Коми Республикалӧн дӧрапас

Босьтӧма Рувикиысь
Коми Республикалӧн дӧрапас
Flag of Komi.svg
Субъект Коми Республика
Страна  Россия
Вынсьӧдӧма 1997 вося ӧшым тӧлысь 17-ӧд лун[1]
Пропорция 2:3
Автор котыр
Дӧрапаслӧн автор Сердитов Владимир Яковлевич[2]
Воддза дӧрапасъяс
Flag of Komi 1991.svg1991 вося вӧльгым тӧлысь 27-ӧд лун[3] — 1997 вося ӧшым тӧлысь 17-ӧд лун
Пропорция 1:2

Коми Республикалöн дöрапас (рочӧн Флаг Республики Коми) — Россия Федерацияса Коми Республикалӧн канму символӧн. Ӧнія дӧрапас вынсьӧдӧма 1997 вося ӧшым тӧлысь 17-од лунӧ да пыртӧма Россия Федерацияса канму геральдика реестрӧ 154 номер улын.

Канпаскӧд да кыпкӧд ӧттшӧтш лоӧ Коми Республикалӧн официальнӧй канмуй символӧн.

История

Дӧрапассӧ вынсьӧдіс Коми ССР-са Вылыс Сӧвет 1991 вося ӧшым тӧлысь 17-ӧд лунӧ.

Коми Республикаса дӧрапас йылысь оланпас вӧлі йӧзӧдӧма 1994 вося лӧддза-номъя тӧлысь 6-ӧд лунӧ[4]. Медводз кузьтаыс вӧлі кыкпӧв унджык пасьтаысь.

1997 вося ӧшым тӧлысь 17-ӧд лунӧ дӧрапассӧ вежыштӧмаӧсь [5], кузьта да пасьта костын торъялӧмыс лои 3:2. Тадзи сійӧс пыртӧмась Рочму Федерациялӧн канувса геральдика регистрӧ 154 нумерӧн.

Гӧгӧрвоӧдӧм

Веськыд пельöса от, мый артмö кузьта ногöн вылісянь уліöдз öта-мöд бöрся лöз, турунвиж да еджыд куим визьысь, быдöн пасьтанас дöрапаслöн öти коймöд пасьта.

Дöрапаслöн пасьтаыс кузьта серти — 2:3[6].

Символика гӧгӧрвоӧдӧм

Дöрапаслöн серпасыс петкöдлö Коми Республикалысь географическöй аслыспöлöслун да вöр-ва озырлун.

Рӧмлӧн символика:
• Дöрапасыс куим рӧма: лӧз, турунвиж да еджыд.
• Лöз рöмыс петкöдлö енэж, войвывса паськыдінъяслысь мичлунсö да помтöмлунсö.
• Турунвиж рöмыс — лача да озырлун, паськыд ота коми парма — коми войтырлысь медшöр озырлунсö да олан гöгöртассö.
• Дöрапаслöн еджыд рöмыс петкöдлö лымлысь еджыдлунсö да сöстöмлунсö, войвывса вöр-валысь сöдзлунсö да мичлунсö, Войвылö Коми Республикалысь пырöмсö. Еджыд рöмыс гöгöрвосьö и кыдзи республикаын олысь уна сикас войтырлысь равенствосö, налöн культураяслысь öтувъялунсö[6].

История

РСФСР-ын Коми (Зыряна) асвеськӧдлан обласьт котыртчис 1921 вося моз тӧлысь 22-ӧд лунӧ. 1936 вося ӧшым тӧлысь 5-ӧд лунӧ сійӧс вӧчӧма Коми АССР-ӧ.

