Дончук Василий Иванович

Василий Иванович Дончук
Чужан лун	1910 вося тӧвшӧр тӧлысь 10-ӧд лун
Чужанін	Киев, Россия империя
Кулан лун	1944 вося йирым тӧлысь 21-ӧд лун
Куланін	Нессебю, Финнмарк, Норвегия
Канму	СССР
Войска сикас	авиация
Служитан вояс	1937—1944
Звание	майор
Командуйтіс	108-ӧд торъя разведка авиация эскадрильяӧн
Тышъяс/вӧйнаяс	Хасанса тышъяс (1938) Айму вӧсна Ыджыд тыш
Наградаяс да премияяс

Дончук Василий Иванович (1910 вося тӧвшӧр тӧлысь 10-ӧд лун, Киев — 1944 вося йирым тӧлысь 21-ӧд лун, Нессебю, Финнмарк, Норвегия) — Айму вӧсна Ыджыд тышын участвуйтысь, Комиысь Сӧветскӧй Союзса Герой, военнӧй лётчик, гвардияса майор.

Олантуй

Дончук Василий Иванович чужис 1910 во помын Киевын кресьтянин семьяын, коді уджаліс стрӧйба видзысьӧн да столярӧн Медводдза Киевса гимназия бердын. Украинеч. Батьыс Василийлӧн кувсьӧма 1921 воын, кольӧма дӧваӧс куим челядьӧн. Василийлӧн мамыс пӧшти став кадсӧ уджаліс нажӧтка перйом могысь, зілис вердны челядьсӧ, семьяыс вӧлі гӧль. Василий, сылӧн чойыс да вокыс корысялісны уличаяс вылын да мыйкӧ дыра олісны детдомын.

1927 воын пырис комсомолӧ. ФЗУ школа помалӧм бӧрын, кӧні босьтіс металл кузя токарлысь профессия, пырис Сталинградса трактор вӧчан заводӧ, кӧні уджаліс кык во[3]. 1932 воын пырис ВКП (б)-ӧ . Помаліс Ейскса авиация училище, сы бӧрын служитіс Москваса военнӧй кытшын, лоис лётнӧй частьса начальникӧн. Москваын гӧтрасис да регыд мысти Лариса гӧтырыскӧд мӧдӧдчис Ылі Асыввылӧ, вуджис гражданскӧй авиацияӧ. 1935 восянь уджаліс Хабаровскса аэроклубын лётнӧй частьса начальникӧн да лётчик-инструкторӧн, 1936 восянь уджаліс Камчаткаын Камчаткаса акционер котырса пилотӧн. Гӧтырыслӧн казьтылӧм серти, Василий уджавлӧма Петропавловск-Камчатскын акционер котыр бердын авиаотрядын, тӧдмалӧма инъяссӧ да новлӧма грузъяс сьӧкыда воӧдчан районъясӧ.

Гӧрд Армияын служитіс 1937 восянь да 1938 воын участвуйтіс тышъясын Хасан ты вылын. Вӧчис ӧти разведка рейс МП-1 бис самолётӧн. Таысь Дончуклы сетісны премия, босьтӧм сьӧм вылас сійӧ ньӧбис мотоцикл. Но 1938 во помын нин сійӧс вуджӧдӧмаӧсь лётчикъясысь мувывса отрядӧ, а ӧшым тӧлысь 30-ӧд лунӧ арестуйтӧмаӧсь. 1939 вося сора тӧлысь 31-ӧд лунӧ сійӧс вӧлі мыждӧма Хабаровск крайын РСФСР-са УНКВД УК 58-1а-10-11 статья серти, но та бӧрын делӧсӧ вӧлі немвиччысьтӧг тупкӧма, а Дончукӧс мездӧмаӧсь дзескыдінысь.

Та бӧрын Дончук веськӧдліс «БАМпроект» кӧрт туй стрӧитан лагеръясӧн веськӧдланін бердын авиаотрядӧн.

1941 вося тулысын ыстӧмаӧсь Воркутаӧ торъя авиация группаса торъя авиаотрядса командирӧн. Дончуклӧн отрядыс сулаліс Абезьын, кытысянь лэбавлісны Войвыв океан берег да Югорскӧй Шар виям весьтті, новлӧдліс грузъяс, нуӧдіс разведка да, ковмыліс кӧ, мездан операцияяс.

Айму вӧсна Ыджыд тыш дырйи

Айму вӧсна Ыджыд тыш заводитчӧм бӧрын, 1941 вося лӧддза-номъя тӧлысьын, Дончук корис ыстыны вӧйна вылӧ, но командование тшӧктіс кольччис Заполярьеӧ пӧшти во помӧдзыс. 1941 вося вӧльгым тӧлыссянь фронт вылын Гражданскӧй воздушнӧй флотлӧн Войвывса торъя авиация группаса (сэсся ГВФ-лӧн Карело-финскӧй торъя авиагруппаса) пилот. П-5 самолёт вылын, мый Дончук аслас бортмеханик Владимир Лосевкӧд вайӧдіс Заполярьеысь, сійӧ лэбавліс фронт линия сайӧ, вайліс партизанъяслы боеприпасъяс да петкӧдіс сэтысь доймӧмаясӧс да военнӧй донесениеяс, а сідзжӧ вайис прӧтивник тылӧ разведка да диверсионнӧй группаяс. 1942 вося урасьӧм тӧлысьын Дончуклӧн вӧзйӧм серти П-5 самолётъяссӧ вӧлі выльмӧдӧма кокньыдик бомбардировщикъясӧн — на вылӧ вӧлі сувтӧдӧма бордувса кык авиабомба кутӧдъяс. Дончук, Матвеев да Никитов лётчикъяс бомбитісны враглысь военнӧй объектъяс, сы лыдын Суомуссалмиса казармаяс да Кестеньгаса аэродром, та бӧрын аэродромыс лоис водзӧ уджӧдны шогмытӧмӧн. 1942 вося ода-кора тӧлысь кежлӧ 94 боевӧй рейс вӧчӧм бӧрын Дончукӧс наградитісны Гӧрд Кодзув орденӧн да сетісны капитан звание, сы бӧрын индісны Карело-Финскӧй торъя авиагруппалӧн медводдза авиаотрядса командирӧн.

