Елфимова Анжелика Геннадьевна
| Елфимова Анжелика Геннадьевна | |
|---|---|
 | |
| Чужан лун | 1970-ӧд вося ода-кора тӧлысь 27-ӧд лун (56 арӧс) |
| Чужанін | |
| Страна | |
| Мыйся уджыс | журналист, поэт |
Елфимова Анжелика Геннадьевна (1970-ӧд вося ода-кора тӧлысь 27-ӧд лун, Маджа, Коми АССР) — коми поэт, журналист.
Олантуй
Анжелика Елфимова чужӧма Коми АССР-ын Кӧрткерӧс районса Маджа сиктын 1970-ӧд вося ода-кора тӧлысь 27-ӧд лунӧ. Помалӧма Сыктывкарын искусствояс училишеысь хорӧн дирижирование класс (1989), Москваын А. М. Горький нима Литературнӧй институт (2007). Велӧдчылӧма Сыктывкарса канму университетлӧн филология да финн-йӧгра факультетъяс вылын (1996—2000).
Уджалӧма культура керкаын художествоа веськӧдлысьӧн, челядь видзанінын шылада веськӧдлысьӧн, Маджаса школаын шыладӧ велӧдысьӧн (1989—1999), корреспондентӧн Кӧрткерӧс районса «Звезда» (1999) да республикаса «Коми му» (2000—2003) газетъясын, «Чушканзі» журналын (2003—2010).
Уджавлӧма Коми гижысь котырын литературнӧй консультантӧн (2010—2014), Сыктывкарса коми культура шӧринын художествоа веськӧдлысьӧн (2017). 2019-ӧд восянь зільӧма «Чушканзі» журналын[1].
Гижан удж
Медводз кывбуръяссӧ гижӧма рочӧн, йӧзӧдӧма «Красное знамя» газетын 1989-ӧд воын. Ёртъясыс коркӧ юалӧмаӧсь, «мыйла кывбуръяссӧ оз гиж комиӧн»? Та бӧрын босьтчӧма гижны сӧмын комиӧн. Коми кывбур чукӧрсӧ медводдзаысь вӧлі йӧзӧдӧма 1999-ӧд воын «Коми му» газетын. Сы бӧрын нин, кор кутӧма кывны асьсӧ гижысьӧн, мунӧма велӧдчыны А. М. Горький нима Литературнӧй институтӧ.
Кывбуръяссӧ йӧзӧдлӧма ӧтувъя чукӧръясын, «Войвыв кодзув» да «Арт» журналъясын, рочӧн, вуджӧдӧмӧн — «Невский альманах» да «Родная Ладога» журналъясын, «Литературный Санкт-Петербург» да «Литературнӧй газетын», «Инвожо» (Ижкар) журналын.
Анжелика Елфимовалӧн петавлӧма «Аддзысьлытӧдз» (2002), «Еджыд вӧтъяс» (2008), «Вемӧсӧн ли вӧтӧн» (2010) кывбур чукӧръяс. Йӧзӧдчылӧма «Мелiлуныс пыдӧстӧм и помтӧм» (2001), «Уна рӧма сикӧтш» (2002), «Возвращение Вяйнемейнена» (2002), «Пӧлӧзнича пӧвстын» (2010) да мукӧд сборникын.
Сылысь кывбуръяссӧ вуджӧдӧма роч, удмурт, эст, англия да француз кывъяс вылӧ.
Комиӧдлӧма «Коми войтыр: культура да история йылысь дженьыд серпаскывъяс» небӧг (Сыктывкар, 2008).
Россияса гижысь котырӧ (2005) да Россияса журналист котырӧ (2004) пырысь.
Небӧгъяс
• Аддзысьлытӧдз: кывбуръяс. — Сыктывкар: Коми небӧг лэдзанін, 2002. — 190 л.б.
• Вемӧсӧн ли вӧтӧн: Кывбуръяс / Водзкывйыс В. В. Тиминлӧн, Ред. П. И. Симпелев, Серпасаліс Е. М. Коюшева. — Сыктывкар: «Коми му» газет редакция КР АУ, 2010. — 160 л.б.
