Зарни ань

Босьтӧма Рувикиысь
Тайӧ терминыслӧн эмӧсь мӧд вежӧртасъяс, видзӧд Зарни ань (вежӧртасъяс).
Зарни ань
Золотая Баба. Описание европейской Сарматии.png
Мифология Коми мифология
Мукӧд кывъясын ним коми-перым Зарни инь; ханты Сорни най; манси Калтась-эква
Рӧд энюлов

Зарни ань (рочӧн Золота́я ба́ба; коми-перым Зарни инь; ханты Сорни най; манси Калтась-эква) — нималана ен, сылы юрбитӧны Асыв-Войвыв Европаын да Рытыв-Войвыв Сибырын олысь йӧз.

Ӧшмӧсъяс

Суйӧрсайса ӧшмӧсъяс

Чайтӧны, мый Войвывса зарни ен йылысь медводдзаысь казьтывсьӧ скандинавияса «Вежа Олав йылысь сагаын», мый медся бура кольӧма Снорри Стурлусонлӧн  (рус.) (коми «Круг Земной» свод тэчасын (XIII нэм). Тайӧ сага сертиыс 1026 вося тулысын[2] Норвегияса викингъяс, кодъясӧс нуӧдіс нималана Торир Собака, мунісны походӧн Биармияӧ. Ю вылын, кутшӧмӧс ӧткымынъяс шуӧны Винаӧн да ӧткодялӧны Войвыв Вынвакӧд[3], налы мойвиис тӧдмавны, кӧні меститчӧ татчӧс бьярма племяясӧн юрбитан Йомали (Юмалы) енлӧн вежаиныс, да гусьӧникӧн пырны сэтчӧ. Викингъяс аддзисны пуысь вӧчӧм ыджыд статуя, кодлӧн пидзӧсъяс вылас вӧлі эзысь чаша, а сьыліас сикӧтш. Ен юр вылын вӧлі зарни корона, кодӧс мичмӧдӧма дас кык разнӧй серпасӧн. Чашасӧ вӧлі тыртӧма эзысь сьӧмӧн, а статуясӧ кытшалысь потшӧс сайын меститчис мыльк, кӧні зарнисӧ да эзысьсӧ вӧлі сорлалӧма муыскӧд[4]. Вежаинсӧ грабитӧм, сикӧтшсӧ да сьӧмсӧ гусялӧм бӧрын скандинавъяс паныдасисны сійӧс дорйысьяскӧд да тэрмасьӧмӧн кывтісны чужанінас[5].

Энтони Дженкинсонлӧн «Руссияса, Московияса да Тартарияса» карта вылын Zlata baba (1562)[6]

Сы йылысь, позьӧ-ӧ ӧткодявны сагаясын казьтывлӧм бьярмаяслысь (беормъяслысь) Йомали енсӧ обса йӧгралӧн енкӧд, вензьӧны важӧн нин. Ӧткымын туялысьлӧн видзӧдлас серти, медводдзаыс ӧткодь славяна-балтскӧй Перункӧд/Перкунаскӧд да скандинавияса Торкӧд[7], а мӧдыс ёнджыкасӧ петкӧдчӧ Ен-мамӧн.

1420 во гӧгӧрын немеч хронист Ульрих фон Рихенталь  (рус.) (коми аслас «Констанцскӧй соборлӧн хроникаын» казьтыштіс «Роч му сайын меститчысь» «Зарни пӧч дорын» кутшӧмкӧ кар йылысь, кӧні «юрбитӧны Зарни пӧрысь нывбабалы» (guldin alt wib), кодӧс быттьӧкӧ кыпӧдӧмаӧсь «ӧти пӧрысь дӧваӧс» пыдди пуктӧм могысь, коді «сетӧма тайӧ муыслы быдсяма бурторсӧ»[8]. Рихенталь хроникалӧн латин оригинал серти, мый абу кольӧма ӧнія кадӧдз, «Зарни пӧч дорын» карлысь нимсӧ вайӧдӧма немеч кыв вылӧ сійӧс вуджӧдӧмӧн — «ad Auream Vettullam»[9].

Зарни ань, либӧ «Зарни пӧч» йылысь паськыдджык юӧрыс паныдасьлӧ Рытыввыв Европаса путешественникъяслӧн да XVI нэмса гижысьяслӧн Роч канму йылысь небӧгъясын. Тайӧ тӧдмӧгъясыс ёнакодь мунӧны ӧта-мӧдныслы паныд.

Сылысь юӧрсӧ пӧшти вежлавтӧг вайӧдӧ аслас «Войвыв войтырлӧн историяын» (1555) швед космограф Олаф Магнус  (рус.) (коми, но сійӧ гижӧ Зарни аньлысь нимсӧ ӧтлаын (Zlotababa) да меститӧ изваяниесӧ дзик мӧд местаӧ, оз асыв-войвылӧ, Вяткасянь Скифияӧ мунан туй вылӧ (мӧд ногӧн кӧ, Ылі Войвылӧ), либӧ Вятка му пытшкӧ, кыдзи индӧма Польшаса туялысьлӧн, а Московия да Литва костӧ[10].

«Литвасаяс да московитъяс костын мудорын ветлан туй вылын, — гижӧ Магнус, — сувтӧдӧма изваяние, кодӧс налӧн кыв вылын шуӧны Zlotababa-ӧн, мӧд ногӧн зарни пӧчӧн… Ӧтка ветлысь-мунысьяс бурӧдӧны сійӧс кутшӧмкӧ козинъясӧн, кӧть доннас найӧ оз вевтыртны куысь нетшыштӧм сісӧ; а то найӧс, коді петӧ туйӧ, оз ло видзӧма лёк суӧмысь»

(In confinibus Lituanorum ac Moscouitarum, statuam esse publico itineri impositam, quae patria lingua Zlotababa dicitur, id est, aurea vetula: quam singuli viatores certis munusculis placant, etiam si pili valorem non excedant: alioquin suscepti itineris nullam habituri securitatem)[11].

