтӧдӧма "Тасянь заводитчӧ войвывса ыджыд Печора ю" гижӧда чугун плита[4].
Унь ю заводитчанінсянь Унь ю вомӧдз Печӧра лоӧ гӧравывса юӧн. Якша посёлок дорын (Волостница юӧ усьӧм бӧрын) кежӧ войвылӧ да визувтӧ Печӧра увтасті Усвавомӧдз. Усва ю вомсяньыс бергӧдчӧ рытыввылӧ да артмӧдӧ кык ыджыд кӧджа паськыд чукыль. Ворга пасьтаыс тані воӧ 2 километрӧдз, ковтысын артмӧны ыджыд ойдлан видзьяс. Чилимдін гӧгӧрын (Пижма да Чильма юяслӧн ӧтлаасьӧм бӧрын) Печӧра бара кежӧ войвылӧ, тайӧ юкӧнас сылӧн паськыд уйтас эм уна вис ("шар") да важ ю сёртас.
Печӧра ю вомсянь 130 км ылнаын Печӧра юксьӧ кык вож вылӧ - асыввыв (Ыджыд Печӧра) да рытыввыв (Ичӧт Печӧра). Улынджык, Нарьян-Мар районын, юыс артмӧдӧ 45 км гӧгӧр пасьта дельта да усьӧ Печӧра саридзлӧн Печӧра лайколаӧ.
Юлӧн ӧтувъя пӧкатыс - 0,373 м/км. Вылыс юкӧнас (Ылыдз ю вомсянь вылынджык) пӧкатыс 2,5-3,0 м/км, юыс ӧдйӧ визувтӧ, эмӧсь косьяс, сылӧн пыдӧсыс изъя. Ылыдздінсянь улынджык пӧкатыс - 0,10-0,11 м/км, Печӧра визулыс пӧшти кык пӧв содӧ, воргаыс паськалӧ 100-150 метрасянь 300 метраӧдз, пыдӧс вежсьӧ лыа вылӧ, кӧні сорласьӧма галька да гравий[5].
Ю вожъяс
Медшӧр вожъяс — Унья, Войвыв Мылва, Велью, Льӧмъю, Кӧжва, Лыжа, Изьва, Неридз, Пижма, Чильма, Сула, Борӧвӧй (шуйгавылын); Ылыдз, Пӧдчерем, Щугор, Усва, Лая, Йӧрша, Сӧдзва, Шапка, Куя (веськыдвылын).
Гидрология
Ва содан ӧшмӧсыс Печӧраын сора, ёнджыкасӧ лымъя. Ытва заводитчӧ косму тӧлысь помын - ода-кора тӧлысь заводитчигӧн, медсёрыс - ода-кора тӧлысь шӧрын юлӧн шӧр визулас да увтасінъясын лӧддза-номъя тӧлысь медводдза лунъясӧдз. Гожӧмын и тӧлын - межень. Гожся меженьыс - сора тӧлысь шӧрсянь моз тӧлысьӧдз, тайӧ кадӧ тшӧкыда зэрӧ. Вогӧгӧрся шӧркодь ва видзӧмыс - ю вомын 4100 м³/с. Кынмӧ йирым тӧлысь помын. Йиыс заводитӧ кылавны ю йывсянь. Йи кылалігӧн тані век овлӧ тыктым.
Оланінъяс
Печӧра вылын медтӧдчана пристаньяс — Нарьян-Мар, Чилимдін, Шелляюр, Печӧра, Вуктыл.
Печӧра ю дорын гырысь оланінъяс — Комсомольск-на-Печоре, Мылдін, Акись, Уньявом, Аранеч, Кыдзкар, Песчанка, Соколов, Уляшов, Родионов, Нӧвикбӧж, Усвавом, Шеллябӧж, Закарвань, Денисов, Васькин, Кипъёва.
Овмӧсын тӧдчанлун
Печӧраті ветлӧ уна сикас судно. Суднояс вермӧны ветлыны Мылдінӧдз, тулысын да арын — Уньявомӧдз. Саридзса суднояс кайӧны ва катыд Нарьян-Мар саридз портӧдз (ю вомсянь 110 км).
Тані ёна сӧвмӧма чери кыйӧм (чими, кебӧс, сельги).
Печӧра ковтысын эм из шом, мусир да биару, зарни, марганеч, кварц да сылӧн сикасъяс, титан куйлӧдъяс.
Печӧра ю ковтысын меститчӧ Печӧра-Ылыдзса бисфернӧй заповедник да «Югыд ва» национальнӧй вӧр-ва парк[6].
Литература
- Географический энциклопедический словарь: Географические названия / Гл. ред А. Ф. Трёшников; Ред. кол.: Э. Б. Алаев, П. М. Алампиев, А. Г. Воронов и др. — М.: Сов. энциклопедия, 1983. — С. 83. — 538 с. — 100 000 экз.
- Производительные силы Коми АССР. Том II. Часть II. Водные ресурсы. — М.:Изд-во АН СССР, 1955.
- Атлас Республики Коми. — М.: Феория, 2011. — 448 с.
- Атлас Республики Коми. — М.: Изд-во «Дизайн. Информация. Картография», 2001. — 552 с.
- Атлас Республики Коми по климату и гидрологии. — М.: Изд-во «ДиК», Издательский дом «Дрофа», 1997. — 116 с.
- Республика Коми: Энциклопедия. Т.1 — Сыктывкар: Коми книжное издательство, 1997.— 472 с.
Ыстӧгъяс
- ↑ Ресурсы поверхностных вод СССР: Гидрологическая изученность. Т. 3. Северный край / под ред. Н. М. Жила. — Л.: Гидрометеоиздат, 1965. — 612 с.
- ↑ Географические названия Урала : топонимический словарь / А. К. Матвеев. — Екатеринбург : ИД "Сократ", 2008. — 352 с.
- ↑ А. И. Туркин. Топонимический словарь Коми АССР. Сыктывкар: Коми книжное издательство, 1986.
- ↑ Просвирнин Иван Никандрович
- ↑ Ильина Л. Л., Грахов А. Н. Реки Севера / Рец.: д-р геогр. наук А. А. Соколов. — Л.: Гидрометеоиздат, 1987. — 128 с. — (Реки и озёра нашей Родины). — 80 500 экз.
- ↑ Братцев А. Печора // Республика Коми. Энциклопедия. Том II. — Сыктывкар: Коми книжное издательство, 1999. — С. 433-434.