Коми сёрнисикасъяс

Сёрнисикас (грек. diаlektos — сёрни, сёрнисикас, рочӧн диалект) — кывлӧн сикас, мыйӧн вӧдитчӧны торъя мутасын олысь йӧз.

Коми сёрнисикасъяслӧн карта

Коми кыв сикасъяс

Коми кыв пырӧ перым кыв чукӧрӧ да артмӧ куим ыджыд юкӧнысь: перым коми сёрниног, зыран коми сёрниног да язьва коми сёрниног.
Став тайӧ нимыс туялысьяс кост сёрнитчӧм серти артмӧма: ӧд став комиыс асьсӧ нимтӧ комиӧн, а оз зырянинӧн, пермякӧн ли язьвенечӧн.

Язьва коми cёрни

Язьва коми cёрниног юргӧ Перым областьса Красновишерск районын, Язьва ю пӧлӧн, Вылыс Язьва сиктсӧветувса Көрйөл (Антипина), Көрул (Паршакова), Талавол, Конанова, Арефина, Вылыс да Улыс Заполье, Сÿйөб (Ванькова), Егорова, Коновалово, Симанова грездъясын. Медгырысьясыс на пиысь — Антипина, Паршакова да Ванькова.

Перым коми сёрни

Перым коми кывъя йӧз олӧны вӧвлӧм Перым коми кытшын. Перым коми сёрнисикасъяс юксьӧны лунвыв да войвыв наречиеяс вылӧ. Быд сёрниног ӧтувтӧ нёль сёрнисикас.
Лунвыв сёрниногӧ пыртӧны ӧнь, нердва, кудымкар-иньва да иньвагорув сёрнисикасъяс.
Войвыв сёрниног ӧтувтӧ мыс-луп, кӧсва-кама да кӧчладор сёрнисикасъяс.

Сюзьдінса коми сёрни

Перым коми сёрнисикасъяс лыдӧ пыртӧны и камайыв сёрниног, коді паськалӧма Киров областьса Афанасьевскӧй районын. Сэтчӧс олысь войтырсӧ нимтӧны нӧшта сюзьдінса комиясӧн. Сюзьдін (рочӧн Зюздино) — Афанасьево сиктлӧн важ нимыс. Тайӧ аслыспӧлӧс сёрнисикас, коді кыв сертиыс сулалӧ перым коми да зыран коми сёрнисикасъяс костын.

Коми (зыран коми) сёрни

Коми войтыр олӧны кызвыннас Коми Республикаын. Кыв туялысьяс торйӧдӧны дас сёрнисикас:

1. Луза-Леткабердса сёрнисикас паськалӧма Луза да Лэтка юяс ковтысын, ӧнія Луздор районын (Прокопьевка, Мутнича, Гуръёвчи, Слудка, Пӧруб, Ношуль, Занулльӧ, Абъячой). Юксьӧ луза да летка сиктсёрнияс вылӧ. Сёрнисикаслӧн уна ӧтувъялун перым коми да камайывса сёрнисикасъяскӧд.

2. Сыктывйывса сёрнисикас ӧнiя кадӧ паськалӧма Сыктыв катыдын: Грива, Карвуджӧм, Койгорт, Ужга, Мырпонаыб сиктъясын; водзынджык сыктывйывса комияс овлӧмны и Кобра ю пӧлӧн. Кобра сиктсёрниыс вӧлӧма зэв аслыспӧлӧс, но ӧнія лунъясӧ тайӧ сиктас некод оз ов, олысьясыс вуджисны гырысьджык сиктъясӧ, но кужисны видзны ас сиктсёрнилысь торъяланасӧ. Сыктывйывса сёрнисикас мукӧд сёрнисикасысь медводз торъялӧ аслыспӧлӧс пӧдса о шыӧн (пример вылӧ, пон ‘конец’ — пôн ‘собака’; корс’а ‘ищу’ — кôрс’а ‘веник’; кос ‘промежуток’ — кôс ‘сухой’). Бара жӧ матын перым коми да камайывса сёрнисикасъяскӧд.

3. Сыктывшӧрса сёрнисикасӧн сёрнитӧны шӧр Сыктыв ю ковтысын, Кебра, Гагшор, Визиндор, Визин, Палаззя, Поёл, Куниб, Межадор, Чуклӧм, Ыб, Паджга сиктъясын олысь йӧз.

4. Сыктывкарбердса сёрнисикас — гижӧда кывлӧн подув — паськалӧма Сыктывкарын да сы гӧгӧрса сиктъясын (Чит, Кӧджпом, Сёська, Зеленеч, Койтыбӧж, Парчӧг). Ин сертиыс тайӧ шӧр сёрнисикас, коді йитӧ лунвыв да войвыв сёрнисикасъяс.

5. Эжвагорувса сёрнисикас паськалӧма шӧр Эжва ю ковтысын, Гам, Айкатыла, Висдін, Зӧвсьӧрт, Ипать, От, Паль сиктъясын.

6. Емва сёрнисикасӧн сёрнитӧны вылыс да шӧр Емва ю пӧлӧн, Синдор ты бокын олысь войтыр (Княжпогост районса Весыва, Синдор, Туръяыб, Кони сиктъяс).

