Емдінса ӧксыяс

Босьтӧма Рувикиысь
Емдінса ӧксыяс
Кадколаст XV–XVI нэмъяс
Ним ӧксыяс
Рӧдлы подув пуктысь Ермолай
Когнатъяс Ыджыд Перымса ӧксыяс
Чужанін Ыджыд Перымса ӧксыув/Верейскӧй ӧксыув
Подданство Емдінса ӧксыув,
Москваса вына ӧксыув,
Coat of arms of Russia in 17th century.png Роч сарство
Йӧзкотыр удж Емдінса ӧксыулӧн веськӧдлысьяс
Военнӧй удж воеводаяс

Емдінса ӧксыяс (Ермоличьяс) (рочӧн Вы́мские князья́ (Ермо́личи) — ӧксы рӧд, Емдінса ӧксыулын ыджыдалысь династия. Ыджыд Перымса ӧксыяскӧд ӧти рӧдысь.

Чужанін да статус

Унаӧн чайтӧны (С. М. Соловьёв, А. А. Дмитриев, В. В. Голубев, А. А. Зимин, Шашков, Редин, Е. В. Вершинин), мый рӧдыс артмӧма коми-зыряна либӧ перым коми юрнуӧдысьясысь, «сотникъясысь». Мукӧд чайтӧны, мый Перымса (Емдінса да Ыджыд Перымса) ӧксыяс Рюрикович рӧдысь. Тадзи лыддьыліс роч генеалогиялы подув пуктысь М. Г. Спиридов (1751—1829 вояс). Эжва-Емдінса летопись серти (XVI нэм пом — XVII нэм заводитчӧм) Емдінса ӧксыяс вӧліны Москваса вына ӧксы рӧдвужысь (сылӧн Верейскӧй рӧдвужысь)[1]. Тайӧ юӧрсӧ ошкисны В. А. Оборин, В. Н. Давыдов, Л. Д. Макаров, Г. Н. Чагин, С. Ю. Баранов. Ёнджыка подулалӧма сійӧ видзӧдласыс, мый Перымса ӧксыяс вӧліны Косицкий ӧксыяс рӧд пыр Рюрикович рӧдвужысь, кодъяслӧн XV нэм заводитчигӧн вӧліны Верейскӧй ӧксыулын киын кутан муяс (С. Н. Келембет).

Емдінса ӧксыяс вӧліны наместникъясӧн, накӧд ӧттшӧтш уджалісны сотникъясӧн петкӧдлӧм меставывса асвеськӧдлан органъяс. Найӧ петкӧдчисны медшӧр власьт водзын торъя коми-зыряналӧн «вӧлӧсьт-муясӧн». Кыдзи и мукӧд наместникъяс, Емдінса ӧксыяс эз вермыны сюйсьыны налы индӧм «кормление» чукӧртӧмӧ да вайӧмӧ. Кормлениелысь ыдждасӧ стрӧга пасйылісны уставнӧй грамотаясын. Колӧ шуны, Емдінса ӧксыяс торъялісны сійӧ кад кежлӧ лӧсялысь наместникъясысь. Ӧти-кӧ, наместничествоыс налы вуджис бать-мамсяньыс. Мӧд-кӧ, Эжваса Перымын найӧ кутісны киын сідз шусяна «княщина» (мӧд ногӧн кӧ, вотчина муяс), мый артмис кыдзи ыджыд ӧксылӧн пожалование. Тыдалӧ, мый Москваса саръяс аддзисны кутшӧмкӧ тӧлк Емдінса ӧксылӧн бать-мамсянь вуджӧм наместничествоын. Кор Эжва Перым вӧлі Москвалӧн медся асыв-войвыв плацдармӧн, Емдінса ӧксыяс петкӧдлісны сылысь военнӧй вынсӧ да дипломатияын тӧдчанлунсӧ.

