Печӧра (кар)

Видлалӧм гижӧд

Кар
Печӧра
Печӧра
Канпас
65°07′ с. ш. 57°07′ в. д.
Страна	Россия
РФ-са субъект	Коми Республика
Муниципальнӧй район	Печӧра район
Кар овмӧдчӧмин	Печӧра
Пытшкӧсса юклӧм	Кӧрт туй вокзал юкӧн; Юдорса юкӧн; НИБ; Мехколонна-53; Асыввыв
Муниципальнӧй районса юралысь - администрацияӧн веськӧдлысь	Шутов Олег Иванович
История да география
Лӧсьӧдӧма	1940 воын
Кар	1949 восянь
Ыджда	28,9 км²
Шӧрин вылна	59 м
Ывласям	шӧркодь континентальнӧй
Час кытш	UTC+3:00
Йӧз
Олысь лыд	▼35 254 чел. (2021)
Олысь лыд км² вылӧ	1036,88 морт/км²
Войтырсикасъяс	рочьяс, белорусъяс, украинечьяс, коми, венгръяс
Конфессияяс	православнӧйяс, старообрядечьяс, мусульмана
Катойконим	печӧраса
Лыдпаса идентификаторъяс
Телефон код	+7 82142, 8(2142)
Пошта индексъяс	169601, 169606, 169607, 169609
ОКАТО код	87420
ОКТМО код	87620101001
Мукӧдтор
Кар лун	тӧвшӧр тӧлысь 18-ӧд лун
pechoraonline.ru  (рус.)
Печӧра Москва
Медиафайлы на РУВИКИ.Медиа

Печӧра — тайӧ Коми Республикаын кар. Печӧра муниципальнӧй районлӧн административнӧй шӧрин, артмӧдӧ Печӧра кар овмӧдчӧмин. Регионса юркарӧдз — Сыктывкарӧдз — 588 км.

Ним артмӧм

Нимыс артмӧма Печӧра гидронимысь .

География

Печӧра районлӧн мусерпас

Карыс меститчӧма республикалӧн асыв-войвылын, Сыктывкарсянь асыв-войвылӧ 588 км ылнаын, Печӧра юлӧн веськыд берегын, Войвыв кӧрт туйӧн вомӧнасянінын.

Карлӧн географическӧй координатаясыс — 65°07′ в.ш. да 57°07′ а.д. Веркӧслӧн абсолютнӧй пасъясыс вежласьӧны 42-64 метраӧдз. Пукалӧ Печора увтасын. Мутаслӧн веркӧсыс артмӧдӧма ва юклан платоӧн да Печора ю ковтысӧн. Рельефыслӧн эмӧсь юдорса обласьтъяслӧн став морфологическӧй признакъясыс (тшӧтшкӧс, жебиник мылькъяса).

Физико-географическӧй боксянь карлӧн мутас пырӧ Печӧраса равниннӧй среднетаежнӧй природно-территориальнӧй комплексӧ. Кар дорын эм мусир да биару, а сідзжӧ каменнӧй материалъяслысь куйлӧдъяс (кирпич да биысь видзчысян сёй, стрӧитчан из, лыа да лыаа-гравий материал).

Печӧра пырӧ Шӧр Войвывса зонӧ, Ылі Войвыв район, кӧні индӧма районса коэффициентсӧ 1,3. «Войвыв балл» лыдыс — 148.

Ывласям

Ывласямыс шӧркодь континентальнӧй, тӧлыс — лымъя, кузь да кӧдзыд, гожӧмыс — дженьыд да ыркыд. Сынӧдлӧн вося шӧр температураыс −1,9 °C, медся шоныд тӧлысьӧн лоӧ сора тӧлысь — +16,1 °C; медся кӧдзыд тӧлысьын (тӧвшӧр тӧлысь) — −18,4 °C. Вогӧгӧрся шӧркодь енэжваыс — 580 мм.

Ывласям Печӧралӧн

Петкӧдлас	Тӧвшӧр тӧлысь	Урасьӧм тӧлысь	Рака тӧлысь	Косму тӧлысь	Ода-кора тӧлысь	Лӧддза-номъя тӧлысь	Сора тӧлысь	Моз тӧлысь	Кӧч тӧлысь	Йирым тӧлысь	Вӧльгым тӧлысь	Ӧшым тӧлысь	Во
Абсолютнӧй максимум, °C	2,5	2,5	11,0	21,9	30,6	34,1	34,9	32,4	27,6	20,0	7,7	3,5	34,9
Шӧркодь максимум, °C	−14,4	−13	−3,6	2,5	9,5	18,0	21,7	16,9	10,3	2,2	−7,3	−11,9	2,6
Шӧркодь температура, °C	−18,4	−17,2	−8,9	−3,2	4,2	12,3	16,1	12,0	6,5	−0,2	−10,5	−15,7	−1,9
Шӧркодь минимум, °C	−22,5	−21,4	−13,7	−8,3	−0,3	7,4	11,1	8,0	3,6	−2,5	−13,8	−19,7	−6
Абсолютный минимум, °C	−54,7	−56	−44,7	−35,7	−23,3	−5,6	0,1	−3,1	−9,5	−33,9	−43,3	−52,5	−56
Енэжва норма, мм	42	32	31	33	45	67	72	77	62	63	49	50	623
Источник: Поводдя да ывласям

Час кытш

Печӧра кар, кыдз и ставнас Коми Республика, меститчӧ МСК (москваса кад) час кытшын. UTC серти кадыс торъялӧ +3:00 вылӧ.

