Шондібан
| Шондібан | |
|---|---|
 "Шондібан" гаж заводитчӧм, 2024 во | |
| Кутшӧм кадсянь | 1991 восянь |
| Кадпас | моз тӧлысь 22-ӧд лун |
«Шондібан» (рочӧн лик солнца) — Коми Республикаса йӧзкостса художествоа творчестволӧн гаж.
Гажсӧ пасйӧны моз тӧлысь 22-ӧд лунӧ, Коми Республикалӧн лунӧ.
Йӧзкостса художествоа творчестволӧн «Шондібан» республикаса гаж 1992-2016 воясӧ вӧлі Коми Республикаса йӧзкостса художествоа творчестволӧн традиционнӧй да медшӧр праздникӧн. 2024-ӧд воын бӧр заводитісны нуӧдны гажсӧ[1].
Гажлӧн медшӧр символыс — Шонді. Сыкӧд топыда йитчӧмаӧсь мукӧд символъяс — ва да му.
История
«Шондібан» республикаса гаж котыртны ас кадӧ вӧзйис Коми Республикаса искусствоын нимӧдана уджалысь Лидия Чувьюрова, кодлы 2024-ӧд воын тырӧ 75 во.
«Шондібан» гаж медводдзаысь вӧлі нуӧдӧма 1991 вося моз тӧлысь 18-ӧд лунӧ (гажлӧн нимыс вӧлі «Шондібанӧй»)[2].
1992-2016 воясӧ вӧлі Коми Республикаса йӧзкостса художествоа творчестволӧн традиционнӧй да медшӧр праздникӧн.
8 во гажсӧ эз нуӧдны.
2024-ӧд вося моз тӧлысь 22-ӧд лунӧ, Коми Республикалӧн лунӧ вӧлі выльысь котыртӧма тайӧ гажсӧ[3][4][5].
"Шондібанӧй" гажлӧн афиша, 1991 во
"Шондібан" гажлӧн эмблема, 2016 во
"Шондібан" гажлӧн эмблема, 2024 во
Пасйӧм
Коми Республикаса муниципальнӧй юкӧнъясысь быд котыр петкӧдлӧ творческӧй уджтас, кытчӧ пырӧны фольклор, сьыланкыв, хореография жанръяс. Уджтасын позьӧ петкӧдлыны ас сиктлысь, районлысь традицияяс, татчӧс традиционнӧй гажъясысь юкӧнъяс. Котыръяс вермасны пыртны уджтасӧ районлы лӧсялана хороводъяс, йӧктӧмъяс, ворсӧмъяс, сьыланкывъяс да обрядъяс[6].
2024 воын шӧр гажыс муніс Сыктывкарса Киров нима паркын. Вӧлі котыртӧма уна сикас площадка.
Шӧр сцена вылын Сыктывкарысь, Сосногорскысь, Ухтаысь, Воркутаысь, Сыктывдін, Кӧрткерӧс, Сыктыв, Койгорт, Емдін, Кулӧмдін, Луздор, Княжпогост да Мылдін районъясысь любительскӧй котыръяс петкӧдлісны концерт да йӧзкостса обрядъяс.
«МедБурКад» квартирник сяма камернӧй сцена вылын том артистъяс петкӧдлісны коми йӧзкостса традицияяссӧ ӧнія форматын.
«Вӧрлӧн лов» площадка вылын ворсӧмӧн гӧсьтъяс тӧдмасисны коми преданиеса геройяскӧд да коми прӧмыслӧвӧй календаркӧд, пырӧдчисны войвыв вӧр йылысь викторинаясӧ, выль велӧдчан во водзвылын запасӧн вӧчисны кос дзоридзьясысь небӧг закладкаяс.
Гаждырся ярманга вылын мастеръяс вӧзйисны карса олысьяслы да гӧсьтъяслы йӧзкостса художественнӧй прӧмыселса вӧчӧмторъяс.
Шылада инструментъяса площадка вылын петкӧдлісны коми национальнӧй шылада инструментъяс: сюмӧдысь вӧчӧм шур-шар, жургысь зиль-зёль, чипсан да с.в. Видзӧдысьяс тӧдмасисны инструментъяс вӧчан технологияӧн.
«Коми традиционнӧй культура сӧвмӧдан ӧнія проектъяс да ӧтмунӧмлӧн вектор» площадкаын туялысьяс, дизайнеръяс, мастеръяс, урбанистъяс, методистъяс, музыкантъяс, ас вылӧ уджалысьяс да общественникъяс юксисны коми традиционнӧй культураын уджалан опытӧн да сійӧс актуализируйтан бур практикаӧн. Таысь кындзи, площадка вылын вӧлі котыртӧма чая пикник, петкӧдлісны художественнӧй да мультипликационнӧй кинояс, петкӧдлісны этномода.
«Шондібан» гаж помасис коми йӧктӧмӧн да уна йӧза хоровӧдӧн, кытчӧ пырӧдчисны став творческӧй котыръяс да видзӧдысьяс[7].
Наградаяс
2017 воын сетӧма «Грани театра масс» ставрочмувывса премиялӧн театр искусствоса уна йӧза формаяс юкӧнын шедӧдӧмторъясысь «Медбур национальнӧй гаж» номинацияын III местаысь диплом[8].
Ыстӧдъяс
- ↑ В Сывктывкаре провели возрожденный республиканский фестиваль национальных культур «Шондiбан» - «Лик солнца»
- ↑ Жеребцов Л., Мельникова Н. Популярная история Республики Коми. — Сыктывкар: ООО «Коми республиканская типография», 2016. — С. 120.
- ↑ Восемь лет спустя: в Коми возродили праздник народного творчества "Шондiбан"
- ↑ В Сыктывкаре после восьмилетнего перерыва состоится Республиканский праздник народного творчества «Шондiбан»
- ↑ В День Республики Коми будет возрождён праздник народного художественного творчества «Шондiбан»
- ↑ Шондібан
- ↑ Праздник к Дню Республики
- ↑ "Шондібан" признан одним из лучших национальных праздников