Напалков Виктор Егорович

Напалков Виктор Егорович
Напалков Виктор Егорович
Чужан лун	1938-ӧд вося лӧддза-номъя тӧлысь 29-ӧд лун (86 арӧс)
Чужанін	Джеджим, Дон сикт овмӧдчӧмин[d], Кулӧмдін район, Коми Республика, РСФСР, Сӧветскӧй Социалистическӧй Республикаяслӧн Союз или ; Коми Автономнӧй Сӧветскӧй Социалистическӧй Республика, РСФСР, Сӧветскӧй Социалистическӧй Республикаяслӧн Союз;
Страна	Сӧветскӧй Социалистическӧй Республикаяслӧн Союз; Рочму;
Мыйся уджыс	гижысь, журналист

Файл:Напалков В.Е.JPG

Напалков Виктор Егорович — коми гижысь да журналист (2013 во)

Напалков Виктор Егорович (1938-ӧд вося лӧддза-номъя тӧлысь 29-ӧд лун, Кулӧмдiн районса Джеджим грезд—2022-ӧд вося моз тӧлысь 30-ӧд лун) — коми гижысь, журналист, Коми Республикаса нимйӧза гижысь.

Олантуй

Виктор Напалков чужӧма 1938-ӧд вося лӧддза-номъя тӧлысь 29-ӧд лунӧ Кулӧмдiн районса Джеджим грездын. Водз кольӧма батьтӧгыс. Сійӧ усьӧма Айму вӧсна Ыджыд тыш дырйи 1942-ӧд воын; мам ки вылас кольӧма куим кага. Велӧдчӧма Джеджим, Дон, Керчомъя школаясын. 1955-ӧд воын помалӧма 10 класс Кулӧмдінса шӧр школаын. Во уджалӧма Носим лесопунктын — ув кералысьӧн, вӧр кылӧдысьӧн, мотористӧн электростанцияын. 1959-ӧд воын помалӧма Лесотехническӧй техникум. Сэсся уджысь орӧдчытӧг велӧдчӧма Ставсоюзса юридическӧй институтын.

1960-ӧд восянь уджалӧма Кулӧмдін районса «Парма гор» газетын. Уна во уджалӧма районса газетъясын кывкутысь секретарӧн, республикаса радио да телевидениеын — редакторӧн. 1986—1992-ӧд воясӧ — коми кыв вылын челядьлы «Би кинь» журналын кывкутысь секретар. В.Напалков вӧлӧма тайӧ журналсӧ котыртысьяс лыдын. 1992 восянь уджалӧма «Войвыв кодзув» журнал редакцияын; 1994—1998-ӧд воясӧ вӧлӧма кывкутысь секретарӧн.

Кулӧма 2022-ӧд вося моз тӧлысь 30-ӧд лунӧ^[1].

Гижан удж

Нэм джын нин сылӧн олӧмыс коми журналистикаын да литератураын.

Виктор Напалковлӧн кывбуръясыс кутісны петны 1956-ӧд восянь. Кывбуръясыс вӧлі йӧзӧдӧма «Коми колхозник» газетын. Вӧрын уджалігӧн уна гижӧма: очеркъяс да статьяяс петавлісны районса да республикаса печатьын. Тадзи Виктор Напалков воис журналистикаӧ — 1960-ӧд воын сійӧс корисны Кулӧмдін районса «Парма гор» газетӧ.

«Козьнав мортлы муслун» медводдза повесьтсӧ вӧлі йӧзӧдӧма «Войвыв кодзув» журналын 1974-ӧд воын.

Повесьтъяс: «Олӧны-вылӧны», «Томъяс», «Кӧсъя тӧдмасьны», «Лун бӧрся лун», «Ме тэнӧ радейта», «Кӧин» да Вероника», «Прӧстит, аньтусьӧй», «Прӧщай», «Вотӧса август», «Шойтӧм крест», «Кӧн тэ, мус ёкмыльӧй?» (2002).

Йӧзӧдӧм романъяс: «Эзысь перна» (2000), «Утка туй» (2004), «Йӧг каллян» (2013 восянь петӧны юкӧнъяс).

Поэмаяс: «Туйвежъяс», «Поп пи».

Виктор Напалков комиӧдӧма кывбуръяс да проза некымын авторлысь: И. Кузнецовлысь, Ю. Балегилысь, С. Паньколысь, С. Есенинлысь. Гижысьлысь кывбуръяссӧ вуджӧдӧма роч да венгер кывъяс вылӧ.

