Коми Республикаса национальнӧй музей
| «Коми Республикаса национальнӧй музей» республиканскӧй канму сьӧмкуд учреждение | |
|---|---|
| Коми Республикаса национальнӧй музей | |
 | |
| Лӧсьӧдан кадпас | 1911 вося йирым тӧлысь 17-ӧд (4-ӧд — важ стиль серти) лун |
| Ин |
Вӧр-ва юкӧн / Выставка зал (Сыктывкар, Коммунистическӧй ул., 6) История юкӧн (Сыктывкар, Ленин ул., 57) Этнография юкӧн (Сыктывкар, Коммунистическӧй ул., 2) И.П. Морозовлӧн керка-музей (Сыктывкар, Киров ул., 32) И.А. Куратовлӧн литература музей (Сыктывкар, Орджоникидзе ул., 2) |
| Инпас | Коми Республика, Сыктывкар, Коммунистическӧй ул., 6 |
| Директор | Бандура Светлана Владимировна |
| Сайт | museumkomi.ru |
Коми Республикаса национальнӧй музей (рочӧн Национальный музей Республики Коми) — Коми муын медводдза научнӧй да культурно-просветительнӧй учреждениеясысь ӧти, Коми Республикаса медся ыджыд да медся важ музей. Сійӧс вӧлі восьтӧма 1911-ӧд вося йирым тӧлысь 17-ӧд лунӧ. К. Ф. Жаков, А. А. Цембер, Н. П. Чеусов, Ф. А. Старовский да мукӧд энтузиаст-краеведъяслӧн водзмӧстчӧмӧн, кодъяс ХІХ-ХХ нэмъясын унаысь босьтчылісны восьтыны Усть-Сысольск карын музей. Вӧлі котыртӧма Роч Войвыв туялан Архангельскса обществолӧн Усть-Сысольскса юкӧн, коді и водзмӧстчис восьтыны карын археология да этнография музей[1][2][3].
История
Коми Республикаса национальнӧй музей — Коми муын медводдза научнӧй да культурно-просветительнӧй учреждениеясысь ӧти. Сійӧс вӧлі восьтӧма 1911-ӧд вося йирым тӧлысь 17-ӧд лунӧ (важ стиль серти - 4-ӧд лунӧ), кор уездса земскӧй собрание примитіс коллекцияяс ньӧбӧм вылӧ 100 шайт вичмӧдӧм йылысь шуӧм.
Музейыс чужис этнография, археология, палеонтология предметъяс чукӧртӧм да неыджыд библиотека подув вылын да уджаліс земствоӧн да карса думаӧн торйӧдӧм торъя сьӧм да вичмӧдӧм сьӧм тшӧт весьтӧ. Сійӧ вӧлі карса библиотека-читальняса ӧти жырйын, карса думалӧн кипод улын[4].
1916-ӧд воӧдз музейӧн веськӧдліс А. А. Цембер (1874-1959) — Роч Войвыв туялан Архангельскса обществолӧн Усть-Сысольскса отделениеӧн веськӧдлысь, велӧдысь, этнограф, фольклорист. Аслас уджын кык во кежлӧ коставлӧм бӧрын музей восьтіс ассьыс ӧдзӧсъяссӧ волысьяслы 1918-ӧд вося ӧшым тӧлысьын.
1918-ӧд восянь 1925-ӧд воӧдз музейса директорӧн вӧлі А. В. Холопов (1880-1942) — йӧзӧс велӧдан юкӧн бердын важся да искусство паметникъяс видзӧм кузя юкӧдулӧн веськӧдлысь, Коми Республикаса медводдза архитектор, серпасасьысь.
1920-ӧд воясӧ музейлӧн уджыс вӧлі топыда йитчӧма Коми му туялан котыркӧд да мыйкӧ дыра збыльысь вӧлі сылӧн веськӧдлӧм улын. Коми областнӧй краеведческӧй музей статус босьтіс 1923-ӧд воын. Национальнӧй музейлӧн фондъясын шоча паныдасьлысь юкӧнӧ пырӧны: профессор А. А. Черновлӧн геология коллекция, А. Н. Гренлӧн археология коллекция, Троице-Стефано-Ульяновскӧй да Кылтовса Крестовоздвиженскӧй манастыръясысь культӧвӧй предметъяс да книгаяс, А. С. Сидоровӧн да Д. Т. Яновичӧн чукӧртӧм бытӧвӧй да этнография предметъяс [5].
