Щиров Сергей Сергеевич

Рувикиын эмӧсь мукӧд йӧз йылысь статьяяс, кодъяслӧн овыс Щиров.

Сергей Сергеевич Щиров
Чужан лун	1916 вося урасьӧм тӧлысь 6-ӧд лун
Чужанін	Акимовка сикт, Мелитополь уезд, Таврия губерня, Россия империя
Кулан лун	1956 вося косму тӧлысь 7-ӧд лун
Куланін	СССР-са НКВД-лӧн Казаньса тюрьмаын психбольнича, Казань, СССР
Канму	СССР
Войска сикас	ВВВ
Служитан вояс	1932—1949 (коставлӧмӧн)
Звание
Часьт	267-ӧд истребительнӧй авиация полк, 518-ӧд истребительнӧй авиация полк
Чин	полкса командир
Тышъяс/вӧйнаяс	Айму вӧсна Ыджыд тыш
Наградаяс да премияяс	Суйӧрсайса наградаяс:

Щиров Сергей Сергеевич (1916 вося урасьӧм тӧлысь 6-ӧд лун,Акимовка сикт, Мелитополь уезд, Таврия губерня, Россия империя — 1956 вося косму тӧлысь 7-ӧд лун, Казань, РСФСР) — Айму вӧсна Ыджыд тышын участвуйтысь, подполковник, Комиысь Сӧветскӧй Союзса Герой (1942).

Олантуй

Чужис 1916 вося урасьӧм тӧлысь 6-ӧд лунӧ Акимовка сиктын (ӧні — Россияса Запорожскӧй областьса Акимовскӧй районса посёлок) крестьянин семьяын. 1927 восянь олӧма Севастопольын. Помаліс школалысь вит класс, сэсся фабрично-заводскӧй школа. Ӧттшӧтш помалӧма Севастопольса планернӧй школа да Мелитопольса аэроклуб. 1932—1935 воясӧ служитіс Гӧрд Армияын. 1939 воын выльысь босьтӧмаӧсь армияӧ. 1940 воын помаліс Качинса лётчикъяслысь военнӧй авиация школа.

Вӧйна да вӧйнабӧрся вояс

Айму вӧсна Ыджыд тышын вӧлі медводдза лунсяньыс. Участвуйтіс тышъясын Рытыв-Лунвыв, Калининса, Войвыв Кавказса фронтъяс вылын. 1942 вося моз тӧлысьын вӧзйисны Сӧветскӧй Союзса Герой ним вылӧ, но наградасӧ вежисны Ленин орден вылӧ.

Воюйтіс 87-ӧд, 10-ӧд да 518-ӧд истребительнӧй авиаполкъясын. 1942 вося вӧльгым тӧлысь кежлӧ вӧлі Закавказьеса фронтлӧн 236-ӧд истребительнӧй авиадивизияын пилотируйтан техника кузя инструкторӧн капитан званиеын. Сэк кежлӧ сійӧ вӧчис 258 боевӧй рейс, участвуйтіс 38 сынӧдса косьын, уськӧдіс прӧтивниклысь 14 самолёт ачыс да нӧшта куимӧс — группаын.

«Гӧрд Армияса начальствуйтысь да рядӧвӧй составлы Сӧветскӧй Союзса Геройлысь ним сетӧм йылысь» СССР-са Медвылыс Сӧвет Президиумлӧн 1942 во ӧшым тӧлысь 13-ӧд лунся Индӧдӧн «немецкӧй захватчикъяскӧд тыш нуӧдігӧн командованиелысь боевӧй заданиеяс образцӧвӧя олӧмӧ пӧртӧмысь да та дырйи повтӧмлун да геройство петкӧдлӧмысь» сетӧма Сӧветскӧй Союзса Герой ним 9598 №-а Ленин орденӧн да 587 №-а «Зарни Кодзув» медальӧн.

Ставнас вӧйна чӧжӧн вӧчис 348 боевӧй рейс, участвуйтіс 70 сынӧдса косьын, уськӧдіс прӧтивниклысь 18 самолёт ачыс да нӧшта 4 — группаӧн.

1944 вося сора тӧлысь 28-ӧд лунсянь командуйтіс 267-ӧд истребительнӧй авиация полкӧн. 1944 вося вӧльгым тӧлысьынучаствуйтіс Югославия мездӧмын.