Водзӧ гижысьяслӧн, на лыдын Сигизмунд Герберштейн («Московия йылысь пасйӧдъяс», 1549[12]), Алессандро Гваньини («Европаса Сарматия опишитӧм», 1578), Джайлс Флетчер («Роч канму йылысь», 1591), Пётр Петрей де Ерлезунд («Вына Москваса ӧксыув йылысь история», 1615), Зарни аньыс сулалӧ нин Об ю вом дорын, Обдорияын.

  • Cигизмунд Герберштейнлӧн Московия карта вылын Slata baba (1549)

    Cигизмунд Герберштейнлӧн Московия карта вылын Slata baba (1549)

  • Антоний Видлӧн Россия карта вылын Зарни ань (шуйгаладорын выліас)[13]

    Антоний Видлӧн Россия карта вылын Зарни ань (шуйгаладорын выліас)[13]

  • Zlata baba. Андре Тевелӧн «Всемирнӧй космографияысь» гравюра (1575)

    Zlata baba. Андре Тевелӧн «Всемирнӧй космографияысь» гравюра (1575)

Зарни ань ен йылысь тадзи висьтавлӧмаӧсь:

  • пӧчӧн петкӧдлӧм статуя йылысь, кодлӧн кынӧмас эм пи да тыдалӧ нӧшта ӧти кага — внук (С. Герберштейн)[14];
  • из бӧлбан йылысь, мый петкӧдчӧ кагаӧс киас кутысь пӧрысь нывбабаӧн, а орччӧн мӧд кага — внук (А. Гваньини)[15];
  • креж йылысь, мыйлӧн мыгӧрыс — тайӧ сыри-летки паськӧма ань, коді кутӧ киас кагаӧс (Дж. Флетчер)[16];
  • пӧчлӧн зарниӧн мавтӧм, пытшкӧссяньыс кодйӧм да тыртӧм изваяние йылысь, коді вермӧ сетны труба шыяс да «Дельфийскӧй оракул моз» висьтавны аскиа лунсӧ (Петрей де Ерлезунда)[17].

Аслыспӧлӧс, мый Зарни аньсӧ серпасалӧны оз ӧткодя. Немеч картограф Антоний Видлӧн сійӧ петкӧдлыссьӧ озырлун вайысь ань енмӧн, кодлы юрбитӧны «абдор» (Abdori) войтыр. Та дырйи, Вид карталӧн медводдза 1555 вося изданиеын кӧ енмыс сулалӧ пасьтӧм джуджыд подув вылын, мый гӧгӧр шыблалӧма пемӧсъяслысь куяс, Франц Хогенберглӧн 1570 вося выльысь лэдзӧмторйын ми аддзам нин нёль пельӧса из вылын сулалысь мӧд аньлысь мыгӧрсӧ. Сійӧ кузь паськӧма да кутӧ киас кагаӧс. Сылы юрбитысь сэтчӧс олысьяслӧн лыдыс чинӧма сизимсянь нёльӧдз, а козинъяссӧ петкӧдлӧма дзик ӧти кучикӧн. И медводдза, и мӧд серпасъясыскӧд орччӧн тыдалӧ гижӧд. Медводдза кывъяссӧ гижӧма кириллицаӧн «Зарни Ань», на бӧрын мунӧ гӧгӧрвоӧдӧм: «Мӧд ногӧн кӧ, зарни пӧч, ен, кодӧс пыдди пуктӧны тайӧ местаясын олысьяс» (Hoc est aurea uetula idolum quod huius partis incolae adorant). Тӧдчӧ серпасъяс да гӧгӧрвоӧдан гижӧд костын тыдалана лӧсявтӧмлун, сы вӧсна мый кыкнан карта вылас петкӧдлӧма том нывбабаясӧс, а абу пӧчӧс[18].

Герберштейнлӧн «Московия йылысь пасйӧдъяс» медводдза изданиеын (1549) Зарни аньсӧ петкӧдлӧма античнӧй Минерваӧн, коді кутӧ киас копьё. Та дырйи, пасйӧдъяссӧ выльысь йӧзӧдӧмсянь кӧкъямыс во мысти, енмыс пукалысь Дева Мария кодь, коді кутӧ киас кагаӧс. Эм мӧвп, мый Зарни аньлысь статуясӧ Австрияса дипломат босьтіс, медым петкӧдлыны кутшӧмкӧ география регион[19], но абу гӧгӧрвоана, мыйла сэки сійӧ вайӧдӧ сыкӧд орччӧн сувтӧдӧм «кутшӧмкӧ инструментъяс йылысь юӧр, кутшӧмъяс пыр шыалӧны трубаяс моз»[20].

  • Дэниэль Келлерлӧн «Азия выльысь опишитӧмысь» карта вылын Slata baba (1590) [21]

    Дэниэль Келлерлӧн «Азия выльысь опишитӧмысь» карта вылын Slata baba (1590) [21]

  • Герард Меркаторлӧн атласысь Арктика карта вылын Zolotaia baba (веськыдвылын) (1595)

    Герард Меркаторлӧн атласысь Арктика карта вылын Zolotaia baba (веськыдвылын) (1595)

Ки вылын кагаӧн статуя, кӧні гижӧма «Зарни ань» (Slata baba), эм XVI нэмся Роч канмулӧн ӧткымын рытыввыв Еврпаса карта вылын Об ю кывтыдын. Торйӧн кӧ, Иоанн Грозный кадся 1562 вося карта вылын, Англияса дипломат да путешественник, Москваса компаниялӧн вузасьысь агент Энтони Дженкинсонӧн лӧсьӧдӧм «Россиялӧн, Московиялӧн да Тартариялӧн карта» копия вылын (1562) пасйӧма: «Злата-баба старуха свято почитается жителями Обдоріи и Югоріи»[22]. Енлысь збыль изваяниесӧ Дженкинсон явӧ эз аддзыв, да та вӧсна серпасаліс сійӧс Рафаэльлӧн Сикстинскӧй мадонна моз[5].

