Выльгорт (Сыктывдін район)
| Сикт | |
| Выльгорт | |
|---|---|
 | |
| 61°37′21″ с. ш. 50°45′26″ в. д.GЯO | |
| Страна | Россия |
| РФ-са субъект | Республика Коми |
| Муниципальнӧй район | Сыктывдін |
| Сикт овмӧдчӧмин | Выльгорт |
| Юралысь | Доронина Елена Валерьевна |
| История да география | |
| Лӧсьӧдӧма | 1586 воын |
| Час кытш | UTC+3:00 |
| Йӧз | |
| Олысь лыд | |
| Официал кыв | коми, роч |
| Лыдпаса идентификаторъяс | |
| Телефон код | +7 82130 |
| Пошта индекс | 168220 |
| ОКАТО код | 87228805001 |
| ОКТМО код | 87628405101 |
|
|
|
 Медиафайлы на РУВИКИ.Медиа | |
Выльгорт (рочӧн Выльгорт) — Коми Республикаса сикт, Сыктывдін районса юрсикт да Выльгорт сикт овмӧдчӧминса шӧрсикт[2].
Ним артмӧм
«Погост Вылгорт» ним паныдасьлӧ 1586 воын, «Погост Выльгорт» (1646, 1678), 1846 вося карта вылын — Вилгородцк. Выльгорт — тайӧ «выль керка, выль сикт» (коми выль «выль», горт «керка», водзті «оланін, сикт»).
Документъясысь позьӧ тӧдмавны, мый Выльгорт артман историяыс йитчӧма Каръюр важ крепостькӧд, сійӧс ас кадӧ жугӧдлӧмаӧсь да грабитлӧмаӧсь. Каръюр сиктысь кольӧм олысьяс овмӧдчӧмаӧсь выль местаясӧ, тшӧтш и ӧнія Выльгорт инӧ[3].
География
Пукалӧ Сыктыв ю бокын, Сыктывкарсянь 7 км сайын.
История
XVI—XIX нэм
• Выльгорт медводдзаысь казьтывсьӧ 1586 вося гижӧдын: «Алексеевскӧй сикт, мый вӧлі гижӧма Вильгорт погост», 2 овмӧс. ӧтиас оліс Иван Алексеевич (овсӧ абу индӧма), тыдалӧ, сиктлы подув пуктысьлӧн пиыс, кодсянь и сиктыслӧн нимыс. Алексеевскӧй грездкӧд орччӧн сулалісны нӧшта 6 грезд (Петровскӧй, Васильевскӧй Кузь Полянка вылын, Матвеевскӧй, Сидоровскӧй, Максимовскӧй да Афанасьевскӧй) да 4 посёлок (Афанасьев, Ошкин, Березник да Алексеевскӧй «Горнӧй полянка вылын»). ХVII нэмся II джынйын ставныс найӧ ӧтлаасисны Выльгорт овмӧдчӧминӧ.
• 1586 воын став 11 овмӧдчӧминын вӧлі 20 овмӧс. Став тайӧ сикт-грездыс пырӧмаӧсь Шошка вӧлӧсьтӧ, сідзкӧ, медводдза олысьяснас сэні вӧлӧмаӧсь комияс, кодъяс овмӧдчӧмаӧсь татчӧ Шошкаысь.
• 1608 воын Алексеевскӧй грездын да орчча сиктъясын вӧлі 11 олан да 8 тыртӧм овмӧс. Тыртӧммӧм керкаясын олысьяс кулӧмаӧсь тшыгла 1601—1602 воясся неурожайяс дырйи, либӧ тшыгла кулӧмысь мездысьӧм могысь вуджӧмаӧсь овны Прикамьеӧ. ХVII нэмся II джынйын Алексеевскӧйӧ стрӧитісны часовня да 1678 вося переписнӧй книгаын сійӧс пасйӧма кыдзи Выльгорт погост. ӧткымын выльгортсаяс гӧльмисны, вуджисны овны Сибырӧ либӧ мунісны «крестьянскӧй нимӧн вердысьӧ, а кытчӧ, сы йылысь он тӧд…».
