Цветаев Вячеслав Дмитриевич

Босьтӧма Рувикиысь
Рувикиын эмӧсь мукӧд йӧз йылысь статьяяс, кодъяслӧн овыс Цветаев.
Вячеслав Дмитриевич Цветаев
Цветаев, Вячеслав Дмитриевич.jpg
Чужан лун 1893-ӧд вося тӧвшӧр тӧлысь 17-ӧд лун(1893-01-17)
Чужанін 
Кулан лун 1950-ӧд вося моз тӧлысь 11-ӧд лун(1950-08-11)[1] (57 арӧс)
Куланін 
Канму  Россия империя →
 СССР
Войска сикас пехота
Служитан вояс Россия 1913—1918,
Сӧветскӧй Социалистическӧй Республикаяслӧн Союз 1918—1950
Звание
Поручик поручик
Генерал-полковник
Командуйтіс 6-ӧд армияӧн,
33-ӧд армияӧн,
5-ӧд ударнӧй армияӧн,
войскалӧн лунвыв группаӧн,
М. В. Фрунзе нима военнӧй академияӧн
Тышъяс/вӧйнаяс Медводдза мирӧвӧй вӧйна,
Гражданскӧй вӧйна,
Басмачьяскӧд тыш,
Айму вӧсна Ыджыд тыш
Наградаяс да премияяс
Логотип РУВИКИ.Медиа Медиафайлы на РУВИКИ.Медиа

Цветаев Вячеслав Дмитриевич (1893 вося тӧвшӧр тӧлысь 17-ӧд лун, Малоархангельск — 1950 вося моз тӧлысь 11-ӧд лун, Москва) — сӧветскӧй военачальник, генерал-полковник, Айму вӧсна Ыджыд тыш дырйи армияясӧн командуйтысь командующий, Комиысь Сӧветскӧй Союзса Герой (1945)[2].

Олантуй

Томдыр да Медводдза мирӧвӧй вӧйна

Вячеслав Дмитриевич Цветаев чужис 1893 вося тӧвшӧр тӧлысь 17-ӧд лунӧ Малоархангельск карын, ӧні Орёл обласьтын, кӧрт туй вылын уджалысьлӧн семьяын. Роч. 1910 воын помалӧма школа. 1913 воын велӧдчӧма Тула карса шӧр техническӧй училищеын[2].

1914 вося йирым тӧлыссянь[3] Роч императорскӧй армияын. Пыртӧма радӧвӧйӧн Орёлса 203-ӧд пехотнӧй запаснӧй батальонӧ. 1916 воын помаліс Тифлисса прапорщикъяслысь школа, сэсся индісны младшӧй офицерӧн да ротаса командирӧн Екатериноградскӧй торъя пехотнӧй батальонӧ. 1916 вося моз тӧлыссянь участвуйтіс тышъясын Медводдза мирӧвӧй вӧйнаса Кавказса фронт вылын, кытчӧ вӧлі мӧдӧдӧма тайӧ батальонсӧ. 1917 вося Февральскӧй революция бӧрын служитіс младшӧй офицерӧн 6-ӧд Кавказса армейскӧй корпусса корпуснӧй инженер управлениеын, батальонса командирӧн. Тышъясын повтӧмлунысь наградитӧма кык орденӧн, кадысь водз сетӧма поручик звание.

Октябрса социалистическӧй революция бӧрын, 1918 вося тӧвшӧр тӧлысьын демобилизуйтчис. Овмӧдчис Москваӧ, уджаліс Пресняса машина стрӧитан заводын.

