Цембер Андрей Андреевич
| Цембер Андрей Андреевич | |
|---|---|
 | |
| Чужан лун | 1874-ӧд вося рака тӧлысь 23-ӧд лун |
| Чужанін |
|
| Кулан лун | 1959-ӧд вося тӧвшӧр тӧлысь 7-ӧд лун (84 арӧс) |
| Куланін | |
| Страна |
|
| Мыйся уджыс | лингвист, фольклор чукӧртысь |
.svg){kind=small}
Цембер Андрей Андреевич (1874 вося рака тӧлысь 11-ӧд лун (важ стиль сертирака тӧлысь 23-ӧд лун), Вӧлӧгда губерняса Усть-Сысольск—1959 вося тӧвшӧр тӧлысь 7-ӧд лун, Пятигорск) — коми кыв да фольклор туялысь, историк, чужан му туялысь, лингвист, архивист, музейщик, велӧдысь, веськӧдлысь и библиотекарь.
Олантуй
Андрей Цембер чужис Вӧлӧгда губерняса Усть-Сысольскын 1874 вося рака тӧлысь 11-ӧд лунӧ (важ стиль сертирака тӧлысь 23-ӧд лунӧ) ичӧт чина морт семьяын. Сылӧн пӧльыс Ксаверий Цембер, кыдзи и сылӧн сизим вок, активнӧя участвуйтіс 1830 вося польскӧй восстаниеын. Ксаверийлӧн пӧшти став вокъясыс пӧгибнитісны, а асьсӧ сійӧс вӧлі ыстӧма Коми муӧ. Андрей Цемберлӧԋ мамыс — коми кресьтянка, батьыс — чиновник. А. Цембер асьсӧ шуліс «природнӧй зырянинӧн». Семьяас вӧлі квайт челядь, Андрей — медыджыд. Школаын велӧдчис бура, босьтіс уездса земствосянь стипендия.
Помаліс вичкобердса да карса училишӧяс, 1893 воын — Тотьмаын велӧдысьяслысь семинария.
20 во уджаліс велӧдысьӧн Керчомъя сиктса народнӧй училишӧын.
Библиотека котыртӧм да сійӧн веськӧдлӧм
А. Цемберлӧн водзмӧстчӧмӧн вӧлі восьтӧма Усть-Сысольскса публичнӧй библиотека. 1899—1915 воясӧ веськӧдліс Усть-Сысольскса публичнӧй библиотекаӧн. Пырӧдчис Юрьё Вихманлӧн (1901-1902 воясӧ), Ууно Таави Сирелиуслӧн (1907 во), Давид Фокош-Фукслӧн да Бенедек Балглӧн (1911, 1913 воясын) экспедицияясӧ [1].
Музейын удж
А. Цемберлӧн водзмӧстчӧмӧн вӧлі лӧсьӧдӧма Роч Войвыв тӧдмалан Кардор котырлӧн Усть-Сысольскса юкӧн (1910). А 1911 воын вӧлі восьтӧма Коми муын краеведческӧй музей (ӧні Коми Республикаса национальнӧй музей).
Цембер 1916 воӧдз сійӧ веськӧдліс музейӧн дон босьттӧг, чукӧртіс экспонатъяс. Сідз, 1928 воын Коми му туялан котыр тшӧктӧм серти сійӧ ветліс Яренскӧ да Великӧй Устюгӧ и вайис сэтысь важ небӧгъяс. 1931 воын на пиысь 120 небӧг вӧлі сетӧма музейӧ. 1932 воын Цембер ветліс Изьваӧ да Печӧра юдорса сиктъясӧ да вайис сэтысь 5 мешӧкын 124 кг книга[2].
Коми муысь ветлӧм
1916—1918 воясӧ уджаліс Вӧлӧгдаын да Юзовкаын коммерческӧй банкын да кооперативын кассирӧн.
Бӧр Коми муын
1918 вося арнас бергӧдчис Усть-Сысольскӧ.
1918 воӧ пырис РКП(б)-ӧ, кытысь сійӧс киритісны 1929 воын, кыдзи «случайнӧя сюрӧм элементӧс», но 1931 воын бӧр пыртісны[3], а сэсся 1935 воын бӧр вӧтлісны «буржуазнӧй национализм» вӧсна.