• 1693 воын Выльгортын вӧлі стрӧитӧма Сретенньӧ вичко, тані лоисны вичкоын служитысьяслӧн овмӧсъяс. Тайӧ кад кежлас Выльгорт дорын чужис некымын выль грезд, кодъяслы сетісны нимъяс, медсясӧ наӧ медводдза овмӧдчысьяслӧн овъяс серти — Оплесниновскӧй, Лыткиновскӧй, Кузьвасевскӧй. Вочасӧн Выльгорт гӧгӧрса став сикт-грездыс ӧтувтчисны сыкӧд.
• 1846 воын сиктын воссис вичко-приходскӧй школа. 1847 воын кыпӧдісны изйысь вӧчӧм вичко. 1859 воын сиктын вӧлӧма 220 керка, 1420 морт, тані вӧлӧма 2 вичко.
• Олысь лыд серти Выльгорт вӧлі ичтӧджык сӧмын Усть-Сысольск да Яренск каръясысь.
• 1860 воын, «Вӧлӧгда губернияын начальнӧй образование» небӧг серти, татчӧ Ыбысь вуджӧдісны земскӧй училище.
• 1870 воын воссис Выльгортса мужичӧйяслӧн земскӧй училище, 1897 воын («Вӧлӧгда губернияын начальнӧй образование» небӧг серти; мукӧд юӧр серти, 1900 воын) — нывъяслы земскӧй училище.
• 1895 вося ӧшым тӧлысьын выльгортсаяс шыӧдчисны уездса власьтъяс дорӧ сиктӧ народнӧй библиотека-лыддьысянін восьтӧм йылысь корӧмӧн; сылысь устав баласӧ вӧлі вынсьӧдӧма губернияса веськӧдлысьясӧн 1896 воын. Небӧгаинсӧ восьтісны 1897 воын.
XX нэм
• 1913 воын стрӧитӧма Альберти да А. В. Холопов проект серти начальнӧй школа (архитектура паметник, видзӧ канму).
• 1916 воын Выльгортын вӧлі 4 посни лавка.
• 1918 воын, С. И. Налимовлӧн юӧр серти, сиктын медводдзаысь петкӧдлісны кинофильм.
• 1917 вося кӧч тӧлысьын Выльгортын котыртӧма крестьянскӧй депутатъяслысь сӧвет.
• 1919 вося вӧльгым тӧлысь Гражданскӧй вӧйна дырйи сиктсӧ босьтӧмаӧсь еджыдъяслӧн вӧйскаяс.
• РКП-лысь медводдза ячейка лӧсьӧдӧма 1919 вося йирым тӧлысь 14-ӧд лунӧ, РКСМ-лысь медводдза ячейка — 1920 вося урасьӧм тӧлысь 21-ӧд лунӧ.
• 1920 вося рака тӧлысьын котыртӧма медводдза сельхозартель.
• «Гӧрд маяк» медводдза колхоз котыртчис 1930 вося тӧвшӧр тӧлысь 25-ӧд лунӧ.
• 1929 воын Выльгорт лои Сыктывдін районлӧн шӧринӧн.
• 1930 воын Выльгорт сиктсӧветӧ пырисны Ветевгрезд, Вичкодор, Грезд, Дав, Давпон, Ляпыд, Ляпыдпон, Седьяков, Силапиян, Сорма, Худяевгрезд, Якощ грездъяс да Анькышт посёлокъяс, Брагашор, Вожаёлью, Денисовка, Кокыль-устье, Гӧрд Звезда, Увшор, Човбок (Мироново), Човоболтаустье.
• 1935 вося урасьӧм тӧлысь 10-ӧд лунӧ вӧлі котыртӧма Сыктывдін район Выльгорт сиктын шӧринӧн.
• Айму вӧсна Ыджыд тыш дырйи сиктса олысьяс чукӧртісны 124 797 шайт «Коми колхозник» танкӧвӧй колонна вылӧ (1942).
• 1940 воын вӧлі котыртӧма гын сапӧг вӧчан фабрика.
• 1941 воын лоис лесопункт.
• 1957 воын сиктса некымын колхоз подув вылын вӧлі котыртӧма «Сыктывкарскӧй» совхозлысь Выльгортса юкӧн.
• 1964 воын заводитіс уджавны «Сыктывкарса» чипан видзан фабрика.
• 1966 воын заводитісны стрӧитны видз-му овмӧс техникумлысь выль комплекс.