Вӧйна помасьӧм бӧрын водзӧ служитіс ВВВ-ын.

Победа бӧрын лӧсьӧдчис участвуйтны Гӧрд изэрд весьтын сынӧдса парадын, но артист Леонид Двинин ордын гажӧдчӧм бӧрын Сӧветскӧй Союзса Герой подполковник П. С. Середалӧн тӧдсаыс — Щировлӧн асладорса ёртыс гижис на вылӧ донос. Доносын висьтавсис, мый парад дырйи Щиров да Середа лӧсьӧдчӧны зурасьны асланыс истребительясӧн Мавзолей трибунаӧ, медым бырӧдны сӧветскӧй веськӧдлысьясӧс. Тайӧ донесение кузяыс уголовнӧй делӧ эз панлыны, но парадӧ пырӧдчӧмысь Щировӧс да Середаӧс вештісны да кутісны на бӧрся видзӧдны (тайӧ лои ӧти помкаӧн, мый вӧсна Середа бӧрынджык эз кыпӧдчы генерал-майорысь вылӧджык). Ӧти нылӧс, коді вӧлі гаж вылын, арестуйтісны «английскӧй разведкакӧд йитӧд кутӧмысь». Ачыс Щиров тайӧ мыжалӧмъяс йывсьыс бӧрынджык допрос дырйи шуис: «Кутшӧмкӧ сӧрӧм».

1947 восянь служитіс ВВВ-лӧн веськӧдланінын.

Конфликт Бериякӧд

Щировлӧн уголовнӧй делӧ материалъясысь (1980-ӧд воясӧдз вӧліны пӧдсаӧсь) тӧдса, мый Москваын служитігӧн сылӧн гӧтырыс кажитчис Министръяс Сӧветса председательӧс вежысь Л. П. Бериялы, коді курируйтіс сӧветскӧй правительствоын канму безопасносьт органъяс. Л. П. Берия кутіс вӧтлысьны Щировлӧн гӧтыр бӧрсяыс, ыстывліс сыла полковник званиеа асьыс отсасьысьӧс, коді юасьтӧг волывліс Щиров патераӧ, некод вылӧ видзодтӧг нуӧдлывліс Щриовлысь гӧтырсӧ Бериялӧн тшӧктӧм серти. Сэки Щиров шуис гӧтырыслы: «Мун аслад Берия ордӧ да висьтав, мый тайӧ могъяс вылӧ тэнад эм верӧс. Час мысти кӧ он лок, менӧ некор он аддзыв». Сійӧ бӧр воис час мысти, мый бӧрын Бериялы отсасьысь эз кут волывлыны сэсся, но водзӧ кутісны звӧнитны телефон пыр, ӧні нин ачыс Берия. Щиров шыӧдчис ВВВ-са командование дорӧ рапортӧн мӧдӧдны сійӧс служитны авиация частьясӧ, но сійӧс эз лэдзны. Сы могысь, медым мынтӧдчыны сійӧс дӧзмӧдысь Щировысь, Берия медводз ыстіс сійӧс командировкаӧ авиацияса офицеръяс группакӧд Прикарпатскӧй военнӧй кытшӧ , а сэсся ыстіс сійӧс действительнӧй военнӧй служба вылысь запасӧ да вуджӧдіс Москваысь Узбекистанӧ, Ташкентса аэроклуб ОСОАВИАХИМ-са начальникӧн. Гӧтыртӧг Ташкентӧ вуджӧдӧм бӧрын Щиров паныдасис сэні Ташкентса экономическӧй институтса студентка Людмила Вильчинскаякӧд, кодкӧд найӧ ӧтлаын коллявлісны рытъяс, ветлывлісны йӧктыны. Щиров решитчис пышйыны суйӧрсайӧ сыкӧд ӧтлаын. 1949 вося рака тӧлысьын сійӧ вайӧдіс нывкасӧ аэродром вылӧ, кӧні тшӧктіс лӧсьӧдны У-2 самолётсӧ лэбзьӧм кежлӧ. Найӧ пуксисны нин кабинаӧ, сійӧ лэдзис двигательсӧ да лӧсьӧдчис кыпӧдчыны, но аэродром кузя дежурнӧй кыпӧдіс тревога, и налы эз сетны лэбны. Сы вӧсна мый санкционируйттӧг лэбзьӧмыс вӧлі ичӧтик пӧрадок торкалӧмӧн да эз ӧткодявсьы автоматическӧя суйӧрсайӧ пышйыны зільӧмкӧд, Щировӧс да сылысь нывкасӧ эз пуксьӧдны.

