Кисляков Василий Павлович

Ортсыса серпасъяс
Ортсыса серпасъяс
	Саридзса пехоталӧн 12-ӧд Краснознаменнӧй бригада Муста-Тунтури гӧра визьті марш дырйи 1944 во.
	Лейтенант Кисляков фронт вылын 1942 во.
	Казьтылан пас геройскӧй тыш инын 2000-ӧд вояс.

Василий Павлович Кисляков
Василий Павлович Кисляков
Чужан лун	1916 вося урасьӧм тӧлысь 20-ӧд лун
Чужанін	Бугаев сикт, Печӧра уезд, Кардор губерня Россия империя
Кулан лун	1990 вося вӧльгым тӧлысь 29-ӧд лун
Куланін	Москва, СССР
Канму	СССР
Войска сикас	ВМФ
Служитан вояс	1937—1955
Звание
Часьт	Мурманскса укрепитӧм районса торъя дегазационнӧй рота; Войвыв флотса морякъяслӧн медводдза добровольческӧй отряд; Войвыв флотса ВМС-лӧн саридзса пехоталӧн 12-ӧд бригада; Черноморскӧй флотса ВМС-лӧн саридзса пехоталӧн 143-ӧд торъя батальон;
Тышъяс/вӧйнаяс	Айму вӧсна Ыджыд тыш

Видлалӧм гижӧд

Кисляков Василий Павлович (1916 вося урасьӧм тӧлысь 20-ӧд лун, Бугаев сикт, Печӧра уезд — 1990 вося вӧльгым тӧлысь 29-ӧд лун, Москва) — капитан, Айму вӧсна Ыджыд тышын участвуйтысь, Комиысь Сӧветскӧй Союзса Герой (1941)^[2]^[3].

Олантуй

Василий Кисляков чужис Чилимдін районса Бугаев сиктын 1916 вося урасьӧм тӧлысь 20-ӧд лунӧ Павел Тимофеевич да Дарья Матвеевна Кисляковъяс кресьтянин семьяын. Роч. Нёль класс бӧрын Василий Кисляков уджаліс батьыслӧн овмӧсын. 1930 воын Кисляковъяслӧн семья пырис колхозӧ. 1932 воын Василий Павлович пырис уджавны Печора ювывса пароходствоӧ. Первойсӧ ветлӧма «Активист» пароход вылын маслёнщиклы отсасьысьӧн, сэсся «Сталинец» пассажирскӧй пароход вылын кочегарӧн.

Гӧрд Армияӧ В. П. Кисляковӧс босьтісны 1937 воын. Служитіс Полярнӧйын берегдорса охранаын. Войнаӧдз старшӧй сержант В. П. Кисляков вӧлі Войвыв флотса ВМС-лӧн Мурманскса укрепитӧм районын торъя дегазационнӧй ротаса взводса командирӧн. Айму вӧсна Ыджыд тыш заводитчӧм бӧрын Войвыв флотса военнослужащӧйясысь вӧлі котыртӧма морякъяслысь добровольческӧй медводдза отряд, кӧні взводса командирлӧн отсасьысь да отделениеса командир старшӧй сержант В. П. Кисляков участвуйтіс Ыджыд Рытыввыв Лица ю вомын десант операцияын. 1941 вося сора тӧлысь 14-18 лунъясӧ Рытыввыв Лица ю вомын отряд тышкасис противниклӧн ыджыдджык вынъяскӧд. Кисляковлӧн отделениеыс дорйис ӧти нимтӧм вывтас. Ӧти тышын, кор боеприпасъясыс пӧшти бырисны, старшӧй сержант В. П. Кисляков тшӧктіс аслас боечьяслы бӧрыньтчыны, а ачыс час чӧж ӧтнасӧн кутіс босьтӧм позицияяссӧ подкрепление матыстчытӧдз, та дырйи бырӧдіс враглысь 100 гӧгӧр салдат^[3].

СССР-са Медвылыс Сӧвет Президиумлӧн 1941 вося моз тӧлысь 13-ӧд лунся Индӧдӧн старшӧй сержант Василий Павлович Кисляковлы вӧлі сетӧма Сӧветскӧй Союзса Герой ним Ленин орден да 532 №-а «Зарни Кодзув» медаль сетӧмӧн^[2].

1941 вося вӧльгым тӧлысь 6-ӧд лунӧ 314,9 вылна вӧсна тышын, Мурманск-Титовка туйкӧд орччӧн, Василий Павловичӧс ранитісны да эвакуируйтісны Мурманскӧ военно-морскӧй госпитальӧ. Бурдӧм бӧрас сійӧс мӧдӧдісны берегдорса оборона штаб бердын офицеръяслы курсъяс вылӧ. Найӧс помалӧм бӧрын младшӧй лейтенант званиеын В. П. Кисляковӧс мӧдӧдісны саридзса пехота 12-ӧд бригадаӧ да индісны разведка кузя 5-ӧд батальонса штабса начальниклы отсасьысьӧн. 1942 вося тулысын Василий Павлович отсаліс петкӧдны десант Мотов лайкола лунвыв берегӧ да Шӧр кӧдж вылын тышъясын. Эз ӧтчыдысь нуӧдлы разведгруппаясӧс противниклӧн пыді тылӧ, вӧчліс налётъяс немечьяслӧн опорнӧй пунктъяс вылӧ Баренц саридз берег вылын.