Ачыс Дженкинсон аслас карта дорӧ гӧгӧрвоӧдана гижӧдын юӧртӧ:

«Зарни Пӧчсӧ нимӧдӧны обдорсаяс да юграсаяс. Тун юалӧ тайӧ енмыслысь сы йылысь, мый налы колӧ вӧчны да кытчӧ вуджны овны, а ен (дивӧ!) сетӧ юасьысьяслы вочакывъяс, водзвыв висьталӧмъясыс стӧча збыльмӧны…»[23][24].

Курляндияын чужлӧм Якоб Рейтенфельс, коді 1670 восянь 1673 воӧдз овліс Москваын, юӧртӧ, мый сылӧн кадӧ Зарни аньлысь изваяниесӧ вӧлі нин жугӧдӧма:

«Кандиния, либӧ Кандорскӧй обласьт, пырӧ Гиперборейскӧй саридзӧ, нимсӧ босьтӧма Кандинскӧй мыс да ді серти. Сійӧ зэв озыр дона куясӧн. Тані вӧлі Зарни ань, ен, кодӧс пемыд племяяс лыддисны енмӧн. Рочьяс некымын во сайын аддзӧмаӧсь сійӧс да жугӧдӧмаӧсь, а наӧн пежалӧм мыльксӧ, кытчӧ сэтчӧс олысьяс ӧшӧдлісны быдсяма куяссӧ да мукӧд сикас козинсӧ, кӧні найӧ вӧчлісны жертваяс, лӧсялана ногӧн нимтӧмаӧсь Чӧртлӧн приказӧн, мӧд ногӧн кӧ, дявӧллӧн канцелярияӧн»[25].

Россияса ӧшмӧсъяс

Роч ӧшмӧсъяс пӧвстын медводдзаысь коми язычникъясӧн Зарни аньлы юрбитӧм йылысь юӧртӧма 1398 во гӧгӧрын Медводдза Софийскӧй летописьын  (рус.) (коми[26][27], тайӧ войтырӧс югдӧдысь Перымса Степан кулӧм йылысь юӧртӧмкӧд йитӧдын[28].

Водзӧ вылӧ, пӧшти куим нэм чӧж, ни ӧти роч документ, Москваса митрополит Симонлӧн пермякъяслы послание кындзи (1501), кӧні збыльвылас вӧлі мӧдпӧвъёвтӧма летописьысь юӧрсӧ, оз веськыда висьтав тайӧ ен йывсьыс[29]. Сӧмын ХVI нэм помын, кор Сибырса муяссӧ ӧтувтісны Роч канмукӧд, бара кыптіс обса йӧграяслӧн нималан изваяние дінӧ интерес.

1675 воын Китайӧ мунігӧн Сибыр муяс пыр мунысь роч дипломат Николай Спафарий висьталӧ:

«А Березово дорын эмӧсь енлы ӧстяк кевманінъяс, на йылысь гижӧны земнописецъяс, мый тані эм Зарни Ань ен, но зарнияс йылысь оз висьтавлыны, а мый эзысь, пуысь краситӧмыс зэв уна да ыргӧн кисьтӧны жӧ…»[30].

Нималана традиция йитӧ тӧдтӧм енкӧд Ермак Тимофеевичлӧн  (рус.) (коми Сибырӧ экспедицияын участвуйтысьяскӧд. Кунгурса «висьтъяс» серти, сы йылысь казакъяс тӧдмалісны чувашсянь, коді пышйис налӧн станӧ Демьянскӧй городище кытшӧ босьтігӧн[31]. XVII нэм помын лӧсьӧдӧм Ремезовскӧй летописьын висьтавсьӧ Ермак Богдан Брязгилӧн 1582 вося тулысын Иртыш да Об кузя Белогорьеӧдз поход йылысь:

«Ту бо у нихъ молбище болшее богыне древнеi: нага с сыномъ на стулѣ сѣдящая, приемлюще дары от своихъ, и дающе еi статки во всякомъ промысле, а eже кто по обѣту не дастъ, мучитъ и томитъ, а хто принесетъ жалеючи к неi, тотъ предъ нею падъ умретъ, имѣша бо жрение и съѣзд великіи…»[32].

Европаса туялысьяс казьтывлӧны Зарни ань йылысь легендаяссӧ. Та дырйи кымын сёрӧнджык паныдасьлӧны висьталӧмъясыс, сымын водзӧ асыввывлань вешйӧ сылӧн меститчаніныс[33].

«Янгал-маа» йӧзкостса вогул поэмаын казьтывсьӧ Рача йылысь — «зарни ань» йылысь, кодлы кевмысяніныс, кыдзи висьталӧны, вӧлӧма Рачевскӧй карын Березовскӧй берегын[34]. Поэма опишитӧмын М. Плотников ыстысьӧ XX нэм заводитчӧмся роч охотовед да этнограф К. Д. Носиловлӧн  (рус.) (коми «Эзысь ань» туйвывса очерк вылӧ, кӧні казьтывсьӧ нималана Зарни анькӧд эзысь слиток, кутшӧмӧс Ыджыд Перымса Степан дырйи на «язычникъяс» нуӧмаӧсь Урал сайӧ. Вермас лоны, мый Рачаыс и вӧлі Перымса нималана Зарни аньнас, а сылысь эзысь слитоксӧ, сійӧ жӧ висьталӧм сертиыс, видзисны Конда ю йылын, Ям-Нельпаульын, пӧль-вогул ордын[35].