Гражданской вӧйна дырйи

1918 вося ода-кора тӧлысьын пырис Гӧрд Армияӧ доброволечӧн. Вӧлі индӧма 4-ӧд Москваса Сӧветскӧй полкса ротаса командирӧн, регыд муніс Гражданскӧй вӧйна вылӧ. Медводдза кык восӧ воюйтіс Войвыв фронт вылын Кардор дорын, 1918 вося моз тӧлыссянь командуйтіс торъя ротаӧн да торъя батальонӧн. 1918 вося вӧльгым тӧлыссянь — Печӧраса стрелкӧвӧй полкса командир. 1919 вося тӧвшӧр тӧлысьын Шенкурскса операция дырйи командуйтіс Войвыв фронтса партизанскӧй группаӧн. 1919 вося косму тӧлыссянь — Кай-Чердын районса ӧружьеа вынъясӧн командуйтысь, а сійӧ жӧ вося сора тӧлыссянь — Войвыв фронтлӧн Пинега-Печора крайса войскаӧн командуйтысь. 1919 вося ода-кора тӧлысь-лӧддза-номъя тӧлысьын тышкасис Помӧсдін-Немдін-Кажымса завод участокъяс вылын[2]. 1919 вося моз тӧлысьын Мозын, Пинега да Котлас районъясса войскаысь Войвыв фронт вылын вӧлі котыртӧма 54-ӧд стрелкӧвӧй дивизия, кодӧн командуйтны сійӧ жӧ вося ӧшым тӧлысьын индісны В. Д. Цветаевӧс. 1919 воын дивизия 6-ӧд армиякӧд тышкасис Вынва да Пинега юяс вылын, 1920 вося тӧвшӧр тӧлысь-урасьӧм тӧлысьын участвуйтіс Холмогоры да Кардор мездӧмын. 1920 вося косму тӧлысьын вуджӧдісны 7-ӧд армияӧ да воюйтіс фин армиялы паныд Ладожскӧй да Онежскӧй тыяс костын. 1920 вося лӧддза-номъя тӧлысьын дивизиясӧ вуджӧдісны Рытыввыв фронтса 15-ӧд армияӧ да сійӧ участвуйтіс сӧвет-польша вӧйнаын. 1920 вося моз тӧлысьын польшаса вӧйскалӧн контрнаступление дырйи дивизиясӧ вӧлі топӧдӧма Асыввыв Пруссиялӧн границаяс дорӧ. Дивизияыс вуджис сійӧс да сэні вӧлі интернируйтӧма. 1921 воын бӧр бергӧдӧма РСФСР-ӧ.

1918 вося ода-кора тӧлысьын пырис РКП(б)-ӧ, но Польшаын бӧрыньтчигӧн 1920 вося кӧч тӧлысьын пленӧ сюрӧм грӧз дырйи бырӧдіс ассьыс партбилетсӧ, мый вӧсна петіс коммунистическӧй партияысь.

Вӧйнаяс костын да репрессируйтӧм

1921 воын бӧр воӧм бӧрын Цветаевӧс индісны командирӧн Петроградса военнӧй кытшын пытшкӧсса службаса войскалӧн 204-ӧд торъя бригадаын. 1922 воын помаліс Гӧрд Армияса комсоставлысь Военно-академическӧй курсъяс. 1922 вося моз тӧлысьын индӧмаӧсь Петроградса военнӧй кытшлӧн 10-ӧд стрелкӧвӧй дивизияса командирлы отсасьысьӧн. Сійӧ жӧ вося ноябрсянь — Петроградса (1924 восянь — Ленинградса) военнӧй кытшса 56-ӧд москваса стрелкӧвӧй дивизияса командир.

1926 вося вӧльгым тӧлысьын вуджӧдӧмаӧсь Шӧр Азияса военнӧй кытшӧ 3-ӧд Туркестанскӧй стрелкӧвӧй дивизияса командирӧн. 1927 воын помаліс М. В. Фрунзе нима Гӧрд Армияса Военнӧй академия бердын медвылыс начсостав бурмӧдан курсъяс. 1929 вося вӧльгым тӧлысьын индӧмаӧсь 2-ӧд Туркестанса стрелкӧвӧй дивизияса командирӧн. Вит во участвуйтіс басмачьяскӧд тышъясын Лунвыв Туркестанын. 1931 восянь — М. В. Фрунзе нима Гӧрд Армияса Военнӧй академияын ӧтувъя тактика кафедраса старшӧй преподаватель. 1937 вося урасьӧм тӧлысьын индӧмаӧсь Байкалсайса военнӧй кытшын 57-ӧд Урал стрелкӧвӧй дивизияса командирӧн.

