Баженова Ольга Николаевна
| Баженова Ольга Николаевна | |
|---|---|
 | |
| Чужан лун | 1992-ӧд вося урасьӧм тӧлысь 18-ӧд лун (34 арӧс) |
| Чужанін | |
| Страна | |
| Мыйся уджыс | гижысь |
Баженова Ольга Николаевна (1992-ӧд вося урасьӧм тӧлысь 18-ӧд лун, Кӧжмудор, Коми ССР) — коми гижысь, филология наукаяс кандидат. Коми гижысь котырӧ да Россияса гижысь котырӧ пырысь.
Олантуй
Ольга Баженова чужӧма 1992-ӧд вося урасьӧм тӧлысь 18-ӧд лунӧ Емдін районса Кӧжмудор сиктын. Медводз велӧдчис Кожмудорса школаын, а бӧрынджык, сизимӧд классӧдз велӧдчӧма Туискерӧсса школаын.
2009-ӧд воын помалӧма зарни медальӧн Сыктывкарын Ю. А. Спиридонов нима Коми Республикаса Юралысь бердын искусствояс гимназия.
2008—2014-ӧд воясын велӧдчӧма Сыктывкарса канму университетын гуманитарнӧй наукаяслӧн институтса коми юкӧнын, помалӧма гӧрд дипломӧн.
2014-2015-ӧд воясын уджалӧма Коми Республикаса войтырлӧн шылада-драмаа театрын, та кадӧ жӧ велӧдӧма Искусствояс гимназияын.
2016-ӧд вося арсянь вӧліс аспирантӧн Коми наука шӧринса Кыв, литература да история институтын. 2022 воын дорйис филология кандидат ним вылӧ «Стилистические ресурсы лексики в коми художественных текстах» диссертация (веськӧдлысьыс — Е. А. Цыпанов)[1].
2016 восянь 2022 воӧдз уджаліс Коми наука шӧринын кыв секторса старшӧй лаборантӧн. 2024 восянь уджалӧ научнӧй сотрудникӧн[2].
2020—2023 воясӧ — Сыктывкарса канму университетын филология финно-угроведение да регионоведение кафедраын велӧдысь.
Гижан удж
Ольга Николаевна заводитіс гижны кывбуръяс 2007 восянь, кор велӧдчис Гожся филологияса университетын (семинаръяс нуӧдіс В. В. Тимин).
Ольга Баженова унджыксӧ гижӧ кывбуръяс. Гижӧдъяссӧ йӧзӧдлӧма 2007-ӧд воын «Войвыв кодзув» да «Арт» журналъясын, «Медводдза муслун» сборникын[3].
Медводдза асшӧр небӧгӧн позьӧ шуны «Кывбуръяс» чукӧр, кодӧс дасьтӧма С. К. Терентьев 2011-ӧд воын. Ки помысь небӧгын 35 кывбур, кодъясӧс гижӧма важ перым анбурӧн, а орччӧн — ӧнія графикаӧн[4].
2012-ӧд воын сылӧн петӧма «Шондіа ю» медводдза кывбура небӧг. Мӧд небӧгсӧ — «Ме велӧдча радейтны выльысь» (2016) — йӧзӧдӧма Эстонияса Национальнӧй Культура Фондлӧн сьӧм вылӧ.
Коми Республикаса «Эзысь борд» литературнӧй конкурсын, кодӧс нуӧдӧ «Войвыв кодзув» журнал, «Поэзия» нимпасын вермысь.
2013-ӧд воын, студентӧн на, водзмӧстчӧма драматургияын: гижӧма да йӧзӧдӧма «Арт» журналын «От» пьеса, мый серти Искусствояс гимназияса велӧдчысьяслӧн «Ордым» театр котыр Сыктывкарса университетса велӧдчысьяскӧд ӧтвылысь пуктӧма спектакль (режиссёрыс В. М. Напалков).
Ольга Баженова пырӧ Коми гижысь котырӧ да Россияса гижысь котырӧ[5].
Небӧгъяс
• Баженова О. Н. Кывбуръяс: [кывбуръяс важ перым анбурӧн]. — Сыктывкар: [С. К. Терентьев], 2011. — 64 л.б.
• Баженова О. Н. Шондіа ю: кывбуръяс / Ред. Е. Е. Афанасьева, Серпасаліс Ю. Н. Лисовский. — Сыктывкар: Коми Республикаса гижысь котыр, 2012. — 32 л.б. («Шондіа енкӧла» чукӧр / Лӧсьӧдіс А. Г. Елфимова)
• Баженова О. Н. Ме велӧдча радейтны выльысь: кывбуръяс / Водзкывйыс А. Г. Елфимовалӧн. — Сыктывкар, 2016. — 64 л.б.
Наградаяс
• А. Лужиков нима литературнӧй премияа лауреат (2011);
• «Эзысь борд») республикаса литературнӧй конкурсын вермысь «Поэзия» нимпасын (2016)[6].
Пасйӧдъяс
- ↑ Баженова О.Н. Стилистические ресурсы лексики в коми художественных текстах (рус.). РГБ. Шыӧдчан кадпас: 9 кӧч тӧлысь 2025.
- ↑ Баженова Ольга Николаевна (рус.). КНЦ. Шыӧдчан кадпас: 9 кӧч тӧлысь 2025.
- ↑ Баженова Ольга Николаевна (рус.). НБРК. Шыӧдчан кадпас: 9 кӧч тӧлысь 2025.
- ↑ Кывбуръяс (О. Баженовалӧн 2011 вося небӧг). Шыӧдчан кадпас: 9 кӧч тӧлысь 2025.
- ↑ Джавршян Г. Двух авторов из Коми приняли в Союз писателей России (рус.). Комиинформ (19 сора тӧлысь 2018). Шыӧдчан кадпас: 9 кӧч тӧлысь 2025.
- ↑ Баженова Ольга Николаевна (рус.). Союз писателей РК. Шыӧдчан кадпас: 9 кӧч тӧлысь 2025.
Литература
• Емдiн — вежа му: культурологический, публицистический, литературно-художественный сборник авторов Усть-Вымского района / лöсьöдiсны: Е. В. Козлова, А. С. Одинцов; редактор Н. А. Обрезкова. — Сыктывкар, 2011.
• «Финноугория» юӧр сетан шӧрин
• Баженова Ольга гижӧдъяс йылысь FU-Lab сайтын