1981 воын Усть-Маньяысь Уралса проводник-манси Самбиндалов висьтавліс «Центрнаучфильм» киностудияса оператор Михаил Заплаткинлы, мый коркӧ Манья-Тумп гӧра вылын (Ханты-Манси асвеськӧдлан кытшса Берёзовскӧй район) сулалысь Зарни аньлӧн изваяниеыс збыльысь вермис лэдзны гора шыяс: «Гӧра дорті мунны вӧлі страшнӧ. Аньыс гораа горзіс»[5]. Тайӧ эскӧдӧ Герберштейнлысь, Гваньинилысь да Пётр Петрейлысь юӧръяссӧ

Туялӧмъяс

Нидерландыысь нималана учёнӧй, политик да асшӧр уджалысь Николаас Витсен  (рус.) (коми «Войвыв да Асыввыв Тартария» аслас сочинениелӧн мӧд изданиеын (нидерл. Noord en Oost Tartarye, 1705), мый Европаса наукаын вӧлі Сибырлӧн история да этнография серти медводдза уджӧн, Дженкинсонлӧн, Гваньинилӧн да кутшӧмкӧ «тӧдчана роч господинлӧн» мыччӧдъяс вылӧ ыстысьӧмӧн юӧртӧ:

«Гӧра улын, Обдорияын, сулалӧ Зарни Ань статуя. „Злата Баба“ кывъяслӧн вежӧртасыс — „золотая старуха“. Меным юӧртӧны, мый ӧстякъяс да мукӧд язычникъяс — Тобол дорын да Об вылын олысьяс, копрасьӧны дявӧллы, коді, налӧн висьталӧм серти, петкӧдчывлӧ налы аньӧн, коді кутӧ пидзӧс вылас челядьӧс. Сылӧн мыгӧр вылас зильгӧны тільгунъяс. Сыысь ёна полӧны да сійӧс пыдди пуктӧны…»[36]

Швед офицер да путешественник Иоганн Филипп фон Страленберг  (рус.) (коми, коді 13 во вӧлі роч пленын да чукӧртіс Сибырын аддзӧмторъяс йылысь озыр этнографическӧй да картографическӧй материал, аслас «Европалысь да Азиялысь войвыв да асыввыв юкӧнъяссӧ история да география боксянь опишитӧмын», кутшӧмӧс йӧзӧдісны 1730 воын Стокгольмын, медводдзаысь ӧткодяліс скандинавияса сагаясысь Йомалиӧс (Юмалаӧс) Ыджыд Перымлӧн Зарни анькӧд, ӧткымын «летопись роч гижысь» вылӧ ыстысьӧмӧн[37].

XVIII нэмся роч учёнӧйяслӧн, торйӧн кӧ, И. И. Лепёхинлӧн  (рус.) (коми уджъясын петкӧдчӧ юӧр сы йылысь, мый Зарни ань — важся коми ен, кодлысь статуясӧ нуисны Об вылӧ пыртчывны кӧсйытӧм язычникъяс. Г. Ф. Миллер  (рус.) (коми «Сибырлӧн историяын» петкӧдлӧ «Зарни аньсӧ» кыдзи языческӧй енлысь изваяние, «коді пиыскӧд ӧтлаын пасьтӧм пукаліс улӧс вылын». Белогорскӧй вӧлӧсьтса ӧстякъяс, кодъяс олісны Иртыш ю кывтыдын, вайлывлісны сылы жертваяс, мыйысь сійӧ «отсавліс налы вӧралӧмын, чери кыйӧмын да налӧн став уджын». 1583 вося тулысын сэтчӧ воис Богдан Брязгилӧн казакъяс отряд. Та бӧрын енмыс быттьӧкӧ «тшӧктіс асьсӧ дзебны, а ӧстякъяслы кытчӧкӧ дзебсьыны», «кор казакъяс петісны берег вылӧ, нинӧм сэтысь эз аддзыны, куш юртаяс кындзи»[38].

«Зарни ань» йылысь литератураын гижисны зэв уна: кодъяскӧ пыдіа видлалісны-туялісны тайӧ юалӧмсӧ, а кодъяскӧ (а сэтшӧмыс вояс чӧж чукӧрмис уна) сетісны сӧмын подулавтӧм мӧвпалӧмъяс. «Зарни аньӧс» шулісны и «Юноналӧн римса изваяниеӧн», коді зэв важӧн веськавлӧма Урал сайӧ, и Тибетса богиня Тара петкӧдчӧмӧн, и вузасьысьясӧн вайӧм Китайса ен Гуаньиньӧн, да весиг «важ Гипербореяысь важ колясӧн»[5].

