Уква (ю)

Ухта
Ухта
Сикасалӧм
Кузьта	199 км
Ковтыс	4510 км²
Ва рӧскод	48,9 м³/с (13 км ю вомсянь)
Водоток
Ю йыв	юяс ӧтлаасьӧм: Войвож и Лунвож
• Вылна	173,5 м
• География координатаяс	63°52′24″ с. ш. 52°46′18″ в. д.GЯO
Ю вом	Изьва
• Ин	316 км ю вомсянь, Сосногорск кар (Коми Республика)
• География координатаяс	63°36′50″ с. ш. 53°53′25″ в. д.GЯO
Ин
Ва система	Изьва → Печора → Баренц саридз
Страна	Россия;
Регион	Коми Республика
ГВР Код	03050300112103000076400
	— исток, — устье
	Медиафайлы на РУВИКИ.Медиа

Уква (рочӧн Ухта) — тайӧ Коми Республикаын ю (199 км), Изьва юлӧн шуйга вож.

Ним артмӧм

Чуть ю Уква юсянь неылын, 2007 вося вӧльгым тӧлысь

Уква ю Шудаяг весьтын, 2009 вося ода-кора тӧлысь

Тайӧ ю нимыс паныдасьлӧ зэв важӧн нин «Книга Большого Чертежа» небӧгын (1627) — «река Ухна и пала в реку в Ыжму». Ним артмӧм серти эм уна версия.

Ухта гидронимлӧн вужйыс важ финн-йӧгра кывйысь, та йылысь висьталӧ Ухта да сылӧн Охта вариант нимъяслӧн Россиялӧн европа юкӧнса Войвыв гидронимъясын паськыда паськалӧмыс. Тыдалӧ, вӧлӧма «ухта» термин, мый петкӧдлӧма «ю, вис»^[2].

Гидронимлӧн роч форма (Ухта) подулын куйлӧ обдорса йӧгра кывъясысь апеллятив: хант. охгот (охгт), ухгут (ухгт) «кык ю костын вуджанін, кыті кыскӧны пыжъяс», манс. ахт «вис, кӧрӧм». Татшӧм апеллятива ю нимъяс (Ухта, Ухтым, Уктым, Ухтома, Охта, Охтома, Охтомица, Вохтома и др.) йитчӧмаӧсь историческӧй вӧлӧкъясӧн. Уква ю сідзжӧ вӧлі ва кузя вӧлӧка туй юкӧнӧн. Роч Ухта воӧма важъя обдорса йӧгра кывъясысь ухгт «вӧлӧк», -а – роч кывпом, медым йитны род серти роч река терминсӧ да ю нимсӧ. Коми формаыс лоис асшӧра, но сылӧн подулас тайӧ жӧ апеллятивыс. Но сы вӧсна мый коми кывйын оз паныдасьлы ӧтлаын кыкысь унджык согласнӧй шы, а [х] шы вуджӧ [к] шыӧ, то Ухгтва, Ухтва пыдди лоис Уква. Гибриднӧй Уква — «вӧлӧка ю», кӧні Ук артмӧма ухгт «вӧлӧк» кывйысь, и коми ва «ва», «ю» вежӧртасын ^[3].

Уква (Вуква) нимлӧн медводдза юкӧнас кольӧма важ коми вук кыв «шуйга» вежӧртаса (орччӧд Вуктыл). Татшӧм ногӧн, Вуква — «шуйга ю; шуйгаладорсянь усьысь ю». Важ коми кывйын [w] шыыс вӧлі вомдорса, полугласнӧй, мӧд ногӧн кӧ, [в] да [у] костын шӧркодьӧн, мый петкӧдчис Вуква - Уква ним формаясын (орччӧд Удора). Официал Ухта формаыс вермис артмыны Уква формаысь, а бӧрынджык вӧлі ладмӧдчӧма тайӧ регионын паныдасьлысь -та кывъя некымын нимкӧд^[4].

География

Юлӧн кузьта — 199 км (Лунвожсянь — 228 км), ю ковтыс — 4 510 км², пасьта — 60—100 метраӧдз, джуджта — 0,7—2,0 м, визув ӧд — 0,6—0,8 м/сек.

Ю йизьӧ вӧльгым тӧлысь пансигӧн, воссьӧ косму тӧлысь помын — ода-кора тӧлысьын.

Уква ю артмӧ Войвож (кузьта 29 км) да Лунвож (кузьта 29 км) ӧтувтӧмысь, найӧ визувтӧны Тиманлӧн асыввывладорсянь.

Уквалӧн вожъяс: Лоим (27 км), Чуть (48 км) — шуйга вожъяс, Тобысь (106 км) — веськыд

Уква ю вылын сулалӧны: Уква каркытшӧ пырысь Воднӧй да Шудаяг посёлокъяс, Уква кар. Сосногорск районӧ пырысь Уквавом сикт весьтын усьӧ Изьва юӧ.

Ыстӧгъяс

↑ Ресурсы поверхностных вод СССР: Гидрологическая изученность. Т. 3. Северный край / под ред. Н. М. Жила. — Л.: Гидрометеоиздат, 1965. — 612 с.
↑ Поспелов, 2008, с. 466.
↑ А.П. Афанасьев. Топонимия Республики Коми. Словарь-справочник. Сыктывкар: Коми книжное издательство, 1996.
↑ А. И. Туркин. Топонимический словарь Коми АССР. Сыктывкар: Коми книжное издательство, 1986.

[1] Ресурсы поверхностных вод СССР: Гидрологическая изученность. Т. 3. Северный край / под ред. Н. М. Жила. — Л.: Гидрометеоиздат, 1965. — 612 с.

[_7fb05b3afb72ae83-2] Поспелов, 2008, с. 466.

[3] А.П. Афанасьев. Топонимия Республики Коми. Словарь-справочник. Сыктывкар: Коми книжное издательство, 1996.

[4] А. И. Туркин. Топонимический словарь Коми АССР. Сыктывкар: Коми книжное издательство, 1986.

[1]

[2]

[3]

[4]