Регыд Щировӧс корисны Москваӧ, ВВВ-лӧн веськӧдланінӧ, быттьӧ удж кузя, но сійӧ гӧгӧрвоис, мый сійӧс сэні виччысьӧны нин, медым арестуйтны, та вӧсна мӧдысь кӧсйис пышйыны, ӧні нин ӧтнас, та вӧсна мӧдӧдчис эз веськыда Москваӧ, а Ленинакан пыр, кӧні, официальнӧй версия серти, сійӧ воис сӧветско-турецкӧй границаӧдз да заводитіс вуджны сійӧс.

Арест да дзескыдін

Делӧ материалъяс серти, 1949 вося косму тӧлысь 7-ӧд лунӧ югдандорыс Щиров кӧсйӧма вуджны СССР-лысь канму граница, но сійӧс кутӧма пограничнӧй патруль. Косму тӧлысь 9-ӧд лунӧ сійӧс вӧлі арестуйтӧма чужан му вузавны кӧсйӧмысь, «СССР-лы паныд водзӧ тыш нуӧдӧм могысь суйӧрсайӧ пышйыны кӧсйӧмысь» мыжалӧмӧн. Быттьӧкӧ Турцияӧ пышйӧм бӧрын сійӧ лӧсьӧдчис вуджны сэтысь Францияӧ, кӧні олісны сылӧн француз ёртъясыс — «Нормандия-Неман» полкысь вӧйна воясся лётчикъяс . Пыткаяс улын признайтчис «контрреволюционнӧй заговорӧ» пырӧдчӧмын, «суйӧрсайса разведкаяслы уджалӧмын» да сідз водзӧ , но французъяскӧд, югославъяскӧд да полякъяскӧд кутшӧмкӧ контрреволюционнӧй йитӧдъяс йылысь, пыткаяс вылӧ видзӧдтӧг, немтор эз шу. Аслас медводдза пышйыны кӧсйӧм кузя допрос дырйи мыжсӧ босьтіс ас вылас, шуис: «Людмила нинӧмысь абу мыжа. <…> Ме шуи, мый прӧстӧ сійӧс новлӧдлышта. Да, шуи, „лэбӧда“ тэнӧ суйӧрсайӧ». Корис аслыс военнӧй трибуналлысь суд, кӧні кӧсйис висьтавны сійӧс арестуйтӧмлысь збыль помкаяссӧ да Л. П. Бериякӧд ассьыс конфликтсӧ, но канму безопасносьт министерстволы эз позь, медым Щиров веськаліс военнӧйяс киӧ да 1949 вося вӧльгым тӧлысь 12-ӧд лунӧ СССР-са канму безопасносьт министерство бердын торъя совещание некутшӧм судтӧг приговоритіс сійӧс 25 во кежлӧ дзескыдінӧ Коми АССР-ын — Вӧркута бердын 6-ӧд номера (Речлаг), а сэсся Инта бердын 1 номера (Минлаг) торъя лагеръясын.

Канму безопасносьт министерствоса уджалысьясӧн Ереванын да Москваын пыткаяс дырйи сыысь пычкӧм висьталӧмъясысь позьӧ гӧгӧрвоны, мыйла сійӧ сэтшӧм падъялігтыр, дилетант моз кӧсйис вуджны границасӧ, — сылӧн вӧлі вывті ыджыд эмоциональнӧй шызьӧм. Авиацияса генерал-майор А. В. Ворожейкин бӧрынджык казьтывліс аслас мемуаръясын, мый кор налы официальнӧя юӧртісны сы йылысь, мый Щиров быттьӧкӧ вӧлӧма «иностраннӧй канмуса шпионӧн да арестуйтӧмаӧсь граница вуджӧмысь», а вербуйтӧмаӧсь сійӧс вӧлі быттьӧкӧ Югославияын на, сылы лои гӧгӧрвоана, мыйла сійӧ бӧрддзис, кор найӧ Щировкӧд семьяясыскӧд ӧтлаын шойччисны Алупкаын — пыр жӧ сы бӧрын, кор гӧтырыс друг муніс Москваӧ корӧм серти.