История

Ӧшмӧсъяс висьталӧны, мый XV нэмын вогулъяс (йӧгра) зэв лӧгпырысь видзӧдісны кык орчча Перым муса олысьяс вылӧ (Ыджыд Перым да Эжваса Перым вылӧ), кӧть эськӧ и йӧгра, и пермякъяс мынтісны Новгородлы вуз-вот, а комияслӧн вензяна муяс вӧсна ӧта-мӧд костас тышкасисны Новгород республика да Ростов ӧксыув, кодлӧн мыджӧдӧн вӧліны Ростовса Ыджыд Устюгысь землепроходчикъяс. Москва кутіс паськӧдны ассьыс тӧдчанлунсӧ Эжва Перым вылӧ медводз сэк, кор ХIV нэм помын Москваын олысь Киевса да став Роч муса митрополитъяс ыстісны Вежа Степанӧс пыртны коми-зырянаӧс. Аслас земляк-устюгса олысьяс отсӧгӧн епископ Степан вӧтліс татчӧс Пан либӧ Пам нима ӧксы-сотникӧс да сы дор сулалысьясӧс, кодъяслӧн муясыс меститчисны Югдінкӧд орччӧн, язычество пыдди пуктысь племяяс пиысь ӧти — удорасаяс дінын, да Перым муын восьтіс медводдза православнӧй манастыръяс да каръяс, на лыдын Емдінын Перымса епископъясӧн ыджыдалан картор. Степан пырис веськыда Киевса да став Роч муса митрополитлы кипод улӧ, да сэк, кор комияс, кодъясӧн сійӧ веськӧдліс, вермисны 1385—1386 воясся Новгородкӧд тышын, кӧні сы дор тшӧтш сувтісны Москва да Югдін, ветліс Ыджыд Новгородӧ сыкӧд мирнӧй сёрнитчӧм кырымалӧм могысь. Но Пам удорасаяскӧд да вогулъяскӧд ӧтув водзӧ нуӧдіс тышсӧ. Сӧмын 1444 воын Перымса кафедра вылын Степанлысь уджсӧ водзӧ нуӧдысь епископ Питиримлы артмис бурасьны удорасаяскӧд да пыртны найӧс. Перымса сотникъяс Ефимий Эжвин да Емелька Лузьков участвуйтісны Москваса канмулӧн гражданскӧй тышын ыджыд ӧксы Василий Темный дор, мыйысь 1450 воын налысь ловсӧ босьтіс Дмитрий Шемяка.

1451 воын ыджыд ӧксы Василий индіс Перымын аслас наместникъясӧн Эжваса ӧксы Ермолайӧс да сылысь Василий писӧ, а Ермолайлӧн мӧд пиыс Михаил лои Ыджыд Перымӧн вассальнӧй веськӧдлысьӧн. Тайӧ кадсяньыс Ермолай да Василий да налӧн быдтасъясыс босьтісны Емдінса ӧксыяс, а Михаил — Ыджыд Перымса ӧксы ним.

1465 воын Емдінса ӧксы Василий эжва-емдінса ополчение юрнуӧдӧм улын участвуйтіс Москваса полкъяслӧн Йӧгра вылӧ походын. Найӧ вермисны: Сибырын вӧлі босьтӧма зэв уна пленнӧйӧс, а йӧграса кык ӧксыӧс — Калбаӧс да Течикӧс — вайӧдісны Москваӧ. Сэні найӧ сетісны присяга ыджыд князь Иван Васильевичлы, кӧсйысисны мынтыны Москвалы куӧн вуз-вот да бӧр мунісны асланыс муясӧ.

1471 воын Ыджыд Перымса ополчение ӧткажитчис участвуйтны Москваса, сы лыдын и эжва-емдінса, полкъяслӧн Казаньлань походын. Сэки Иван ІІІ казьтыштiс ӧбидаяссӧ, кутшӧмъясӧс вӧчисны Москваса купечьяслы Ыджыд Перымын, найӧ лоисны водзӧс мынтан экспедициялы помкаӧн. 1472 вося тулысын Москваса полкъяс, кытчӧ бара пырисны эжва-емдінса ополчениеяс, Югдінса воевода Фёдор Пестровлӧн ӧтувъя веськӧдлӧм улын жугӧдісны Ыджыд Перымса войскаӧс, коді петіс налы паныд, да босьтісны пленӧ ӧксы Михаилӧс. Сійӧс вайӧдісны Москваӧ, сiйӧ кужис корны ыдыжд ӧксылысь прӧща да бӧр локтiс важ статуснас. Эжва-емдінса ополчение сэсся участвуйтіс Пелым да Йӧгра (1483 во), Вятка вылӧ (1489 во), Печӧра (1499 во) да бара Пелым вылӧ (1500 во) Москваса полкъяслӧн походъясын.

