Рубан Сергей Владимирович
| Рубан Сергей Владимирович | |
|---|---|
 | |
|
| |
|
«Кулӧмдін» муниципальнӧй районса юралысь - районса администрацияӧн юрнуӧдысь
|
|
| 2015 вося ӧшым тӧлысь 11-ӧд лунсянь | |
| Водзвывса уджалысь | Шатохин Дмитрий Александрович |
|
|
|
| Чужис |
1981-ӧд вося рака тӧлысь 26-ӧд лун (45 арӧс) Носим, Кулӧмдін район, Коми АССР, РСФСР, СССР |
| Ютыр | Единая Россия |
Рубан Сергей Владимирович (1981 вося рака тӧлысь 26-ӧд лун, Носим, Кулӧмдін район, Коми АССР, РСФСР) — Россияса канморт, «Кулӧмдін» муниципальнӧй районса юралысь — районса администрацияӧн юрнуӧдысь (2015 вося ӧшым тӧлысь 11-ӧд лунсянь ӧнія кадӧдз).
Олантуй
Сергей Владимирович чужис 1981 вося рака тӧлысь 26-ӧд лунӧ Коми Республикалӧн Кулӧмдін районса Носим сиктын. Помаліс Паспомса шӧр школа.
2003 воын помаліс Коми педагогика канму институт вылыс тшупӧда уджсикасӧ велӧдан канму учреждение, специальносьт — технология да предпринимательство; квалификация: технология да предпринимательство велӧдысь;
2012 воын помаліс «Канму службаӧ да веськӧдлыны велӧдан Коми Республикаса академия» Коми Республикаса вылыс тшупӧда уджсикасӧ велӧдан асшӧрлуна учреждение, специальносьт — юриспруденция, квалификация: юрист[1].
Удж
• 2004 вося рака тӧлыссянь 2008 вося лӧддза-номъя тӧлысьӧдз — Кулӧмдін сиктса шӧр школаын технология велӧдысь;
• 2008 вося лӧддза-номъя тӧлыссянь 2015 вося ӧшым тӧлысьӧдз — «Кулӧмдін» сикт овмӧдчӧминса администрация: специалистсянь быдмис администрацияӧн веськӧдлысьӧдз;
• 2015 вося ӧшым тӧлыссянь 2020 вося кӧч тӧлысьӧдз — «Кулӧмдін» муниципальнӧй районса администрацияӧн юрнуӧдысь;
• 2020 вося йирым тӧлыссянь — «Кулӧмдін» муниципальнӧй районса юралысь — районса администрацияӧн юрнуӧдысь.
Районса администрацияӧн юрнуӧдысь чинӧ Сергей Рубанӧс индӧм
Сергей Рубан вӧсна гӧлӧсуйтіс муниципальнӧй сӧветса 21 депутат. Сы кындзи конкурснӧй комиссияӧн вӧлі лэдзӧма бӧрйысьӧмъяс вылӧ Районса шӧр больничаысь юралысь врач Ирина Книгницкаяӧс (сы вӧсна гӧлӧсуйтіс 1 депутат) да районса администрацияысь муниципальнӧй могъяс вылӧ закупкаяс, тӧвар, уджъяс да услугаяс олӧмӧ пӧртӧм серти юкӧнӧн заведуйтысь Ирина Гулынинаӧс, кодлы эз вичмы ни ӧти гӧлӧс. Ӧти депутат кутчысис гӧлӧсуйтӧмысь.
Сергей Владимирович матӧ сизим во юрнуӧдіс медся ыджыд сикт овмӧдчӧминӧн, Кулӧмдінӧн, унатор вӧчис районлы бур вылӧ муниципальнӧй туй вез сӧвмӧдӧм, уличаяс югзьӧдӧм да асшӧр оланін стрӧитӧм серти. Тайӧ сӧмын медшӧр нырвизьяс, кутшӧмъяс серти лоины тӧдчана бурланьӧ вежсьӧмъяс. Сійӧ бура тӧдӧ районлысь мытшӧдъяссӧ. Сылы оз ков велӧдчыны, сійӧ пыр жӧ вермас босьтчыны уджӧ, — гӧгӧрвоӧдіс бӧрйысьӧмъяслысь кывкӧртӧдъяссӧ районлӧн сӧветса депутат да конкурснӧй комиссияӧн веськӧдлысь Александр Кулясов[2].
Кандидат дор вӧлі тайӧ чинын сы водзвылын уджалысь Дмитрий Шатохин. Вӧльгым тӧлысь 27-ӧд лунӧ «Единая Россиялӧн» меставывса юкӧнын политсӧветлӧн чукӧртчылігӧн Дмитрий Шатохин вӧзйис ютырӧ пырысьяслы ошкыны С. Рубанлысь кандидатурасӧ да шуис, мый сійӧ «овмӧдчӧминса медся вына юралысьяс пиысь ӧти, кодлӧн эм ыджыдкодь веськӧдлан опыт».
Уджын нырвизьяс:
«Кулӧмдін» муниципальнӧй районса юралысь — районса администрацияӧн юрнуӧдысь уджын нырвизьяс:
Ладмӧдӧ:
• районса администрацияӧн юрнуӧдысьӧс медводдза вежысьлысь уджсӧ;.
• районса администрацияӧн юрнуӧдысьӧс вежысьяслысь уджсӧ;
• войтырӧс доръян да неминучаысь видзан юкӧнлысь уджсӧ;
• бухгалтерскӧй учёт да отчётносьт нуӧдан юкӧнлысь уджсӧ
да видзӧдӧ на бӧрся[3].
Ютырын удж
«ЕДИНАЯ РОССИЯ» ставроссияса политическӧй ютырлӧн Коми дінму юкӧнын Дінму политическӧй сӧветса президиумӧ пырысь, Ютырлӧн Кулӧмдінын меставывса юкӧнлӧн секретар[4].
Ас семья
Гӧтыра, быдтӧ кык челядьӧс.
Наградаяс
• Коми Республикаса войтырӧс доръян да неминучаысь видзан комитетлӧн Почёт грамота;
• Коми Республикаса Юралысьлӧн Администрациясянь аттьӧалана гижӧд;
• Россия Федерацияса Федеральнӧй Собраниелӧн Каналан Думаса депутат О. В. Савастьяновасянь аттьӧалана гижӧд;
• Коми Республикаса ӧтйӧза палатасянь аттьӧалана гижӧд;
• «ЕДИНАЯ РОССИЯ» ставроссияса политическӧй ютырлӧн Коми дінму юкӧнсянь аттьӧалана гижӧд;
• Коми Республикаса экономика министерствосянь аттьӧалана гижӧд;
• Коми Республикаса культура, туризм да архив удж министерствосянь аттьӧалана гижӧд;
• Ветеранъяслӧн районса сӧветсянь аттьӧалана гижӧд;
• «Коми Республикаса Юралысь дорӧ республиканскӧй шыӧдчанін» Кулӧмдінса филиалсянь аттьӧалана гижӧд;
• «Кулӧмдін районса йӧзӧс уджӧн могмӧдан шӧрин» Коми Республикаса канму учреждениесянь аттьӧалана гижӧд[5].