Войпель

Босьтӧма Рувикиысь
Видлалӧм гижӧд
Войпель
VOIPEL.jpg
Мифология Коми мифология
Казьтӧмъяс 1501 во

Войпель — тайӧ ен коми мифологияын[1][2][3], вой тӧв ен[4], ӧнія орфографияӧн — войпӧль[5].

Казьтывсьӧ Митрополит Симон Великӧйлӧн Перымӧ 1501 вося Шыӧдчӧмын[6], кӧні сійӧ чуксалӧ пастукъясӧс «Войпель-бӧлбанлы абу юрбитны да кодрасьӧм сылы абу вӧчны»[1].

Ним гӧгӧрвӧдӧм

Ним сертиыс ӧніӧдз мунӧны вензьӧмъяс.

Пырджык чайтісны, мый роч гижӧдын терминыс вӧлі дзугӧма. Чайтсис, мый сылӧн буквальнӧй вуджӧдӧмыс «северное ухо» либӧ жӧ «ночное ухо» ӧдвакӧ вермис лоны кутшӧмкӧ енлӧн нимӧн. Сідзкӧ, абу пель кывсянь артмӧма, а пӧль кывсянь. Коми кывйыны пӧль кывлӧн вежӧртасыс «батьлӧн бать». «Вӧрпӧльӧн» либӧ «вӧр пӧльӧн» (вӧрса пӧльӧн) шулісны вӧрса лов-кӧзяинӧс. Позьӧ чайтны, мый роч гижӧдын сійӧс вежӧма ö шысӧ е шы вылӧ, мӧд ногӧн кӧ, оригиналын вӧлі «Войпӧль» (Войвывса кӧзяин)[1]. Нимсӧ колӧ гӧгӧрвоны, тӧдӧмысь, кыдз «вой тӧв» либӧ «Войвывса кӧзяин»[7].

Но, кутчысьны кӧ тайӧ этимология версияӧ, Войпель — тайӧ айлов, мужичӧй, мый паныд сулалӧ фольклорын тайӧ енмыслӧн энь мыгӧр йылысь шуӧмъяслы. Та вӧсна эм колӧ корсьны Войпель нимлысь мӧд этимология. «Вой пель» кывтэчасӧн и ӧні на нимтӧны торъя ёсь пеля йӧзӧс. Вермас лоны Войпель нимыслӧн вежортасыс — «ставсӧ кылысь , ставсӧ тӧдысь»: тайӧ енлы лӧсялана эпитетъясысь ӧти, мый вӧдитчисны сылӧн эвфемистическӧй ним пыдди. А Войпелльлӧн идол дорын ракпаньяссӧ позьӧ семантизируйтны кыдзи сылӧн пельяслысь символъяс, кодъяс вӧліны быдлаын, кӧні олісны важ комияс, мый и сетіс позянлун Войпельлы лоны быдтор тӧдысьӧн[1].

Серпасалӧм

Войпельсӧ серпасалӧны кыдзи нёль чужӧма нывбабаӧс. Сылӧн рӧд серти серпасалӧмыс чужтӧ туялысьяслысь юалӧмъяс: ӧти-кӧ, коми войтырлӧн фольклорысь тыдалӧ, мый Войпель — нывбаба ен, но сылӧн нимыс быттьӧкӧ артмӧма «вӧрса пӧль, вӧр пӧль, пӧль» кывтэчасысь. Таысь кындзи, ХІХ нэм заводитчигӧн на перым комияслӧн вӧлі ӧні вошӧм айпель кыв «мужичӧй» вежӧртасын[1].

Вермас лоны, мый буретш Войпельӧс петкӧдлӧны уна чужӧма нывбабаӧн перым звер стильын вӧчӧмторъясын[1].

