Помӧсдін (Кулӧмдін район)

Видлалӧм гижӧд

Сикт
Помӧсдін
62°11′41″ с. ш. 54°10′39″ в. д.
Страна	Россия
РФ-са субъект	Коми Республика
Муниципальнӧй район	Кулӧмдін
Сикт овмӧдчӧмин	Помӧсдін
Юралысь	Уляшев Анатолий Егорович
История да география
Лӧсьӧдӧма	1695 во
Медводдзаысь пасйӧма	1706 во
Ыджда	18,33 км²
Шӧрин вылна	150 м
Час кытш	UTC+3:00
Йӧз
Олысь лыд	▲2732 морт (2021)
Официал кыв	коми, роч
Лыдпаса идентификаторъяс
Пошта индекс	168090
ОКАТО код	87248865001
ОКТМО код	87648465101
pomozdino-r11.gosweb.gosuslugi.ru
Помӧсдін Помӧсдін

Помӧсдін (рочӧн Помоздино) — Коми Республикаын сикт, Кулӧмдін районысь Помӧсдін сикт овмӧдчӧминса шӧрсикт.

Ним артмӧм

Сиктлӧн нимыс артмӧма гидронимысь, тэчас серти торъялӧ кык юкӧн: Помӧс да дін. Помӧс — тайӧ дженьдӧдӧм ним Помӧсъюлӧн, мый вомын сиктыс пукалӧ, а дін — «ю вом» вежӧртаса кыв. Юлӧн нимыс артмӧма «помӧс» кывйысь. Сійӧ ас кадӧ артмис помны кадакывйысь «тшупны (ю, шор)» —ӧс кыв артмӧдан суффикс отсӧгӧн. Помӧсъю — «тшупӧм, помӧм ю».

География

Сикт пукалӧ Эжва юлӧн веськыд бокын, Помӧсъю вомын. Помӧсдінсянь Кулӧмдін юрсиктӧдз 83 км, Сыктывкар юркарӧдз 250 км.

Кад кытш

Помӧсдін, кыдз и ставнас Коми Республика, меститчӧ МСК (москваса кад) час кытшын. UTC серти кадыс торъялӧ +3:00 вылӧ.

Шахов А. Помӧсдін сикт да сы гӧгӧрса вӧр-ва вывсянь снимайтӧм

История

• Артмис 1678 во бӧрын.
• 1706 — вӧлӧма нин пу вичко.
• 1707 — медводдзаысь казьтыштӧма документъясын.
• 1707 — «Погост Помоздин на усть речки Помоса», 8 овмӧс. Медводдза олысьясӧн вӧліны Немдінысь Симон Наумович Игнатов, Григорий. Никифор да Мокей Фёдорович Карманов вокъяс.
• 1720 — Погостын вӧлі 2 овмӧс.
• 1747 — тані оліс 67 мужичӧй (нывбабаяс йылысь юӧр абу).
• 1782 — Помӧсдін сиктын 25 овмӧс, 200 морт.
• 1825 — кыпӧдӧма кирпичысь вичко.
• 1859 — сиктын вӧлі 52 овмӧс, 271 морт.
• 1861 — восьтӧма вичкобердса школа, 1870-ӧд вояс пансигӧн — земскӧй училище, 1900 — Нывъяслы земскӧй училище.
• 1888 вося ӧшым тӧлысь 6-ӧд лунсянь тӧвшӧр тӧлысь 6-ӧд лунӧдз нуӧдісны ярманга.
• 1889 восянь сиктын уджаліс фельдшер.
• 1901 воын воссис небӧгаин.
• 1901 вося ода-кора тӧлысь 10-ӧд лунӧ Помӧсдінӧ медводдзаысь воис «Любимец» парокод.
• 1902 воын сиктын оліс татчӧ ыстӧм нималана революционер да полярник Русанов В.А..
• 1908 — сиктын вӧлі восьтӧма висьысьясӧс примитанін.
• 1915 — сиктын вӧлі восьтӧма высшӧй начальнӧй училище, директорнас лоис Никитин Николай Никифорович (бӧрыннас Педагогика наукаяс акакдемияса член, геометрия учебник автор).
• 1916 — Помӧсдінын 88 овмӧс, 453 морт; 1926 — 148 овмӧс, 526 морт (Мӧдлапӧв грездтӧг).
• 1930 — Помӧсдінын вӧлі: бурдӧдчанін, школа, изба-читальня, колхозса томуловлӧн школа, видз-му пункт, ветеринарнӧй пункт, нарсудлӧн камера, му ӧтлан вӧдитан товарищество, видз-му коммуна, парокод сувтанін, потребительяслӧн котыр, кредит сетан товарищество, госторглӧн агентство, госспиртлӧн лавка, кресьтяналы общественнӧй отсӧг сетан комитет, милиция участок.
• 1947 воын заводитісны стрӧитны ВЛКСМ-лы 30 во нима Помӧсдінса колхозкостса ГЭС, коді сетіс би 1948 вося йирым тӧлысь 28-ӧд лунӧ. ГЭС уджаліс 1960-ӧд вояс шӧрӧдз.
• 1949 вося сора тӧлысь 7-ӧд лунӧ сикт лоис Помӧсдін районлӧн шӧринӧн (бырӧдӧма 1962 во помын).
• 1950 вося сора тӧлысь 14-ӧд лунӧ Помӧсдін сикт сӧветса Щорс, Сталин, Чапаев нима колхозъяс да «Маяк» ӧтувтӧма ӧти колхозӧ.
• 2000 — 518 овмӧсын оліс 1517 морт.