1938 вося сора тӧлысь 5-ӧд лунӧ Байкалсайса военнӧй кытшса особӧй отдел арестуйтіс сійӧс да мыжалісны Германиялы пӧльза вылӧ «шпион уджысь». Пуксьӧдӧмаӧсь Читаса тюрьмаӧ, мучитӧмаӧсь: инсценируйтӧмаӧсь лыйлӧм, абу сетӧмаӧсь узьны, нӧйтӧмаӧсь, допросъяс мунӧмаӧсь оръявлытӧг 7 суткиӧдз. Мыждӧмаӧсь сійӧс 1938 вося сора тӧлысь 15-ӧд лунӧ мыж вӧчӧмысь РСФСР-са Уголовнӧй Кодексын 58-1 «б», 58-7, 58-8, 58-9, 58-11 статьяяс серти. 1939 вося косму тӧлысь 30-ӧд лунӧ пыткаяс улын кырымаліс асьсӧ мыжаӧн лыддьӧм йылысь документ, мый сійӧ Германияса разведкалӧн агент, а сідзжӧ военно-троцкистскӧй организацияӧ пырысь, кытчӧ сійӧс вербуйтіс 1937 воын Байкалсайса военнӧй кытшса войскаӧн командуйтысь комкор И. К. Грязнов. Но мыйкӧ дыра мысти тайӧ висьталӧмсьыс ӧткажитчис да мыжаӧн асьсӧ эз лыддьы. 1939 вося кӧч тӧлысь заводитчигӧн СССР-са НКВД-лӧн канму безопасносьт Шӧр веськӧдланінса Торъя отделлӧн постановлениеӧн В. Д. Цветаевӧс вӧлі правдайтӧма мыжалӧмсӧ петкӧдлытӧм вӧсна, 1939 вося кӧч тӧлысь 9-ӧд лунӧ сійӧс вӧлі мездӧма.

Мездӧм бӧрас мӧд луннас шыӧдчис СССР-са оборона Наркоматӧн веськӧдлысьяс дорӧ корӧмӧн бӧр босьтны сійӧс Гӧрд Армияӧ. Мый и вӧлі вӧчӧма.

1939 вося кӧч тӧлыссянь — М. В. Фрунзе нима Военнӧй академияын старшӧй преподаватель, а 1941 вося тӧвшӧр тӧлыссянь — ӧтувъя тактика кафедраса начальник.

Айму вӧсна Ыджыд ты дырйи

Айму вӧсна Ыджыд тыш дырйи 1941 вося сора тӧлысьын генерал-лейтенант В. Д. Цветаевӧс индӧмаӧсь командуйтны войскалӧн оперативнӧй группаӧн Войвыв фронтса 7-ӧд армияын, коді дорйысис Карелияын фин войскаысь. 1942 вося медводдза джынйын — Волхов фронтлӧн 4-ӧд армияса командующӧйӧс вежысь. 1942 вося сора тӧлыссянь — 10-ӧд резервнӧй армияӧн командуйтысь. 1943 воын мӧдысь пырис ВКП(б)-ӧ.

1942 вося ӧшым тӧлысь 6-ӧд лунӧ индӧмаӧсь командующӧйӧс вежысьӧн, а 1942 вося ӧшым тӧлысь 26-ӧд лунсянь 1944 вося ода-кора тӧлысьӧдз — 5-ӧд ударнӧй армияӧн командуйтысьӧн. Сылӧн командуйтӧм улын армия тышкасис Сталинградса, Рытыв-Лунвыв, Лунвыв, 4-ӧд Украинаса, 3-ӧд Украинаса фронтъяс вылын. 1944 вося ода-кора тӧлыссянь кӧч тӧлысьӧдз — медводдза Белорусскӧй фронтса командующӧйӧс вежысь. 1944 вося кӧч тӧлысьын — 6-ӧд армияса командующӧй (вӧлі ВГК Ставка резервын). 1944 вося кӧч тӧлыссянь вӧйна помӧдз — медводдза Белорусскӧй фронт вылын 33-ӧд армияӧн командуйтысь[4].

