Маринченко Николай Данилович

Маринченко Николай Данилович
Маринченко Николай Данилович
Чужан лун	1912-ӧд вося лӧддза-номъя тӧлысь 20-ӧд лун
Чужанін	Чернянка[d], Новоосколса уезд[d], Курск губерния[d], Россияса империя[d];
Кулан лун	1943-ӧд вося сора тӧлысь 12-ӧд лун (31 ар)
Куланін	Вяжи-Заречье[d], Новосильскӧй район[d], Орёл обласьт, РСФСР, Сӧветскӧй Социалистическӧй Республикаяслӧн Союз;
Канму	СССР
Войска сикас	пехота[d]
Служитан вояс	1933—1937; 1942—1943
Звание
Часьт	457-ӧд стрелковӧй полк
Командуйтіс	взводӧн
Тышъяс/вӧйнаяс	Айму вӧсна Ыджыд тыш .;

Маринченко Николай Данилович (1912 вося лӧддза-номъя тӧлысь 20-ӧд лун, Курск губернияса Чернянка слӧбӧда — 1943 вося сора тӧлысь 12-ӧд лун, Орёл областьса Вяжи-Заречье сикт) — Брянск фронтвывса 63-ӧд армиялӧн 129-ӧд стрелкӧвӧй дивизияса 457-ӧд стрелкӧвӧй полкса стрелкӧвӧй взводса командир. Айму вӧсна Ыджыд тышын участвуйтысь, Комиысь Сӧветскӧй Союзса Герой^[1]^[2].

Олантуй

Николай Маринченко чужліс 1912 вося лӧддза-номъя тӧлысь 20-ӧд лунӧ Курск губернияса Новооскольскӧй уездлӧн (ӧні Белгородскӧй область) Чернянскӧй волостьса Чернянка слӧбӧдаын, украинаса кресьтянин Данила Маринченколӧн семьяын.

Семьяын Николай вӧлі медыджыд кагаӧн да ичӧтсяньыс корсис позянлун отсавны бать-мамыслы вердны семьясӧ. Мамыслӧн казьтылӧм серти, коді оліс кузь нэм да кувсис сӧмын 1990-ӧд воясӧ, Коля вӧлі томсяньыс зэв водзмӧстчысьӧн да уджачӧн. Таысь кындзи, сійӧ вӧлі бур сьылысьӧн да йӧктысьӧн, но вӧлі асныра да некор эз миритчы несправедливостькӧд, пыр водзсасис ӧбидитысьяслы. Шӧр школаын сизим класс помалӧм бӧрын уджаліс XVII партсъезд нима колхозын, но ичӧт удждон вӧсна муніс Донбасса шахтаӧ, кӧні уджаліс забойщикӧн, а сэсся десятникӧн.

1933 восянь 1937 воӧдз Маринченко служитіс Гӧрд Армияын, кӧні воис сержант чинӧдз. Демобилизуйтчӧм бӧрын Николай Маринченко воис гортас, Чернянкаӧ, но регыд муніс уджавны Москваӧ, кӧні уджаліс техник-строительӧн.

1937 вося моз тӧлысь 2-ӧд лунӧ Маринченкоӧс арестуйтӧмаӧсь хулиганитӧмысь, власьт представительяслы водзсасьӧмысь да власьт кутігӧн лёк вӧчӧм мыжалӧмӧн. 1938 вося рака тӧлысь 16-ӧд лунӧ Маринченкоӧс пуксьӧдісны исправительно-трудӧвӧй лагерӧ 10 во кежлӧ да мӧдӧдісны Ухтпечлагӧ, кӧні сійӧ уджаліс техник-строительӧн Ухта-Крутая туй стрӧитігӧн.

1942 вося моз тӧлысь 31-ӧд лунӧ Маринченкоӧс кадысь водз мездісны да Коми АССР-са Укваса райвоенкомат мӧдысь босьтіс армияӧ. 1942 вося сора тӧлыссянь Маринченко участвуйтіс тышъясын, тышкасис Ленинград дорын да Курскӧй дуга вылын^[3].