Коми АССР-лӧн дӧрапасын 1937 во кежлӧ вӧлі «Р.С.Ф.С.Р.» да «Коми АССР» гижӧд роч да коми (латинскӧй графикаӧн) кывъяс вылын. Бӧрынджык, кор коми кыв вуджӧдісны латинизируйтӧм алфавит вылысь роч графика вылӧ, вежсисны и дӧрапас вылын гижӧдъяс (Оланподувса 112 ст.). Коми латынь анбур вӧлі 1936 воӧдз. Сэсся вӧлі выльысь пыртӧма А. Молодцовлысь анбур. 1938 воын Молодцовлӧн анбур пыдди вӧлі лӧсьӧдӧма роч графика серти алфавит, и республикалӧн нимыс коми кыв вылын лои роч нога жӧ — «КОМИ АССР».

1954 воын вежсис РСФСР-лӧн дӧрапас, сы бӧрын вежсис и Комилӧн дӧрапас (Дӧрапас йылысь положение вынсьӧдӧма 1956 вося рака тӧлысь 16-ӧд лунӧ). Выль дӧрапасыс вӧлі зарни чарлаа да мӧлӧта гӧрд полотнище, кантонас зарни каймаа гӧрд кодзув, пу дорын сувтса кельыдлӧз визьы да гижӧд (чарла да мӧлӧт улын): «КОМИ АССР» (кык строкаа; тайӧ аббревиатураыс гижсьыліс ӧткодя и рочӧн, и комиӧн).

1978 вося ода-кора тӧлысь 23-ӧд лунӧ 9 созывса Коми АССР-са Верховнӧй Сӧветлӧн VIII внеочереднӧй сессия вынсьӧдіс Коми АССР-лысь выль Оланподувсӧ[7]. Республикаллӧн дӧрапас да канпас йылысь вӧлі гижӧма 158, 157 статьяясын. Дӧрапасыс вӧлі кольӧма вежсьытӧг (дӧрапас йылысь положениелысь выль редакциясӧ вынсьӧдӧма 1981 вося кӧч тӧлысь 15-ӧд лунся Медвылыс Сӧветса Президиумлӧн индӧдӧн, а положение дорӧ содтӧдсӧ — 1984 вося кӧч толысь 18-ӧд лунся индӧдӧн).

1990 вося моз тӧлысь 29-ӧд лунӧ вӧлі примитӧма суверенитет йылысь Декларация да выль ним — Коми Сӧветскӧй Социалистическӧй Республика[8]. Официальнӧй бланокъяс вылын сэки вӧлі канпас «Коми ССР» выль аббревиатураӧн нин, дӧрапасын нинӧм эз вежсьы. 1992 вося ода-кора тӧлысь 26-ӧд лунӧ субъект нимсӧ вежӧма Коми Республикаӧн[9].

Коми Республикалысь ӧнія дӧрапассӧ медводдзаысь вӧлі пыртӧма Коми ССР-са Медвылыс Сӧвет Президиумлӧн 1991 во вӧльгым тӧлысь 27-ӧд лунся Шуӧмӧн да «Коми ССР-лысь канму дӧрапас вынсьӧдӧм да Коми ССР-лӧн Оланподулӧ (Медшӧр Оланпасӧ) вежсьӧмъяс пыртӧм йылысь» оланпасӧн. Дӧрапас гӧгӧрвоӧдӧмсӧ вайӧдӧма Коми Республикаса Оланподувлӧн 158 статья серти: «Коми Республикаса канму дӧрапас лоӧ веськыд пельӧса полотнищеӧн, кытчӧ пырӧны лӧз, турунвиж да еджыд рӧма куим визь, кодъясӧс сувтӧдӧма горизонтальнӧя вывсянь улӧдз, быд визьлӧн пасьтаыс дӧрапаслӧн ӧти коймӧд юкӧн. Дӧрапаслӧн пасьта да кузьта костын отношениеыс - 1:2»"[10]. Сёрӧнджык Коми Республикаса Каналан Сӧвет Россия Федерацияса Президент бердын Канму геральдиялӧн вӧзйӧм серти пыртӧма индӧм оланпасӧ вежсьӧмъяс, кодъяс йитчӧмаӧсь дӧрапаслӧн пасьта да сылӧн кузьта костын, мый, кыдзи и Россия Федерацияса канму дӧрапаслы, колӧ вӧлі лӧсявны 2:3 пропорцияын[11].

