Холопова Диана Григорьевна
| Холопова Диана Григорьевна | |
|---|---|
 | |
| Чужан лун | 1949-ӧд вося тӧвшӧр тӧлысь 2-ӧд лун (77 арӧс) |
| Чужанін | |
| Страна | |
| Мыйся уджыс | коми литература туялысь, общественнӧй удж вӧчысь |
Холопова Диана Григорьевна (1949-ӧд вося тӧвшӧр тӧлысь 2-ӧд лун, Джеджим, Коми АССР) — коми литература туялысь, Иван Куратовлӧн литература музейӧн веськӧдлысь (1988—2021), Коми Республикаса культураын нимӧдана уджалысь. Нывдырся овыс — Напалкова.
Олантуй
Диана Холопова чужӧма Коми АССР-ын Кулӧмдін районса Джеджим грездын 1949-ӧд вося тӧвшӧр тӧлысь 2-ӧд лунӧ. Мамыс — Напалкова Елена Васильевна, батьыс — Напалков Григорий Иванович, кыкнанныс вӧліны Айму вӧсна Ыджыд тышын. Мамыс война бӧрын дзик пенсия вылӧ петтӧдзыс уджаліс начальнӧй классъяс велӧдысьӧн, батьыс уджаліс колхозын трактористӧн, бригадирӧн, председательӧн.
Диана Холопова 1957 воын пырис велӧдчыны Джеджимса начальнӧй школаӧ, 1961—1965 воясӧ велӧдчӧма Кулӧмдін районса Донса кӧкъямыс класса школаын, 1967 воын помалӧма Кулӧмдінса шӧр школа. 1967—1968 воясӧ уджаліс Джеджимса начальнӧй школаын начальнӧй классъяс велӧдысьӧн. 1968 воын пырис велӧдчыны Коми канмуса педагогика институтӧ историко-филологическӧй факультетӧ. 1972 воын помаліс институтсӧ «Роч кыв да литература. Коми кыв да литература» специальносьт серти.
1972 воын пырис уджавны Кулӧмдін районын Шӧръягса кӧкъямыс класса школаӧ роч да коми кыв да литература велӧдысьӧн. 1973 восянь 1974 воӧдз вӧлі тайӧ жӧ школаас завучӧн, 1974 восянь 1975 воӧдз — директорӧн.
1975 воын вуджис овны Сыктывкарӧ да пырис уджавны И. А. Куратовлӧн литературнӧй музейӧ научнӧй сотрудникӧн да уджаліс тайӧ чинын 1988 воӧдз. 1988 восянь 2021 воӧдз вӧлі музейын директорӧн, 2021 восянь 2024 воӧдз — научнӧй сотрудникӧн[1].
Ӧні пенсия вылын.
Общественнӧй удж
Зіля пырӧдчӧ Коми му туялан котырлӧн да «Коми войтыр» ӧтмунӧмлӧн уджӧ.
Тӧдмӧдӧ йӧзсӧ коми гижысьяслӧн олӧмӧн да творчествоӧн библиотекаясын, велӧдчанінъясын, научнӧй да краеведческӧй конференцияяс вылын, «Войвыв кодзув» журналын, радио пыр да с.в.[2][3].
Туялан уджъяс
- Холопова Д. Г., Ерофеева Л. А., Краева Н. В. Они не вернулись с войны: о жизни и творчестве коми писателей-фронтовиков. — Сыктывкар: Анбур, 2017. — 143 с.
- Холопова Д. Г., Ерофеева Л. А. Ты за меня, тайга, договори… — Сыктывкар: Эскӧм, 2024. — 126 с.
Наградаяс
• «Сиктын культурнӧй шефствоын отличник» пас (1986);
• «Уджвывса ветеран» медаль (1990);
• Коми АССР-са Медвылыс Сӧвет Президиумлӧн Почёт грамота (1991);
• «Культураын заслугаясысь» Россия Федерацияса культура министерстволӧн морӧсвыв пас (1998);
• «Сыктывкар» КК МЮ Администрациялӧн Почёт грамота (2006);
• Коми Республикаса культура да национальнӧй политика министерстволӧн аттьӧалӧм (2007);
• Коми Республикаса культура министерстволӧн аттьӧалана гижӧд (2008);
• Культура юкӧнын Коми Республикаса Веськӧдлан котырлӧн премияа лауреат (2009);
• «Коми Республикаса культураын нимӧдана уджалысь» почёт ним (2009);
• Россияын музей удж сӧвмӧдӧмӧ ыджыд пай пуктӧмысь Россияса музейяс котырлӧн Почёт грамота (2011);
• Коми Республикаса Юралысьлӧн аттьӧалӧм (2014);
• «Коми Республикалы 95 во» казьтылан медаль (2016);
• «Эзысь борд» литературнӧй конкурсын «Публицистика» нимпасын вермӧмысь диплом (2019);
• Коми Республикаса национальнӧй политика министерстволӧн аттьӧалана гижӧд (2019);
• Чужан му туялӧм сӧвмӧдӧмӧ да паськыда тӧдмӧдӧмӧ ыджыд пай пуктӧмысь Коми Республикаса Юралысьлӧн дона козинӧн ошкӧм (2022);
• «Эзысь борд» литературнӧй конкурсын «Публицистика да литературнӧй критика» нимпасын вермӧмысь диплом (2023);
• Коми Республикаса гижысь котырлӧн Почёт грамота (2024).
Пасйӧдъяс
- ↑ Пунегова Н. Тӧдам! Помнитам! Гӧрдитчам! (рус.). Коми му (11 ода-кора тӧлысь 2022). Шыӧдчан кадпас: 22 йирым тӧлысь 2025.
- ↑ Коми книги военных лет (рус.). Сыктывкарская ЦБС (24 рака тӧлысь 2025). Шыӧдчан кадпас: 22 йирым тӧлысь 2025.
- ↑ И вернусь домой я непременно... (рус.). Эжвинская ЦБС (15 косму тӧлысь 2025). Шыӧдчан кадпас: 22 йирым тӧлысь 2025.