Лешанов Иван Петрович

Иван Петрович Лешанов
Чужан лун	1920 вося лӧддза-номъя тӧлысь 29-ӧд лун
Чужанін	Сабельская грезд, Брейтов район, Ярославль обласьт
Кулан лун	1976 вося тӧвшӧр тӧлысь 10-ӧд лун
Куланін	Гам грезд, Емдін район, Коми Республика
Канму	СССР
Войска сикас	артиллерия
Служитан вояс	1940—1946
Звание
Тышъяс/вӧйнаяс	Айму вӧсна Ыджыд тыш
Наградаяс да премияяс

Лешанов Иван Петрович (1920 вося лӧддза-номъя тӧлысь 29-ӧд лун, Сабельская грезд — 1976 вося тӧвшӧр тӧлысь 10-ӧд лун, Гам грезд, Емдін район, Коми Республика) — младшӧй лейтенант, Айму вӧсна Ыджыд тышын участвуйтысь, Комиысь Сӧветскӧй Союзса Герой (1944).

Олантуй

Чужис 1920 вося лӧддза-номъя тӧлысь 29-ӧд лунӧ Сабельская грездын (ӧні — Брейтов район Ярославль обласьт). Помаліс абу тыр шӧр школа да фабрично-заводскӧй школа, сы бӧрын уджаліс судомонтажникӧн судоремонтнӧй мастерскӧйясын.

1940 вося йирым тӧлысьын босьтісны служитны Гӧрд Армияӧ. 1941 вося лӧддза-номъя тӧлыссянь — Айму вӧсна Ыджыд тыш вылын.

1943 вося кӧч тӧлысь кежлӧ красноармееч Иван Лешанов вӧлі Воронежскӧй фронтвывса 38-ӧд армиялӧн 167-ӧд стрелкӧвӧй дивизияса 465-ӧд стрелкӧвӧй полклӧн орудиеса наводчикӧн. Петкӧдліс асьсӧ геройӧн Днепр вӧсна тышын. 1943 вося кӧч тӧлысь 30-ӧд лунлы воддза войӧ расчёт составын сайӧдіс Вышгород районын Днепр вомӧн сӧветскӧй частьяслысь вуджӧмсӧ, ачыс бырӧдіс 3 би точка, миномётъяслысь 1 батарея, 1 артиллерийскӧй орудие. 1943 вося йирым тӧлысь 12-13 лунъясӧ Лютежскӧй плацдарм вылын тышъясын паныдаліс немечьяслысь некымын контрнаступление, бырӧдіс противниклысь 4 пулемёт, 2 артиллерийскӧй орудие, 35 гӧгӧр салдатӧс да офицерӧс.

«Гӧрд Армияса артиллерияса офицеръяслы да сержантъяслы Сӧветскӧй Союзса Геройлысь ним сетӧм йылысь» СССР-са Медвылыс Сӧвет Президиумлӧн 1944 во урасьӧм тӧлысь 9-ӧд лунся Индӧдӧн «немецкӧй захватчикъяскӧд тыш нуӧдігӧн командованиелысь боевӧй заданиеяс образцӧвӧя олӧмӧ пӧртӧмысь да та дырйи повтӧмлун да геройство петкӧдлӧмысь» сетӧма Сӧветскӧй Союзса Геройлысь ним Ленин орден да 4228 №-а «Зарни Кодзув» медаль сетӧмӧн.

1945 воын помаліс младшӧй лейтенантъяслысь курсъяс. 1946 воын сійӧс уволитӧмаӧсь запасӧ. Оліс да уджаліс Черновицкӧй да Запорожскӧй областьясын, Крымын, Уралын.

1954 воын помаліс видз-му овмӧс механизируйтан училище.

1959 восянь оліс Коми АССР-ын Емдін районса Подгорнӧй грездын (ӧні тайӧ грездыс Гам сиктын), уджаліс сельпоын, кылӧдчис, вузасис, вӧчис Зӧвсьӧртса фанера вӧчан заводын ДСП-70. Куліс 1976 вося тӧвшӧр тӧлысь 10-ӧд лунӧ, дзебӧма Гамын.

Наградаяс

• Сӧветскӧй Союзса Герой(1944.02.09);
• «Зарни Кодзув» медаль 4228 №-а (1944.02.09);
• Ленин орден (1944.02.09);
• Айму вӧсна Ыджыд тышса II тшупӧда орден;
• Гӧрд Кодзув орден;
• медальяс.

Паметь

• Емдін районса народнӧй образованиелӧн история музейын видзӧны младшӧй лейтенант И. П. Лешановлӧн личнӧй делӧсӧ да сылысь награда документъяссӧ;
• 2001 воын Ёль грездын пуктӧма Сӧветскӧй Союзса Герой Иван Петрович Лешановлы мемориальнӧй плита;
• 2016 воын Яг грездын сувтӧдӧма Сӧветскӧй Союзса Герой Иван Петрович Лешановлы паметник .
• «Юрган» телеканал вӧчис Лешанов йылысь документальнӧй кино «Герои. История подвига. Иван Лешанов».

Пасйӧдъяс

Литература

• Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1987. — Т. 1 /Абаев — Любичев/. — 911 с. — 100 000 экз. — ISBN отс., Рег. № в РКП 87-95382.
• Герои земли Ярославской. Т. 3 — Ярославль, 2010.
• Герои огненных лет. Ярославль: Верхне-Волжское кн. изд., 1985.
• Днепр — река героев. Киев, 1983.
• Книга памяти Республики Коми. Т. 9 / сост. В. М. Котельников, А. М. Калимова, А. А. Карпов. — Сыктывкар, 2002.
• Книга памяти Республика Коми. Т. 10 / сост. В. М. Котельников, А. М. Калимова, А. А. Карпов. — Сыктывкар, 2004.