Вурдов Алексей Иванович

Вурдов Алексей Иванович
Вурдов Алексей Иванович
Чужан лун	1956-ӧд вося урасьӧм тӧлысь 21-ӧд лун
Чужанін	Инта, Коми АССР, РСФСР, Сӧветскӧй Социалистическӧй Республикаяслӧн Союз;
Кулан лун	2024-ӧд вося ода-кора тӧлысь 17-ӧд лун (68 арӧс)
Куланін	Усогорск, Удора район, Коми Республика, Россия;
Страна	Сӧветскӧй Социалистическӧй Республикаяслӧн Союз; Россия;
Мыйся уджыс	гижысь

Вурдов Алексей Иванович (1956-ӧд вося урасьӧм тӧлысь 21-ӧд лун, Инта, Коми АССР — 2024-ӧд вося ода-кора тӧлысь 17-ӧд лун, Усогорск, Коми Республика) — коми гижысь. Россияса гижысьяс котырӧ пырысь (2008 восянь)^[1].

Олантуй

Алексей Вурдов чужис Инта карын 1956 вося урасьӧм тӧлысь 21-ӧд лунӧ. Интаӧ бать-мамыс вӧлі локтӧмаӧсь Удора районса Слӧбӧдаяг грездысь. Шахтаын вит во уджалӧм бӧрын найӧ бӧр бергӧдчисны Удораӧ. 1959 восянь сылӧн челядьдырыс колис Ыджыдъяг посёлокын да Слӧбӧдаяг грездын.

1973 воын помаліс Косланса шӧр школа. 1978 воын Кардорса лесотехническӧй институтын босьтіс «вӧр овмӧсын инженер» специальносьт, заочнӧя помаліс Ленинградса финансово-экономическӧй институт.

1970-1980 воясын уджаліс Кардорса Мехлесхозын лесничӧйлы отсасьыстӧн. 1980-1982 воясын вӧлі Кардор обласьтса Приморскӧй районын комсомол райкомын инструкторӧн. 1982-1991 воясын уджаліс Кардорын пытшкӧсса делӧяс кузя органъясын офицерӧн, вӧлі спецназса командирӧн.

1991 воын лӧсьӧдіс Россияын тшӧт серти коймӧд охранно-сыскнӧй фирма, веськӧдліс сійӧн 1994 воӧдз (Кардор кар), вӧлі войтыркостса концернлӧн филиалса безопасносьт службаса начальникӧн, войтыркостса концернлӧн экономическӧй юалӧмъяс кузя сӧветникӧн (1994-1998, Москва кар)^[2].

Комиӧ воӧм бӧрын уджаліс мастерӧн «Усогорсклес» леспромхозын, Усогорскса жилищно-коммунальнӧй овмӧсын. 2004 восянь инвалидносьт кузя (ранитчӧм бӧрын) пенсия вылын.

2014 вося лӧддза-номъя тӧлысьын А. И. Вурдов муніс Украина асыв-лунвылӧ, пырӧма ополченечьяс радӧ. Война вылын сійӧ вӧлі ранитчӧма осколокӧн да контузитчӧма.

Кувсис 2024 вося ода-кора тӧлысь 17-ӧд лунӧ Усогорскын^[3].

Гижан удж

Литератураӧ Алексей Вурдов воис олӧмсӧ тӧдысь мортӧн. Гижан уджӧ босьтчис 2002 воӧ. Гижӧ комиӧн да рочӧн. Гижӧдъяссӧ йӧзӧдліс «Войвыв кодзув» да «Арт» журналъясын, россияса да республикаса газетъясын.

Медводдза висьт небӧгыс петіс 2005 воын комиӧн да шусис «Менам Йирва», мӧдыс — 2007 воын «Сир войт». Коймӧд небӧгыс петіс рочӧн 2008 воын «Ирвинские сны» ним улын. 2011 воын йӧзӧдіс «Удоралӧн история — мойдӧмъясын» небӧг.

Россияса гижысь котырын 2008 восянь. Кыкысь босьтліс I места «Эзысь борд» конкурсын «Проза» нимпасын.

Гижис сценарийяс да Сыктывкарысь Евгений Танимовкӧд лӧсьӧдісны нёль кинофильм: «Эхо зырянской Ежуги» (2011), «Дух Большого Субача» (2012), «Ирвинское зазеркалье» (2012), «Легенда о мезенской чуди» (2013). Кинофильмъяссӧ петкӧдлісны фин-йӧгра войтырлӧн «Туйвеж» визуальнӧй искусствояс фестиваль дырйи.