Коми АССР-са Народнӧй комитетъяс Сӧвет Шуӧм серти 1940-ӧд вося йирым тӧлысь 29-ӧд лунӧ музейлысь статуссӧ вӧлі пасйӧма кыдз Республикаса краеведческӧй музей. 1943-ӧд воын краеведческӧй музейлӧн художественнӧй юкӧн лои асшӧр музейӧн да вӧлі нимтӧма республикаса художественнӧй музейӧн[6][4].
Великӧй Отечественнӧй война дырйи музейын уджыс эз дугдыв: лӧсьӧдлісны выль выставкаяс музей залъясын, нуӧдісны лекцияяс колхозъясын, вӧр лэдзысьяслы, стрӧитчысьяслы да с. в. 1950-ӧд вояс помын-60-ӧд вояс заводитчигӧн вӧлі эштӧдӧма куим юкӧнлысь реэкспозиция: сӧветскӧй кадӧдзса история да сӧветскӧй кадся история, вӧр-ва.
1969-ӧд воын воссис коми литературалы подув пуктысь И. А. Куратовлӧн литературно-мемориальнӧй музейлӧн экспозиция. Финн-угроведъяслӧн VІ Войтыркостса конгресс кежлӧ (1985-ӧд вося сора тӧлысь) вӧлі лӧсьӧдӧма выль экспозиция «Коми му важ кадсянь миян лунъясӧдз». Вознесенскӧй вичколӧн дзоньталӧм керкаын лӧсьӧдӧма «Коми войтырлӧн культура да олӧм (XIX - ХХ нэм заводитчӧм)» экспозиция (1989). Бӧрынджык вичкосӧ вӧлі сетӧма татчӧс православнӧй котырлы.
1994-ӧд воын республикаса историко-краеведческӧй музейлы сетӧма Коми Республикаса национальнӧй музейлысь статус[7].
2000-ӧд воын воссис выль этнографическӧй экспозиция - «Традиционная культура коми в обрядах жизненного цикла».
2004-ӧд воын вӧлі восьтӧма музейлысь выль юкӧн - И. П. Морозовлӧн керка-музей.
2009-ӧд воын С. Сухановлӧн дзоньталӧм керкаын воссис И. А. Куратовлӧн литературнӧй музей [1].
Музейӧн веськӧдлысьяс
• Цембер Андрей Андреевич (1911 во-1916 во) (Усть-Сысольскын этнография да археология музей лӧсьӧдысь)
• Холопов Александр Викентьевич (1918 во-1924 во) (Коми/Зырянскӧй музейӧн заведуйтысь, 1924-1925 – коллекцияяс видзысь)
• Сидоров Алексей Семёнович (1924 во – 1925 во) (Коми обласьтса музейӧн заведуйтысь)
• Батиев Дмитрий Александрович (1925 вося урасьӧм тӧлысь-1928 во) (Коми обласьтса музейӧн заведуйтысь)
• Молодцова Антонина Александровна (1928 вося рака тӧлысь-1931 вося тӧвшӧр тӧлысь) (Коми обласьтса музейӧн заведуйтысь)
• Попов Сергей Александрович (1931 вося тӧвшӧр тӧлысь-1933 вося косму тӧлысь) (Коми обласьтса музейӧн заведуйтысь)
• Старцев Георгий Афанасьевич (1933 вося ода-кора тӧлысь-1936 вося моз тӧлысь 25-ӧд лун) (Коми обласьтса музейӧн заведуйтысь)
• Подоров Василий Николаевич (1936 вося кӧч тӧлысь-1940 вося ӧшым тӧлысь) (Коми республиканскӧй краеведческӧй музейса директор)
• Нахлупин Павел Ильич (1940 вося кӧч тӧлысь–1940 во пом) (Коми республиканскӧй краеведческӧй музейса директорлысь удж вӧчысь)
• Старцев Алексей Александрович (1940 во пом-1941 вося ода-кора тӧлысь) (Коми республиканскӧй краеведческӧй музейса директор)
• Машезерский Виктор Иванович (1941 вося йирым тӧлысь-1942 вося ода-кора тӧлысь) (Коми республиканскӧй краеведческӧй музейса директор)