• Кык кыв. Два слова: Кывбуръяс. Сборник стихов / Серпасаліс А. Вологжанина. — Сыктывкар: «Издательский дом Коми», 2021. — 112 с.
• Сьылан менам, сьылан… : 68 сьыланкыв: гудöк шысьыс он и пöтлы… = Песня моя, песня… : 68 самых популярных коми песен / лöсьöдысьяс: А. Г. Елфимова [и др.]; серпасалic Д. М. Лужиков. — Сыктывкар : Редакция газеты «Коми му», 2008. — 91, [5] лист бок : серпас, ноты.
• Павлова Н. М. Кор алöй биöн ойдас лежнöг : кывбуръяс / Надежда Павлова; [редактор А. Г. Елфимова; серпасалiс Н. И. Гиголян]. — Сыктывкар : [б. и.], 2011. — 174, [2] лист бок : серпас.
• Втюрина Л. З. Майбыр кад : [кывбуръяс] / Зарни Люся; [редактор Анжелика Елфимова]; серпасалiс Ю. Н. Лисовский. — Сыктывкар : Издательство Союза писателей Республики Коми, 2010. — 31, [1] лист бок : серпас.
Вуджӧдӧмъяс
• Жеребцов И. В. [да мук.] Коми войтыр: культура да история йылысь дженьыд серпаскывъяс / Вуджӧдіс А. Г. Елфимова. — Сыктывкар: «Кола», 2008. — 264 л.б.
Общественнӧй удж
А.Елфимова — «Коми войтыр» ӧтмунӧмлӧн Сыктывкарса юкӧнын веськӧдлысьӧс вежысь (2011—2015), «Коми КВН» ӧтмунӧмӧн веськӧдлысь (2012 восянь).
Наградаяс
• М. Кастрен котырлӧн (Финляндия) премия (журналистика юкӧнын) (2002);
• «Эзысь борд» республикаса литературнӧй премия: «Поэзия» (2010), «Вуджӧдӧмъяс» (2013), «Публицистика» (2014) нимпасъясын;
• Эстонияса рӧдвуж войтыр Программалӧн литературнӧй премия художествоа кывбуръяс юкӧнын (2014);
• «Золотое перо» ставроссияса конкурсын диплом босьтысь «Медбур лирикаа кывбур» (2008) да «Россияса войтырлӧн медбур кывбуръяс» нимпасъясын (2012)[2];
• «Лыддьысьысьлӧн премия» (2021)[3].
Пасйӧдъяс
- ↑ Елфимова Анжелика Геннадьевна (рус.). НБРК. Шыӧдчан кадпас: 20 йирым тӧлысь 2025.
- ↑ Елфимова Анжелика (рус.). Журнальный мир. Шыӧдчан кадпас: 20 йирым тӧлысь 2025.
- ↑ «Премию Читателя» вручили в Юношеской библиотеке Республики Коми поэту Анжелике Елфимовой (рус.). Регион (4 рака тӧлысь 2021). Шыӧдчан кадпас: 20 йирым тӧлысь 2025.
Литература
• «Коми гижысь» котыр сайтын А. Г. Елфимовалӧн олантуй
• Коканина Е. Я в открытые души вхожу без преград… // «Знамя труда» газет, 2013 во, вӧльгым тӧлысь 15-ӧд лун
• Малева А. Анжелика Геннадьевна Елфимова // Писатели Коми: биобиблиографический словарь: в 2-х т. — Сыктывкар, 2017. — Т. 1: А — Л. — С. 278—281.
• Коми Республикаса вужвойтырлӧн небӧгаин
• Габова А. А. Фольклорные жанры и поэзия Анжелики Елфимовой // Вопросы коми филологии: сборник научных статей / Отв. ред. В. М. Лудыкова. — Сыктывкар: Изд-во Сыкт. ун-та, 2006. — С. 45—50.