Перым пемӧс стиль

Босьтӧма Рувикиысь

Перым пемӧс стиль (рочӧн Пе́рмский звери́ный стиль), сідзжӧ Туналан серпасъяс, Чудь пертасъяс, Культӧвӧй литьё) — пемӧс стильлӧн, миян эраӧдз VII нэмся — миян эраса ХII нэмся бронза художествоа пластикалӧн сикас[1], мый лӧсялӧ Кама-Вятка ковтыссянь Енисей—Об ва юкланінӧдз Асыв— Войвыв Европаса да Рытыввыв Сибырса вӧр да вӧр-тундра зонаяслы.

Elk-headed man on the lizard.jpg
Permian Animal Style - Horsemen.jpg
Йӧра юра морт сулалӧ ящер вылын. VIII нэм Кык антропоморфнӧй фигура пукалӧны змей вылын сулалысь вӧв вылын; группаӧс колльӧдӧны лэбачьяс. Вӧв водзын меститчӧ Шонділӧн символ. X нэм

Пемӧс стильын вӧчӧмторъяссӧ позьӧ аддзыны Россияса уна музейысь, на лыдын Чердінса ас му туялан музейысь, Перымса канму университетлӧн, Канму история музейлӧн, Канму Эрмитажлӧн коллекцияясысь да мукӧдлаысь.

История

Кама бердын зэв водз чужис металлургия. Ӧнія Оралово сиктсянь неылысь аддзӧмаӧсь миян эраӧдз X—IX нэмъясса ыргӧн кисьтан формаяс да тиглияс (Ананьинскӧй культура)[2].

Буракӧ, перым пемӧс стильын уджалысь металлургъясӧн вӧлӧмаӧсь аньяс: тайӧ мӧвпсӧ подулалӧны аньяслӧн гуясысь аддзӧм кӧрт кисьтан ичӧт формаяс.

Стильыс чужис скифъяслӧн татшӧм жӧ пемӧс стиль тӧдчӧм улын.

Туялысьяс лыддьӧны, мый тайӧ стильыс татчӧс[1]. Позьӧ чайтны, мый стильыс артмӧма некымынлаын: Томскса Об берд (кулайскӧй культура), Урал сай да Урал берд (ананьинскӧй культура). Перым пемӧс стильлысь образецъяссӧ чукӧртӧны да на серти наука уджсӧ нуӧдӧны XIX нэм помсянь.

Олӧмын медся важ предметъясыс, кутшӧмъясӧс ыртӧны перым пемӧс стильӧ, лӧсялӧны миян эраӧдз VIII—III-ӧд нэмъяслы. Лыысь да сюрысь вӧчӧм сынанъяссӧ мичмӧдӧма лэбачьяслӧн да мукӧд пемӧслӧн серпасӧн. Тшӧкыда сэні серпасалӧма йӧраӧс, кӧрӧс, вӧлӧс либӧ хищнӧй лэбачӧс. Водз кӧрт нэм кадӧ паськалӧ оз сӧмын материалыс, кытчӧ серпасалӧма пемӧсъяссӧ, но и позьӧ аддзыны выль пемӧсъсӧс: бронза булавкаясын, браслетъясын, гривна ӧшӧдъясын серпасалӧма змейясӧс, кӧинъясӧс, понъясӧс, ошъясӧс. Пермым пембӧс стильлысь сюрӧссӧ позьӧ аддзыны и мир пасьталаын, шуам, Мексикаын, а сідзжӧ сійӧ паськалӧма ӧнія мастеръяслӧн стилизуйтӧм вӧчӧмторъясын[3].

Туялӧм

Перым пемӧс стильсӧ заводитісны туявны ХІХ нэм помын — ХХ нэм заводитчигӧн. Став туялысьыс воӧны ӧти кывйӧ — Перым пемӧԍ стильыс татчӧс. Ӧні позьӧ сёрнитны перым пемӧс стиль йылысь кыдзи урал—сибыр пемӧс стильлӧн меставывса вариант йылысь. Сідзжӧ туялысьяс торйӧдӧны и стиль артман мукӧд шӧрин либӧ урал—сибыр стильлысь меставывса вариантъяс, шуам, Томск—Нарымскса Об бердын, Кама бердын, гӧраяса да вӧра Урал сайын.