Коми Республикалысь канму дӧрапас вынсьӧдӧма «Коми Республикалӧн канму дӧрапас йылысь» Коми Республикаса 1994 во лӧддза-номъя тӧлысь 6-ӧд лунся XІІ-20/3 №-а оланпасӧн[12].

  • Коми АССР-лӧн 1937 вося дӧрапас

    Коми АССР-лӧн 1937 вося дӧрапас

  • Коми АССР-лӧн 1938 вося дӧрапас

    Коми АССР-лӧн 1938 вося дӧрапас

  • Коми АССР-лӧн 1954 вося дӧрапас

    Коми АССР-лӧн 1954 вося дӧрапас

Пасйӧдъяс

  1. ↑ Закон Республики Коми от 17.12.1997 № 47-РЗ «О внесении изменений и дополнений в закон Республики Коми о государственном флаге Республики Коми» Архивса копия 12 вӧльгым тӧлысь 2007 Wayback Machine ресурсын. Подписан 26.12.1997.
  2. ↑ ART и общество от Владимира Сердитова, Национальная Галерея Республики Коми. Шыӧдчан кадпас: 26 рака тӧлысь 2025.
  3. ↑ Постановление Президиума Верховного Совета Коми ССР от 27.11.1991 — закон «Об утверждении Государственного флага Коми ССР и внесении изменений в Конституцию (Основной Закон) Коми ССР». Утверждён законом № XII-20/3 от 06.06.1994 Архивса копия 12 вӧльгым тӧлысь 2007 Wayback Machine ресурсын. Закон введён в действие Постановлением № XII-20/4.
  4. ↑ Коми Республикаса оланпас N XII-20/3
  5. ↑ Коми Республикаса оланпас N 47-РЗ
  6. ↑ 1 2 Государственный флаг Республики Коми (рус.). Официальный сайт Республики Коми. Шыӧдчан кадпас: 28 сора тӧлысь 2025.
  7. ↑ Конституция (Основной закон) Коми Автономной Советской Социалистической Республики (рус.). Президентская библиотека им. Б.Н. Ельцина. Шыӧдчан кадпас: 28 сора тӧлысь 2025.
  8. ↑ О заявлении Государственного Совета Республики Коми "О десятой годовщине принятия декларации о государственном суверенитете Республики Коми", Постановление Государственного Совета Республики Коми от 30 июня 2000 года №II-5/12. docs.cntd.ru. Шыӧдчан кадпас: 28 сора тӧлысь 2025. Архивируйтӧма 26 лӧддза-номъя тӧлысь 2020.
  9. ↑ Золотарев О., Обедков А. Республика Коми. Общие сведения // Республика Коми. Энциклопедия. Том I. — Сыктывкар: Коми книжное издательство, 1997. — С. 11.
  10. ↑ 26 ноября 1991 года Верховный Совет Коми ССР утверждает флаг республики (сине-зелено-белый триколор) (рус.). НБРК (26 вӧльгым тӧлысь 2018). Шыӧдчан кадпас: 28 сора тӧлысь 2025.
  11. ↑ Флагу Республики Коми исполняется четверть века (рус.). Комиинформ (27 вӧльгым тӧлысь 2016). Шыӧдчан кадпас: 28 сора тӧлысь 2025.
  12. ↑ Закон Республики Коми «О Государственном флаге Республики Коми» (рус.). Шыӧдчан кадпас: 28 сора тӧлысь 2025.

Йитчӧм гижӧдъяс

• Коми Республикаса канпас
• Коми Республикаса кып

Ыстӧгъяс

• Коми - гербы и флаги

Босьтӧма "https://kv.ruwiki.ru/w/index.php?title=Коми_Республикалӧн_дӧрапас&oldid=482425"-ысь