Медводдза чайтӧмлы подулӧн вӧлі XV нэмся Италияса гуманист Юлий Помпоний Летлӧн  (рус.) (коми гудыр юӧрыс. Сійӧ 1479—1480 воясӧ лунвыв рочмуясӧ волӧм бӧрын римса историк Луций Анней Флор (миян эраса II нэм) йылысь аслас лекцияясын казьтывліс сы йылысь, мый Обса йӧгра пӧль-пӧчьяс вермисны участвуйтны Аларихса готъялӧн Рим вылӧ походын: «Бӧр локтігӧн, — гижліс Помпоний Лет, — на пиысь ӧткымынӧн овмӧдчисны Паннонияӧ да лӧсьӧдісны сэні вына канму; ӧткымын морт бӧр воисны чужанінас Йиа океан дорӧ да ӧнӧдз налӧн эмӧсь кутшӧмкӧ ыргӧн статуяяс, кодъясӧс найӧ вайӧмаӧсь Римысь да кодъяслы юрбитӧны кыдзи енъяслы»[39]. Сы вылӧ видзӧдтӧг, мый Италияса туялысь явӧ сорлаліс готъясӧс гуннъяскӧд, а Аларихаӧс — Аттилакӧд[40], сійӧ позянлунсӧ, мый сійӧ тӧдмасис Уралбердса античнӧй важторъяслӧн материальнӧй культураӧн , ӧтдортны оз позь, сы вӧсна мый сэні, шуам, вӧлі аддзӧма водз Византия кадся сьӧмпасъяс, а сідзжӧ Сасанидскӧй Иранысь донаторъяс да эзысь дозмук[41]. Олонхо якут эпосын петкӧдчӧ Dies Emeget («ыргӧн нывбаба») — адьярай войтырлӧн ен, кодӧс ӧткымын туялысь ӧткодялӧ кетъяскӧд, кодъяс важысянь нин кужӧны дорччыны[5].

1847 воын Н. И. Костомаров  (рус.) (коми аслас «Славяна мифология» уджын висьталіс сэтшӧм гипотеза, мый Зарни ань веськалӧма Обса йӧгра дорӧ асыввыв славянасянь да петкӧдлӧ языческӧй ен Живаӧс:

«Ми тӧдам, — гижис историк, — мый финн войтырлӧн вӧлӧма Зарни Ань ен, коді ки вылас кутӧ кагаӧс. Тайӧ нимыс, дерт, абу финскӧй да и енсӧ босьтӧма славяналысь… Сійӧ, мый Зарни Ань да Жива костын эм йитӧд да ӧткодьлун, тыдалӧ оз сӧмын сыын, мый кыкнансӧ серпасалӧма кагакӧд… Но Живакӧд ӧткодь и Лада, ӧд Ладалы сиӧм тувсов гажыс вӧлі тшӧтш и Живалы сиӧм гажӧн. Жива да Лада нимъясыс петкӧдлӧны ӧтитор. Нӧшта сьыланкывъясын Лада эпитет — тайӧ мам, а литвасаяс Ладаӧн шулісны Зарни Панеяӧс, мый ӧткодь Зарни Анькӧд»[42]

Но Роч муын олысьяслысь Уралсайса войтыркӧд йитӧдъяс йылысь гижӧма XI нэмысь абу водзджык ӧшмӧсъясын, Кристослы эскӧмӧ пыртӧм бӧрын нин, да тайӧ волысьӧмъясыс медводз петкӧдчисны ӧта-мӧд костын вузасьӧмӧн. 1871 воын тӧдса роч археолог да меценат граф А. С. Уваров  (рус.) (коми лыддис позянаӧн пыртны Зарни аньсӧ «из аньяс» лыдӧ — лунвыв роч степъясса кочевникъяслӧн памятнӧй антропоморфнӧй менгиръяс лыдӧ[43]. Но татшӧмсяма изваяниеяс вӧчан традицияыс лӧсялӧ тюрк, а оз финн-йӧгра войтырлы, абу пасйӧма сідзжӧ зарниалан традициясӧ. Оз лӧсяв степса из аньяслы и обса енмӧс петкӧдланногыс, кодӧс, пырджык, серпасалісны кагакӧд либӧ киас копьёӧн либӧ беддьӧн[44].

1884 воын немеч историк Генрих Михов «Древние карты Руси» уджын висьталӧма, мый Зарни ань ним улын сибырса войтыр пыдди пуктывлӧмаӧсь католическӧй мадонналысь статуясӧ, кодӧс вайлӧмаӧсь на дінӧ рочьяс тыш нуӧдан походъяс дырйи. Татшӧм гипотезалы подулӧн сійӧ, торйӧн кӧ, лыддис ӧстякъяслысь зарниысь вӧчӧм ай енлы юрбитӧмсӧ, коді пукаліс крестильнича кодь дона тасьтіын[45]. Кунгурса летописьлӧн 74 статьяысь юӧрсӧ анализируйтӧм бӧрын позьӧ веськыда гӧгӧрвоны, мый вылынджык индӧм Брязгалӧн казакъяс 1583 воын аддзылӧмаӧсь Демьянка ю вомдорса ӧстяк карысь христиана изваяние, коді Н. М. Карамзинлӧн  (рус.) (коми чайтӧм серти вермис веськавны Урал сайӧ Роч му пыртан кадӧ на[46]:

«И доѣхали конми до усть Демьянки рѣки до болшева ихъ сборного княжца Демаяна; и городъ ихъ великъ и крѣпокъ… Одинъ же въ нихъ Чювашенинъ былъ у Кучюма, руского полону, сказалъ: молятся де они рускому богу и тотъ де руской богъ литой золотой, въ чашѣ сѣдит, и въ ту де чашу наливши воды пьютъ, и зовутъ его Христомъ, а сказываютъ де привезенъ отъ Владимерова крещенiя, и для того живутъ смѣло…»[47]

Но 1906 воын на роч лингвист да философ-евразиеч Н. С. Трубецкой  (рус.) (коми эскӧдана ӧткодяліс «Зарни аньӧс» манси мифологияса медвылыс ен-мам Калтащкӧд (Калтаськӧд), кодлӧн эпитетъясысь ӧти — «Сорни-эква» — вуджӧдсьӧ кыдзи «зарни пӧч»[48]."Сорни" манси кыв вермӧ петкӧдлыны кыдзи зарни, сідзи и шонділысь дзирдалӧмсӧ[49]. Историк-медиевист да археолог В. Я. Петрухин  (рус.) (коми ӧткодялӧ «Зарни Калтащсӧ» му вын петкӧдлысь важ иран ен Ардвисура Анахитакӧд, кодлӧн традиционнӧй атрибутъясӧн вӧліны зарни да мой ку[50].