7. Удора сёрнисикас паськалӧма Вашка да Мозын юяс пӧлӧн (Ёвкӧдж, Мукты, Важгорт, Путшкымдін, Веньдін, Слӧбӧда, Йӧртымдін, Сёльыб, Удор, Пыисдін). Зэв аслыспӧлӧс сёрнисикас, уна ӧтувъя кыв петкӧдчӧм матыстӧ тайӧ сёрнисикассӧ перым коми сёрнисикасъяскӧд. Удора сёрнисикасын торйӧдӧны вит сиктсёрни: вашкайыв, вашкагорув, мозынйыв, мозыншӧр, мозынгорув.

8. Изьва сёрнисикас юргӧ Изьва, Печора, Уса юяс ковтысын (Изьва, Букур, Сизяыб, Краснобор, Вертеп, Шелляюр. Кыдзкар, Кипиёва, Мутнӧй Материк, Уквавом, Колва). Войвывсянь изьва сёрнисикас йитчӧ ненеч да роч сёрнисикасъяскӧд. Колӧ пасйыны, мый изьва кывъя войтыр олӧны оз сӧмын Коми муын, но и Тюмень, Кардор да Мурман обласьтъясын.

9. Эжвайывса сёрнисикас паськалӧма вылыс Эжва ю ковтысын: Локчим, Висер да Воч юяс пӧлӧн (Висер, Дереваннӧй, Дон, Керчомъя, Воч, Дзоль, Мордін, Мыс, Помӧсдін, Шойнаты, Кулӧмдін, Нэмдін). Тайӧ сёрӧн артмӧм сёрнисикас; сӧвмис мукӧд сёрнисиксъяс подув вылын.

10. Печора сёрнисикас (Мылдін, Абар, Покча, Саваяг, Дутов, Пӧдчерем). Тайӧ бара жӧ серӧн артмӧм сёрнисикас: Сыктывшӧрса да эжвайывса сёрнисикасъяс подув вылын.

Зыран-коми сёрнисикасъяс торйӧдӧны лунвыв да войвыв чукӧръяс вылӧ:
Лунвыв сёрнисикасъяс лыдӧ пырӧны Луза-Леткабердса, Сыктывйывса да Сыктывшӧрса сёрнисикасъяс.
Войвыв сёрнисикасъяс — Эжвагорувса, Удора, Емва да Изьва.
Сыктывкарбердса — вуджана сёрнисикас.
Эжвайывса да Печора сёрнисикасъяс артмисны-сӧвмисны сёрӧн, бӧръя кыксё воясӧ.

Литература

• Баталова Р. М. Диалектная система коми-пермяцкого языка и её развитие в сравнительном и ареальном освещении: Научный доклад на соискание ученой степени доктора филологических наук. — М., 1998. — 70 с.
  
• Баталова Р. М. К вопросу о классификации коми-пермяцких диалектов // Congressus Tertius Internationalis Fenno-Ugristarum. Pars I: Acta Linguistica. — Tallinn, 1975. — C. 538—540.
  
• Баталова Р. М. Коми-пермяцкая диалектология. — М.: Наука, 1975. — 252 с. (АН СССР. Ин-т языкознания).
  
• Безносикова Л. М. Диалекты коми языка // Историко-культурный атлас РК. — М., 1997. — С. 284—285.
  
• Жилина Т. И. Верхнесысольский диалект коми языка / Отв. ред . Е. С. Гуляев. — М.: Наука, 1975.- 268 с. (АН СССР. Коми филиал).
  
• Жилина Т. И. Вымский диалект коми языка / Ин-т. яз. лит. и истории Коми НЦ УрО РАН. Отв. ред. Г. В. Федюнева. -Сыктывкар, 1998. — 438 с.
  
• Жилина Т. И. Лузско-летский диалект коми языка / Отв. ред. Г. Г. Бараксанов. — М.: Наука, 1985. — 271 с.
  
• Жилина Т. И., Бараксанов Г. Г. Присыктывкарский диалект и коми-литературный язык. — М.: Наука, 1971. — 276 с.
  
• Жилина Т. И., Сахарова М. А., Сорвачева В. А. Сравнительный словарь коми-зырянских диалектов: Ок. 25 000 слов / Коми филиал АН СССР. Сыктывкар: Коми книгоиздат, 1961. 490 с.
  
• Попова Р. П., Сажина С. А. Фонетические и морфологические особенности коми диалектов (сравнительный аспект исследования) : монография. Сыктывкар: Издательство СыктГУ, 2014. 248 лб.
  
• Сахарова М. А., Сельков Н. Н. Ижемский диалект коми языка / Отв. ред. В. И. Лыткин. — Сыктывкар: Коми кн. изд-во, 1976. — 288 с.
  
• Колегова Н. А., Бараксанов Г. Г. Среднесысольский диалект коми языка/ Отв. ред. Т. И. Жилина. — М.: Наука, 1980. — 226 с.
  
• Хаузенберг А.-Р. Формирование коми диалектов: факты и гипотезы // Пермистика: вопросы диалектологии и истории пермских языков/ Отв. ред. Б. Ш. Загуляева, В. К. Кельмаков. — Ижевск, 1987. — С. 55-59.
• Игушев Е. А. Коми сёрнисикасъяс. Сыктывкар: Издательство СыктГУ, 1996.

Пасйӧдъяс