• 1965 воын Выльгорт сикткӧд вӧлі официальнӧя ӧтувтӧма Ветевгрезд, Грезд да Седьяково грездъяс; 1969 вося лӧддза-номъя тӧлысь 24-ӧд лунӧ — Ляпыд сикт; 1975 вося кӧч тӧлысь 23-ӧд лунӧ — Дав да Силапиян; 1991 вося вӧльгым тӧлысь 19-ӧд лунӧ — Ёляты да Пичипашня грездъяс.
Медводдза овъяс
Шеболкин (1646), Кузиванов, Кочев, Кокилев, Курсов, Худяев, Оплеснин (1678), Налимов, Ватаманов, Чеусов, Костин, Перенин, Русанов, Терехин, Мальцев, Лыткин, Пылаев, Жаков, Каликов[2].
Олысь лыд
| 1939[4] | 1959[5] | 1970[6] | 1979[7] | 1989[8] | 2000 | 2002[9] |
|---|---|---|---|---|---|---|
| 2402 | ↗4068 | ↗4787 | ↗8512 | ↗8965 | ↗11 392 | ↘10 211 |
| 2009 | 2010[10] | 2012[11] | 2013[12] | 2014[13] | 2015[14] | 2016[15] |
| ↗11 335 | ↘10 289 | ↗10 738 | ↗10 979 | ↗11 251 | ↗11 574 | ↗11 756 |
| 2017[16] | 2018[17] | 2019[18] | 2020[19] | 2021[20] | ||
| ↗11 946 | ↗12 171 | ↗12 494 | ↗12 661 | ↘10 564 |
Культура
Музейяс
Сиктын эм нималана Э. А. Налимова нима Сыктывдін районса история да культура музей.
Гажъяс да казьтылан кадпасъяс
Йӧввыв
Пасйыссьӧ быд во календар серти. Уджтасын — театрализованнӧй петкӧдчӧм, вӧвъясӧн да верблюдъясӧн ветлӧм, ярманга, ворсӧмъяс, конкурсъяс, чучела сотӧм.
Семён Налимов нима йӧзкостса струнаа инструментъясӧн ворсысьяслӧн регионъяскостса конкурс
Медводзсӧ тайӧ вӧліны инструментальнӧй шылада Налимовлы сиӧм лунъяс, найӧс пырджык нуӧдлісны урасьӧм тӧлысьын. Мероприятиеяссӧ сиӧма мастер-краснодеревщик, «роч балалайка Страдивариуслы», Выльгорт сиктын чужлӧм Семён Налимовлы. Нуӧдсьӧ кык вонас ӧтчыдысь.
Сиктлӧн лун
Гажыс мунӧ уна йӧза гажӧдчӧмӧн да паськӧдӧма вузасьӧмӧн, йӧзыс вермӧны пырӧдчыны уна сикас конкурсӧ да ворсӧмӧ.
Велӧдӧм
Сиктын меститчӧма 3 школа, 7 детсад, С. И. Налимов нима искусствояс школа, 3 библиотека, районса культура керка, Сыктывдін районса история да культура музей, Коми Республикаса агропромышленнӧй техникум.
Спорт
• Р. Сметанина нима лызьӧн котралан республикаса комплекс — Россияын лызьӧн котралан медся гырысь комплексъясысь ӧти. Стрӧитӧмаӧсь 1977 воын.
• Коми Республикаса вӧв спорт школа. Медшӧр пӧрӧдаыс — племеннӧй рӧдвыв роч тракенъяс.
Нималана йӧз
• Жаков Каллистрат Фалалеевич — этнограф, гижысь, философ-идеалист.
• Налимов Семён Иванович — шылада инструментъяс вӧчысь нималана мастер.
• Налимов Василий Петрович — учёнӧй-этнограф.
