Елькин Василий Иванович
| Елькин Василий Иванович | |
|---|---|
| Чужан лун | 1912-ӧд вося сора тӧлысь 15-ӧд лун |
| Чужанін |
|
| Кулан лун | 1942-ӧд вося рака тӧлысь 21-ӧд лун (29 арӧс) |
| Куланін | |
| Мыйся уджыс | поэт, журналист |
Елькин Василий Иванович (комиӧн – Иван Вась, Домна Вась) (1912–1942) – коми поэт, журналист, вуджӧдчысь.
Олан туй
- 1912, сора тӧлысь 15 лун — Чужис Вӧлӧгда губернияса Усть-Сысольск уездысь Кырув грездын гӧль кресьтянин семьяын.
- Водз коли батьтӧгыс, та вӧсна эз вермы помавны шӧр школа.
- 1930 — Пырис уджавны «Югӧр» колхозӧ, кӧні сійӧс бӧрйӧны комсомол ячейкаса секретарӧн да стенгазетса редакторӧн. Медводдза кывбуръясыс тані и петавлісны.
- Армиаӧ босьтӧм водзын помаліс газетын уджалысьяслысь курсъяс, лои журналистӧн. Уджаліс Коми небӧг лэдзанінын, сэсся — «Ударник» журналын.
- 1932 — Елькин лои «Коми комсомолец» газетын пионеръяслӧн юкӧдын веськӧдлысьӧн.
- 1934—1936 — Служитіс Гӧрд Армиаын, Крымын.
- Демобилизациа бӧрын уджаліс Коми АССР-са Гижысь котырын том гижысьяслы инструкторӧн.
- 1941 — Медводдзаяс лыдын муніс Айму вӧсна Ыджыд тыш вылӧ. Фронт вылын сійӧс индісны мӧд ранга интендантӧн бригадаса штабӧ.
- 1942, рака тӧлысь 21 лун — Усис Айму вӧсна Ыджыд тыш дырйи Волхов фронт вылын Ленинград дорса Шала грездсянь неылын. Медводз вӧлі дзебӧма ӧтувъя гуын Шала грездын. Но 1975 воын усьӧмаяслысь колясъяссӧ вуджӧдісны да гуалісны Любань карса кыддза аллеяын, кытчӧ сувтӧдісны ӧтувъя обелиск. 2014 воын Любаньса мемориалын ӧшӧдісны нӧшта ӧти плита, кытчӧ пасйӧма В.И. Елькинлысь нимсӧ.[1]
Гижан удж
Василий Елькин гижис лирикаа кывбуръяс, публицистика да сатира.
В. И. Елькин 1930-ӧд воясӧ вӧлі медся нималана коми кывбуралысьяс лыдын, коді гижис Коми му йылысь. Медводдза колхоз лӧсьӧдӧм, сиктын медводдза лампочка, коми газет петӧм — та йылысь дзик пыр жӧ гижӧ Василий Елькин.
В. Елькин 1939 восянь пырӧ СССР-са Гижысь котырӧ. Сэки жӧ петӧ кывбуръясыслӧн медводдза небӧгыс — «Шуд йылысь сьылӧм».
Небӧгъяс
Комиӧн
- Шуд йылысь сьылӧм: кывбуръяс / Ред. Д. Конюхов; серпасаліс В. Поляков. — Сыктывкар: Коми кн. изд-во, 1939. — 64 л.б.
- Бӧрйӧм гижӧдъяс / Лӧсьӧдіc А.А. Вежев; серпасаліc М.П. Безносов. — Сыктывкар: Коми госиздат, 1948. — 176 л.б.
- Шуд вӧсна. Бӧрйӧм гижӧдъяс. Кывбуръяс / Ред. А. Морозова; Серпасаліс М.П. Безносов. — Сыктывкар: Коми кн. изд-во, 1960. — 112 л.б.
Вуджӧдӧмъяс
- Сьыланкывъяс / Ред. Ф.В. Плесовский; лӧсьӧдіс Д.В. Конюхов; серпасаліс В.Г. Постников; вуджӧдісны: Г. Фёдоров, В. Елькин, Д. Конюхов, И. Вавилин, С. Тимушев, А. Осипов, М. Лебедев. — Сыктывкар: Коми госиздат, 1951. — 93 л.б.