1943 вося тӧвшӧр тӧлысьын В. П. Кисляковӧс мӧдӧдісны Кардорӧ офицеръяслысь тӧдӧмлун бурмӧдан курсъяс вылӧ. Велӧдчӧм бӧрас сійӧ бӧр локтіс аслас бригадаӧ да вӧлі индӧма автоматчикъяс ротаса командирӧн. 1944 вося йирым тӧлысьӧдз бригада нуӧдіс позиционнӧй бойяс Шӧр кӧдж вылын. 1944 вося йирым тӧлысь 7-ӧд лунӧ Карелияса фронтлӧн войска заводитісны наступайтны. Петсам-Киркенесс операция дырйи 1944 вося йирым тӧлысь 10-ӧд лунӧ морскӧй пехоталӧн 12-ӧд бригада орӧдіс прӧтивниклысь дорйысьӧмсӧ Шӧр кӧдж вылын. Тайӧ тышас старшӧй лейтенант Кисляков медводдзаӧн писькӧдчис немецкӧй дорйысян пункт флангӧ, писькӧдчис медічӧт ылнаӧдз да шыбитіс немецкӧй траншеяӧ гранатаяс, сэсся пырис сэтчӧ да лыйліс ловйӧн кольӧм прӧтивникъяссӧ автомат биӧн. Сӧмын сутки чӧжӧн штурм дырйи сылӧн ротаыс босьтіс 4 немецкӧй дот, кодъясӧс вӧлі кодйӧма скалаясын^[4]. Водзӧ бригада участвуйтіс Петсамо штурмуйтӧмын (ӧні Мурманск обласьтса Печенга кар), мый бӧрын форсированнӧй маршӧн вуджис Муста-Тунтури гӧра визьті да пырис Норвегияӧ. 1944 вося вӧльгым тӧлысь 15-ӧд лун кежлӧ Карелияса фронт вылын вӧйнаыс помасис.

1945 вося урасьӧм тӧлысьын В. П. Кисляковӧс вуджӧдісны Черноморскӧй флотлӧн саридзса пехоталӧн 143-ӧд торъя батальонӧ Дунайса военнӧй флотилия составын. Василий Павлович вӧлі автоматчикъяс ротаса командирӧн, участвуйтіс Вена вылӧ наступайтан операцияын. Василий Павловичлы вӧйнаыс помасис 1945 вося ода-кора тӧлысь 9-ӧд лунӧ Венаын.

Вӧйна бӧрын Василий Павлович водзӧ служитіс армияын. 1946 восянь 1948 воӧдз служитіс Москваын, сэсся сизим во вӧлі Финляндияын сӧветскӧй войскалӧн контингентын ротаса командирӧн. 1955 воын Финляндияысь сӧветскӧй войскаӧс петкӧдӧм бӧрын капитан В. П. Кисляков муніс запасӧ. Оліс Москваын. Пенсия вылӧ петтӧдз уджаліс «Главметрострой», «Красный богатырь» да «Каучук» заводъясын.

Куліс Москваын 1990 вося вӧльгым тӧлысь 29-ӧд лунӧ. Гуалӧма Москваын Троекуров шойнаын.

Наградаяс

• Сӧветскӧй Союзса Герой почёт ним (1941.08.13);
• Ленин орден (1941.08.13);
• «Зарни Кодзув» медаль (532 №) (1941.08.13);
• «Тышын заслугаясысь» медаль
• «Сӧветскӧй Заполярье дорйӧмысь» медаль;
• «1941—1945 воясся Айму вӧсна Ыджыд тышын Германия вермӧмысь» медаль;
• куим Айму вӧсна Ыджыд тышса I тшупӧда орден (1944.12.08; 1945.03.05; 1985.03.11).

Паметь

• Петыркарын меститчысь Медшӧр военно-морскӧй музейын Войвыв флот вылын медводдза Сӧветскӧй Союзса Геройлӧн подвиглы сиӧма стенд.
• Коми Республикаын Бугаев сикт овмӧдчӧминлӧн сельсӧвет здание вылын восьтӧма Василий Кисляковлӧн барельефа казьтылан пӧв^[5].
• Ыджыд Рытыввыв Лица ю берегын, Андреев лайкола дорӧ нуӧдысь туй дорын, 2008 воын восьтӧмаӧсь Геройӧс казьтылан из обелиск^[6].
• Сӧветскӧй Союзса Герой В. П. Кисляковлысь ним сетӧма Москва карын 668 №-а шӧр школалы^[7].
• Сӧветскӧй Союзса Герой В. П. Кисляковлысь ним сетӧма Москва карса Войвыв административнӧй кытшлӧн Дмитровскӧй районын 1631 №-а школалы^[8].
• Сӧветскӧй Союзса Герой В. П. Кисляковлысь нимсӧ сетӧма Коми Республикалӧн Чилимдін районса Чилимдін сиктын уличкостлы да Бугаев сиктын шӧр уличалы^[9].
• Сӧветскӧй Союзса Герой В. П. Кисляковлысь ним сетӧма Коми Республикалӧн Чилимдін районса Бугаев сиктын школалы.
• Документальнӧй фильм «Кисляков Василий Павлович — Герой СССР».