Олысь лыд

Олысьяслӧн лыд
1782	1859	1916	1926	1959	1970	1979	1989	1992	2000	2007	2010	2020	2021
200	271	453	526	994	1198	1527	1477	1658	1517	1317	1390	1262	2732

500

1000

1500

2000

2500

3000

1959

2010

2020

2021

Медводдза овъяс

• 1720 — Игнатов, Карманов.
• Чисталёв.

Культура

Ылӧдз нималӧ Помӧсдін сиктса культура керкалӧн йӧзкостса театр. Сійӧ котыртіс 1918 воын Тима Вень.

Велӧдӧм

Сиктын эм В. Т. Чисталёв нима шӧр школа.

Нималана йӧз

• Чисталёв Вениамин Тимофеевич (1890—1939) — коми гижысь;
• Чисталёв Иона Тимофеевич (Жан Морӧс; 1893—1923) — коми поэт, вуджӧдчысь, критик, велӧдысь;
• Старовский Владимир Никонович (1905—1975) — Cӧвет кадся тӧдчана уджалысь, профессор (1934), экономикаысь доктор (1940), СССР-са наукаяс академияысь член-корреспондент (1958), Социалистическӧй уджвывса герой (1975);
• Мысов Пантелеймон Ануфриевич (1914—1958) — нималана коми актёр, Коми АССР-са нимйӧза артист (1943), РСФСР-са нимӧдана артист (1946);
• Трошева Юлия Ивановна (1916—1988) — нималана коми актриса, Коми АССР-са нимйӧза артист (1951), РСФСР-са нимйӧза артистка (1980);
• Уляшев Александр Васильевич (1925—1998) — СССР-са нимйӧза велӧдысь (1981);
• Игнатов Михаил Иванович (1933—1999) — коми гижысь.

Тӧдчана эмторъяс

• Успенньӧ вичко;
• Тима Веньлы паметник;
• Домна Каликовалы паметник;
• Краеведческӧй музей;
• Тима Веньлӧн музей;
• Сиктсянь неылын эм «Габшорса» ботаническӧй вӧр-ва памятник.

Литература

• Атлас Республики Коми. — Москва, 2000.
• Жеребцов И. Л. Где ты живешь: Населенные пункты Республики Коми. Историко-демографический справочник. — Сыктывкар, 2000.
• Игнатов М. К. Взгляд сквозь годы. — Сыктывкар: Коми небӧг лэдзанін, 1998. — 224 с.
• Игнатов М. К. Усть-Куломский район: помни прошлое, зная настоящее, делай будущее (1620—2008). — Сыктывкар, 2009. — 366 с.
• История Коми с древнейших времен до конца XX века: В 2-х т. / По общей редакцией А. Ф. Сметанина. — Сыктывкар, 2004.
• Республика Коми: Энциклопедия. — Сыктывкар, 1997—2000. — Т. 1-3.
• Административно-территориальное и муниципальное устройство Республики Коми (на 1 августа 2006 г.). Издание шестое, официальное / ГУ «ТФИ РК». — Сыктывкар, 2006. — 278 с.

Ыстӧгъяс

Помӧсдін сикт овмӧдчӧминса оланінъяс
Ӧнія оланінъяс: Бадьёль • Выльгорт • Кырныша • Мӧдлапӧв • Помӧсдін • Скӧрӧдум • Сордйыв •