Но Петрухин В.Я шуӧ Войпельсӧ коми Енлӧн пиӧн [8]. Войпель вӧлі вына енмӧн, коді бура ладмис йӧзкӧд. Сы дорӧ шыӧдчылісны корӧмӧн, медым сійӧ видзис висьӧмъясысь да тшыкӧдӧмысь, а сідзжӧ эз сет уськӧдчыны вӧрӧгъяслы коми йӧз либӧ торъя морт вылӧ[1]. Тайӧн сійӧ ёна торъяліс Ёма чойсьыс[8]. Войпельлӧн вӧлі вой тӧв, турӧб да лёк поводдя вылын власьт. Сійӧ дорйис и пемӧсъясӧс[1].

Чайтісны, мый Войпель оз радейт шумсӧ, та вӧсна вӧралысьяслы вӧралігӧн эз позь шумитны, таысь вермис кыпӧдчыны турӧб. Тайӧ эскӧм сертиыс нянь шептасигӧн оз позь вӧлі гораа пожъявны паськӧм, челядьлы — шутьлявны тюрзанӧн, таысь вой тӧв вермис кынтыны кӧдзасӧ.

Гӧраясын вӧлі Шуа — Войпельлӧн этшыс — вермис пӧртны шума ветлысь-мунысьӧс изйӧ либӧ тыртны найӧс лым турӧбӧн[8].

Войпель оліс Урал гӧраясын, Тӧвпоз-Из вылын (1 694 метра)[7][9]. Серпасъяс вылын сійӧ сулалӧ ыджыд кыдз пу улын мукӧд енъяскӧд орччӧн, кодъяс пӧвстын Войпельлӧн идолыс (пуысь вӧчӧм енмыс) вӧлі медся джуджыдӧн. Сы дорын сулаліс вись вайӧм вылӧ пӧрт, кытчӧ тэчлісны жертвуйтӧм куяссӧ да орчча войтырлысь на вылӧ вежӧм эзысьсӧ. Быд боксянь идолсӧ вӧлі кытшалӧма быд юысь да ёльысь вайӧм изъясӧн да ракпаньясӧн, кӧні овлӧмаӧсь Войпельлы юрбитысь йӧз. Ыджыд гажъяс дырйи Войпельлы вайлывлӧмаӧсь скӧт. Вӧралысьяс лыйлісны ньӧввужъясӧн вежа сюръяӧ, мый сулаліс идолкӧд орччӧн. Перым комияслӧн фольклор мыччӧдъяс серти, вӧралысьяс войдӧр лыйлісны ньӧввужъясӧн вежа пуӧ (либӧ сюръяӧ) прӧмыс заводитчытӧдз, медым налы мойвиис[1].

Культураын тӧдчанлун

• Каллистрат Жаков 1901 воын гижис «Языческое миросозерцание зырян» статья[10] да Бегство северных богов: сказание.
• 1994 воын М. Л. Герцман пуктіс «Войпель» балет Коми Республикаса опера да балет канму театрлӧн сцена вылын.
• 2020 воын Вуктылын лоис «Вой тӧвъяслӧн ен» выль арт-объект, кодлысь эскизсӧ вӧчис география велӧдысь Александр Пинежанинов[11].
• Петкӧдчӧ «Человеколось» компьютер ворсӧмын (2017 во).
• Войпель кыдзи шӧр геройӧс колльӧдысь персонаж петкӧдчӧ «Чёрная книга» компьютер ворсӧмын (2021 во).
• 2018 воын Сыктывкарса аэропортлы нимсӧ бӧрйигӧн вӧзйисны и Войпельӧс кыдзи сынӧдса кӧзяинӧс[12].
• 2014 воын Вӧркутаын нуӧдісны карса конкурс «Кӧні олӧ Войпель?» мойд вылӧ[13].
• Уна нималана коми серпасалысь сиисны ассьыныс уджъяс Войпельлы.

