Кузьбожева Мария Вячеславовна
| Кузьбожева Мария Вячеславовна | |
|---|---|
 | |
| Чужан лун | 1953-ӧд вося сора тӧлысь 13-ӧд лун (73 арӧс) |
| Чужанін | |
| Страна | |
| Мыйся уджыс | школаын велӧдысь, директор, общественнӧй удж вӧчысь, министр |
Кузьбожева Мария Вячеславовна (1953-ӧд вося сора тӧлысь 13-ӧд лун, Куж, Коми АССР) — коми велӧдысь, общественнӧй удж вӧчысь.
Олантуй
Мария Вячеславовна чужӧма Коми АССР-ын Кулӧмдін районса Куж сиктын 1953-ӧд вося сора тӧлысь 13-ӧд лунӧ. Водз кольӧма бать-мамтӧгыс. Сійӧс быдтӧма пӧчыс, Логинова Елена Федотовна.
1968-ӧд воын помалӧма Кужса кӧкъямыс класса школа, 1970-ӧд воын — Кебанъёльса шӧр школа, 1974-ӧд воын — Коми канмуса педагогика институтысь физика-математика факультет, лоӧма физика велӧдысьӧн[1].
1974—1980-ӧд воясын — Яснӧгса шӧр школаын быдтысян удж нуӧдысь.
1980—1982-ӧд воясын директоралӧма Лӧзымса шӧр школаын, 1982—1990-ӧд воясын — Паджгса шӧр школаын. 1990—1991 воясӧ вӧлӧма Паджгаса шӧр школаын внекласснӧй удж котыртысьӧн.
Та бӧрын вуджӧма уджавны Сыктывкарӧ. 1991—1992-ӧд восын вӧлӧма Велӧдысьяслысь тӧдӧмлун кыпӧдан институтын быдтысян удж кабинетын методистӧн. 1992—1994 — Коми Республикаса Велӧдан министерстволӧн внешкольнӧй велӧдӧмлӧн республикаса шӧринын йӧзкостса педагогикаысь методист.
1994-ӧд воын уджалӧма Коми Республикаса Велӧдан министерствоын шӧр да содтӧд тӧдӧмлун сӧвмӧдан юкӧдын главнӧй специалистӧн, 1994—1995 — министрӧс медводдза вежысьӧн. 1995—2003-ӧд воясын директоралӧма Коми Республикаса Юралысь бердын искусствояс гимназияын. 2003—2005-ӧд воясын — Коми Республикаса культура да войтырсикас политика министр[2]. 2013-ӧд восянь 2018 воӧдз — Коми Республикаса Юралысь бердын искусствояс гимназияын директор[3]
2018 воын Мария Кузьбожева вӧліс Коми Республикасянь Россия Федерацияса президентӧ кандидат Владимир Путинлӧн дӧвереннӧй мортӧн[4].
Ӧні пенсия вылын, зіля пырӧдчӧ общественнӧй уджӧ.
Общественнӧй удж
• 1999—2003 воясӧ — Коми Республикаса каналан сӧветын II созывса депутат;
• 2005-ӧд восянь пырис «Мирлӧн Россияса фонд» Коми Республикаса юкӧнлӧн веськӧдланінӧ, «Россияса челядь фонд» республикаса юкӧнлӧн веськӧдланінӧ;
• пырліс Коми Республикаса нывбабаяслӧн котырса президиумӧ;
• вӧлӧма «Коми Республикаса вужвойтыр аньяс» регионъяскостса ӧтмунӧмын веськӧдлысьӧс вежысьӧн;
• вӧлӧма Сыктывдін районса Сӧветын депутат («Справедливӧй Россия» ютырсянь);
• Мария Кузьбожева пырӧ Коми войтыр ӧтмунӧмлӧн Президиумӧ, вӧлӧма Коми войтыр ӧтмунӧмлӧн Сыктывкарса юкӧнын веськӧдлысьӧн (2007—2011). 2024 воын бӧрйисны «Коми войтыр» ӧтмунӧмӧн веськӧдлысь Олег Лажаневӧс вежысьӧн[5].
Наградаяс
• Россияса просвещениеын отличник;
• Коми АССР-са школаясын нимӧдана велӧдысь;
• «Коми Республикалы 100 во» медаль (2021).
Пасйӧдъяс
- ↑ Кузьбожева Мария Вячеславовна (рус.). История Пажги в свободном доступе. Шыӧдчан кадпас: 10 вӧльгым тӧлысь 2025.
- ↑ Коми. Министром культуры Коми назначена директор Гимназии искусств при Главе республики (рус.). Регнум (27 тӧвшӧр тӧлысь 2003). Шыӧдчан кадпас: 10 вӧльгым тӧлысь 2025.
- ↑ Мария Кузьбожева покинула пост директора гимназии искусств при главе Коми (рус.). Комиинформ (15 тӧвшӧр тӧлысь 2018). Шыӧдчан кадпас: 10 вӧльгым тӧлысь 2025.
- ↑ Опытная общественница и молодой инженер стали доверенными лицами Владимира Путина в Коми (рус.) (12 тӧвшӧр тӧлысь 2018). Шыӧдчан кадпас: 10 вӧльгым тӧлысь 2025.
- ↑ Веськӧдлысьяс (рус.). Коми войтыр. Шыӧдчан кадпас: 10 вӧльгым тӧлысь 2025.