Рогова Зоя Ивановна
| Рогова Зоя Ивановна | |
|---|---|
| Чужан лун | 1918-ӧд вося рака тӧлысь 2-ӧд лун |
| Чужанін |
|
| Кулан лун | 2004-ӧд вося лӧддза-номъя тӧлысь 15-ӧд лун (86 арӧс) |
| Мыйся уджыс | писательница |
Рогова Зоя Ивановна (1918—2004) — челядьлы коми гижысь.
Олан туй
Зоя Ивановна Рогова (нывдырся — Доронина) чужис Вӧлӧгда губерняын Яренск уездса (ӧні — Сыктывдін районса) Придаш сиктын 1918 вося рака тӧлысь 2 лунӧ гӧль кресьтянин семьяын. Шӧр школа помалӧм бӧрын пырис велӧдчыны Сыктывкарса педучилишеӧ. 1939—1940 воясӧ медводз уджаліс пионервожатӧйӧн Выльгортса да Нювчимса школаясын. Кык во мысти вуджис заочнӧй юкӧнӧ, сы вӧсна мый пансис Айму вӧсна Ыджыд тыш и Зоя Ивановна лои на лыдын, коді вежис фронт вылӧ мунысь велӧдысьясӧс. Вӧлі велӧдысьӧн Придаш, Ипать да Мандач школаясын. Война кадся уджысь 1946 вося моз тӧлысьӧ сылы вӧлі сетӧма «1941-45 воясся Айму вӧсна Ыджыд тыш дырйи бур уджысь» медаль. Война бӧрын З.И. Рогова библиотекараліс Зеленечса школаын.
1949 восянь 1977 воӧдз, кор петіс пенсия вылӧ, З И. Рогова веськӧдліс изба-читальняӧн да клубӧн, уджаліс киносетьын кассирӧн, фотоательеын, буфетчицаӧн, бурдӧдчанінын санитаркаӧн, Сыктывкарын — страхӧвӧй агентӧн.
Пенсия вылӧ петӧм бӧрын сьыліс войнаса да уджвывса ветеранъяслӧн Сыктывкарса хорын. Нуӧдіс Сыктывкарса интернатъясын да Выльгортса школаын коми йӧзкостса культура да искусство серти урокъяс.
Кулӧма 2004 вося лӧддза-номъя тӧлысь 15-ӧд лунӧ.
Гижан удж
Зоя Рогова гижӧ кывбуръяс, висьтъяс. Радейтӧ серпасасьны. Тӧдӧ коми фольклорысь уна важ сьыланкыв, нӧдкыв, частушка, кодъясӧс пыртӧ аслас гижӧдъясас.
Коми литератураӧ гижысь локтіс война бӧрын. Сэки Зоя Рогова уджаліс библиотекарӧн Зеленечса школаын, кӧні котыртавліс литература рытъяс, кытчӧ корлывлісны коми гижысьясӧс. Ӧти татшӧм рыт дырйи сійӧ петкӧдліс ассьыс кывбуръяссӧ да висьтъяссӧ Геннадий Юшковлы, коді вӧзйис водзӧ гижны. Недыр мысти сылысь висьтъяссӧ йӧзӧдісны Войвыв кодзув журналын, а сэсся гижӧдъясыс петісны коми гижысьяслӧн мукӧд ӧтувъя чукӧръясын.
Небӧгъяс
Комиӧн
- Тӧлысь вылӧ. — Сыктывкар: Коми книжнӧй издательство, 1979.
- Куим чой: Висьтъяс, пьеса, кывбуръяс, нӧдкывъяс / Ред. А.В. Тентюков; Художник Е.А. Мошева. — Сыктывкар: Коми книжнӧй издательство, 1991. — 56 л.б.
- Ов, Придашӧй! — Сыктывкар: Коми книжнӧй издательство, 1993.
Роч кыв вылӧ вуджӧдӧмӧн
- Мишук побывал в раю: Рассказы, сказки: [Для мл. шк. возраста] / Художник Г.Н. Шарипков. — Сыктывкар: Коми книжнӧй издательство, 1998. — 63 с.
Наградаяс
- «1941-45 воясся Айму вӧсна Ыджыд тыш дырйи бур уджысь» медаль (1946)