  • «Вой тӧв ен» арт-объект Вуктылын

    «Вой тӧв ен» арт-объект Вуктылын

  • Ю. Лисовскийлӧн «Трансформация Войпеля» серпас

    Ю. Лисовскийлӧн «Трансформация Войпеля» серпас

  • П. Микушевлӧн «Жрицы и Войпель» серпас

    П. Микушевлӧн «Жрицы и Войпель» серпас

  • В. Игнатовлӧн «Коми языческий ночной дух Войпель» серпас

    В. Игнатовлӧн «Коми языческий ночной дух Войпель» серпас

Ыстӧгъяс

  1. ↑ 1 2 3 4 5 6 7 8 9 Конаков Н.Д. Войпель // Энциклопедия уральских мифологий. Т.I, Мифология коми. / Под ред.: А.-Л. Сиикала, В.В. Напольских, М. Хоппал. Руководитель авторского коллектива Н.Д. Конаков. – М., ДиК, 1999.
  2. ↑ Конаков Н. Войпель // Республика Коми. Энциклопедия. Том I. — Сыктывкар: Коми книжное издательство, 1997. — С. 313.
  3. ↑ Войпель
  4. ↑ Войпель // Коми сёрнисикас кывчукöр. Словарь диалектов коми языка: в 2-х томах. Сыктывкар: ООО «Издательство «Кола», 2012.
  5. ↑ Войпӧль // Безносикова Л.М., Айбабина Е.А., Коснырева Р.И. Коми-роч кывчукӧр (Коми-русский словарь) / Отв. ред. Л.М.Безносикова; ИЯЛИ Коми НЦ УрО РАН. - Сыктывкар: Коми кн. изд-во, 2000.
  6. ↑ Послание Симона митрополита всея Русии в Великую Пермь
  7. ↑ 1 2 Северный ветер. Войпель почитался у коми как главный покровитель человеческого рода. Шыӧдчан кадпас: 19 ӧшым тӧлысь 2011. Архивируйтӧма 4 урасьӧм тӧлысь 2014.
  8. ↑ 1 2 3 Петрухин В.Я. Мифы финно-угров. — Москва: Астрель : АСТ : Транзиткнига, 2005.
  9. ↑ Чувьюров А. «Священные места» Урала в русском и финно-угорском фольклоре // Сакральная география в славянской и еврейской культурной традиции: сборник статей. — Москва: Центр "Сэфер", Институт славяноведения РАН, 2008. — С. 189-207.
  10. ↑ Жаков К.Ф. Языческое миросозерцание зырян // Научное обозрение. 1901. №3. С. 63–84.
  11. ↑ Журавлёва С. Войпель. Дух зимы
  12. ↑ Сыктывкарский аэропорт вошел в проект «Великие имена России»
  13. ↑ Городской конкурс на лучшую сказку «Где живет Войпель?»

Литература

• Войпель // Энциклопедический словарь Брокгауза и Ефрона : в 86 т. (82 т. и 4 доп.). — СПб., 1892. — Т. VIa. — С. 940.
• Белицер В.Н. Очерки по этнографии народов коми: XIX - начало XX в. / В. Н. Белицер. – Москва: АН СССР, 1958. – 393 с., 9 л. ил.
• Гагарин Ю.В. История религии и атеизма народа коми. М., 1978.
• Габова Е. В. Дети древней земли: повесть / Е. Габова, Н. Макарова; худож. М. Ф. Беллон. – Сыктывкар: Кола, 2011. – 160 с. Взять книгу в библиотеке
• Мифология Коми. – Москва - Сыктывкар: ДИК, 1999. – 480 с.: ил., карт.
• Му пуксьӧм: коми войтырлӧн мифология / лӧсьӧдiс, коми кыв вылӧ вуджӧдiс П. Ф. Лимеров; серпасалic А. В. Мошев. – Сыктывкар: Коми небӧг лэдзанiн, 2005. – 622, [2] л. б.: серпас.
• Грен А. Зырянская мифология / А. Грен // Коми му. – 1925. - № 1 (11). – С. 23-33.
• Жаков К. Ф. Бегство северных богов: сказание

Босьтӧма "https://kv.ruwiki.ru/w/index.php?title=Войпель&oldid=483199"-ысь