Петсам-Киркенес операция заводитчӧм бӧрын Дончук ачыс транспортнӧй самолётӧн новлӧдліс выль аэродромъяс вылӧ медся колана оборудование, медым кыдз позьӧ ӧдйӧджык дасьтыны эскадрильялысь боевӧй часьтсӧ лэбзьӧмъяс кежлӧ. 1944 вося йирым тӧлысь 21-ӧд лунӧ Дончук аслас экипажкӧд босьтчис вӧчны разведка Киркенес районӧ (Войвыв Норвегия), кӧні мунісны медся сьӧкыд тышъяс. Лэбигас экипаж некымынысь йитчыліс, юӧртіс Киркенес дорын противниклӧн войскаяслӧн вешйӧм да чукӧртчӧм йылысь, но бӧръя юӧръясын сійӧ шуис веськыдвывса двигательлӧн жугалӧм да немецкӧй истребительяслӧн атака йылысь. Та бӧрын йитӧдыс дзикӧдз ори. Базаӧ экипаж эз во. 2014 воын печатьын Норвегияысь историк Михаэль Стокке вылӧ ыстысьӧмӧн петіс тайӧ лэбзьӧмыслӧн помасьӧм йылысь юӧр. Стокке да Руне Раутио висьталӧны, мый самолёт, коді муніс Ивало - Инари - Карасёк - Лаксэльв - Киркенес маршрут кузя, вермис усьны Норвегияын Нессебю коммуна весьтын; сэтчӧс олысьяс аддзылісны, кыдзи сотчысь самолёт усис берегсянь неылын матысса фьорд ваӧ. Тыдалӧ, самолётыс ӧні куйлӧ фьорд пыдӧсын 40-70 метр джудждаын.

Пӧгибнитігӧдзыс Василий Дончук вӧчис ылі разведкаа 270 рейс, новлӧдліс десант да бомбитіс аэродромъяс, кӧрт туй станцияяс да промышленнӧй объектъяс. Витысь пуксьыліс самолётӧн вӧрӧг тылӧ. Ставнас лэбаліс 5 сюрс час 14 разнӧй моделя самолёт вылын. 1944 вося вӧльгым тӧлысь 2-ӧд лунӧ СССР-са Медвылыс Сӧвет Президиумлӧн индӧдӧн майор Василий Иванович Дончуклы кувсьӧм бӧрас сетӧма Сӧветскӧй Союзса Геройлысь ним.

Хабаровскса аэроклуб здание вылын мемориальнӧй пӧв

Наградаяс

• Сӧветскӧй Союзса Герой ним (1944.11.02);
• Ленин орден (1944.11.02);
• «Зарни Кодзув» медаль (1944.11.02);
• Айму вӧсна Ыджыд тышса II тшупӧда орден (1943.01.03);
• Гӧрд Кодзув орден (1942.05.31);
• Гӧрд Дӧрапас орден (1944.04.13; 1944.07.02);
• «Айму вӧсна Ыджыд тышса партизанлы» I тшупӧда медаль

Паметь

• Сӧветскӧй Союзса Герой Василий Иванович Дончуклысь нима уличаяс эмӧсь Киев, Хабаровск да Воркута каръясын.
• Василий Дончуклысь нимсӧ сетӧма шӧр школаяслы Воркута да Хабаровск каръясын.
• Геройлы мемориальнӧй пӧвъяс сувтӧдӧма Петыркарын, Кардорын, Воркутаын (тані кык мемориальнӧй пӧв: ӧтиыс Дончук улича вылын, мӧдыс Воркутаса аэропорт зданиеын), Хабаровскса аэроклуб здание вылын.
• «Юрган» телеканал дасьтіс документальнӧй кино В. Дончук йылысь: «Герои. История подвига. Василий Дончук».

Пасйӧдъяс

Литература

• Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1987. — Т. 1 /Абаев — Любичев/. — 911 с. — 100 000 экз. — ISBN отс., Рег. № в РКП 87-95382.
• Личков Г. Триста раз во вражеский тыл // Красная звезда. 1970. 22 июль. С. 4.
• За чистое небо : Сборник. Книга 3 / Сост.: Минеев, Н. Ф., Ялыгин, М. И. – Л., 1978.
• Сорокажердьев, В. Они сражались в Заполярье : Герои Советского союза 1939 – 1945 : боевые биографии. – Мурманск, 2007.
• Герои Отечественной войны. Василий Иванович Дончук / Издание Политического управления Карельского фронта. – 1944.
• Боевые звёзды киевлян: очерки о Героях Советского Союза — уроженцах Киева и Киевской области / сост.: И. В. Волков, К. Л. Клепик, А. К. Корнилов и др. — 3-е изд., перераб. — Киев, 1983. — 518 с. — (Герои Советского Союза).
• Героям Родины слава! / науч. ред. Гардин, Е. С. – Изд. 3-е, испр. и доп. – Петрозаводск, 1985.
• Жирохов, М.А. Воздушная война в Заполярье. 1941 – 1944. – М., 2011. – (На линии фронта. Правда о войне).

Ыстӧгъяс

Мельников Александр Евгеньевич. Дончук Василий Иванович  (рус.). Сайт «Герои страны». Шыӧдчан кадпас: 6 ода-кора тӧлысь 2016.