Старцев Георгий Афанасьевич

Видлалӧм гижӧд

Старцев Георгий Афанасьевич
Чужан лун	1902-ӧд вося урасьӧм тӧлысь 21-ӧд лун(1902-02-21)
Кулан лун	1943
Мыйся уджыс	гижысь, этнограф, историк, преподаватель, директор

Старцев Георгий Афанасьевич (сідзжӧ Опонь Ёгор; 1902 вося урасьӧм тӧлысь 21-ӧд лун, Яренск уездса Онежье вӧлӧсьтысь Катыдпом грезд — 1943, Сталинград) — медводдза коми профессиональнӧй этнограф, туялысь, Коми канмуса педагогика институтын велӧдысь, историк, фольклорист, Коми областнӧй музейса директор.

Олантуй

Георгий Старцев чужис 1902 вося урасьӧм тӧлысь 21-ӧд лунӧ Яренск уездса Онежье вӧлӧсьтысь Катыдпом грездын (ӧні — Коми Республикаса Княжпогост район). Сылӧн медводдза велӧдысьӧн лоис батьыс. 1916 воын помаліс Туръяыбын вичкобердса школа. Сэсся бать-мамыс мӧдӧдісны писӧ Соловецкӧй манастырӧ, кысянь пырис велӧдчыны Гамса кыквося школаӧ. Сійӧс помалӧм бӧрын 1918 воын пырис велӧдчыны Емдінса велӧдысьяслӧн семинариаӧ.

1919 воын доброволечӧн тышкасис Гӧрд армияын, воюйтіс Коми муын, Войвыв Двинаын, Петроград улын Юденичлы паныд.
1920 во пансигӧн водзӧ велӧдчис Яренскын велӧдысьяслӧн куимвося курсъяс вылын.
Войвыв Двина губерняса I съезд дырйи, мый вӧлі Усть-Сысольскын 1920 вося кӧч тӧлысь 12—13-ӧд лунъясӧ, пырӧдчис коми (зыряна) автономия лӧсьӧдӧм йылысь сёрниӧ. Сійӧс бӧрйисны РСФСР-са национальносьтъяслӧн делӧяс кузя народнӧй комиссариатысь Зыряна юкӧнӧ пырысьӧн. Сэні уджаліс 1920-ӧд вося кӧч тӧлысьсянь 1921-ӧд вося тӧвшӧр тӧлысьӧдз Зыряна юкӧдын секретарӧн.
1921-ӧд вося тӧвшӧр тӧлысьӧ бӧр воис Усть-Сысольскӧ, лои Йӧзӧс велӧдан Институтса студентӧн, медым мунны велӧдны коми школаясӧ.
1921-ӧд вося кӧч тӧлысьӧ Георгий Старцевӧс мӧдӧдӧны велӧдчыны Петроградса университетӧ.

1921—1924 воясӧ Старцев — ФОН университетын общественнӧ-педагогическӧй юкӧнса студент. Ӧттшӧтш велӧдчис географическӧй факультетса этнография юкӧнын. Сылӧн уджлӧн научнӧй веськӧдлысьясӧн вӧліны социолог да юрист Н. А. Гредескул, этнографъяс Л. Я. Штернберг да В. Г. Богораз-Тан.

Университет помалӧм бӧрын сійӧс кольӧдісны сэтчӧ: медводз социология кафедраӧ, а 1925 вося косму тӧлысьсянь — Рытыввыв да Асыввыв литература да кыв институтлӧн (ИЛЯЗВ) асыввыв подсекцияса научнӧй сотрудникӧн.
1926 вося рака тӧлысьсянь 1928 вося кӧч тӧлысьӧдз — младшӧй ассистент, 1929 воын вӧлі штатысь содтӧд ассистентӧн.