1918 воӧ Цембер А. уджаліс йӧзӧс велӧдан уездса отделын инспекторӧн да зіля пырӧдчис коми литература лӧсьӧдан комиссия («Школаяслы да йӧзлы зыран литература чукӧртӧм да лӧсьӧдӧм кузя комиссия») уджӧ.
1922 восянь 1936 воӧдз А.А. Цембер вӧлі обласьтса архивын медводдза веськӧдлысьӧн (ӧні Коми Республикаса национальнӧй архив)[4].
Но медыджыд уджӧн А. Цембер лыддис велӧдӧм: сійӧ ветлӧдліс школаясті, лыддис лекцияяс [5].
1924 восянь зіля уджаліс Коми му туялан котырын.
1932 восянь уджаліс Коми пединститут бердын научнӧй сотрудникъяслӧн юкӧнын.
Коми муысь мунӧм
1936 воын муніс Коми муысь бурдӧдчӧм могысь [6], мӧд видзӧдлас серти - интеллигенцияӧс дзескӧдны заводитӧм вӧсна [7].
Куліс Пятигорскын 1959 вося тӧвшӧр тӧлысь 7-ӧд лунӧ.
Туялан да йӧзӧдчан удж
Цембер А. А. вӧлі медводдзаяс пиысь, кодъяс туялісны да гижисны Коми муын революция йылысь.
Цембер А. А. йӧзӧдіс Коми муын медводдза небӧгъяс коми кыв вылын.
• Русско-зырянский словарь / А. А. Цембер. - Усть-Сысольск, 1910. - 68 с.
• Коми мойдан и сьылан кывъяс / чукöртыc А. А. Цембер. - Устьсысольск : Издание Устьсысольского Отдела Архангельского Общества изучения Русского Севера, 1914. - 84 л. б.
• Коми мойдан кывъяс / чукöртыс А. А. Цембер. - Устьсысольск : Тип. " З. Д. Слъдников и К", 1913. - 40, [1 л. б. - Печатайтöма Сыктыв карса отдел кардорса общество И.Р.С. сьöм вылö.]
• Цембер Андрей Андреевич. Дневник / А. А. Цембер ; подгот. текста, вступ. ст. и коммент. проф. Л. П. Рощевской. - Сыктывкар : Изд-во СГУ, 1997. - 189, [1] с. - 5-88584-032-6.
Паметь
2017 воын восьтісны Сыктывкарын А. Цемберӧс казьтылан пӧв[8].
Ӧшмӧсъяс
• Рощевская Л.П. Спасать историю для краеведа Андрея Цембера стало смыслом жизни // «Республика» газетлӧн сайт, 2012 во, тӧвшӧр тӧлысь 18-ӧд лун
• Книжные памятники Республики Коми: коллекция А.А. Цембера
• Краева Н.В. Книги из коллекции А.А. Цембера в Национальном музее Республики Коми: к вопросу о реконструкции // Мудрость книжной культуры в век цифровых технологий: сб. материалов международной научно-практической конференции (Сыктывкар, 7-8 ноября 2007 г.). — Сыктывкар, 2008. — С. 56-76.
Ыстӧгъяс
- ↑ Туркин А. Цембер Андрей Андреевич // Коми язык. Энциклопедия.. — М.: Издательство ДИК, 1998. — С. 544-546.
- ↑ Сова В.А. Основатель этнографического и археологического музея А.А. Цембер // История в событиях и лицах. Страницы истории Национального музея Республики Коми. — Сыктывкар, 2011. — С. 7-9.
- ↑ Таскаев М.В. Цембер Андрей Андреевич // Город Сыктывкар. Энциклопедия.. — Сыктывкар, 2010. — С. 329.
- ↑ Первый архивист
- ↑ Андрей Андреевич Цембер // Исследователи Коми края. — Сыктывкар: Коми книжное издательство, 1984. — С. 76-77.
- ↑ Таскаев М. Цембер Андрей Андреевич // Республика Коми. Энциклопедия. Том III. — Сыктывкар: Коми книжное издательство, 2000. — С. 271.
- ↑ Туркин А. Цембер Андрей Андреевич // Коми язык. Энциклопедия.. — М.: Издательство ДИК, 1998. — С. 544-546.
- ↑ В Сыктывкаре увековечат память о первом архивисте Коми края