Би кинь (журнал)

Видлалӧм гижӧд

"Би кинь" журнал (2024 во)

«Би кинь» журнал – ичӧт да шӧр арлыда челядьлы уна рӧма литературно-художественнӧй да серпаса журнал, петӧ 1986-ӧд восянь.

Медшӧр юӧр

Петӧ тӧлысьнас ӧтчыдысь. Ыдждаыс — А4 формат, 16 лист бок. Тиражыс — 1000 сайӧ экз.

Индексыс — П4363

Пошта пыр гижӧдчан дон (2023 во вылӧ): 1 тӧлысь — 39,82 шайт; 6 тӧлысь — 238,92 шайт; во кежлӧ - 477,84 шайт. Редакция пыр доныс: 1 тӧлысь — 23 шайт; 6 тӧлысь — 138 шайт; во кежлӧ - 276 шайт. Электроннӧй гижӧдчан дон: 6 тӧлысь — 150 шайт; во кежлӧ - 300 шайт.

История

Журналлӧн медводдза номерыс петіс 1986-ӧд вося сора тӧлысьӧ. Журналлӧн могъяс — коми кыв да литература, быдмысь войтырлӧн вежӧрын чужан му дорӧ муслун сӧвмӧдӧм, Коми мулӧн историяӧн тӧдмӧдӧм. Век корсьӧ енбиа нывкаясӧс да зонкаясӧс.

Журналын йӧзӧдӧны челядьлы лыддьӧм вылӧ висьтъяс, кывбуръяс, мойдъяс, гижысьяс, пемӧсъяс да лэбачьяс йылысь гижӧдъяс. Редакциякӧд йитӧд кутӧны гижысьяс, ворсысьяс, шылад тэчысьяс. Медуна зільӧны йӧзӧдны челядьлысь гижӧдторъяс да серпасъяс.

«Би киньын» редакторъясӧн вӧліны коми гижысьяс Николай Белых, Александр Лужиков (1992-ӧд восянь), Александр Ульянов, Алексей Попов (2021-ӧд вося урасьӧм тӧлысьӧдз). Ставныс найӧ пырӧны Россияса гижысь котырö. Недыр шер-редакторлӧма И.Н. Орёл. 2021-ӧд вося кӧч тӧлысь 1-дза лунсянь медшӧр редакторыс — коми гижысь Алёна Нестерова.

Некымын во чӧж журналлӧн редакция республикаса районъясын котыртлӧ «Би кинь» гаж, кодлӧн могыс енбиа ныв-зонмӧс корсьӧм да быдтӧм. «Би кинь» гаж – тайӧ театрализованнӧй мича ворсӧм, кӧні медшӧр геройӧн ворсӧ беринӧсь зонка «Би кинь». Медся сюсь да енбиа челядьлы вичмӧ козин.

Редакция топыд йитӧд кутӧ удмурт челядьлы «Кизили» журналкӧд.

2004-ӧд вося урасьӧм тӧлысьын Коми Республикаса правительстволӧн индӧд серти котыртчӧма «Коми му» газет редакция» Коми Республикаса канму учреждение, коді ӧтувтӧма «Коми му» да «Йӧлӧга» газетъяс, «Би кинь» да «Чушканзі» журналъяс. Сійӧ кадсяньыс тайӧ ыджыд котырнас директоралӧма коми гижысь Александр Ульянов. Налӧн лоӧма ӧтувъя бухгалтерия да компьютернӧй цех.

Наградаяс

• челядьлӧн да том йӧзлӧн «Волшебнӧй кыв» федеральнӧй конкурсын вермысь (2022, 2024)

Ӧтуввез-листбок

Коми йӧзӧдчан керка холдинглӧн эм асшӧр ӧтуввез сайт:http://komikerka.ru/ , а "Би кинь" журналлӧн торъя лист бок: http://komikerka.ru/smi/bikin.

"Би кинь" журналлӧн Контактын эм торъя группа: https://vk.com/bikin.

Литература

• Путеводитель по журналу «Би кинь». 1986–2007 / МУК «Централизованная библиотечная система»; Сост. Н.Н. Колегова. – Сыктывкар, 2008. – 240 с.