1943 вося сора тӧлысь 12-ӧд лунӧ Орёл областьса Вяжи-Заречье сиктсянь рытыв-лунвылынджык тыш дырйи 129-ӧд стрелкӧвӧй дивизияса 457-ӧд стрелкӧвӧй полкса взводса командир лейтенант Маринченко боечьяскӧд писькӧдчис прӧтивниклӧн тылӧ. Маринченколӧн взводыс орӧдіс немецъяслысь бӧрыньтчан туйсӧ да лӧсьӧдіс противниклы засада. Пока батальонлӧн шӧр вынъясыс тышкасисны траншеяясын, Маринченколӧн взводыс тышкасис враглӧн резервъяскӧд, кодъяс матыстчисны Большой Малиновец сиктсянь. Противникӧс бырӧдӧм бӧрын батальон заводитіс тышкасьны вылна понда, кӧні противник тшупсис кык 75-миллиметровӧй орудиеӧн. Веськыдвыв флангсянь тӧдлытӧг пырӧм бӧрын Маринченко аслас взводкӧд бырӧдіс противникӧс. Тайӧ тышас лейтенант Маринченко ачыс бырӧдіс 57 немецкӧй салдатӧс да офицерӧс, но и ачыс кувмӧн ранитчис^[4].

СССР-са Медвылыс Сӧвет Президиумлӧн 1943 во моз тӧлысь 27-ӧд лунся Индӧдӧн ыджыд повтӧмлунысь, героизмысь да кужӧмӧн тыш котыртӧмысь лейтенант Маринченко Николай Даниловичлы кувсьӧм бӧрас сетӧма Сӧветскӧй Союзса Геройлысь ним «Зарни Кодзув» медаль да Ленин орден сетӧмӧн.

Дзебӧмаӧсь Орлов обласьтса Залегощенскӧй районса Грачёвка сиктын.

Наградаяс

• Сӧветскӧй Союзса Герой(1943.08.27);
• «Зарни Кодзув» медаль (1943.08.27);
• Ленин орден (1943.08.27);

Паметь

Казьтылан пӧв Уква карса историко-краеведческӧй музейын

• Чернянка посёлокын сувтӧдӧма геройлысь бюст да нимтӧма улича;
• Школаын, кӧні велӧдчис Маринченко, пуктӧма казьтылан пӧв;
• Сылысь ним сетӧмаӧсь Орёл карса уличалы;
• 2010 вося ода-кора тӧлысь 8-ӧд лунӧ Уква карын пуктӧма казьтылан пӧв карса военнӧй комиссариатлӧн стрӧйбаын;
• Казьтылан пӧв пуктӧма и Уква карса историко-краеведческӧй музейын;
• Маринченко Н.Д. йылысь видеосюжет: «Катинская Ольга о Герое Советского Союза Маринченко Николае Даниловиче»;
• Маринченко Н.Д. йылысь видеосюжет:«Военные улицы Орла. Николай Маринченко».

Пасйӧдъяс

↑ Книга памяти Республики Коми. Маринченко Николай Данилович
↑ Репортаж 26. Наш Герой – лейтенант пехоты Маринченко Николай Данилович
↑ Николай Данилович Маринченко (неопр.). Герои страны. Шыӧдчан кадпас: 29 ӧшым тӧлысь 2011. Архивируйтӧма 24 косму тӧлысь 2012.
↑ Архивный реквизит на сайте «Подвиг народа» № 15041124.

Литература

• Маринченко Николай Данилович (рус.). Сайт «Герои страны».
• Герои Чернянской земли.
• Книга памяти Республики Коми. Т. 8 / сост. В. М. Котельников, А. М. Калимова. — Сыктывкар, 1999.
• Книга памяти Республика Коми. Т. 10 / сост. В. М. Котельников, А. М. Калимова, А. А. Карпов. — Сыктывкар, 2004.
• Герои огненных лет. Книга 7. – М., 1984.
• Герои-белгородцы : Сборник материалов о Героях Сов. Союза. 2-е изд., доп. – Воронеж, 1972.
• Фотолетопись Республики Коми. Книга первая. 1921 – 1970 годы. – Сыктывкар, 2011.

[1] Книга памяти Республики Коми. Маринченко Николай Данилович

[2] Репортаж 26. Наш Герой – лейтенант пехоты Маринченко Николай Данилович

[3] Николай Данилович Маринченко (неопр.). Герои страны. Шыӧдчан кадпас: 29 ӧшым тӧлысь 2011. Архивируйтӧма 24 косму тӧлысь 2012.

[4] Архивный реквизит на сайте «Подвиг народа» № 15041124.

[1]

[2]

[3]

[4]