История

• 1903 воын Россияса Войвыв нималана туялысь В. А. Русанов вӧчис ыджыд экспедиция Печӧра ю кузя, кывтіс и мича крут берегъяс пӧлӧн, кӧні матӧ 40 во мысти чужис Печӧра кар.
• 1940 вося гожӧмын, Войвыв-Печӧра кӧрт туй стрӧитӧмкӧд йитӧдын (1937—1942 вояс), ӧнія депо да Печӧра кӧрт туй станция вокзал районын заводитіс уджавны строитчысьяслӧн отряд, кӧні кызвыннас вӧліны ГУЛАГ-ын пукалысьяс. Медводдза недырся оланінъяссӧ (землянкаяссӧ да баракъяссӧ) кутісны шуны Печӧра кӧрт туй станцияса посёлокӧн. Тайӧ жӧ гожӧмнас 1940 воын Печӧра ю вылын вӧлі стрӧитӧма Канин Нос пристань, сэтчӧ медводдза начальникӧн индісны Н. А. Богатырёвӧс. 1942 во помын Войвыв-Печӧра магистральсӧ вӧлі пыртӧма уджӧ.
• 1943 вося гожӧмын немечьяс пуксьӧдісны Печӧра районӧ десант, медым взорвитны ю вомӧн поссӧ, но сӧветскӧй военнопленнӧйясысь диверсионнӧй группаӧ пырысьяс ас вӧляысь сетчисны НКВД-лы.
• 1949 вося тӧвшӧр тӧлысь 18-ӧд лунӧ Печӧра кӧрт туй станцияса да Канин Нос пристаньса паськалӧм посёлокъяссӧ ӧтувтісны да сетісны карлысь статус. Тайӧ луныс лыддьыссьӧ Печӧралы подув пуктан официальнӧй лунӧн. Кожва районлысь административнӧй шӧринсӧ вуджӧдісны Кожваысь Печӧраӧ.
• Печӧра лои республикалӧн медшӧр транспорт узелъясысь ӧтиӧн: ва да кӧрт туйяс дорӧ содісны ещӧ и сынӧд туйяс — 1956 воын вӧлі стрӧитӧма аэродром.
• Кар дорын стрӧитісны «Дарьял» сикаса радиолокационнӧй станция, кӧні вӧлі ракетаяслӧн уськӧдчӧм йылысь водзвыв юӧртан система.
• 1974 вося тӧвшӧр тӧлысьын заводитісны стрӧитны Печӧраса ГРЭС. Стрӧйкаыс босьтіс ставсоюзса статус, медводдза энергоблок вӧлі пыртӧма уджӧ 1979 вося урасьӧм тӧлысь 5-ӧд лунӧ. Татшӧм ногӧн, Печора лои Коми АССР-лӧн «энергетика юркарӧн»: ӧні Печӧраса ГРЭС-ын вӧчсьӧ Коми Республикаса став электроэнергияысь коймӧд юкӧныс.
• 2010 воын вынсьӧдӧма 2030 воӧдз Печора сӧвмӧдан генеральнӧй план.
• Карыс бура сӧвмис, кытчӧдз ХХ нэмся 90-ӧд воясӧ Печораын эз тупкысь некымын предприятие. Йӧзыс кутісны разӧдчыны. 2021 вося лыдпасъяс серти карын олӧ 35 254 морт.

Олысь лыд

Олысь лыд

1959	1967	1970	1979	1987	1989
30 586	↗38 000	↘37 803	↗56 361	↗64 000	↗64 746
1991	1992	1996	1998	2002	2003
↗66 500	↘65 400	↘62 400	↘60 400	↘48 700	→48 700
2005	2006	2007	2008	2009	2010
↘47 700	↘47 200	↘46 900	↘46 700	↘46 099	↘43 105
2011	2012	2013	2014	2015	2016
↘43 100	↘42 296	↘41 716	↘41 189	↘40 910	↘40 653
2017	2018	2019	2020	2021
↘40 048	↘39 400	↘38 784	↘38 229	↘35 254