В. Д. Цветаевлӧн командуйтӧм улын войска участвуйтісны Сталинградса тышын, Ростовса, Миусса, Донбасса, Мелитопольса, Никопольско-Криворожскӧй, Березнеговато-Снигирёвскӧй, Одесскӧй, Висло-Одерскӧй наступайтана да Берлинса наступайтана операцияясын[4].

Торйӧн нин генерал-полковник В. Д. Цветаев петкӧдліс асьсӧ Висло-Одерскӧй наступайтана операция дырйи. Сыӧн веськӧдлан армия ӧдйӧ орӧдіс противниклысь уна эшелона обороналысь некымын полоса, кодъясӧс вӧлі лӧсьӧдӧма Пулаваса плацдармлы паныд. 69-ӧд армиякӧд ӧтвылысь 33-ӧд армия жугӧдіс гырысь немецкӧй группировка Радом да Томашув каръяс дорын, мездіс тайӧ каръяссӧ. Сэсся армия наступайтіс рытыввылӧ, прӧйдитіс став Польша пыр да петіс Одер ю вылӧ. Армия форсируйтіс юсӧ да босьтіс плацдарм. Та дырйи армия мездіс Калиш, Шрем, Швибус каръяс да 800 сайӧ мукӧд сикт-грезд. 1945 вося тӧвшӧр тӧлысьын армия бырӧдіс да босьтіс 60 сюрсысь унджык салдатӧс да офицерӧс, 186 танк да штурмӧвӧй орудие, 1 184 артиллерия орудие, уна мукӧд военнӧй эмбур[5].

Войскаӧн кужӧмӧн веськӧдлӧмысь, та дырйи повтӧмлун петкӧдлӧмысь СССР-са Медвылыс Сӧвет Президиумлӧн 1945 во косму тӧлысь 6-ӧд лунся Индӧдӧн генерал-полковник Цветаев Вячеслав Дмитриевичлы сетӧма Сӧветскӧй Союзса Герой ним Ленин орден да «Зарни Кодзув» медаль сетӧмӧн[4].

Вӧйна бӧрын

Вӧйна бӧрын, 1945 вося сора тӧлысьын В. Д. Цветаевӧс индӧмаӧсь главнокомандующӧйӧс вежысьӧн, а 1947 вося тӧвшӧр тӧлыссянь — войскалӧн лунвыв группаса главнокомандующӧйӧн. 1948 вося тӧвшӧр тӧлыссянь — М. В. Фрунзе нима Военнӧй академияса начальник.

Цветаевлӧн гуыс

Вячеслав Дмитриевич Цветаев кувсис 1950 вося моз тӧлысь 11-ӧд лунӧ. Дзебӧмаӧсь Москваын Новодевичье шойнаын.

Воинскӧй званиеяс

  • прапорщик (1916.05.01);
  • подпоручик (1916.12.06);
  • поручик (1917);
  • комдив (1935.12.05);
  • генерал-лейтенант (1940.06.04);
  • генерал-полковник (1943.09.18).

Наградаяс

Россия империялӧн наградаяс

• Вежа Станислав 3-ӧд тшупӧда орден;
• Вежа Анна 4-ӧд тшупӧда орден[6]

СССР-са наградаяс

• Сӧветскӧй Союзса Герой ним (1945.04.06);
• «Зарни Кодзув» медаль 7416 №-а (1945.04.06);
• кык Ленин орден (1945.02.21, 1945.04.06);
• нёль Гӧрд Дӧрапас орден (1919.07.08, 1930.11.26[7], 1944.11.03, 1948);
• куим Суворов I тшупӧда орден (1943.02.14, 1944.09.02, 1945.05.29);
• Кутузов I тшупӧда орден (1943.09.17);
• Богдан Хмельницкӧй I тшупӧда орден (1944.03.19);
• медальяс.