1931 воын Сыктывкарын восьтісны Коми канмуса педагогика институт да ӧттшӧтш тупкисны Ленинградса да Вӧлӧгдаса институтъясысь коми юкӧнъяс. Велӧдчысьясӧс да велӧдысьясӧс вуджӧдісны Сыктывкарӧ.
1932 вося тӧвшӧр тӧлысь 16-ӧд лунсянь Георгий Старцев кутіс веськӧдлыны Коми канмуса педагогика институтын велӧдан юкӧнӧн да история кафедраӧн. 1935 вося кӧч тӧлысьӧ сійӧс уволитісны Коми институтысь («за невозможностью нагрузить его по специальности»).
1933 вося ода-кора тӧлысьын Г.А. Старцевӧс индісны Коми обласьтса краеведческӧй музейӧн (ӧні Коми Республикаса национальнӧй музей) веськӧдлысьӧн. Сійӧ бура тӧдіс музейлысь уджсӧ, вӧлі тӧдса Европаса музейяс уджӧн, кор ветліс 1927 воын командировкаӧ Германияӧ да Финляндияӧ. Сійӧ директораліс 3 во, и тайӧ каднас музейын вӧлі унатор вӧчӧма, стрӧитӧма 2 выль юкӧн, лӧсьӧдӧма 15 выставка.
1936 вося моз тӧлысь 20-ӧд лунӧ Г. Старцевӧс вӧтлісны ВКП(б)-ысь да моз тӧлысь 25-ӧд лунӧ удж вылысь татшӧм гижӧдӧн:

В связи с тем, что директор музея Г.А. Старцев исключен из рядов партии как двурушник, троцкист и буржуазный националист, Старцева Г.А. с работы в музее снять.

1936 вося кӧч тӧлысьӧ Г. Старцев бергӧдчис Ленинградӧ, велӧдіс школаясын. 1936 вося вӧльгым—ӧшым тӧлысьясӧ сёрнитчӧм серти уджаліс Публичнӧй библиотекаын, а 1937 вося рака тӧлысь 29-ӧд лунсянь лӧддза-номъя тӧлысь 29-ӧд лунӧдз уджаліс штатас научнӧй литература юкӧдын медводдза разряда библиотекарӧн. Веськӧдліс юкӧдас асыввыв-фин котырӧн. Библиотекаысь уволитісны 1937 вося лӧддза-номъя тӧлысь 27-ӧд лунӧ.

1937 вося моз тӧлысь 18-ӧд лунӧ сійӧс арестуйтісны Ленинградын «Контрреволюционная организация блока правых, троцкистов и буржуазных националистов во главе с первым секретарем Коми обкома ВКП(б) А.А. Семичевым» делӧ серти.
1939 вося моз тӧлысь 24-ӧд лунӧ Урал кытшса НКВД войскалӧн военнӧй трибунал пуксьӧдіс 10 во кежлӧ. Мыжаӧн сійӧ асьсӧ эз лыддьы и сетіс аппеляция Медвылыс ёрдӧ, кӧні выльысь видлалісны сылысь делӧ 1940 вося кӧч тӧлысь 10-ӧд лунӧ да сетісны 5 во .
1940 восянь Г.А. Старцев вӧлі ссылкаын Красноярск крайын.
1942 вося йирым тӧлысь 24-ӧд лунӧ муніс фронт вылӧ. Усис Айму вӧсна Ыджыд тыш дырйи 1943 воын Сталинград улын.

Реабилитируйтӧма Коми АССР-са Медвылыс Ёрдлӧн 1956 во лӧддза-номъя тӧлысь 1 лунся 4/360к №-а шуӧмӧн , партияӧ бӧр босьтісны 1989 воын.

Туясян удж

Георгий Старцев аспирантӧн на босьтчис туявны коми, перымса коми, яранъяс (ненча), ӧстякъяс (хантъяс), вӧгулъяс (манси) войтырлысь йӧзкостса культура да кывъяс.

