Изьва районлӧн дӧрапас
| официальнӧй ним Коми Республикаса «Изьва» муниципальнӧй районлӧн дӧрапас | |
|---|---|
.png) | |
| Субъект | Изьва район |
| Регион |
 Коми Республика |
| Страна |
 Россия |
| Вынсьӧдӧма | 2012 вося ӧшым тӧлысь 13-ӧд лунӧ |
| Пропорция | 2:3 |
| Автор котыр | |
| Шӧр мӧвп | Ригерт Михаил Георгиевич |
| Вексиллология боксянь лӧсьӧдӧм |
Мочёнов Константин Фёдорович |
| Серпасалысь | Ольга Салова |
| Символикасӧ подулалӧм |
Мишин Вячеслав Васильевич |
Россия Федерацияса Коми Республикаын «Изьва» муниципальнӧй районлӧн дӧрапас — тӧдмалан-инӧда пас, муниципальнӧй юкӧнлӧн официальнӧй символ.
Дӧрапассӧ вынсьӧдӧма 2012 вося ӧшым тӧлысь 13-ӧд лунӧ «Изьва» муниципальнӧй районса Сӧветлӧн 4-16/12 №-а Шуӧмӧн[1] да 2012 вося ӧшым тӧлысь 26-ӧд лунӧ пыртӧма Россия Федерацияса канму геральдика регистрӧ 8047 пасъян номер сетӧмӧн.
Гӧгӧрвоӧдӧм
«Лӧз рӧма кык бока веськыд пельӧса дӧра. Дöрапаслöн пасьтаыс кузьта серти — 2:3. Шӧрас серпасалӧма Изьва районлӧн канпасысь мыгӧръяс: кольквиж кытш, пытшкӧсыс пиня, ортсысяньыс - пиня, быд пинь вылын ичӧтик ромб, пытшкӧсыс турунвиж рӧма. Турунвиж рӧм вылын еджыд рӧма котралысь войвыв кӧр».
Символика подулалӧм
Изьва мулӧн историяыс заводитчӧ XVІ нэмсянь.
XVI нэм помын - XVII нэм заводитчигӧн тӧдчымӧн унджык кутісны ветлӧдлыны Печора да сылӧн вожъяс кузя уна сикас промышленнӧй да тӧргӧвӧй йӧз. Медшӧр туйясысь ӧтиӧн лои Емдін-Изьва ва система. Изьваса комияс вӧралісны, чери кыйисны, видз-му вӧдитісны, кӧр видзисны. Кӧр видзан прӧдукция, медводз няр, кыс, яй вузалӧм лои Изьваса экономикалы подулӧн.
Изьваса этнос заводитіс артмыны ХVI нэм мӧд джынйын. Изьваса этнос артмӧдӧмын участвуйтісны Емдінса да Удораса комияс, войвывса рочьяс да вӧрса яранъяс. Феодальнӧй кад помасигкежлӧ изьваса комияс лӧсьӧдісны кызвыннас кыв да культура аслыспӧлӧслунсӧ, мый сэтшӧм тӧдчымӧн торйӧдӧ найӧс мукӧд коми котыръясысь. Кызвын коми-изьватас олӧны Коми Республикаын Печора шӧрса ковтысын, Печора вожъяс - Изьва да Усва берегъяс пӧлӧн.
Дӧрапаслӧн сюжетыс петкӧдлӧ:
• районлысь, мый меститчӧма войвыв да медся войвыв пармалӧн зонаулын, вӧр-ва условиеяс (лӧз рӧм - юяс да тыяс, турунвиж рӧм - помтӧм вӧр да видзьяс). Вӧрыс кызвыннас козъя. Паныдасьлӧны пожӧм да ниа. Уна естественнӧй видз, торйӧн нин Изьва ю кывтыдын;
• войвыв кӧр, кодтӧг морт оз вермы овны медся войвыв пармалӧн зонаын. Кӧр - сійӧ и яй, и кучик, и бурдӧдчантор, и кыскасян пемӧс;
• 34 пиня кольквиж кытш - индӧ Изьва районӧ пырысь сикт-грезд лыд вылӧ. Национальнӧй узор элементъясыс тӧдчӧдӧны татчӧс вужвойтырлысь аслыспӧлӧслунсӧ, налысь этноссӧ.
Геральдикаын рӧм символика:
• Кельыдлӧз рӧм (лазурь) - ыджыд кӧсйӧмъяс, сьӧлӧмсянь кӧсйӧмъяс, сьолӧмӧн сетчӧм (преданность), ловзьӧм символ;
• Турунвиж рӧм - вӧр-ва, тулыс, дзоньвидзалун, томлун да лача символ;
• Еджыд рӧм (эзысь) - сӧстӧмлун, восьсалун, ен мывкыд, бурасьӧм символ.
История
.svg)
«Изьва» муниципальнӧй районса Сӧветлӧн 2011 во моз тӧлысь 26-ӧд лунся «"Изьва" муниципальнӧй районлысь канпас да дӧрапас вынсьӧдӧм йылысь» Шуӧмӧн вӧлі вынсьӧдӧма районлысь дӧрапас бала. Тайӧ баласӧ колӧ вӧлі видлавны Сӧветлӧн 2011 вося йирым тӧлысь 5-ӧд лунся чукӧртчылӧм вылын, но бӧръя здукас сійӧс киритісны сёрнитанторйысь.
Дӧрапас бала гӧгӧрвоӧдӧмын висьтавсьӧ: «Веськыд пельӧса дӧра. Дöрапаслöн пасьтаыс кузьта серти — 2:3. Сэні эм куим водсанога визь: ӧтчыдысь рибӧм пиньяса вылыс визь, еджыд рӧма улыс визь да турунвиж рӧма шӧрса, налӧн пасьтаыс лӧсялӧ кыдзи 1:4:1. Турунвиж визь шӧрас - дӧрапас кӧрталан шайт дорӧ котӧртысь еджыд рӧма кӧр, кодлӧн сюръясыс да гыжъясыс виж рӧмаӧсь да синмыс гӧрд рӧма».
Вылыс визьыс петкӧдлӧ, мый тайӧ местаыс озыр лыска вӧрӧн. Улыс визьыс тӧдчӧдӧ национальнӧй колоритсӧ. Кӧр петкӧдлӧ, мый татчӧс олысьяс оз сӧмын вӧдитны кӧръясӧс, но кӧр культ тані лоӧ медшӧрӧн.
Видзӧд тшӧтш
Ыстӧгъяс
- ↑ Решение Совета муниципального района «Ижемский» от 13.12.2012 № 4-16/12 «О флаге муниципального образования муниципального района „Ижемский“ Республики Коми»