Суйӧрсайса наградаяс

• «Грюнвальд Крест» III тшупӧда орден (Польша);
• Virtuti Militari орденлӧн эзысь крест (Польша);
• «Одраысь, Нисаысь и Балтикаысь» медаль (Польша);
• «Почёт легион» орден (АӦШ).

Паметь

• Вячеслав Дмитриевич Цветаевлысь нимсӧ сетӧма Одессаын да Орёл карын уличаяслы.
• Тулаын сувтӧдӧма сылы сиӧм казьтылан пӧв.
• Малоархангельскын сувтӧдӧма В. Д. Цветаевлысь бюст.
• Николаевоын Д. Цветаев нимӧн шуӧма улича.
• «Ирина Рава о подвиге Цветаева Вячеслава Дмитриевича» видеосюжет.

Пасйӧдъяс

  1. ↑ 1 2 Цветаев Вячеслав Дмитриевич // Большая советская энциклопедия (рус.): [в 30 т.] / под ред. А. М. Прохоров — 3-е изд. — М.: Советская энциклопедия, 1969.
  2. ↑ 1 2 3 Вайровская С. Цветаев Вячеслав Дмитриевич // Республика Коми. Энциклопедия. Том III. — Сыктывкар: Коми книжное издательство, 2000. — С. 270.
  3. ↑ Мӧд мыччӧдъяс серти, Роч армияӧ В. Цветаевӧс босьтісны вӧйнаӧдз на, 1913 вося йирым тӧлысьын, а Тифлисса прапорщикъяслысь школасӧ помаліс 1915 воын.
  4. ↑ 1 2 3 Наш Герой — генерал-полковник пехоты Цветаев Вячеслав Дмитриевич
  5. ↑ Наградной лист на представление В. Д. Цветаева к званию Героя Советского Союза // ОБД «Память народа».
  6. ↑ В. Д. Цветаев на сайте «Офицеры РИА».
  7. ↑ Герои Гражданской войны. Цветаев Вячеслав Дмитриевич. // Военно-исторический журнал. — 1975. — № 2. — С.69.

Литература

• Черушев Н. С. Из ГУЛАГа — в бой. — М.: Вече, 2006. — С. 254—270. — 512 с. — (Военные тайны XX века). — 5000 экз. — ISBN 5-9533-1588-0
• Соловьёв Д. Ю. Все генералы Сталина. — М., 2019. — ISBN 9785532106444. — С.91—93.
• Лазарев С. Е. Цветаев Вячеслав Дмитриевич // Россия в Гражданской войне. 1918—1922: Энциклопедия: в 3 т. / отв. ред. А. К. Сорокин. Т. 3: Р—Я. М.: Политическая энциклопедия, 2021. С. 608.
• Книга памяти Республики Коми. Т. 12 / составители А. А. Карпов, О. А. Сергичева, Л. Н. Двинская. — Сыктывкар, 2013.
• Герои Советского Союза: крат. биогр. слов. Т.2. — Москва, 1988.
• Герои огненных лет. Книга 2. М.: Московский рабочий, 1976.
• За землю родную. К 20-летию освобождения Орла от немецко-фашистских захватчиков. — Орёл, 1963.
• Звягинцев В. Трибунал для героев. — М., 2005.
• Фролов П. И., Пирогов В. А., Макушев А. Ф. Боевое созвездие орловцев. — Тула,1985.

Ыстӧгъяс

Босьтӧма "https://kv.ruwiki.ru/w/index.php?title=Цветаев_Вячеслав_Дмитриевич&oldid=473044"-ысь