Сафонов Владимир Ильич

Владимир Ильич Сафонов
Владимир Ильич Сафонов
Чужан лун	1917 вося кӧч тӧлысь 5-ӧд лун
Чужанін	Перым кар
Кулан лун	1993 вося вӧльгым тӧлысь 22-ӧд лун
Куланін	Пушкино кар, Москва обласьт
Канму	СССР
Войска сикас	авиация
Служитан вояс	1937—1946
Звание
Тышъяс/вӧйнаяс	Айму вӧсна Ыджыд тыш
	Медиафайлы на РУВИКИ.Медиа

Сафонов Владимир Ильич (1917 вося кӧч тӧлысь 5-ӧд лун, Перым кар — 1993 вося вӧльгым тӧлысь 22-ӧд лун, Пушкино кар, Москва обласьт) — гвардияса капитан, Айму вӧсна Ыджыд тышын участвуйтысь, Комиысь Сӧветскӧй Союзса Герой (1944)^[1].

Олантуй

Владимир Сафонов чужис 1917 вося кӧч тӧлысь 5-ӧд лунӧ Перым карын уна челядя семьяын. Шӧр школа помалӧм бӧрын уджаліс электрослесарӧн, уджкӧд ӧттшӧтш занимайтчис аэроклубын. 1937 воын Сафоновӧс босьтісны служитны Гӧрд Армияӧ. 1939 воын сійӧ помаліс Перымса военнӧй авиация школа, сійӧс помалӧм бӧрын уджаліс сэні инструкторӧн^[1].

1942 вося моз тӧлыссянь — Айму вӧсна Ыджыд тыш вылын^[2]. Участвуйтіс Сталинградса тышын, дорйис Ленинград^[1].

1944 вося йирым тӧлысь кежлӧ гвардияса капитан Владимир Сафонов командуйтіс СССР-са ылі лэбалан авиациялӧн 2-ӧд гвардейскӧй авиакорпусса 8-ӧд гвардейскӧй авиадивизияса 8-ӧд гвардейскӧй авиаполклӧн эскадрильяӧн. Сэк кежлӧ сійӧ вӧчис 242 боевӧй рейс (на пиысь 225-ысь лэбаліс войын), бомбитіс противниклысь техника да ловъя вын^[2].

В. И. Сафонов участвуйтіс Орёл, Белгород, Брянск, Харьков, Киев да Псков мездӧмын, лэбавліс враглӧн пыді тылӧ. Война воясӧ В. И. Сафонов вӧчис 270 боевӧй рейс^[1].

Сійӧс кыкысь вӧзйылісны Ленин орден вылӧ (1943.04.15; 1943.10.01), но кыкнанысьсӧ сійӧс наградитлӧмаӧсь Гӧрд Дӧрапас орденъясӧн^[1].

Кыкысь вӧзйылісны Сӧветскӧй Союзса Герой ним вылӧ. Медводдзаысь — 1944 вося рака тӧлысьын^[1].

СССР-са Медвылыс Сӧвет Президиумлӧн 1944 во вӧльгым тӧлысь 5-ӧд лунся Индӧдӧн «немецкӧй захватчикъяскӧд тыш нуӧдігӧн командованиелысь боевӧй заданиеяс образцӧвӧя олӧмӧ пӧртӧмысь да та дырйи мужество да героизм петкӧдлӧмысь» гвардияса капитан Владимир Сафоновлы вӧлі сетӧма Сӧветскӧй Союзса Геройлысь ним Ленин орден да 5100 №-а «Зарни Кодзув» медаль сетӧмӧн^[2]. Тайӧ жӧ индӧдӧн вӧлі сетӧма Сӧветскӧй Союзса Геройлысь ним лётчикъяс Г. Г. Агамировлы да М. М. Кирилловлы, бӧрыннас найӧ олісны да уджалісны Вӧркутаын^[1].

1946 воын Сафонов муніс запасӧ. Оліс да уджаліс Коми АССР-са Вӧркута карын, гражданскӧй авиацияын, вӧлі страна войвылын авиационнӧй отрядса пилотӧн, лэбаліс Обдор-Вӧркута трасса кузя^[1]^[3]. Ӧти рейс дырйи лоис неминуча, и Сафоновлысь кок пӧвсӧ чинтісны:

Асывнас воис Обдорысь лёк юӧр — усьӧма самолёт, эмӧсь доймӧмаяс, срочнӧя колӧ хирургическӧй отсӧг. Делӧыс сыын, мый тайӧ самолётыс вӧлі вӧркутаса да лэбалісны сы вылын… груз колльӧдысь Лев Баух, Польшаса комсомол ЦК-лӧн вӧвлӧм секретар, да экипажса командир Володька Сафонов, Сӧветскӧй Союзса Герой, бомбардируйтан авиацияса вӧвлӧм лётчик… Лэбаліс сійӧ тані Обдор да Вӧркута костын важ «Дуглас» самолётӧн вӧльнӧй мортӧн, новліс сёян-юан. Обдорын лэбзян площадкаыс ичӧтик, мыйкӧ эз артышт тайӧ пӧрйӧ Володька, тэрмасис кыпӧдчыны, да, тыдалӧ, эз удит ӧдсӧ содтыны, уси полоса вылӧ. Штурман шокысла куліс, командирӧс ёна личкис да жугӧдіс кокъяссӧ, а вот Лева веськаліс вый тыра ящикъясӧ да коли дзоньвидзаӧн.
Володькаӧс вайисны Вӧркутаӧ, сы вӧсна мый Обдорын эз вӧчны татшӧм операциясӧ. Ошурков (Григорий Андриянович Ошурков — Вӧркутаын медводдза хирург) некымын операция бӧрын ловзьӧдіс сійӧс, а вот кок пӧвсӧ спаситны эз артмы. Вундісны кок пӧвсӧ герой-лётчиклысь…^[4]

Тайӧ лоӧмтор бӧрын регыд мысти Сафонов муніс овны Москва обласьтса Пушкино карӧ.

Кувсис 1993 вося вӧльгым тӧлысь 22-ӧд лунӧ, дзебӧмаӧсь Пушкино районса Кавезинскӧй шойнаын.

Наградаяс

• Сӧветскӧй Союзса Герой (1944.11.05);
• Ленин орден (1944.11.05);
• «Зарни Кодзув» медаль (1944.11.05);
• Айму вӧсна Ыджыд тышса I тшупӧда орден;
• кык Гӧрд Дӧрапас орден;
• Александр Невскӧй орден;
• медальяс^[2].

Паметь

• Полтава карын (Украина) Ылі лэбалан авиацияса Геройяслы казьтылан пас (1983 во);
• Перым карын сувтӧдӧма Сӧветскӧй Союзса Геройяслы стела (2013 во);
• Перым карын Офицеръяслӧн гарнизоннӧй керка зданиелӧн фасадын меститӧма казьтылан пӧв вылын;
• Перым карса 47 №-а шӧр школаын Боевӧй слава музейын мемориальнӧй пӧв (мемориальнӧй пӧв вылын гижӧд: «Тані велӧдчисны Сӧветскӧй Союзса Геройяс: А. В. Гашков, А. И. Крохалев, С. Ф. Куфонин, И. Г. Лядов, В. А. Полыгалов, В. И. Сафонов, Е. М. Ежов», 2010 во).
• Видеосюжет Сафонов Владимир Ильич. Герой Советского Союза.

Пасйӧдъяс

↑ ¹ ² ³ ⁴ ⁵ ⁶ ⁷ ⁸ Репортаж 33. Наш Герой — гвардии капитан авиации Сафонов Владимир Ильич
↑ ¹ ² ³ ⁴ Сафонов Владимир Ильич (рус.). Сайт «Герои страны».
↑ Герой Советского Союза лётчик Владимир Сафонов
↑ Стахорский, Д. Ночное солнце / Д. Стахорский. — Сыктывкар: Кировская областная типография, 2009. — С. 71.

Литература

• Герои Советского Союза: Краткий биографический словарь / Пред. ред. коллегии И. Н. Шкадов. — М.: Воениздат, 1988. — Т. 2 /Любов — Ящук/. — 863 с. — 100 000 экз. — ISBN 5-203-00536-2.
• Герои Прикамья. — Пермь: Пушка, 2006.
• Золотые Звёзды Прикамья. — 3-е изд. — Пермь, 1974.
• Воркута в годы Великой Отечественной войны 1941—1945 / Воркутинский музейно-выставочный центр, Централизованная библиотечная система. — Пермь: Типография «Астер Плюс», 2021. — С. 100—102.
• Гордость и слава пушкинцев / составители Л. Д. Хорева [и др.]. — Москва: Зарница, 2009.
• Панченков, В. В. Золотые звёзды пушкинцев. В 2-х т. Т. 1 / Василий Панченков. — Москва : ГРАФ Сервис, 2015.
• Стахорский, Д. Ночное солнце / Д. Стахорский. — Сыктывкар: Кировская областная типография, 2009. — С. 71.

[:1-1] ¹ ² ³ ⁴ ⁵ ⁶ ⁷ ⁸ Репортаж 33. Наш Герой — гвардии капитан авиации Сафонов Владимир Ильич

[wh-2] ¹ ² ³ ⁴ Сафонов Владимир Ильич (рус.). Сайт «Герои страны».

[3] Герой Советского Союза лётчик Владимир Сафонов

[4] Стахорский, Д. Ночное солнце / Д. Стахорский. — Сыктывкар: Кировская областная типография, 2009. — С. 71.

[1]

[2]

[3]

[4]