Эфиопса календар
Эфиопса календар (рочӧн Эфиопский календарь, амхара የኢትዮጵያ ዘመን አቆጣጠር — ye'Ītyōṗṗyā zemen āḳoṭaṭer) — Эфиопияын, Эфиопса православнӧй вичкоын да Эритрейса православнӧй вичкоын, Эритрейса католическӧй вичкоын да Эритреяса Евангелистскӧй вичкоын вӧдитчана календар.
Тайӧ календарыс подулавсьӧ важджык, коптъяслӧн календар вылӧ, а сійӧ ас кадӧ босьтӧма важ египетса календарысь, но сылӧн эм ӧткодьлун и юлиан календаркӧд: сэні сідзжӧ содтӧд лунӧн вӧдитчӧны быд нёль во мысти. Во заводитчӧ юлиан календар серти моз тӧлысь 30-ӧд лунӧ, локтан воыс кӧ кассяна во, либӧ моз тӧлысь 29-ӧд лунӧ, локтан воыс кӧ абу кассяна во. Кыдзи и копт календарын, эфиопса календарын эм 12 тӧлысь 30 лунӧн быдӧн, а сідзжӧ во помын вит либӧ квайт содтӧд лун, кодъясӧс тшӧкыда торйӧдӧма 13-ӧд тӧлысьӧ. Содтӧд лун лыдысӧ зависитӧ сыысь, кассяна во либӧ абу кассяна во.
Эфиопса календарын вояс лыддьӧмыс заводитчӧ юлиан календар серти миян эраса 8-ӧд вося моз тӧлысь 29-ӧд лунсянь. Татшӧм ногӧн, выль сюрсвоӧ Эфиопия пырис 2008-ӧд вося моз тӧлысь 29-ӧд лунӧ (кӧч тӧлысь 11-ӧд лунӧ).
Луна-вояыс заводитчӧ оз вой шӧрын, а Шонді петӧмсянь.
Тӧлысьяс
| Амхар кыв | Копт кыв | Тӧлысь заводитчӧм | Кассяна во бӧрся мунысь в эфиопса воын тӧлысь заводитчӧм |
|---|---|---|---|
| መስከረም (Mäskäräm) | Tut | кӧч тӧлысь 11-ӧд лун | кӧч тӧлысь 12-ӧд лун |
| ጥቅምት (Teqemt) | Babah | йирым тӧлысь 11-ӧд лун | йирым тӧлысь 12-ӧд лун |
| ኅዳር (Hedar) | Hatur | вӧльгым тӧлысь 10-ӧд лун | вӧльгым тӧлысь 11-ӧд лун |
| ታኅሣሥ (Tahsas) | Kiyahk | ӧшым тӧлысь 10-ӧд лун | ӧшым тӧлысь 11-ӧд лун |
| ጥር (T’er) | Tubah | тӧвшӧр тӧлысь 9-ӧд лун | тӧвшӧр тӧлысь 10-ӧд лун |
| የካቲት (Yäkatit) | Amshir | урасьӧм тӧлысь 8-ӧд лун | урасьӧм тӧлысь 9-ӧд лун |
| መጋቢት (Mägabit) | Baramhat | рака тӧлысь 9-ӧд лун | рака тӧлысь 10-ӧд лун |
| ሚያዝያ (Miyazya) | Baramundah | косму тӧлысь 9-ӧд лун | косму тӧлысь 9-ӧд лун |
| ግንቦት (Genbot) | Bashans | ода-кора тӧлысь 9-ӧд лун | ода-кора тӧлысь 9-ӧд лун |
| ሰኔ (Säne) | Ba’unah | лӧддза-номъя тӧлысь 8-ӧд лун | лӧддза-номъя тӧлысь 8-ӧд лун |
| ሐምሌ (Hamle) | Abib | сора тӧлысь 8-ӧд лун | сора тӧлысь 8-ӧд лун |
| ነሐሴ (Nähase) | Misra | моз тӧлысь 7-ӧд лун | моз тӧлысь 7-ӧд лун |
| ጳጉሜ (Pagumän) | Nasi | кӧч тӧлысь 6-ӧд лун | кӧч тӧлысь 6-ӧд лун |
Кадпасъясыс индӧмаӧсь григорий календар серти XX—XXI нэмъяслы.