2010 воын Перым крайса культура феноменъяслы сиӧм серияын петіс небӧг, кутшӧмӧс газет-журналын шуисны[4] перымса пемӧс стиль серти велӧдчан небӧгӧн либӧ энциклопедияӧн — Александр Доминяклӧн «Свидетельства утраченных времён. Человек и мир в пермском зверином стиле» («Книжный мир» издательство). Сэні сикасалӧма тайӧ стильӧн вӧчӧм предметъяссӧ, а сідзжӧ тайӧ предметъяс вылас петкӧдлӧм сюрӧсъяссӧ. Таысь кындзи, сэні видлалӧма тайӧ предметъясӧн вӧдитчан позянлунъяссӧ да видлӧма лӧсьӧдны важ ломоватовечьяслысь — перым стиль авторъяслысь — мир серпассӧ.

Пемӧс стиль — Перым крайса туристическӧй бренд

Пемӧс стиль — Перым крайса медшӧр брендъясысь ӧти[5].История наукаса доктор Любовь Фадеева пыртӧма пемӧс стильсӧ Перымын куим традиционнӧй культура символ лыдӧ (балеткӧд да пу скульптуракӧд ӧттшӧтш)[6].

«Ыджыд Урал» форум вылын «перым пемӧс стильын» кӧртысь вӧчӧмторъяслӧн стенд, Ельцин-шӧрин, 2020 вося кӧч тӧлысь 25-ӧд лун

Культураын

Коми, а сідзжӧ мукӧд финн-йӧгра войтырлӧн мифология вылӧ подуласьӧм 2017 вося «Человеколось» ворсӧмын авторъяс зілисны гӧгӧрвоны перым пемӧс стильлысь артефактъяс вылын петкӧдлӧм сюжетъяссӧ да на подув вылын видлыны найӧс ловзьӧдны. Ворсӧмас вӧдитчӧны и перым пемӧс стильлӧн эстетикаӧн[7].

Пасйӧдъяс

  1. ↑ 1 2 Пермский звериный стиль. Уральская историческая энциклопедия. — Екатеринбург: УрО РАН, Институт истории и археологии, 2000.
  2. ↑ Майстренко Д. Л., Мельничук Л. Ф. Орловское озеро II — поселение рубежа поздней бронзы и начала железного века в северном Прикамье // Вестник Пермского университета. Серия: История. — 2015. — № 1 (28). — С. 37—44.
  3. ↑ С. И. Ваксман и др. Pera maa — дальняя земля. Книга открытий. — Пермь: Сота, 2009. — 159 с.
  4. ↑ Юлия Табалина. Энциклопедия пермского звериного стиля // Новый Компаньон. — Пермь, 2010. — С. 16.
  5. ↑ Бренды Пермского края. Шыӧдчан кадпас: 26 вӧльгым тӧлысь 2025. Архивируйтӧма 17 лӧддза-номъя тӧлысь 2022.
  6. ↑ Соленые уши и художественные галереи. Шыӧдчан кадпас: 26 вӧльгым тӧлысь 2025. Архивируйтӧма 12 косму тӧлысь 2021.
  7. ↑ Вихров, Денис Профессия: разработчик видеоигр. «Для некоторых игры — это вообще несусветное зло и дичь» (рус.). ProPerm.ru (17 тӧвшӧр тӧлысь 2017). Шыӧдчан кадпас: 26 вӧльгым тӧлысь 2025. Архивируйтӧма 4 тӧвшӧр тӧлысь 2022.

Литература

  • Грибова Л. С. Пермский звериный стиль: Проблемы семантики / Академия наук СССР, Коми филиал; Институт языка, литературы и истории. — М.: Наука, 1975. — 148 с.
  • Грибова Л. С. Пермский звериный стиль / Ред. Л. Войлокова; Пер. текста Н. Мальцева. — Изд. 2-е, стереотип. — Кудымкар: Коми-Пермяцкий этнокультурный центр, 2014. — 176 с.
  • Оборин В. А. Древнее искусство народов Прикамья: Пермский звериный стиль. — Пермь: Пермское книжное издательство, 1976. — 192 с. — 15 000 экз.
  • Оборин В. А., Чагин Г. Н. Чудские древности Рифея: Пермский звериный стиль. — Пермь: Пермское книжное издательство, 1988. — 184 с. — (Искусство Прикамья). — 30 000 экз.
  • Доминяк А. В. Свидетельства утраченных времён: Человек и мир в пермском зверином стиле. — Пермь: Книжный мир, 2010. — 152 с. — 1000 экз. — ISBN 978-5-903861-15-6.
  • Эренбург Борис. Пермские бренды. — Пермь: Сенатор, 2012. ISBN 5-90323607-3

Ыстӧгъяс

Босьтӧма "https://kv.ruwiki.ru/w/index.php?title=Перым_пемӧс_стиль&oldid=482377"-ысь