Литература

• «Герои страны» проектын В. П. Кисляков йылысь
• Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1987. — Т. 1 /Абаев — Любичев/. — 911 с. — 100 000 экз. — ISBN отс., Рег. № в РКП 87-95382.
• Бескоровайный А. И. Встречи с героями. — М. : ДОСААФ, 1982. — С. 118—172. — 288 с.
• Букин Н. И. Север, фас! : рассказы. — М. : Малыш, 1979.
• Кисляков В. П. На сопках Заполярья. — Сыктывкар: Коми книжное издательство, 1968. — 120 с.
• Кисляков В. П. За Полярным кругом. — М. : Воениздат, 1977. — 79 с.
• Ягодинский Е. А. Золотые Звёзды речников: очерки о речниках, удостоенных звания Героя Советского Союза: в 4 вып. — М. : ДОСААФ, 1981. — Вып. 4. — С. 43—47. — 118 с.
• Книга памяти Республики Коми. Т. 10 / сост. В. М. Котельников, А. М. Калимова, А. А. Карпов. — Сыктывкар, 2004.
• Книга памяти Республика Коми. Т. 6. / сост. В. М. Котельников, А. М. Калимова, А. А. Карпов. — Сыктывкар, 1998.
• Сорокажердьев, В. В. Они сражались в Заполярье. Герои Советского Союза 1939—1945. Боевые биографии — Мурманск, 2007.
• Бабиков, М. А. Летом сорок первого. 2-е издание. — Сыктывкар, 1985.
• Орлов, В. Герой Советского Союза, старший сержант Василий Кисляков. — М., 1941.
• Александров, А. Семнадцать золотых звезд. — Сыктывкар, 1984.
• Они были первыми. — Сыктывкар, 1988.

Ыстӧгъяс

↑ Ӧні Чилимдін район, Коми Республика.
↑ ¹ ² Книга памяти Республики Коми. Кисляков Василий Павлович
↑ ¹ ² Александров А. Кисляков Василий Павлович // Республика Коми. Энциклопедия. Том II. — Сыктывкар: Коми книжное издательство, 1999. — С. 76.
↑ Старчук И. Морская пехота Северного флота в Петсамо-Киркенесской стратегической наступательной операции. // Морской сборник]. — 2012. — № 5. — С. 54.
↑ Мемориальная доска на здании сельсовета в с. Ср. Бугаево Усть-Цилемского района Республики Коми (неопр.).
↑ Официальный отдел. Вести с флотов. // Морской сборник. — 2008. — № 10. — С. 5.
↑ СОШ «Школа здоровья» N 668 имени Героя Советского Союза В. П. Кислякова, Средняя общеобразовательная школа «Школа здоровья» N 668 имени Героя Советского Союза В. П. Кислякова — …
↑ Школа № 1631 им. Героя Советского Союза В. П. Кислякова, Школа № 1631 имени Героя Советского Союза В. П. Кислякова — Учёба.ру
↑ Репортаж 21. Наш Герой — капитан ВМФ Кисляков Василий Павлович

[1] Ӧні Чилимдін район, Коми Республика.

[:1-2] ¹ ² Книга памяти Республики Коми. Кисляков Василий Павлович

[:2-3] ¹ ² Александров А. Кисляков Василий Павлович // Республика Коми. Энциклопедия. Том II. — Сыктывкар: Коми книжное издательство, 1999. — С. 76.

[4] Старчук И. Морская пехота Северного флота в Петсамо-Киркенесской стратегической наступательной операции. // Морской сборник]. — 2012. — № 5. — С. 54.

[5] Мемориальная доска на здании сельсовета в с. Ср. Бугаево Усть-Цилемского района Республики Коми (неопр.).

[6] Официальный отдел. Вести с флотов. // Морской сборник. — 2008. — № 10. — С. 5.

[7] СОШ «Школа здоровья» N 668 имени Героя Советского Союза В. П. Кислякова, Средняя общеобразовательная школа «Школа здоровья» N 668 имени Героя Советского Союза В. П. Кислякова — …

[8] Школа № 1631 им. Героя Советского Союза В. П. Кислякова, Школа № 1631 имени Героя Советского Союза В. П. Кислякова — Учёба.ру

[9] Репортаж 21. Наш Герой — капитан ВМФ Кисляков Василий Павлович

[1]

[2]

[3]

[4]

[5]

[6]

[7]

[8]

[9]