Щиров кындзи, сылӧн делӧ кузя вӧлі арестуйтӧма драмтеатрса артист Ю. Козицынӧс, кодӧс торъя сӧвещаниеӧн 1950 вося кӧч тӧлысь 20-ӧд лунӧ мыждӧмаӧсь 8 во кежлӧ «Шировӧн чужан му вузавны лӧсьӧдчӧм йылысь доложиттӧмысь».

СССР-са Медвылыс Сӧвет Президиумлӧн 1950 во ӧшым тӧлысь 26-ӧд лунся Индӧдӧн Щиров Сергей Сергеевичлысь мырддисны Сӧветскӧй Союзса Герой ним да став канму наградаяссӧ.

1951 вося кӧч тӧлысь 14-ӧд лунӧ лагерын нин сылы судтӧг мӧдысь сетісны РСФСР-са УК-лӧн 58.2 («власьт босьтны зільӧм») да 58.11 («контрреволюционнӧй организация») статьяяс серти нӧшта 25 во дзескыдінын сійӧн лӧсьӧдӧм «вооружённӧй восстание» вӧсна.

1953 воын, Берияӧс удж вывсьыс вештӧм водзвылын, Щировӧс этапируйтісны Москваӧ, кӧні военнӧй прокурор дорын допрос дырйи сійӧ висьталіс, мый пышйӧмсӧ да став мукӧд антисӧветскӧй преступлениеяссӧ сійӧ ас вылӧ босьтіс Лубянкаын пыткаяс дырйи, да висьталіс татшӧмтор: «Ме некор эг кӧсйы вузавны чужан муӧс. Кывзӧй менӧ… менам став пышйӧмӧй — тайӧ инсценировка. Ме муні граница вылӧ, сэтчӧ, кӧні служиті, Ленинакан районӧ, ме сэні тӧді став туйяссӧ да некыдз эг вермы вошны. Ме жӧ висьтавлі следовательяслы: тадзи граница оз вуджны».

Мездӧм да выльысь дзескыдінӧ пуксьӧдӧм

Сэки С. Щировӧс реабилитируйтӧм йылысь юалӧмсӧ прокуратура эз сувтӧдлы. 1954 вося урасьӧм тӧлысь 11-ӧд лунӧ СССР-са Генеральнӧй прокурор Р. А. Руденко кырымаліс кык протест, кӧні висьтавсис, мый «Щировлӧн антисӧветскӧй настроениеясыс вӧліны сы вӧсна, мый Берия жугӧдіс сылысь семьясӧ» да та вӧсна вӧзйис кыкнан делӧ кузяыс чинтыны мыждӧмсӧ 5 воӧдз да мездыны Щировӧс амнистия серти.

Протестъяссӧ вӧлі могмӧдӧма СССР-са Медвылыс Ёрдлӧн Военнӧй коллегияӧн 1954 вося урасьӧм тӧлысь 17-ӧд лунӧ. Медводдза да мӧд делӧ кузя мыждӧмсӧ чинтӧма вит воӧдз, бырӧдӧма инӧдъяс жугӧдӧмсӧ да сійӧс вӧлі мездӧма водзӧ мыждӧмысь СССР-са Медвылыс Сӧвет Президиумлӧн «Амнистия йылысь» 1953 во рака тӧлысь 27-ӧд лунся Индӧд подув вылын, судимостьсӧ киритӧмӧн. Збыльысь мездӧмаӧсь 1954 вося рака тӧлысь 5-ӧд лун Коми АССР-са лагерысь (Минлагысь). Тюрьмаысь Щиров петіс сьӧкыда висьысь мортӧн нин, сьӧм ни оланінтӧг. Москваын сійӧ заводитліс корсьны важся ёртъяссӧ, кодъяскӧд воюйтліс да уджаліс, но этшаӧн окотитісны сёрнитны «партияса да правительствоса веськӧдлысьяслы скӧр паныд муныськӧд». И век жӧ вӧвлӧм ёртъясыс чукӧртісны туй вылӧ неуна сьӧм да отсалісны сылы воӧдчыны Акимовкаӧдз.