• Никольская Татьяна Николаевна (1942 вося ода-кора тӧлысь-1943 во) (Коми республиканскӧй краеведческӧй музейса директорлысь удж вӧчысь)
• Калинин Михаил Евгеньевич (1943 во-1963 во) (Коми республиканскӧй краеведческӧй музейса / Коми АССР-са Республиканскӧй краеведческӧй музейса директор)
• Рубцов Аристарх Михайлович (1963 вося косму тӧлысь-1964 вося сора тӧлысь) (Коми республиканскӧй краеведческӧй музейса директорлысь удж вӧчысь)
• Игнатов Иван Степанович (1964 вося сора тӧлысь-1966 во) (Коми республиканскӧй краеведческӧй музейса директор)
• Куковицкая Наима Григорьевна (1968 во-1969 во) (Коми республиканскӧй краеведческӧй музейса директор)
• Романенко Валерий Иванович (1970 во-1971 во) (Коми республиканскӧй краеведческӧй музейса директор)
• Качалова Алиса Дмитриевна (1971 вося ода-кора тӧлысь-1978 во) (Коми республиканскӧй краеведческӧй музейса директор)
• Лузянина Валентина Ильинична (1978 во–1982 во) (Коми республиканскӧй краеведческӧй музейса директор)
• Семичастнова Елена Витальевна (1982 во-1989 во) (Коми республиканскӧй историко-краеведческӧй музейса директор)
• Стрекалова Валентина Михайловна (1989 во-1993 во, 2001 во-2005 во) (Коми республиканскӧй историко-краеведческӧй музейса директор, генеральный директор, Коми Республикаса национальнӧй музейлӧн директор)
• Кочанова Эмилия Андреевна (1993 во-2001 во) (Коми Республикаса национальнӧй музейлӧн директор)
• Котылева Ирина Николаевна (2005 во-2021 во) (Коми Республикаса национальнӧй музейлӧн директор)
• Бандура Светлана Владимировна (2021-ӧд восянь ӧнія кадӧдз) (Коми Республикаса национальнӧй музейлӧн директор)
Музейлӧн фондъяс
Музейын 260 сюрсысь унджык видзантор. Сэтчӧ пырӧны XVI-XX нэмъясса ӧбразъяс серпасалӧмлӧн аслыспӧлӧс паметникъяс, миян эраӧдз I сюрсво - миян эраса II сюрсвося нумизматика коллекция, коми йӧзлӧн материальнӧй да духовнӧй культура предмет чукӧр, естественнонаучнӧй коллекцияяс, зэв озыр фотодокументальнӧй архив, регионса став йӧзлӧн быдлунъя олӧмысь предмет чукӧр, республикаса нималана политическӧй да общественнӧй деятельяслӧн, творческӧй интеллигенциялӧн архивъяс да коллекцияяс.
Музейлӧн фондъяс лоӧны история, этнография, археология, естественнонаучнӧй, кыв, культурология туялӧмъяс нуӧдан подулӧн[5][1].
Музейлӧн экспозицияяс
Музейын уджалӧ 5 пырся экспозиция.
Этнография юкӧнлӧн экспозиция
«Коми войтырлӧн традиционнӧй культура олӧм цикл обрядъясын» экспозиция подулӧ пуктӧма фольклорнӧй материалъяс подув вылын лӧсьӧдӧм мойдкывъя сюжет, кӧні коми войтырлӧн духовнӧй да материальнӧй культураыс воссьӧ Мужичӧйлӧн да Нывбабалӧн ӧта-мӧдкӧд йитӧдъяс пыр. Тасянь и «Оліс-выліс гозъя...» экспозициялӧн мӧд нимыс.
Условно-сценическӧй комплексъяс - «Радейтчан ворсӧмъяс», «Кӧлысь», «Кага чужтӧм-быдтӧм», «Вӧралан угоддьӧяс», «Гортын тыр-бур олӧм», «Гаждырся тунасьӧмъяс» - петкӧдлӧны медся тӧдчана лоӧмторъяссӧ.