Ленинградса гижысь Глеб Горышин сылӧн гижӧдъяс йывсьыс пасйӧма: «Виктор Напалков — поэт Божьей милостью, с открытой миру душой. Я бы его принял в Союз писателей за один цикл стихов «Моё дыхание».

В. Е. Напалков — Россияса журналист котырӧ (1964) да Гижысь котырӧ пырысь (1991).

Небӧгъяс

Комиӧн[вежны | Вежны кодировкаын]

• Миян Пиля дед: кывбуръяс. — Сыктывкар: Коми книжнӧй издательство, 1975. — 14 л.б.
• Менам лов шы // Куим сьыланкыв: кывбуръяс. — Сыктывкар: Коми книжнӧй издательство, 1977. — Лб.46—91.
• Козьнав мортлы муслун: повесть. — Сыктывкар: Коми книжнӧй издательство, 1981. — 70 л.б.
• Туйвежъяс: кывбуръяс, поэма. — Сыктывкар: Коми книжнӧй издательство, 1986. — 80 л.б.
• Томъяс: повестьяс. — Сыктывкар: Коми книжнӧй издательство, 1988. — 216 л.б.
• Кӧсъя тӧдмасьны: повестьяс. — Сыктывкар: Коми книжнӧй издательство, 1992. — 188 л.б.
• Ме тіянӧс радейта: повестьяс, кывбуръяс, поэма: верстьӧлы, том йӧзлы, челядьлы. — Сыктывкар: Коми книжнӧй издательство, 1994. — 286 л.б.
• Чолӧм и прӧщай...: повестьяс. — Сыктывкар: Коми книжнӧй издательство, 2000. — 320 л.б.
• Эзысь перна: Роман / Ред. А. В. Тентюков; Серпасаліс А. В. Мошев. — Сыктывкар: Коми небӧг лэдзанін, 2004. — 304 л.б.
• О, Енмӧй!.. Кывбуръяс, поэмаяс. — Сыктывкар: Изд-во «Эскӧм», 2007. — 256 с.
• Утка туй: Роман, повесьт / Ред. А. В. Попов; Серпасаліс А. А. Попова. — Сыктывкар: ООО «Анбур», 2008. — 480 л.б.
• Напалков В. Е. Лэбӧны вояс... Кывбуръяс, поэма. — Сыктывкар: «Услуги типографии», 2017. — 160 л.б.
• Напалков В. Е. Йӧг каллян: Роман, повесьтъяс, кывбуръяс. — Сыктывкар: ООО «Анбур», 2018. — 416 л.б.

Роч вылӧ вуджӧдӧмӧн[вежны | Вежны кодировкаын]

• Напалков В.Е. Прости, Аньтусь. Повести. — Сыктывкар: «Услуги типографии», 2017. — 378 с.
• Напалков В.Е. Я вас люблю. Повести, поэма. — Сыктывкар: «Услуги типографии», 2017. — 311 с.

Мукӧдтор

• В.Е. Напалков водзмӧстчӧма общественнӧй олӧмын. Кулӧмдiн районса Джеджим грездын восьтӧма музей-небӧгаин, кытчӧ чукӧртӧма коми да роч авторъяслысь 3 сюрс сайӧ небӧг.
• Гӧтырыс — Наталья Васильевна Напалкова (Дубская) (1940—2022), гижӧма «Исповедь» автобиографическӧй роман.

Наградаяс

• Коми Республикаса нимӧдана уджалысь (1998)
• Кулӧмдiн районса Почёта олысь (2002)^[2]
• Россия Федерацияса президентлӧн Аттьӧалӧм (2015) — Айму культура сӧвмӧдӧмысь да уна вося бур уджысь^[3]
• Коми Республикаса нимйӧза гижысь (2018)^[4]
• Коми Республикаса Веськӧдлан котырлӧн И.А. Куратов нима литературнӧй премия «Утка туй» романысь.

Ӧшмӧсъяс

• Коми гижысь котырӧ пырысьяс
• FU-Lab сайтын В.Е. Напалков

Ыстӧдъяс

[1] Черных Е. Скончался народный поэт Коми Виктор Напалков // «Комиинформ» юӧр сетан агентство (2022.08.30-ӧд лун; рочӧн)

[2] Кулӧмдін районса почётнӧй олысьяс

[3] Глава Республики Коми Вячеслав Гайзер вручил государственные награды жителям региона // Республика Коми: официальный портал (2015.08.21; рочӧн)

[4] Виктору Напалкову и Петру Столповскому присвоено почётное звание «Народный писатель Республики Коми» // «Комиинформ» юӧр сетан агентство (2018.07.23 лун; рочӧн)

[1]

[2]

[3]

[4]