Кыдзи висьтавліс вылынджык казьтыштӧм К. Д. Носиловлы Оронтон-паульысь синтӧм пӧль-вогул Савва, коми-зырянаӧс да пермякъясӧс пыртӧм бӧрын Зарни аньӧс «сэк жӧ бур йӧз миян вӧръяс пыр вуджӧдісны Об вылӧ; кӧні сійӧ ӧні, Казымын ӧстякъяс дорын али Тазаын самоедъяс дорын, ме стӧча ог тӧд, но сійӧ кадсяньыс, кор сійӧ вӧлі тані, миян коли сыысь слиток — „эзысь ань“. Сійӧс ӧнӧдз на видзӧ ю йылын олысь ӧти вогул… Ямнель-паульын…». Саввалӧн висьталӧм серти, коді том дырйиыс быттьӧкӧ аддзывлӧма нималана изваяниелысь копиясӧ, тайӧ вӧлі эзысьысь кисьтӧм пасьтӧм ань. Сы дорӧ шыӧдчывлісны сэк, кор корисны отсӧг вӧралӧмын. Кор путешественник тӧдмаліс, мый «эзысь аньсӧ» кӧсйылӧмаӧсь нин гусявны, сійӧ кӧсйис аддзывны да, позяна кӧ, снимайтны либӧ ньӧбны сійӧс музейӧ нуӧм могысь, но тувсовъя рӧспута торкӧма сылысь планъяссӧ[51]. К. Д. Носилов веськыда шуліс, мый Зарни ань кодь енлы кевман изваяниеяссӧ мансияс лӧсьӧдлӧмаӧсь унаысь да абу ӧти экземплярын[5].

Зарни ань искусствоын

Художествоа литератураын

Уралса гижысь Сергей Плеханов 1985 воын йӧзӧдіс «Молодая гвардия» издательстволӧн «Приключения-85» литература альманахын «Золотая баба» историческӧй повесьт. Сійӧс сиӧма XVІІІ нэмлӧн медводдза джынйын Уралын роч промышленникъясӧн нималана енмӧс корсьӧмлы. 1986 воын Свердловскса киностудияын режиссёр Виктор Кобзев тайӧ небӧг сертиыс пуктіс татшӧм жӧ нима кино.

Александр Бушковлӧн «След пираньи» романса (1996) шӧр герой Кирилл Мазур, кор зільӧ петны пармаысь Америкаысь аслас ёртыскӧд, виччысьтӧг веськалӧ пещераӧ, кӧні видзӧны Зарни аньӧс. Недыр мӧвпалӧм бӧрын Мазур шуӧ кольны нималана статуясӧ места вылас, но век жӧ муртса оз веськав статуя видзысьяслӧн ки улӧ.

Зарни ань йылысь мифлы сиӧма Алексей Ивановлӧн «Сердце пармы» (2003) историческӧй романлысь тӧдчана юкӧнсӧ. Енлы кевмӧдан статуя корсигӧн да гусялігӧн, а сідзжӧ сійӧс бӧр босьтігӧн кувсьӧны да/либӧ йӧймӧны гижӧдса ӧткымын герой. Мукӧдлы, мӧдарӧ, енсӧ босьтны (либӧ сійӧс дорйыны) налӧн кыв сетӧмыс козьналӧ кузь олӧм. Сійӧ оз вермы орны сэтчӧдз, кытчӧдз найӧ оз пӧртны олӧмӧ кӧсйысьӧмсӧ.

Эрнст Бутинлӧн «Золотой огонь Югры» повесьтын висьтавсьӧ Рытыввыв Сибырын Сӧвет власьт лӧсьӧдӧм вӧсна тыш дырйи «Сорни най» вӧсна кыйсьысь кулак-эсеръяса бандалысь колясъяссӧ бырӧдӧм йылысь.

Юрий Курочкинлӧн «Легенда о Золотой бабе» приключенческӧй повесьтын автор вӧдитчӧ литература сюрӧсӧн кыдзи Зарни ань йылысь легендаяс историческӧя туялан средствоӧн, вӧдитчӧ ас му туялан озыр материалӧн.

Анна Кирьяновалӧн «Охота Сорни-Най» романын мистика отсӧгӧн гӧгӧрвоӧдсьӧ Дятлов туристическӧй группалӧн кувсьӧмыс, кодъясӧс кыйис скӧр ен.

Борис Зотовлӧн «По следам золотого идола» повесьтын томулов чукӧр босьтӧ Зарни ань йылысь гижӧдсӧ да юӧр юкӧнсӧ сы йылысь, кӧні енмыс вермас лоны.

Сергей Булыгалӧн «Золотое дело» романын сыщик Маркел Косой, Рӧзбой приказса стряпчӧй, 1595/1596 воясся тӧлын мӧдӧдчӧ гуся миссияӧн Югорскӧй муӧ корсьны «Зарни ань» нима кутны позьтӧм ёмаӧс.

Киноын

• Золотая баба (фильм)  (рус.) (коми;
• Сокровища мёртвых (сериал)  (рус.) (коми;
• Перевал Дятлова (телесериал)  (рус.) (коми;
• Сердце Пармы (фильм)  (рус.) (коми.