Щиров пырис уджавны фотографӧн чужан сиктса рынок вылӧ. Уна вӧчис сы могысь, медым сійӧс реабилитируйтісны да накажитісны збыль мыжаясӧс, сы вӧсна мый сы делӧ кузя следствиесӧ нуӧдісны В. С. Абакумов да В. И. Комаров веськӧдлӧм улын, кодъясӧс вӧлі мыждӧма Берия делӧ кузя да сійӧ кад кежлас нин лыйлӧмаӧсь.

Но сы вӧсна мый сійӧ эз воӧдчы ӧти кывйӧ да требуйтіс накажитны ставсӧ, кодъяс вӧліны мыжаӧсь сы вӧдзын, тшӧтш и тюремнӧй чинъясӧс дзескыдінъясын да партияын уджалысьясӧс, кодъяс колины асланыс чинын, водзӧ вылӧ лоӧмторйыс вӧлі виччысяна. 1955 вося тулысын Акимовкаӧ, кӧні оліс Щиров, воисны штатскӧй паськӧма йӧз, ассьыныс ним да чин висьтавтӧг, вӧзйисны сылы мунны накӧд ӧтлаын Одессаӧ, быттьӧкӧ СССР-са оборона министр маршал Жуков лӧсьӧдчӧ бӧр сетны сылы Геройлысь ним. Щиров висьталіс, мый сійӧ оз эскы налы, да содтіс: «Мӧдӧдча маршал Жуков дінӧ сӧмын сэк, сійӧ кӧ сувтӧдас охрана Акимовкасянь Одессаӧдз». Сійӧ жӧ войнас сійӧ воши. Кыдзи тыдовтчис бӧрынджык, сійӧс нуисны Одессаӧ мырдӧн, бара жӧ судтӧг да следствиетӧг, а реабилитируйтӧм пыдди власьтъяслӧн тшӧктӧм серти сылысь диагностируйтісны «спорадическӧй психоз», мый вӧсна сійӧс мырдӧн пыртӧмаӧсь Одессаса пӧдса психиатрическӧй учреждениеӧ, кӧні сійӧс мырдӧн «бурдӧдӧмаӧсь»: сюрса вемӧ уколъяс вайӧмаӧсь терпитны позьтӧм дой да збыльысь жугӧдӧмаӧсь психикасӧ. 1955 вося сора тӧлысь 14-ӧд лунӧ Щиров пышйис больничаысь, а медицина карточкаын вӧлі вӧчӧма сылӧн «бурдӧм» йылысь гижӧд. Сійӧ бӧр локтіс гортас Акимовкаӧ, но куим сутки мысти нин, 1955 вося сора тӧлысь 17-ӧд лунӧ, сійӧс домавлӧмӧн нуисны гортсьыс бара Одессаӧ. 1955 вося сора тӧлысь 20-ӧд лунсянь йирым тӧлысь 17-ӧд лунӧдз сійӧ вӧлі Одессаса психиатрическӧй больничаын, сы бӧрын сійӧс вуджӧдісны СССР-са НКВД-лӧн Казаньса тюремнӧй психиатрическӧй больничаӧ, кӧні сійӧс видзисны кувтӧдзыс, 1956 вося косму тӧлысь 7-ӧд лунӧдз.

Реабилитируйтӧм

Щировлӧн ӧти полксаясыс сы пӧгибнитӧм бӧрын дыр да весьшӧрӧ добивайтчисны сійӧс тырвыйӧ реабилитируйтӧмсӧ да бур нимсӧ бергӧдӧмсӧ. Медбӧрын, 1988 вося кӧч тӧлысь 30-ӧд лунӧ С. Щировӧс медводдза делӧ кузя СССР-са Медвылыс Ёрдлӧн Пленумлӧн решениеӧн вӧлі реабилитируйтӧма кулӧм бӧрас «мыж вӧчӧм абутӧм вӧсна». СССР-са Медвылыс Сӧвет Президиумлӧн 1989 вося косму тӧлысь 14-ӧд лунся Индӧдӧн бӧр сетӧма Сӧветскӧй Союзса Геройлысь нимсӧ.