1480 воын емдінсаяс виисны Емдінса ӧксы Василийӧс. Наместник статус да ӧксы ним вуджисны сылӧн челядьлы — Пётрлы да Фёдорлы. Емдінса ӧксыяс кутчысисны Эжва Перымын наместникъясӧн стӧч 50 во. 1502 воын ӧксы Фёдорӧс вӧлі вештӧма Иван ІІІ-ӧн да мӧдӧдӧма Печӧраӧ наместникӧн сы вӧсна, мый Ыджыд Перым босьтӧм бӧрын Эжва Перым дугдіс лоны суйӧрбердса регионӧн, да Емдінса ӧксыяслӧн военнӧй сямлунлы лои мӧд пӧльза. Нӧшта куим во мысти вӧлі вештӧма и Ыджыд Перымса ӧксыясӧс[2].

Рӧдсӧ нималана петкӧдлысьяс

• Емдінса ӧксы Ермолай  (рус.) (коми;
• Емдінса ӧксы Василий Ермолаевич  (рус.) (коми (1460?);
• Емдінса ӧксы Пётр Васильевич (казьтывсьӧ 1482 воын);
• Емдінса ӧксы Фёдор Васильевич (казьтывсьӧ 1482 воын).

Пасйӧдъяс

  1. ↑ Республика Коми: Энциклопедия. — Сыктывкар: Коми книжное издательство, 1999. — Т. 2. — 576 с.
  2. ↑ Вершинин Е. В. Пермь Великая: Как Москва пришла на Урал // Родина. — 2001. — № 11. — С. 37—40.

Литература

  • Вершинин Е. В. Пермь Великая: Как Москва пришла на Урал // Родина. — 2001. — № 11. — С. 37—40.
  • Вершинин Е. В. И ещё раз о князьях вымских и великопермских // Проблемы истории России. — Екатеринбург, 2000. — Вып. 3: Новгород, № 11. — С. 285—305.
  • Вершинин Е. В. Статус князей Вымских и Великопермских как правителей: (Адм. аспект присоед. Сев. Приуралья к Русскому гос-ву) // Культурное наследие Азиатской России: Материалы. I Урало-Сиб. ист. конгр.. — Тобольск, 1997.
  • Голубцов В. В. Князья Великопермские, Пермские и Вымские (1463 — 1641 гг.) // Тр. Перм. учен. архив. комис.. — Пермь, 1892. — Вып. 1.
  • Келембет С. Н. Происхождение князей Пермско-Вымских, Великопермских и Косицких // Древ. Русь: Вопр. медиевистики. — 2017. — № 4 (70). — С. 53—57.
  • Корчагин П. А. Из ранней истории Перми Великой: Князья Пермские и Вымские / Павел Корчагин // Филолог. — 2011. — Вып. 13.
  • Корчагин П. А. Очерки ранней истории Перми Великой: Князья Пермские и Вымские // Вестн. Перм. ун-т. Сер.: История. — 2011. — № 1 (15). — С. 114—124.
  • Петров П. Н. Князья Югорские и Пермские. — СПб., 1881. — Т. I. — С. 203—205.
  • Вычегодско-Вымская (Мисаило-Евтихиевская) летопись // Историко-филологический сборник / Коми филиал АН СССР. — Сыктывкар, 1958. — Вып. 4. — С. 257—271.
  • Вычегодско-Вымская (Мисаило-Евтихиевская) летопись // Родники Пармы. — Сыктывкар, 1989.
Босьтӧма "https://kv.ruwiki.ru/w/index.php?title=Емдінса_ӧксыяс&oldid=482449"-ысь