Музей экспозицияясын

«Легенды седого Иртыша» Уватса ас му туялан музейын (Тюмень обласьт) эм Зарни ань йылысь легендалы сиӧм экспозиция. Кунгурса летопись серти, нималана ханты ен вӧлі нёль нэм сайын Демьянскӧй карын (Уватса районлӧн мутас) да гӧгӧрвотӧма воши сэтысь, кор карсӧ босьтісны Ермаклӧн казакъяс атаман Брязга юрнуӧдӧм улын[52]. Зал шӧрас петкӧдлӧма енлы вись пуктанінсӧ, мый весьтын сулалӧ Зарни ань, кодӧс вӧчӧма летопись гижысь С. У. Ремезовлӧн серпасъяс серти да вевттьӧма збыль зарниӧн.

Пасйӧдъяс

  1. ↑ Alessandro (1538-1614) Guagnini. Sarmatiae Europeae Descriptio [... Alexandi Gwagnini [...]]. — Wirzbięta, Maciej (1523-1605), 1578. Архивировано 21 кӧч тӧлысь 2021 года.
  2. ↑ Джаксон Т. Н. Исландские королевские саги о Восточной Европе (первая треть XI в.). Тексты, перевод, комментарий. — М.: НИЦ «Ладомир», 1994. — С. 174—175.
  3. ↑ Марков А. А. К реконструкции представлений о локализации Биармии (Бьярмленда) в средневековых источниках.
  4. ↑ Снорри Стурлусон. Круг Земной. — М.: Ладомир, 1995. — С. 284—285.
  5. ↑ 1 2 3 4 5 6 Lashuk L. Golden woman. One step closer to solving (англ.).
  6. ↑ Анучин Д. Н. К истории ознакомления с Сибирью до Ермака // Труды импер. Московского археологического общества. — М., 1890. — Т. IV. — С. 280.
  7. ↑ Никитин А. Л. Основания русской истории. — М.: АГРАФ, 2001. — 691 с.
  8. ↑ Раннее немецкое известие о Золотой Бабе. Сайт академика Бегунова Ю. К.. Шыӧдчан кадпас: 7 йирым тӧлысь 2025.
  9. ↑ Кудрявцев О. Ф. Золотая баба на картах Московии Антония Вида. Вопросы иконографии // Древняя Русь. Вопросы медиевистики. — М., 2019. — № 1. — С. 48—52.
  10. ↑ Кудрявцев О. Ф. Золотая баба на картах Московии Антония Вида. Вопросы иконографии // Древняя Русь. Вопросы медиевистики. — М., 2019. — № 1. — С. 50.
  11. ↑ Magnus Olaus. Historia de gentibus septentrionalibus (англ.) // Apud Ioannem Bellerum. — 1562. — P. 30.
  12. ↑ Герберштейн С. Записки о московитских делах // Россия XV—XVII вв. глазами иностранцев. — 1986. — С. 115.
  13. ↑ Кудрявцев О. Ф. Золотая баба на картах Московии Антония Вида. Вопросы иконографии // Древняя Русь. Вопросы медиевистики. — М., 2019. — № 1. — С. 52.
  14. ↑ Герберштейн С. Записки о Московии. — 1988. — С. 160.
  15. ↑ Гваньини А. Описание Московии. — Греко-латинский кабинет Ю. А. Шичалина, 1997. — С. 51.
  16. ↑ Флетчер Дж. О государстве Русском // Проезжая по Московии (Россия XVI—XVII веков глазами дипломатов) / Под ред. Н. М. Рогожина. — 1991. — С. 99—100.
  17. ↑ Петрей де Ерлезунда П. История о Великом княжестве Московском // О начале войн и смут в Московии. — 1997. — С. 195.
  18. ↑ Кудрявцев О. Ф. Золотая баба на картах Московии Антония Вида. Вопросы иконографии // Древняя Русь. Вопросы медиевистики. — М., 2019. — № 1. — С. 50.
  19. ↑ Кудрявцев О. Ф. Золотая баба на картах Московии Антония Вида. Вопросы иконографии // Древняя Русь. Вопросы медиевистики. — М., 2019. — № 1. — С. 49.
  20. ↑ Алексеев М. П. Сибирь в известиях западно-европейских путешественников и писателей. — 1941. — С. 106.
  21. ↑ Город Пермь Великая — история, название, древние карты в высоком разрешении // Журнал «Снегирь».
  22. ↑ Глинка Г. В. Атлас Азиатской России / И. И. Тхоржевский, М. А. Цветков. — СПб.: Переселенческое управление, 1914. Архивировано 1 кӧч тӧлысь 2022 года.
  23. ↑ Бурыкин А. А. Золотая баба: идол или топоним? // «Сибирская Заимка». История Сибири в научных публикациях.
  24. ↑ Английские путешественники в Московском государстве в XVI в.. — М.: ОГИЗ-СОЦЭКГИЗ, 1937. — С. 307.
  25. ↑ Рейтенфельс Якоб. Сказания Светлейшему герцогу Тосканскому Козьме Третьему о Московии // Утверждение династии. — М.: Фонд Сергея Дубова, 1997. — С. 398.
  26. ↑ Полное собрание русских летописей. — СПб.: В тип. Э. Праца, 1851. — Т. 5. — С. 250.
  27. ↑ Полное собрание русских летописей. — М.: Наука, 1994. — Т. 39. — С. 135.
  28. ↑ Карамзин Н. М. История государства Российского. — М.: Наука, 1993. — Т. V. — С. 66, 266.
  29. ↑ Лашук Л. П. А была ли баба золотая? // Вокруг света. — 2013. — 20 октябрь (№ 12 (декабрь)). — С. 39.
  30. ↑ Путешествие чрез Сибирь от Тобольска до Нерчинска и границ Китая русского посланника Николая Спафария в 1675 году // Записки русского географического общества по отделению этнографии. — СПб., 1882. — Т. X, вып. 1.
  31. ↑ Скрынников Р. Г. Сибирская экспедиция Ермака. — Новосибирск: Наука, Сибир. отделение, 1986. — 247—248 с.
  32. ↑ Сибирские летописи. — Рязань: Александрия, 2008. — 336 с.
  33. ↑ Алексеев М. П. Сибирь в известиях западно-европейских путешественников и писателей. — С. 118.
  34. ↑ Плотников М. А., Клычков С. А. Янгал-маа: вогульская поэма со статьей автора о вогульском эпосе. — Москва; Ленинград: Академия, 1933. — 610 с. Архивировано 30 моз тӧлысь 2022 года.
  35. ↑ Носилов К. Д. У вогулов. Очерки и наброски. — СПб., 1904. — 112 с.
  36. ↑ Витсен Николаас. Северная и Восточная Тартария. — Амстердам: Pegasus, 2010.
  37. ↑ Записки капитана Иоганна Филиппа Страленберга об истории и географии Российской империи Петра Великого. — М.; Л.: ЛО Ин-та истории СССР АН СССР, 1985. — Т. I. Северная и Восточная часть Европы и Азии. — С. 39, 72.
  38. ↑ Миллер Г. Ф. История Сибири. — М.: Издат. фирма «Восточная литература» РАН, 1999. — Т. I. — С. 242.
  39. ↑ Ионина Н. А. 100 великих сокровищ. — М.: Вече, 2002.
  40. ↑ Забугин В. Н. Юлий Помпоний Лэт: Крит. исследование // Историческое обозрение (1913 г.). — СПб.: Тип. М.М. Стасюлевича, 1914. — С. 97—98.
  41. ↑ Бадер О. Н., Смирнов А. П. «Серебро закамское» первых веков нашей эры. Бартымское местонахождение // Труды ГИМ. Памятники культуры. — М., 1954. — Вып. XIII.
  42. ↑ Костомаров Н. И. Славянская мифология. — Киев: Тип. И. Вальнера, 1847. — 30—31 с.
  43. ↑ Веселовский Н. И. Мнимые каменные бабы. — СПб.: Тип. П.П. Сойкина, 1905. — С. 4.
  44. ↑ Веселовский Н. И. Мнимые каменные бабы. — СПб.: Тип. П.П. Сойкина, 1905. — С. 10.
  45. ↑ Алексеев М. П. Сибирь в известиях западно-европейских путешественников и писателей. — С. 117.
  46. ↑ Карамзин Н. М. История государства Российского. — М.: Книга, 1989. — С. 158.
  47. ↑ Краткая Сибирская летопись (Кунгурская) // Сибирские летописи. — С. 424—425.
  48. ↑ Трубецкой Н. С. К вопросу о Золотой бабе // Этнографическое обозрение. — М., 1906. — № 1—2. — С. 60.
  49. ↑ Гемуев И. Н., Сагалаев А. М., Соловьев А. И. Легенды и были таёжного края. — Новосибирск, 1989. — С. 167.
  50. ↑ Петрухин В. Я. Мифы финно-угорских народов. — М.: Астрель; АСТ; Транзиткнига, 2005. — С. 25.
  51. ↑ Носилов К. Д. У вогулов. Очерки и наброски. — СПб.: Типография А. С. Суворина, 1904. — С. 114, 117—119.
  52. ↑ Vladimir Adaev. Ушедший хозяин Демьяна (почитание хантами духа-хозяина р. Демьянка в XX в.) (англ.). Архивировано 8 ода-кора тӧлысь 2018 года.