История юкӧнлӧн экспозиция
«Коми мулӧн история важся кадсянь XX нэм шӧрӧдз»
Экспозициясӧ лӧсьӧдӧма 1985-ӧд воын, сійӧ меститчӧ стрӧйбалӧн кык судтаын (6 зал). Экспозициялӧн тематикаыс йитчӧма музейлӧн профилькӧд да петкӧдлӧ Коми мулысь историясӧ важся кадсянь XX нэм шӧрӧдз. Подулас — хронология петкӧдлан принцип серти историческӧй материал.
Экспозицияын петкӧдлӧма уна аслыспӧлӧс археология паметник: мезолит кадсянь водз шӧр нэм помӧдз пемӧс стильӧн вӧчӧмторъяс; XVII-XIX нэмъясса ӧбразъяс; XX нэмлӧн медводдза джынйын мунӧм Медводдза мирӧвӧй, Гражданскӧй да Великӧй Отечественнӧй вӧйнаясса реликвияяс.
История юкӧнлӧн визитнӧй карточкаӧн лоӧ Визинса МТС-ын 25 воысь дырджык уджалысь трактор.
Сідзжӧ история юкӧнын уджалӧны выставкаяс: «Усть-Сысольск - провинциальнӧй кар», «Коми мулӧн духовнӧй шӧринъяс», «Коми Республикаса национальнӧй музейлӧн коллекцияысь сьӧм да кладъяс», «Нювчимса кружево».
Вӧр-ва юкӧнлӧн экспозиция
Вӧр-ва юкӧнлӧн экспозицияыс меститчӧ 1912-ӧд вося стрӧйбаын, Д. К. Кузьбожевлӧн вузасян керкаын. Вӧр-ва юкӧн - музейса медся важ юкӧнъясысь ӧти (1924).
Экспозицияын висьтавсьӧ Коми Республикаса вӧр-ва йылысь, кӧні петкӧдлӧма Печӧра-Ылыдзса канму биосфернӧй заповедник, «Югыд ва» национальнӧй парк, заказникъяс да вӧр-ва паметникъяс йылысь материалъяс. Тані позьӧ тӧдмасьны вӧрса да тундраса пемӧсъяскӧд.
Экспозиция вылын петкӧдлӧма республикалы экономическӧй тӧдчанлуна медшӧр гӧра породаяслысь образецъяс. Аслыспӧлӧс экспонатӧн лоӧ «Сьӧд роза» гӧра хрустальлӧн 270 килограмм сьӧктаа друза, мый вӧлі перйӧма Коми Республикаса Инта районын «Желанное» куйлӧдын.
И. А. Куратовлӧн литература музейлӧн экспозиция
Коми кыв, гижӧд да литература история
Медводдза коми поэт И. А. Куратовлӧн литературно-мемориальнӧй музейыс вӧлі восьтӧма 1969-ӧд воын кыдзи Республикаса краеведческӧй музейлӧн филиал да вӧлі олан керкалӧн медводдза судтаын Усть-Сысольсклӧн Орджоникидзе улича вылын. 2009-ӧд воын И. А. Куратовлӧн литературнӧй музей вуджис выль дзоньталӧм керкаӧ - купеч С. Г. Сухановлӧн вӧвлӧм керкаӧ.
Литературнӧй музейлӧн экспозиция тӧдмӧдӧ XIV-XX нэмъясын Комиын кыв, гижӧд да литература сӧвмӧмӧн. Экспозициялӧн шӧр юкӧнъясыс: «Коми финн-йӧгра войтырлӧн семьяын», «Коми-зыраналӧн гижӧд артмӧм», «И. А. Куратовлӧн олӧм да творчество. Поэтическӧй наследие восьтан да туялан история», «Коми литература ХХ нэмын», «Коми Республикаса литература Великӧй Отечественнӧй вӧйна да вӧйнабӧрся кадӧ. 1940-1950 вояс», «Коми Республикаса ӧнія литература. XX нэмлӧн мӧд джын - XXI нэм заводитчӧм».
Музейын видзӧны ӧбраз да небӧг паметникъяс, коми кыв да гижӧд медводдза туялысьяс П. И. Савваитовлысь, Г. С. Лыткинлысь уджъяс, XV-XIX нэмъясся рукописнӧй небӧгъяс, XVIII-XX нэмъясся старообрядческӧй семейнӧй библиотекаяс, крестьянскӧй рукописнӧй небӧгъяс, кӧні вуджӧдӧма коми кыв вылӧ литургическӧй текстъяс да А. С. Пушкинлысь, Н. В. Гогольлысь, М. Твенлысь произведениеяс.