• Попов Дмитрий Яковлевич — общественнӧй удж вӧчысь. Усть-Сысольскын земскӧй собрание съезд вылын (1918.01.19) сійӧ висьтавліс: «Талун ми… лӧсьӧдім высшӧй власть, мый бӧрын ме верма свободнӧя висьтавны тіянлы миян крайлы автономиялӧн вывті ыджыд тӧдчанлун йылысь… Миянлы, зыряналы, кодъяслӧн эмӧсь олӧмын, мировоззрениеын да кывйын аслыспӧлӧс условиеяс, колӧ зільны таӧ мукӧдъяслӧн корӧмъяскӧд да интересъяскӧд лыддьысьтӧг. Миян край водзті вӧлі сӧмын Великороссиялӧн окраинаӧн, кор сылӧн эм тыр право асшӧра олӧм вылӧ, национальнӧй озырлунъясӧн да весиг мореӧ петанінӧн. Ми долженӧсь ыстыны делегатӧс Войвыв-Асыввыв губернияясса представительяслӧн регыд лоан съезд вылӧ, медым лӧсьӧдны губернияясысь: Уфимскӧй, Пермскӧй, Вятскӧй, Ярославскӧй, Костромскӧй, Вологодскӧй, Олонецкӧй да Архангельскӧй особӧй автономнӧй окраиннӧй единицаясысь образование йылысь общӧй положение».
• Чеусов Алексей Александрович — поэт да чужан му туялысь.
• Каликова Домна Фёдоровна — Гражданскӧй войнаса героиня. Выльгорт вӧлӧсьтса Дав грездысь гӧль кресьтянкалысь нывсӧ, Усть-Сысольскӧй отрядса партизанкаӧс разведкаӧ ветлігӧн босьтӧмаӧсь белогвардеецъяс. Пӧгибнитіс пыткаяс улын геройлӧн смертьӧн.
• Оплеснин Николай Васильевич — Сӧветскӧй Союзса Герой. 1941 вося сентябрь тӧлысь помын Николай Оплеснин зэв бура пӧртіс олӧмӧ сьӧкыд могсӧ: нуӧдіс разведка Ямно грезд да Селищенскӧй посёлок гӧгӧрын, куимысь вуджис противник би улын Волхов ю да петкӧдіс дивизиясӧ кытшысь.
• Фёдоров Олег Петрович — роч художник, живописец.
• Вавилин Иван Михайлович — коми поэт.
• Гущин Николай Фёдорович — Сӧветскӧй Союзса Герой, уджавлӧма Выльгортса школаын 1930-ӧд воясӧ, велӧдӧма история.
• Чёрный Николай Михайлович — «Чипан видзан Зеленечса фабрика» акционер котырлӧн генеральнӧй директор, Коми Республикаса Уджвывса Герой, Коми Республикаса Почёта гражданин (2021).
Тӧдчана эмторъяс
Выльгортын Сретенньӧ господньӧ вичко
Сыктывдін районса культура керка
С.И. Налимовлы паметник
Сыктывдін районса история да культура музей
Выльгортын йӧзкостса ремеслояс шӧрин
ӧшмӧсъяс
• Атлас Республики Коми. — Москва, 2000.
• Жеребцов И. Л. Где ты живешь: Населенные пункты Республики Коми. Историко-демографический справочник. — Сыктывкар, 2000.
• История Коми с древнейших времен до конца XX века: В 2-х т. / Под общей редакцией А. Ф. Сметанина. — Сыктывкар, 2004.
• Республика Коми: Энциклопедия. — Сыктывкар, 1997—2000. — Т. 1-3.
Ыстӧгъяс
- ↑ https://rosstat.gov.ru/storage/mediabank/Tom1_tab-5_VPN-2020.xlsx
- ↑ 1 2 Жеребцов И. Выльгорт // Республика Коми. Энциклопедия. Том I. — Сыктывкар: Коми книжное издательство, 1997. — С. 341.
- ↑ Туркин А. И. Топонимический словарь Коми АССР. Сыктывкар: Коми книжное издательство, 1986.
- ↑ Всесоюзная перепись населения 1939 года. Численность сельского населения СССР по районам, крупным селам и сельским населённым пунктам - районным центрам. Шыӧдчан кадпас: 2 тӧвшӧр тӧлысь 2014. Архивируйтӧма 17 ӧшым тӧлысь 2014.
- ↑ Всесоюзная перепись населения 1959 года. Численность сельского населения РСФСР - жителей сельских населённых пунктов - районных центров по полу
- ↑ Всесоюзная перепись населения 1970 года. Численность сельского населения РСФСР - жителей сельских населенных пунктов - районных центров по полу. Шыӧдчан кадпас: 14 йирым тӧлысь 2013. Архивируйтӧма 3 рака тӧлысь 2014.