Литература

Наука литература

Научно-популярнӧй литература

  • Чулков М. Д. Золотая баба // Предания о народных русских суевериях, поверьях и некоторых обычаях. — М.: Тип. С. Орлова, 1861. — С. 103.
  • Гемуев И. Н., Сагалаев А. М., Соловьёв А. И. Легенды и были таёжного края. — Новосибирск: Наука, Сибир. отделение, 1989. — 176 с. — ISBN 5-02-029181-1.
  • Ионина Н. А. 100 великих сокровищ. — М.: Вече, 2002. — ISBN 5-7838-0689-7.
  • Захаров А. П. Вслед за Великой Богиней: легенда о Золотой Бабе: Сборник. — М.: Вече, 2012. — ISBN 978-5-4444-0113-2.

Юӧр сетан литература

  • Зарни ань // Энциклопедический словарь Брокгауза и Ефрона : в 86 т. (82 т. и 4 доп.). — СПб., 1894. — Т. XIIa. — С. 632.
  • Зарни ань // Малый энциклопедический словарь Брокгауза и Ефрона. — 2-е изд., вновь перераб. и значит. доп. Т. 1-2. — СПб., 1907—1909.
  • Республика Коми. Энциклопедия. — Сыктывкар: Коми книжное издательство, 1997. — Т. 1. — С. 464. — ISBN 5-7555-0694-9.
  • Северная энциклопедия. — М.: Европейские издания; Северные просторы, 2004. — 303—304 с. — ISBN 5-98797-001-6.
  • Кулемзин В. М. Золотая баба // Югория. Энциклопедия Ханты-мансийского автономного округа. — Ханты-Мансийск, 2000. — ISBN 5-88664-084-3.

Художествоа литература

Ыстӧгъяс

Босьтӧма "https://kv.ruwiki.ru/w/index.php?title=Зарни_ань&oldid=482773"-ысь