Емватас

«Йӧлӧга шы» фольклор котыр, Коми Республикаса самодеятельнӧй художествоа творчество йӧзкостса котыр, Княжпогост район

Емватас (рочӧн Вымичи) — тайӧ комияслӧн субэтнос чукӧр.

Ним артмӧм

Емватас нимыс петкӧдлӧ войтырлысь овмӧдчанінсӧ. Артмӧма кык кывйысь: Емва да -тас «Емва ю пӧлӧн олысь войтыр».

История

Субэтносыс артмӧма X—XIV нэмъяс гӧгӧрын татчӧс олысь вужвойтырлӧн да Кама бердысь локтӧм йӧз подув вылын. XV—XVII нэмъясӧ татчӧ воӧны уна мукӧд войтыр, тшӧтш и роч йӧз, кодъяс тайӧ местаяс пыр мунісны Сибырӧ, а сідзжӧ военнӧй да вузасян туйті Печӧраӧ.

XV нэмын емватаслӧн этнографическӧй группаыс, тыдалӧ, вӧлі медся ыджыдӧн да вынаӧн. Та вылӧ индӧ и Емва вомын перымса епископъяслы кафедра восьтӧм, и Москваса великӧй князьлысь наместникъяссӧ Емдінса ӧксыясӧн нимтӧм, и сійӧ кадся лоӧмторъясын емвасаяслӧн активнӧя участвуйтӧм. Емдінса ӧксыясысь медся нималанаӧн вӧліны Емдінса ӧксы Ермолай, Емдінса ӧксы Василий Ермолаевич (1460?), Емдінса ӧксы Пётр Васильевич (казьтывсьӧ 1482 воын) да Емдінса ӧксы Фёдор Васильевич (казьтывсьӧ 1482 воын).

XVII нэмын Серегов сикт дорын заводитісны перйыны сов, и та вӧсна тшӧтш локтісны йӧз мӧд муясысь.

Локтӧм йӧз тӧдчӧм улын артмис и коми кывлӧн емва сёрнисикас, мый вылын сёрнитӧны емватас.

Емватаслӧн антропологиялы лӧсялӧ ёнджыкасӧ европеоиднӧй асыввыв балтика сикас.

Овмӧдчӧм

Емватас олӧны Эжва юлӧн веськыд вожын, Емва ю пӧлӧн, Коми Республикаса Княжпогост да Емдін районъясын.

Пасйӧдъяс

Литература

• Жеребцов И.Л. Историко-культурные взаимоотношения коми с соседними народами. — Москва, 1982.
• Лашук Л.П. Формирование народности коми. — Москва, 1972.
• Жеребцов И.Л. Формирование этнографических групп коми (зырян) // Финно-угорский сборник. — Москва, 1982.