Аспирантураын ветлӧдліс Н.Я. Маррлӧн яфетическӧй семинарӧ, финн-йӧгра кывъяс йылысь тӧдмаліс Д.В. Бубрих да Н.Н. Поппе семинаръясысь. 1927 воын куим тӧлысь стажируйтчис Хельсинки университетлӧн да Берлин университетбердса Венгер институтлӧн финно-угроведение кафедраясын. Та кындзи унаысь ветліс чукӧртны материал экспедицияӧ: Коми (Зыряна) асвеськӧдлан обласьтӧ, Урал обласьтса Перым Коми кытшӧ, Тобольск губернияса Березов уездӧ, Кардор губернияса Большеземельскӧй тундраӧ.

Аспирантӧн на велӧдіс Ленинградса канму университетысь география факультетлӧн этнография юкӧнын (финн-йӧгра этнографияысь семинарий, перымса финн-йӧгра этнографияысь курс). 1925 восянь велӧдіс Войвывса войтыръяслӧн Институтын ӧстяк да вӧгул кывъяс. 1928 восянь — Ленинградса канму педагогика институтлӧн коми юкӧнын доцент (коми войтырлӧн этнография да история), 1931 восянь — ЛИЛИ-ын этнография кафедраса велӧдысь.

ВКП(б)-ӧ пырысьӧн Старцев ноксис общественнӧй уджӧн. Вӧлі пырӧ Ленинградсянь краеведениелӧн Шӧр Бюроӧ, Ленинградса СНР бюроӧ. Вӧлі веськӧдлӧ Ленинградса некымын заводын ленинизм да ӧнія политика партшколаясӧн (Коминтерн нима, Н.Г. Козицкий нима, А.Н. Радищев нима, А.П. Леонов нима трампаркын и с.в.).

Старцев гижис 40 сайӧ удж яран, хант, манси да коми войтырлӧн история, этнография да кывйысь. Йӧзӧдсьыны кутіс 1923 восянь, кор петіс комиӧн медводдза тшупӧда школаяслы методическӧй пособие. 1927 восянь Н.Н. Поппекӧд йӧзӧдіс «Финно-угорские народы» небӧг, мый серти 1950-ӧд вояс помӧдз велӧдісны тайӧ войтырыслысь йӧзкостса культурасӧ. Сідзжӧ лэдзис «Остяки» да «Самоеды» небӧгъяс. Уджъясас вӧлі пыртӧма ас чукӧртӧм уна полевӧй материал. Мукӧд мытшӧдсӧ вӧлі гӧгӧрвоӧдӧ «яфетическӧй теории» боксянь, мый оз лӧсяв збыльыслы. Старцевӧн чукӧртӧм уна этнографическӧй материал вошис арестуйтігас.

Гижан удж

1920-ӧд вояссянь Опонь Ёгор гижліс кывбуръяс, лӧсьӧдіс повесьт (эз и йӧзӧдлыны).