10 000

20 000

30 000

40 000

50 000

60 000

70 000

1979

1996

2006

2011

2016

2021

Культура

• «Досуг» карса котыр ӧтувтӧ художественнӧй самодеятельностьын 22 котыр, сідзжӧ уджалӧны интересъяс серти куим клуб да 6 ӧтйӧза организация.
• «Шойччан да кино шӧринӧ» пырӧ 25 клуб.
• «Меридиан» клуб котырӧ пырӧ сиктса да карса овмӧдчӧминъясын 21 филиал.
• «Печораса овмӧдчӧминкостса ӧтувтӧм библиотечнӧй системаӧ» пырӧ 22 библиотека: 6 — карын да 16 — Печӧра районын.
• Печӧраса историко-краеведческӧй музей, сійӧс вӧлі восьтӧма 1969 воын общественнӧй подув вылын, 1977 воын сылы сетӧма «канму музей» статус
• Печӧра карса искусствояс школа; эм скрипка, баян, гитара, аккордеон, домра, балалайка, фортепиано юкӧнъяс; художественнӧй, театральнӧй.

Велӧдӧм

• Печӧраса ю училище (2006 восянь Петыркарса ва коммуникацияяс кузя канму университетлӧн филиал) — ювывса флотлы вылыс тшупӧда специалистъясӧс дасьтан ыджыд велӧдчанін, кӧні эм ӧнія кадлы лӧсялана материальнӧй база.
• Печӧраса промышленно-экономическӧй техникум — Печӧраын медся гырысь велӧдчанінъясысь ӧти. Сэні велӧдчӧ сюрсысь унджык морт улыс тшупӧда 16 профессия да шӧр тшупӧда 4 специальносьт серти.
• Общеобразовательнӧй системаын уджалӧ 8 школа, на лыдын ӧти гимназия.

Нималана йӧз

• Вальран Валерий (Козиев) (1949) — художник-нонконформист, психолог, психология наукаяс кандидат;
• Дарпинян Роман Иванович (1978) — тележурналист, военнӧй корреспондент, «Владивосток» ГТРК-лӧн генеральнӧй директор;
• Коротков Юрий Марксович (1955) — россияса сценарист, гижысь, режиссёр;
• Лавров Алексей (1985) — операын сьылысь (баритон), Нью-Йоркса Метрополитен-операын солист;
• Стенин Андрей Алексеевич (1980 - 2014) — россияса журналист, «Россия Сегодня» агентстовса фотокорреспондент;
• Кулаков Иван Егорович (1944 во — 2005 во) — Коми Республикаса Каналан Сӧветӧн Веськӧдлысь, Коми Республикаса Почёта гражданин (2017);
• Михайлов Олег Алексеевич (1987 во) — россияса политик да канморт, Россия Федерацияса VIII созывса Государственнӧй Думаын депутат, КПРФ-ӧ пырысь. Биология наукаяс кандидат. Коми РО-лӧн КПРФ комитетса медводдза секретар (2014 восянь). Коми Республикаса Каналан Сӧветса депутат (2015—2021).

Нималанаторъяс

• 

  Печӧраса Богородица Скоропослушническӧй манастыр

• 

  В. А. Русановлы паметник

• 

  «ЛВ» серияа паровоз

• 

  Максим Горькийлы паметник

• 

  «Жертвам Печорлага» паметник

• 

  Вертолёт МИ-8

Пасйӧдъяс

Литература

• Поспелов Е. М. Географические названия России. Топонимический словарь. — М.: Астрель, АСТ, 2008. — 523 с. — 1500 экз. — ISBN 978-5-17-054966-5.
• Пыстин М. С. Печора: Экономико-географический очерк. — Сыктывкар: Коми книжное издательство, 1974. — 15 000 экз.
• Малая энциклопедия Печоры. Печора: Печорская ЦБС, 2001. — 1 эл. опт. диск (CD-R).

Ыстӧгъяс

• Официальный сайт администрации города и района Архивса копия 4 ӧшым тӧлысь 2018 Wayback Machine ресурсын
• Фото и видео г. Печоры  (неопр.). Архивируйтӧма оригинала 30 йирым тӧлысь 2016 года.
• Городской сайт «В Печоре. Ру» Архивса копия 9 моз тӧлысь 2021 Wayback Machine ресурсын

Коми Республикаса юкӧнъяс
Юркар: Сыктывкар Кар кытшъяс: Сыктывкар • Муниципальнӧй кытшъяс: Вöркута • Вуктыл • Инта • Княжпогост • Уква • Ускар Муниципальнӧй районъяс: Емдiн • Изьва • Койгорт • Кöрткерöс • Кулöмдiн • Луздор • Мылдiн • Печора • Сосногорск • Сыктыв • Сыктывдiн • Удора • Чилимдiн Коми Республикаса каръяс Вӧркута | Вуктыл | Емва | Инта | Микунь | Печӧра | Сосногорск | Сыктывкар | Уква | Ускар