- ↑ Всесоюзная перепись населения 1979 года. Численность сельского населения РСФСР - жителей сельских населённых пунктов - районных центров. Шыӧдчан кадпас: 29 ӧшым тӧлысь 2013. Архивируйтӧма 10 тӧвшӧр тӧлысь 2014.
- ↑ Всесоюзная перепись населения 1989 года. Численность сельского населения РСФСР - жителей сельских населённых пунктов - районных центров по полу. Шыӧдчан кадпас: 20 вӧльгым тӧлысь 2013. Архивируйтӧма 1 йирым тӧлысь 2013.
- ↑ Всероссийская перепись населения 2002 года. Том. 1, таблица 4. Численность населения России, федеральных округов, субъектов Российской Федерации, районов, городских поселений, сельских населённых пунктов - райцентров и сельских населённых пунктов с населением 3 тысячи и более. Архивируйтӧма 3 урасьӧм тӧлысь 2012.
- ↑ Всероссийская перепись населения 2010 года. Численность населения городских округов, муниципальных районов, поселений и населённых пунктов. Шыӧдчан кадпас: 29 ӧшым тӧлысь 2014. Архивируйтӧма 4 рака тӧлысь 2016.
- ↑ Численность населения Российской Федерации по муниципальным образованиям. Таблица 35. Оценка численности постоянного населения на 1 января 2012 года. Шыӧдчан кадпас: 31 ода-кора тӧлысь 2014. Архивируйтӧма 16 ода-кора тӧлысь 2013.
- ↑ Численность населения Российской Федерации по муниципальным образованиям на 1 января 2013 года. — М.: Федеральная служба государственной статистики Росстат, 2013. — 528 с. (Табл. 33. Численность населения городских округов, муниципальных районов, городских и сельских поселений, городских населённых пунктов, сельских населённых пунктов). Шыӧдчан кадпас: 16 вӧльгым тӧлысь 2013. Архивируйтӧма 12 йирым тӧлысь 2013.
- ↑ Оценка численности населения по городским округам, муниципальным районам, поселениям и городским населённым пунктам Республики Коми на 1 января 2014 года. Шыӧдчан кадпас: 22 рака тӧлысь 2014. Архивируйтӧма 18 тӧвшӧр тӧлысь 2015.
- ↑ Численность населения Российской Федерации по муниципальным образованиям на 1 января 2015 года. Шыӧдчан кадпас: 6 моз тӧлысь 2015. Архивируйтӧма 23 кӧч тӧлысь 2015.
- ↑ Численность населения Российской Федерации по муниципальным образованиям на 1 января 2016 года (5 йирым тӧлысь 2018). Шыӧдчан кадпас: 15 ода-кора тӧлысь 2021. Архивируйтӧма 8 ода-кора тӧлысь 2021.
- ↑ Численность населения Российской Федерации по муниципальным образованиям на 1 января 2017 года (31 сора тӧлысь 2017). Шыӧдчан кадпас: 31 сора тӧлысь 2017. Архивируйтӧма 31 сора тӧлысь 2017.
- ↑ Численность населения Российской Федерации по муниципальным образованиям на 1 января 2018 года. Шыӧдчан кадпас: 25 сора тӧлысь 2018. Архивируйтӧма 26 сора тӧлысь 2018.
- ↑ Численность населения Российской Федерации по муниципальным образованиям на 1 января 2019 года. Шыӧдчан кадпас: 31 сора тӧлысь 2019. Архивируйтӧма 2 ода-кора тӧлысь 2021.
- ↑ Численность населения Российской Федерации по муниципальным образованиям на 1 января 2020 года. Шыӧдчан кадпас: 17 йирым тӧлысь 2020. Архивируйтӧма 17 йирым тӧлысь 2020.
- ↑ Таблица 5. Численность населения России, федеральных округов, субъектов Российской Федерации, городских округов, муниципальных районов, муниципальных округов, городских и сельских поселений, городских населенных пунктов, сельских населенных пунктов с населением 3000 человек и более. Итоги Всероссийской переписи населения 2020 года. На 1 октября 2021 года. Том 1. Численность и размещения населения (XLSX). Шыӧдчан кадпас: 1 кӧч тӧлысь 2022. Архивируйтӧма 1 кӧч тӧлысь 2022.