«Дух Большого Субача» кинофильмын А. Вурдов ачыс ворсіс шаман Омаӧс^[4].

2013 воын Алексей Вурдов гижис рочӧн челядьлы «Заветная мечта» да «Тайна пармы» пьесаяс, комиӧн «Кык вылӧ ӧти шуд» да «Кодрасьӧм» пьесаяс сиктса олӧм йылысь.

2014 вося гожӧмын мӧдӧдчис Донецк йӧзкостса республикаӧ ополченечӧн, медым тышкасьны Украинаса армиалы паныд. Кыкысь ранитчӧм бӧрын воис Сыктывкарӧ бурдӧдчыны, гижис рочӧн «Донецкие рассказы» висьт чукӧр, кодъясӧс йӧзӧдӧма «Выль туйӧд» газетын^[5] да дасьтӧма йӧзӧдны «Юность» журналын.

Небӧгъяс

• Менам Йирва: висьтъяс. — Сыктывкар: Полиграф-Сервис, 2005. — 123 л.б.
• Сир войт: висьтъяс, повесьтъяс. — Сыктывкар: «Арт», 2007. — 142 л.б.
• Ирвинские сны. Сыктывкар: ООО Издательство «Кола», 2008. — 144 с.
• Удоралӧн история мойдӧмъясын: (XIV нэмсянь — XX нэмса 10-ӧд воясӧдз). — Сыктывкар: ООО Издательство «Кола», 2011. — 60 л.б.
• Донецкие рассветы. — 2016.
• Родное эхо : рассказы, пьесы. – Сыктывкар: Кола, 2017. – 134 с.
• Загадочная Удора. – Усогорск, 2017. – 185 с.
• Дзирдалан чиръяс: рассказы, сказки, пьесы, загадки, песни: на коми яз. / худож. С. Г. Семяшкин. – Сыктывкар: Кола, 2017. – 60 с.
• Таежная истина: повесть. – [Б. м : б. и.], 2020. – 54 с.

Пасйӧдъяс

↑ Алексей Иванович Вурдов: писатель, поэт-песенник, сценарист (рус.). Библиотека им.Маршака (20 урасьӧм тӧлысь 2021). Шыӧдчан кадпас: 14 йирым тӧлысь 2025.
↑ Вурдов Алексей Иванович (рус.). НБРК. Шыӧдчан кадпас: 14 йирым тӧлысь 2025.
↑ В Коми ушел из жизни известный писатель Алексей Вурдов (рус.). АиФ. Коми (18 ода-кора тӧлысь 2024). Шыӧдчан кадпас: 14 йирым тӧлысь 2025.
↑ Кудинова А. Алексей Вурдов сыграл лесного духа в короткометражном фильме про удорскую речку Субач (рус.). «Республика» газет (22 урасьӧм тӧлысь 2013). Шыӧдчан кадпас: 14 йирым тӧлысь 2025.
↑ Чупров В., Ковалева А. На войну по доброй воле. В рядах ополченцев юго-восточной Украины сражаются и наши земляки (рус.). «Республика» газет (26 кӧч тӧлысь 2014). Шыӧдчан кадпас: 14 йирым тӧлысь 2025.

Литература

[1] Алексей Иванович Вурдов: писатель, поэт-песенник, сценарист (рус.). Библиотека им.Маршака (20 урасьӧм тӧлысь 2021). Шыӧдчан кадпас: 14 йирым тӧлысь 2025.

[2] Вурдов Алексей Иванович (рус.). НБРК. Шыӧдчан кадпас: 14 йирым тӧлысь 2025.

[3] В Коми ушел из жизни известный писатель Алексей Вурдов (рус.). АиФ. Коми (18 ода-кора тӧлысь 2024). Шыӧдчан кадпас: 14 йирым тӧлысь 2025.

[4] Кудинова А. Алексей Вурдов сыграл лесного духа в короткометражном фильме про удорскую речку Субач (рус.). «Республика» газет (22 урасьӧм тӧлысь 2013). Шыӧдчан кадпас: 14 йирым тӧлысь 2025.

[5] Чупров В., Ковалева А. На войну по доброй воле. В рядах ополченцев юго-восточной Украины сражаются и наши земляки (рус.). «Республика» газет (26 кӧч тӧлысь 2014). Шыӧдчан кадпас: 14 йирым тӧлысь 2025.

[1]

[2]

[3]

[4]

[5]