Чугаев Николай Михайлович

Чугаев Николай Михайлович
Чугаев Николай Михайлович
Чужан лун	1958-ӧд вося урасьӧм тӧлысь 3-ӧд лун
Чужанін	Грива, Койгорт район, Коми АССР, РСФСР, Сӧветскӧй Социалистическӧй Республикаяслӧн Союз;
Кулан лун	2025-ӧд вося йирым тӧлысь 30-ӧд лун (67 арӧс)
Куланін	Грива, Койгорт район, Коми Республика, Россия;
Страна	Сӧветскӧй Социалистическӧй Республикаяслӧн Союз; Россия;
Мыйся уджыс	коми гижысь

Чугаев Николай Михайлович (1958-ӧд вося урасьӧм тӧлысь 3-ӧд лун, Грива, Коми АССР — 2025-ӧд вося йирым тӧлысь 30-ӧд лун, Грива, Коми Республика) — коми гижысь.

Олантуй

Николай Чугаев чужис Койгорт районса Грива сиктын 1958 вося урасьӧм тӧлысь 3-ӧд лунӧ. 8-класса школа помалӧм бӧрын велӧдчӧма СПТУ-2-ын тракторист-машинист специальносьт серти.

1977—1979 воясӧ служитӧма Зайсанын, Казахстан граница бокын. 1991 воӧдз уджалӧма специальносьт серти «Койгородский» совхозын, фермералӧма. Дзоньтавлӧма телевизоръяс, стӧрӧжалӧма челядь видзанінын. Кужӧма зэв бура тэчны пачьяс.

Туяліс чужан му да Грива кытшса топонимика. Тайӧ темаяс серти йӧзӧдіс некымын сборник, шуам, «Аномальные случаи и места Гривы», «Эпизоды войны», «Битва за хлеб», «Год 1944», «Митит Анна», «И один в поле воин», «Бессмертный батальон». Туяліс да лӧсьӧдіс Грива сиктса семьяяслысь ордпусӧ^[1].

Кувсис 2025 вося йирым тӧлысь 30-ӧд лунӧ Койгорт районса Гриваын^[2].

Гижан удж

2007 восянь йӧзӧдчис «Новая жизнь» газетын, «Войвыв кодзув» журналын. Гижис проза да драматургия жанръясын комиӧн. Гижӧма «Шегъясям» теш (2010), «Кӧнкӧ матын, талапӧлас» повесьт (роч вылӧ вуджӧдӧма А. Н. Чугаева). Небӧгъясыс петӧмаӧсь самиздатӧн. Сылӧн геройясыс абу мӧвпыштӧмаӧсь кытыськӧ, а босьтӧма чужан сиктысь, олӧмысь.

Сылысь пьесаяссӧ пуктӧма Койгорт, Сыктыв, Луздор, Кулӧмдін районъясса сценаяс вылӧ. Сылӧн пьесаяс серти спектакльясыс воисны сьӧлӧм вылас Помӧсдін сиктса Народнӧй театрлы, и режиссёр Н. Е. Шевелева да театрса енбиа труппа отсӧгӧн петкӧдлӧмаӧсь найӧс абу сӧмын Кулӧмдін районса, но и Сыктывкарса сценаяс вылын. Сідз, «Ыргӧн чунькытш» пьесасӧ вӧлі петкӧдлӧма «Коми рытъяс» республикаса театральнӧй фестиваль дырйи 2019 воын.

Койгорт районын Николай Михайлович ачыс пуктіс спектакльяссӧ и ворсіс сэні.

Наградаяс

• «Эзысь борд» литературнӧй конкурсын «Проза» номинацияын лауреат Айму вӧсна Ыджыд тыш кадся гриваса трактористкаяслы сиӧм «Кӧнкӧ орччӧн, тайӧ вадорас…» повесьтысь (2008);
• «Эзысь борд» литературнӧй конкурсын «Драматургия» номинацияын лауреат «Ыргӧн чунькытш» пьесаысь (2009);
• «Эзысь борд» литературнӧй конкурсын «Драматургия» номинацияын лауреат «Шегъясям?» пьесаысь (2010).

Семья

Гӧтрасис 1989 воын, гӧтырыс — Татьяна Евгеньевна. Эм куим ныв: Анна, Мария и Елена.

Пасйӧдъяс

↑ Лысаковская М. Гривенские летописцы (рус.). Республика (6 рака тӧлысь 2009). Шыӧдчан кадпас: 10 вӧльгым тӧлысь 2025.
↑ Николай Михайлович Чугаев (рус.). Койгородская Межпоселенческая ЦБС. Шыӧдчан кадпас: 10 вӧльгым тӧлысь 2025.

[1] Лысаковская М. Гривенские летописцы (рус.). Республика (6 рака тӧлысь 2009). Шыӧдчан кадпас: 10 вӧльгым тӧлысь 2025.

[2] Николай Михайлович Чугаев (рус.). Койгородская Межпоселенческая ЦБС. Шыӧдчан кадпас: 10 вӧльгым тӧлысь 2025.

[1]

[2]