Наградаяс

• Сӧветскӧй Союзса Герой (1942.12.13);
• «Зарни Кодзув» медаль 587 № (1942.12.13);
• кык Ленин орден 9596 №, 9598 № (1942.10.23, 1942.12.13);
• Гӧрд Дӧрапас орден 40379 № (1942.11.04);
• Кутузов III тшупӧда орден 6986 №(22.04.1945);
• Александр Невскӧй орден 3554 № (194309.30);
• Айму вӧсна Ыджыд тышса орден 81445 № (1944.09.20);
• Гӧрд Кодзув орден 22052 № (1941.12.29);
• медальяс.

Суйӧрсайса наградаяс

• Партизан кодзув III тшупӧда орден, 1197 № (Югославия) (1945.06.21)

Паметь

• 2013 вося моз тӧлысь 17-ӧд лунӧ аэроклубын, кӧні водзті вӧлі Мелитопольса авиация школа, кӧні велӧдчис С. Щиров, сувтӧдӧма казьтылана пӧв;
• С. С. Щировлысь ним нэммӧдӧмаӧсь Геройяс аллеяын Мелитополь карын;
• Геройлӧн чужанінын Акимовка посёлокын да Сочиын эмӧсь Щиров нима уличаяс;
• Сочиын сувтӧдӧма Геройлысь бюст;
• Сӧветскӧй Союзса Геройлы сиӧм пыр кадся экспозициясӧ лӧсьӧдісны Запорожскӧй обласьтса краеведческӧй музейын.

Пасйӧдъяс

Литература

• Кавалеры ордена Славы трёх степеней: Краткий биографический словарь / Пред. ред. коллегии Д. С. Сухоруков. — М.: Воениздат, 2000. — 703 с. — 10 000 экз. — ISBN 5-203-01883-9.
• 16-я воздушная. — М.: Воениздат, 1973.
• Авдеенко С.И. Последний бой сталинского сокола. — Мелитополь: ИПЦ «Люкс», 2011. — 120 с. — ISBN 978-966-8428-58-6.
• Авдеенко С.И. Служили два товарища. — Мелитополь: ИПЦ «Люкс», 2013. — С. 9—152. — 228 с. — ISBN 978-966-8428-86-9.
• Авдеенко С.И. Красный молох. — Мелитополь: МГТ, 2019. — С. 141—234. — 274 с. — ISBN 978-966-197-632-9.
• Быков М. Ю. Асы Великой Отечественной. — М.: Эксмо; Яуза, 2007.
• Ворожейкин А. В. Небо истребителя. — М., 1991.
• Захарченко В. Д. Антонов. — М., 1996.
• Звягинцев В. Трибунал для героев. — М.: ОЛМА-ПРЕСС, 2005 г.
• Звягинцев В. Е. Трибунал для «сталинских соколов». — М.: ТЕРРА—Книжный клуб, 2008. — 432 с. — (Двуликая Клио: Версии и факты). — ISBN 978-5-275-01612-3.
• Исаенко Н. Ф. Вижу противника! — К., 1981.
• Конев В. Герои без Золотых Звезд. Прокляты и забыты. — М., 2008.
• Феофанов Ю. В. Бремя власти. — М.: Политиздат, 1990. — 287 с. — ISBN 5-250-00888-7.
• Краснознамённый Закавказский. — Тб.: Сабчота сакартвело, 1981.
• «Известия». 1988. 18 октября.
• Книга памяти Республики Коми. Т. 9 / сост. В. М. Котельников, А. М. Калимова, А. А. Карпов. — Сыктывкар, 2002.
• Книга памяти Республика Коми. Т. 10 / сост. В. М. Котельников, А. М. Калимова, А. А. Карпов. — Сыктывкар, 2004.
• Книга памяти Республики Коми. Т. 12 / составители А. А. Карпов, О. А. Сергичева, Л. Н. Двинская. — Сыктывкар, 2013.
• Быков М. Советские асы 1941—1945. Победы Сталинских соколов. — М., 2008.
• Феоктистов, С. И. В небе Туапсе : Авиация в Туапс. оборонит. операции. — Туапсе, 1995.

Ссылки

• Щиров Сергей Сергеевич  (неопр.). Герои страны.
• Щиров Сергей Сергеевич  (неопр.). Музей истории ГУЛАГа.