Литературнӧй музейлӧн экспозицияын медшӧр иныс - коми литературалы подув пуктысь И. А. Куратовлы сиӧм зал. Экспозиция вылысь позьӧ аддзыны И. А. Куратовлӧн библиотекаысь збыль небӧгъяс да поэтлысь ловъядырся фотографиясӧ.
И. П. Морозовлӧн керка-музейлӧн экспозиция
И. П. Морозов: республикалӧн историяын мортлӧн олӧм И. П. Морозовлӧн керка-музей — Межадор сиктын Морозовъяс семьялӧн керкалӧн стӧч копия, кӧні чужис-быдмис Иван Павлович.
«И. П. Морозов (1924-1987): республикалӧн историяын мортлӧн олӧм» экспозиция тӧдмӧдӧ И. П. Морозовлӧн, Коми Республикаса канму, политическӧй да общественнӧй деятельлӧн, олӧмкӧд.
И. П. Морозовлӧн семьялы (челядьдыр, томдыр, велӧдчӧм, Айму вӧсна Ыджыд тышын участвуйтӧм) сиӧм юкӧнын петкӧдлӧма фото- да документальнӧй материалъяс, этнографическӧй предметъяс.
Керка-музейлӧн мӧд джынйын меститчӧма «Важ школа» интерактивнӧй зал. Музейын сідзжӧ нуӧдӧны этнографическӧй экскурсияяс, гажъяс, мастер-классъяс [4].
Коллекцияяс
Археология
Археология фондыс музейын медся ыджыд. Археология коллекциясӧ заводитӧмаӧсь чукӧртны 1920-ӧд воясӧ. Тайӧ воясӧ музейӧ воисны кӧрт кадся да шӧр нэмъясса материалъяс. 1939-ӧд воын фондыс содіс кӧрт кадся кӧлуйӧн (миян эраӧдз I сюрсво - миян эраса I сюрсво) да шӧр нэмъяс (II нэмлӧн медводдза джын) Сыктыв ю ковтысса паметникъясысь. 1940-1950 вояс заводитчигӧн музейӧ воисны Большеземельскӧй тундраысь геолог Г. А. Черновлӧн аддзӧмторъяс [8].
Этнография
Коллекцияын 12500-ысь унджык предмет да сійӧ петкӧдлӧ коми-зыряналӧн став этнографическӧй группаяссӧ, а сідзжӧ Печора ю вожын - Чилимдін вожын олысь роч старообрядческӧй йӧзӧс[9].
Керамика, фарфор и стеклӧ
Коллекцияын 2000 гӧгӧр предмет. Сійӧ петкӧдлӧ XIX-XX нэмъясса олӧм-вылӧм да культура. Коллекцияӧ пырӧны традиционнӧй коми керамикаысь вӧчӧмторъяс, XIX-ӧд - XX-ӧд нэмъяс заводитчигӧн Россияса фабрикаясын вӧчӧмторъяс, сӧвет кадся вӧчӧмторъяс (фарфор статуэткаяс, вазаяс да графинаяс, декоративнӧй блюдъяс да вазаяс, мый вӧлі сетӧма 1946 вося "Коми АССР-лӧн XXV вояс" юбилейнӧй выставка вылысь, сувениръяс)[10].
Изобразительнӧй искусство
Музейын видзӧны ӧбразъяслысь Коми Республикаын медся ыджыд коллекцияяс пиысь ӧтиӧс. Сэні XVI-ӧд - XX нэмся 300-ысь унджык паметник. Коллекциялӧн подулӧн лоӧны музейӧ 1960-1980 воясӧ воӧм произведениеяс республикаса пӧдлалӧм да киссьӧм вичкоясысь да часовняясысь, а сідзжӧ торъя йӧзсянь. На пӧвстын ХVI нэмлӧн медводдза джынйысь куим ӧбраз: «Микайлӧ архангел», «Гавриил архангел» да «Великӧй Василий»[11].
Нумизматика
Коллекцияӧ пырӧны сьӧм, бонаяс, жетонъяс, медальяс, орденъяс, значокъяс. Россияса да суйӧрсайса странаяслӧн историякӧд йитчӧм 12 сюрсысь унджык предмет[12].
