Ген Алексей Леонидович
| Ген Алексей Леонидович | |
|---|---|
 | |
| Чужан лун | 1965-ӧд вося йирым тӧлысь 10-ӧд лун (60 арӧс) |
| Чужанін | |
| Страна | |
| Мыйся уджыс | шылад тэчысь |
Ген Алексей Леонидович (1965-ӧд вося йирым тӧлысь 10-ӧд лун, Пӧдтыбок, Коми АССР) — коми шылад тэчысь. Коми Республикаса культураын нимӧдана уджалысь (2021 во).
Олантуй
Алексей Ген чужис 1965-ӧд вося йирым тӧлысь 10-ӧд лунӧ Коми АССР-ын Кӧрткерӧс районса Пӧдтыбок посёлокын.
1986 воын помаліс Сыктывкарса искусствояс училище «Баян классын велӧдысь, йӧзкостса инструментъяс оркестрӧн веськӧдлысь» специальносьт серти, а 2002 воын помаліс Петыркарса культура да искусство университет «Социально-культурнӧй удж» специальносьт кузя.
1990 воын кутіс уджавны Кӧрткерӧсса культура керкаын аккомпаниаторӧн. 2015 восянь веськӧдлӧ «Зыряночка» сьылан котырӧн. Ӧнӧдз уджалӧ Кӧрткерӧсса культура да прӧст кад коллялан шӧринын медвылыс категорияа хормейстерӧн, аккомпаниатор-концертмейстерӧн да «Зыряночка» сьылан котырлӧн художественнӧй веськӧдлысьӧн[1].
Олӧ да уджалӧ Кӧрткерӧсын.
Шылад тэчӧм
Кыдзи шылад тэчысь дасьтӧ эстраднӧй сьыланкывъяс, йӧзкостса нырвизя, театръяслы да челядьлы шылад. Гижис коми да роч кывбуръяс вылӧ уна сьыланкыв (кывъясыс Елена Козловалӧн, Зоя Шиликовалӧн, Надежда Мирошниченколӧн, Нёбдінса Витторлӧн и с.в.)[2]. Пырӧдчӧ уна конкурсӧ да фестивальӧ, сылӧн сьыланкывъясыс пыр босьтӧны призъяс да Гран-при, сідз «Василей-2025» вылын сылӧн «Муса сикт» сьыланкыв лоис вермысьӧн «Чужан му йылысь сьыланкыв» нимпасын.
2008 воын Кӧрткерӧс сиктлы 400 во тыригкежлӧ Алексей Ген гижис Кӧрт Айка йылысь легенда серти «Кӧрт Айка йылысь висьталӧм» историческӧй вариантлы шылад, а сідзжӧ Кӧрткерӧс йылысь куим сьыланкыв.
2010 воын гижис Кӧрткерӧс районлысь кып.
Дискъяс
• «Республика моя!» (2009)
Наградаяс
• Коми Республикаса культура да национальнӧй политика министерстволӧн Почёт грамота (2003 во);
• Коми Республикаса Юралысьлӧн Аттьӧалана письмӧ (2006 во);
• Коми Республикаса культура да национальнӧй политика министерстволӧн Аттьӧалана письмӧ (2007 во);
• «Кӧрткерӧс» муниципальнӧй районлӧн Аттьӧалана письмӧ (2008 во);
• Коми Республикаса культура министерстволӧн Почёт грамота (2011 во);
• Коми Республикаса культура, туризм да архив удж министрсянь Коми Республика артмӧдӧмсянь 95 во тырӧмлы сиӧм мероприятиеясын зіля участвуйтӧмысь аттьӧалӧм (2016 во);
• Уна вося бур уджысь Коми Республикаса Почёт грамота;
• Коми Республикаса культураын нимӧдана уджалысь (2021 во)[3].
Пасйӧдъяс
- ↑ Ген Алексей Леонидович (рус.). Управление культуры Корткеросского района. Шыӧдчан кадпас: 17 йирым тӧлысь 2025.
- ↑ Ген Алексей Леонидович (рус.). НБРК. Шыӧдчан кадпас: 17 йирым тӧлысь 2025.
- ↑ Ряд жителей Коми получили государственные награды (рус.). Комиинформ (8 сора тӧлысь 2021). Шыӧдчан кадпас: 17 йирым тӧлысь 2025.