Тарабукин Андрей Степанович

Рувикиын эмӧсь мукӧд йӧз йылысь статьяяс, кодъяслӧн овыс Тарабукин.

Тарабукин Андрей Степанович
Чужан лун	1936-ӧд вося йирым тӧлысь 31-ӧд лун(1936-10-31)
Чужанін	Керчомъя, Кулӧмдін район, Коми (Зыряна) асвеськӧдлан обласьт, РСФСР, Сӧветскӧй Социалистическӧй Республикаяслӧн Союз либӧ Коми (Зыряна) асвеськӧдлан обласьт, Войвыв край, РСФСР, Сӧветскӧй Социалистическӧй Республикаяслӧн Союз
Кулан лун	1977-ӧд вося ода-кора тӧлысь 1-ӧд лун(1977-05-01) (40 арӧс)
Куланін	Кӧрткерӧс, Коми АССР, РСФСР, Сӧветскӧй Социалистическӧй Республикаяслӧн Союз
Страна	Сӧветскӧй Социалистическӧй Республикаяслӧн Союз
Мыйся уджыс	гижысь

Тарабукин Андрей Степанович (1936-ӧд вося йирым тӧлысь 31-ӧд лун, Керчомъя, Коми (Зыряна) асвеськӧдлан обласьт или Коми (Зыряна) асвеськӧдлан обласьт, Войвыв край — 1977-ӧд вося ода-кора тӧлысь 1-ӧд лун, Кӧрткерӧс, Коми АССР) — коми гижысь.

Олантуй

Андрей Тарабукин чужис 1936 вося йирым тӧлысь 31-ӧд лунӧ Коми (Зыряна) асвеськӧдлан обласьтысь (ӧні Коми Республика) Кулӧмдiн районса Керчомъя сиктын.

1958 воын гӧрд дипломӧн помаліс Коми канмуса педагогика институтысь физика-математика факультет. Институт бӧрын велӧдіс Кулӧмдiн районса Дереваннӧй сиктын, сэсся Кӧрткерӧс районса Шойнатыын.

1970–1977 воясӧ сійӧ уджаліс Кӧрткерӧсса РОНО-ӧн веськӧдлысьӧн.

Бӧръя кадас уджаліс инспекторӧн ОБХСС-ын.

Кувсис 1977 вося ода-кора тӧлысь 1 лунӧ Кӧрткерӧс сиктын, гуалӧма Кӧрткерӧсса шойнаын.

Семья

Сылӧн тыр нимыс батьсяньыс — Нестер Карп Ӧнтӧн Кӧндрат Левӧ Степан ӧньӧ. Йӧз костас дженьыдджыка шуисны — Лева Степӧ Ӧньӧ либӧ Степӧ Ӧньӧ. Сылӧн батьыс — Тарабукин Степан Леонтьевич (чужис 1901 вося вӧльгым тӧлысь 21-ӧд лунӧ, куліс 1980), мамыс — Мария Дмитриевна (чужис 1903 вося рака тӧлысь 9-ӧд лунӧ, кулан воыс абу тӧдса).

Чайтӧны, мый Степӧ Ӧньӧлӧн семьяыс — Эжва йывса староверъяс, а сылӧн бать Степан Леонтьевич да пӧль Леонтий Кондратьевич вӧліны керчомса общинаын наставникъясӧн и ветлісны велӧдчӧм могысь москваса старообрядческӧй шӧринъясӧ. Вермас лоны, гижан удж дорӧ муслуныс чужис семьяын небӧг видзан традиция пыдди пуктӧмысь.

1950-ӧд вояс помын Степӧ Ӧньӧ гижсис Любовь Ивановна Ермолинакӧд, коді сы кадӧ велӧдчис Коми канмуса педагогика институтын «Коми кыв да литература специальносьт серти». Л. И. Ермолина чужис 1932 вося вӧльгым тӧлысь 7-ӧд лунӧ Кулӧмдiн районса Мыс сиктын.

Кӧрткерӧсса школаын коми кыв да литература велӧдысь Любовь Ермолина кувсис 2003 вося косму тӧлысь 22-ӧд лунӧ. Гуалӧма верӧсыскӧд орччӧн.

Гозъялӧн вӧлі кык пи. 1959 воын чужис Алексей, коді лои коми журналистӧн да Абу петкӧдлана нация да войтыръяслӧн Котырын (рочӧн: Организации непредставленных наций и народов; англия кывйӧн:The Unrepresented Nations and Peoples Organization (UNPO)) коми йӧзлӧн медводдза петкӧдчысьӧн. 1964 воын чужис Василий пи.

Степӧ Ӧньӧ батьлысь воксӧ, Тарабукин Андрей Леонтьевичӧс (1894 чужан во), кулакалісны. Кулакӧн вӧлі шуӧма 1930 воын, репрессируйтӧма 1933 воын. Сылӧн вӧлі: гӧтыр — Мария Васильевна, 1899 ч.в.; пи — Михаил Андреевич, 1927 ч.в.; ныв — Анна Андреевна, 1921 ч.в.; ныв — Агния Андреевна, 1924 ч.в.; ныв — Евстолия Андреевна, 1930 ч.в.; ныв — Мария Андреевна, 1932 ч.в.

Гижан удж

Степӧ Ӧньӧ уджаліс школаса велӧдысьӧн да эз лыдды асьсӧ профессиональнӧй гижысьӧн. Андрей Тарабукин петкӧдчис кыдзи висьтъяс гижысь. Сійӧ гижӧ висьтъяссӧ да пьесаяссӧ и верстьӧлы, и челядьлы. Гижӧдъясыс петавлісны ӧтувъя сборникъясын («Тӧлысь вылӧ», «Гажа сёрни») да «Войвыв кодзув» журналын. 1971 воын сылӧн петіс «Медбур козин» медводдза висьт чукӧр.

Андрей Тарабукинлӧн гижан удж йывсьыс петавліс некымын казьтылана гижӧд Геннадий Беляевлӧн ки улысь «Коми му» газетын.

Небӧгъяс

• Медбур козин: Висьт чукӧр. — Сыктывкар: Коми кн.изд-во, 1971. — 32 л.б.
• Эз вунӧдны (висьт), ӧти пьеса (пьеса) // Тӧлысь вылӧ (висьтъяс, пьеса) / Фёдор Щербаков да мукӧд; серпасалiс В. Н. Аверкиев. — Сыктывкар: Коми кн.изд-во, 1979.
• Сидор дядь чери кыйö… // Гажа сёрни (висьтъяс): сатира да юмор / Ред. С. М. Морозов; серпасалiс С. А. Холопов. — Сыктывкар: Коми книжнӧй изд-во, 1963.

Пасйӧдъяс