Важ небӧгъяс
Коллекцияын петкӧдлӧма уна сикас небӧг паметникъяс: вичко да светскӧй, важ роч литература паметникъяс, мирӧвӧй вӧйнаяс да революцияяс йылысь дневникӧ гижӧдъяс, рукописьяслӧн (127 единица) да важӧн печатайтӧм небӧгъяслӧн (203 единица) коллекция[13].
Документ ӧшмӧсъяс да кино-фото-фоно фонд
Коллекциясӧ чукӧртісны музей котыртӧмсянь. Коллекциялысь тӧдчана юкӧнсӧ артмӧдӧны мемориальнӧй материалъяс, найӧ петкӧдлӧны Коми мулӧн да ӧнія Коми Республикалӧн олӧмысь став юкӧнсӧ. Аслыспӧлӧс фотографияяс висьталӧны XX нэм заводитчигӧн коми йӧзлӧн олӧм-вылӧм йылысь, Коми мулӧн юркар — Усть-Сысольск кар йылысь[14].
Естественно-научнӧй коллекция
Коллекцияын медводдза экспонатъясыс - тайӧ мамонтлӧн воджлы да юрлы, мый вӧлі аддзӧма Дырнӧс ю вылысь Усть-Сысольск грезд гӧгӧрын. Сідзжӧ музейлӧн чукӧрын эм геология коллекция, гербарий материал, кытчӧ пырӧ некымын сюрс экземпляр (800-ысь унджык сикас) да зоология коллекция. Сэтчӧ пырӧны пемӧсъяслӧн, лэбачьяслӧн пӧшти став медшӧр сикасыс (сы лыдын лэбач колькъяслӧн коллекция), республикаын олысь черияслӧн, моллюскъяслӧн, гагъяслӧн коллекцияяс, бобувъяслӧн коллекция, кодӧс музейлы козьналіс Ухтаса туялысь К. Ф. Седых[15].
Кӧртулов фонд
Коллекцияын петкӧдлӧма Нювчимса чугунолитейнӧй заводысь художественнӧй литьёӧн вӧчӧмторъяс. Художественнӧй литьёыс петкӧдлӧма скульптураясӧн, бюстъясӧн, ажурнӧй джаджъясӧн, декоративнӧй тарелкаясӧн, шкатулкаясӧн, пӧим чукӧртанъясӧн, чернильницаясӧн, рамаясӧн да мукӧдторйӧн[16].
Коми Республикаса национальнӧй музейлӧн 100 раритет
Пасйӧдъяс
- ↑ 1,0 1,1 1,2 История музея. Национальный музей Республики Коми. Дата обращения: 27 лӧддза-номъя тӧлысь 2024.
- ↑ Национальный музей Республики Коми. Культура. РФ. Дата обращения: 27 лӧддза-номъя тӧлысь 2024.
- ↑ Национальный музей Республики Коми. Культурная карта Республики Коми. Дата обращения: 27 лӧддза-номъя тӧлысь 2024.
- ↑ 4,0 4,1 4,2 История музея | Национальный музей Республики Коми, Национальный музей Республики Коми | (26 рака тӧлысь 2016). Дата обращения: 27 лӧддза-номъя тӧлысь 2024.
- ↑ 5,0 5,1 ur66.ru. Национальный музей Республики Коми - Культурная карта Республики Коми. cultmap.ru. Дата обращения: 28 лӧддза-номъя тӧлысь 2024.
- ↑ 17 октября 1911 года – день рождения Национального музея Республики Коми. Национальная библиотека Республики Коми. Дата обращения: 28 лӧддза-номъя тӧлысь 2024.К:Рувики:Cite web (не указан язык)
- ↑ Сова В.А. Национальный музей РК // Город Сыктывкар. Энциклопедия.. — Сыктывкар, 2010. — С. 188-189.
- ↑ Археология | Национальный музей Республики Коми, Национальный музей Республики Коми | (2 рака тӧлысь 2016). Дата обращения: 29 лӧддза-номъя тӧлысь 2024.
- ↑ Этнографическая коллекция | Национальный музей Республики Коми, Национальный музей Республики Коми | (21 рака тӧлысь 2016). Дата обращения: 29 лӧддза-номъя тӧлысь 2024.
