Артеева Агафья Тимофеевна

Артеева Агафья Тимофеевна
Артеева Агафья Тимофеевна
Чужан лун	1918-ӧд вося рака тӧлысь 28-ӧд лун
Чужанін	Мокчой, Печора уезд[d], Кардор губерня[d], РСФСР;
Кулан лун	1996-ӧд вося ода-кора тӧлысь 13-ӧд лун
Куланін	Яран асвеськӧдлан кытшса Каратайка посёлок
Страна	РСФСР[d]; Сӧветскӧй Социалистическӧй Республикаяслӧн Союз; Россия;
Мыйся уджыс	вӧралысь

Артеева Агафья Тимофеевна (1918 вося рака тӧлысь 28-ӧд лун, Кардор губерняысь Изьва-Печора уездса Мокчой сикт — 1996-ӧд вося ода-кора тӧлысь 13-ӧд лун, Яран асвеськӧдлан кытшса Каратайка посёлок) — нималана коми вӧралысь, Ленин орден новлӧдлысь.

Олантуй

Агафья Артеева чужӧма 1918-ӧд вося рака тӧлысь 28-ӧд лунӧ Кардор губерняысь Изьва-Печора уездса Мокчойын (ӧні Изьва районса Мокчой сикт) кӧр видзысь семьяын. Бать-мамыскӧд 1930-ӧд воясӧ овмӧдчӧма Каратайка посёлокӧ, кодӧс сӧмын на вӧлі кыпӧдӧны. 1939-ӧд восянь уджалӧма К.Е. Ворошилов нима колхозын.

Агафьялӧн верӧсыс вӧлӧма вӧралысьӧн. Кор сылы вӧлӧма 23 арӧс, верӧсыс вӧйӧма «Комсомолец» буксир экипажкӧд ӧтвылысь. Агафья босьтчӧма вӧравны, сійӧс велӧдӧма Василий Иванович Филиппов.

А.Т. Артеева вӧралӧма тундраын нелямын вит во — 1942-сянь 1987 воӧдз. Кыйдӧссӧ сдайтӧма канмулы. 1947-ӧд восянь 1957 воӧдз вӧлӧма вӧралысьяс пӧвстын ставсоюзса социалистическӧй соревнованньӧын вермысьӧн.

Куимысь ветлӧма ВДНХ вылӧ. 1956-ӧд воын сійӧс вӧлі бӧрйӧма Юшар сиктсӧветса депутатӧн.

Бур уджысь сылы сетӧма уна аттьӧалана гижӧд, ружйӧ (премиа пыдди), «1941–1945 воясса Айму вӧсна Ыджыд тышын бур уджысь» медаль да «1941–1945 воясса Айму вӧсна Ыджыд тышын Вермӧмсянь 50 во» казьтылана медаль. Вӧралӧмын ыджыд вермӧмъяс шедӧдӧмысь 1971 воын наградитӧма Ленин орденӧн.

Кулӧма 1996-ӧд вося ода-кора тӧлысь 13-ӧд лунӧ Яран асвеськӧдлан кытшса Каратайка посёлокын.

Наградаяс

• Ленин орден (1971)
• «1941–1945 воясся Айму вӧсна Ыджыд тышын бур уджысь» медаль
• «1941–1945 воясся Айму вӧсна Ыджыд тышын Вермӧмсянь 50 во» казьтылана медаль (1995)

Ӧшмӧсъяс

• Ненецкий автономный округ. Энциклопедический словарь / Гл. ред. Корепанова Л.Ю. . — М.: Дом Книги «Аванта+», 2001. — С. 304. — ISBN 5-8483-0040-2.
• Шевелёва Н. Агафья-охотница // Няръяна вындер, 27 дек. 2014 г.
• Талеева Л. И. Артеева Агафья Тимофеевна // Ненецкий автономный округ: Энциклопедия: в 2-х т. / Гл. ред. Корепанова Л. Ю. . — М.: ОСТ ПАК НТ, 2019. — Т. 1. — С. 92.

Ыстӧдъяс