Медшӧр уджъяс

• Свадебные причитания зырян // Материалы по свадьбе и семейно-родовому строю СССР / под ред. Л. Я. Штернберга. – Ленинград, 1926.
• Финно-угорские народы: Очерк. С 12 рисунками / соавтор Н. Н. Поппе. – Ленинград: Тип. "КОМИНТЕРН" Центрального Изд-ва Нар. СССР, 1927. – 47 с.
• Остяки: Социально-этнографический очерк. — Ленинград, 1928.
• Важӧн и ӧні: коми йӧзлӧн олӧм вылӧмыс. — Сыктывдінкар: Коми нига лэдзанін, 1929. — 72 лб.
• Гырысьджык велӧдчысьяскӧд гожся удж // Ичӧт школаын вогӧгӧрся удж. — Сыктывдінкар: Коми нига лэдзанін, 1923. — Лб. 21-29.
• Самоеды (ненча) : историко-этнографическое исследование / Г. А. Старцев ; Институт народов Севера. – Ленинград : Типография Первой Артели Советский Печатник, 1930. – 170 с. : ил. – Библиогр.: с. 158–170.
• Коми фольклор (его изучение и значение; жанры; детский фольклор; что и как изучать). – Сыктывкар, 1933. – 29 с.
• О зауральских зырянах // Коми му. 1926. № 1-2 (23-24). С. 46-50.
• Влияние самоедов на ижемских зырян // Коми му. 1926. №11 (33). С. 31-34.
• Некоторые данные о браке и свадьбе остяков // Материалы по свадьбе и семейно-родовому строю СССР / под ред. Л. Я. Штернберга. Ленинград, 1926.
• Прошлое Гамской волости (Материалы к истории Коми края) // Записки общества изучения Коми края. 1928. Вып. 1. С. 109-112.
• Записки общества изучения Коми края // Коми му. 1929. № 4 (62) . С. 59-60.
• К материалам правописания // Коми му. 1929. № 6 (64). С. 47-50.
• А. Н. Максимов. Происхождение оленеводства // Коми му. 1929. № 7. С. 67. (Критика и библиография). Рецензия на ст. опубликованную в «Ученых записках». М, 1928. С. 1-34.
• Милий Езерский – Самоядь (Закон Нума) // Коми му. 1929. № 7 (65). С. 68. (Критика и библиография). Рецензия на роман (Москва: изд-во «Федерация», 1928)
• Милий Езерский. Чудь белоглазая // Коми му. 1929. № 20 (78). С. 46-47. (Критика и библиография). Рецензия на роман (Москва: изд-во «Федерация», 1929. 317 с.)
• К классификации пережитков и обрядов коми народа // Коми му. 1929. № 13(71). С. 45-51
• Выль коми алфавит лöсьöдöм кузя // Культура фронт. 1930. 5 №. 16-18 л. б. Пер. загл. : О создании нового коми алфавита.
• Издан русско-зырянский словарь Г. С. Лыткина : [информация // Культура фронт. 1931. №4. С. 33.]
• Парне-девичий условный язык у коми (заметка) // Сборник Комиссии по собиранию словаря и изучению диалектов коми языка. Москва, 1931. Вып. 2. С. 51-52

Ӧшмӧсъяс

• Щанов А.И. Эз мойви нимавны : Г.А. Старцев чужан лунсянь — 100 во // Войвыв кодзув. — 2002. — №5. — Лб. 66-71.
• Г. А. Старцев // Создание Автономной области Коми (Зырян) и общества изучения Коми края. Исследователи и краеведы: библиогр. указатель в 100-летию Коми государственности / сост. В. И. Силин. Сыктывкар, 2021. С.101-103.
• Некрасова О. И. Старцев Георгий Афанасьевич // Исследователи коми языка: биобиблиогр. словарь. Сыктывкар, 2017. С. 274-276.
• Сова В. А. Г. А. Старцев – ученый, педагог, краевед // История в событиях и лицах. Страницы истории Национального музея Республики Коми / В. А. Сова. Сыктывкар, 2011. С. 53-57.
• Сова В. А. Неизвестные фотографии этнографа Г. А. Старцева // Известия общества изучения Коми края: Научно-популярный краеведческий журнал. Сыктывкар, 2007. №1. С. 165-170.
• Терюков А. Старцев Георгий Александрович // Ямал: энциклопедия Ямало-Ненецкого автономного округа: В 3 т. Т. 3. Салехард; Тюмень: Изд-во Тюмен. ГУ, 2004. С. 121.
• Терюков А. И. Г. А. Старцев в Ленинграде // Арт. 1999. №2. С. 136-142.
• Плосков И. А. О научной деятельности Г. Старцева (коми этнографа и фольклориста) // Финно-угроведение. 1997. № 1. С. 107-110.
• Рогачев М. Б. Забытое имя // Они любили край родной / отв. ред. И. Л. Жеребцов. Сыктывкар, 1994. С. 243-254.
• Терюков А. И. Старцев Георгий Афанасьевич // Сотрудники РНБ — деятели науки и культуры
• Они любили край родной / Отв. ред. и сост. И. Л. Жеребцов. Сыктывкар, 1993.
• Полещиков В. М. За семью печатями: Из арх. КГБ. Сыктывкар, 1995.