- ↑ Коллекция керамики, фарфора и стекла | Национальный музей Республики Коми, Национальный музей Республики Коми | (21 рака тӧлысь 2016). Дата обращения: 29 лӧддза-номъя тӧлысь 2024.
- ↑ Изобразительное искусство | Национальный музей Республики Коми, Национальный музей Республики Коми | (21 рака тӧлысь 2016). Дата обращения: 29 лӧддза-номъя тӧлысь 2024.
- ↑ Нумизматическая коллекция | Национальный музей Республики Коми, Национальный музей Республики Коми | (21 рака тӧлысь 2016). Дата обращения: 29 лӧддза-номъя тӧлысь 2024.
- ↑ Редкие книги | Национальный музей Республики Коми, Национальный музей Республики Коми | (21 рака тӧлысь 2016). Дата обращения: 29 лӧддза-номъя тӧлысь 2024.
- ↑ Документальные источники и кино-фото-фоно фонд | Национальный музей Республики Коми, Национальный музей Республики Коми | (21 рака тӧлысь 2016). Дата обращения: 29 лӧддза-номъя тӧлысь 2024.
- ↑ Естественно-научная коллекция | Национальный музей Республики Коми, Национальный музей Республики Коми | (21 рака тӧлысь 2016). Дата обращения: 29 лӧддза-номъя тӧлысь 2024.
- ↑ Фонд металла | Национальный музей Республики Коми, Национальный музей Республики Коми | (13 кӧч тӧлысь 2016). Дата обращения: 29 лӧддза-номъя тӧлысь 2024.
Литература
• Сова В.А. История в событиях и лицах. Страницы истории Национального музея Республики Коми / Научн. ред. Л.П. Рощевская. — Сыктывкар, 2011. — 152 с.
• Краева Н. В. Северные монастыри России в коллекции Национального музея Республики Коми // Вестник Сыктывкарского университета. Серия гуманитарных наук. — 2014. — № 3.
• Рассыхаев А. Н. Этапы формирования собрания рукописных фольклорных материалов в отделе фондов Национального музея Республики Коми // Известия Коми научного центра УРО РАН. — 2015. — № 1 (21).
• Туркина Т. Ю. Вклад В. И. Канивца в формирование фонда археологии и экспозиции Национального музея Республики Коми // Известия Коми научного центра УРО РАН. — 2012. — № 4 (12).
• Низовцева С. Г., Крашенинникова Ю. А. Локально-групповые прозвища жителей коми края (на материалах 1930-х гг. Из фольклорного собрания Национального музея Республики коми) // Вестник Вятского государственного университета. — 2013. — № 2—1.
• Низовцева С. Г. Прозвищная традиция Коми: опыт систематизации (по архивным материалам первой трети XX В. Из фольклорного собрания Национального музея Республики Коми) // Вестник Вятского государственного университета. — 2015. — № 11.
• Большакова А. С., Виноградов И. М., Гольчевский Ю. В. Опыт привлечения студентов к значимым информационным проектам на примере разработки мультимедийного диска «Медное художественное литьё XVI-XX вв. Из собрания Национального музея Республики Коми» // Открытое образование. — 2013. — № 2.
• Зинченко Н. А. Организация научно-исследовательской деятельности студентов в области художественного проектирования // Мир науки. Педагогика и психология. — 2017. — № 2.
• Волокитина Н. А. Мифологический образ утки в традиционном декоративно-прикладном искусстве коми (зырян) // Вестник Башкирского университета. — 2009. — № 4.
• Волокитина Н.А. Актуализация образов традиционной культуры коми (зырян) в современных культурных практиках // Человек. Культура. Образование. — 2016. — № 3 (21).
• Волокитина Н. А. Изображения водоплавающих птиц в традиционном декоративно-прикладном искусстве коми // Известия Российского государственного педагогического университета им. А. И. Герцена. — 2009. — № 114.
• Павлюткин И. Д. Основные сюжеты пермского звериного стиля // Вестник научной ассоциации студентов и аспирантов исторического факультета Пермского государственного гуманитарно-педагогического университета. Серия: Studis historica juvenum. — 2023. — № 1.
Ыстӧгъяс
• Официал сайт
• Музей йылысь йӧзӧдӧмъяс
• Этнография юкӧнын виртуальнӧй тур
• Социальнӧй вез ВКонтакте