Ануфриева Татьяна Владимировна
| Ануфриева Татьяна Владимировна | |
|---|---|
_%D0%A2.%D0%92..jpg) | |
| Чужан лун | 1990-ӧд вося сора тӧлысь 10-ӧд лун |
| Чужанін | |
| Кулан лун | 2017-ӧд вося урасьӧм тӧлысь 24-ӧд лун (26 арӧс) |
| Куланін | |
| Страна | |
| Мыйся уджыс | гижысь |
Ануфриева Татьяна Владимировна (1990-ӧд вося сора тӧлысь 10-ӧд лун, Новосибирск — 2017-ӧд вося урасьӧм тӧлысь 24-ӧд лун, Сыктывкар) — том коми гижысь. Нывдырся овыс — Кирпиченко.
Олантуй
Татьяна Кирпиченко чужӧма Новосибирск карын 1990 вося сора тӧлысь 10-ӧд лунӧ. 1991-ӧд воын сылӧн семьяыс локтӧма овны Коми Республикаӧ. Олӧма Уква карын, Уква районса Борӧвӧй сиктын, Изьва районса Діюр грездын.
2006-ӧд воын помалӧма Діюр грездса 9 класса школа, 2008-ӧд воын — Краснобор сиктса шӧр школа. 2013-ӧд воын Сыктывкарса канму университетлысь филология факультет помалӧм бӧрын уджалӧма Діюр грездса да Кельчиюр сиктса школаясын серпасасьӧм, роч кыв да литература велӧдысьӧн.
2016 вося гожӧмын висьмӧма лейкозӧн. Кулӧма 2017 вося урасьӧм тӧлысь 24-ӧд лунӧ Сыктывкарса онкодиспансерын. Сылӧн кольӧмаӧсь пи да верӧс[1].
Гуалӧма рака тӧлысь 1 лунӧ Изьва районса Діюрын[2].
Гижан удж
Татьяна Кирпиченко кывбуръяс гижны заводитӧма роч кывйӧн квайт арӧссянь, комиӧн — дас куим арӧссянь. Проза гижӧма дас квайт арӧссянь. Сыктывкарса университетлӧн мӧд курссянь гижӧ челядьлы висьтъяс да мойдъяс.
Татьяна Кирпиченколысь гижӧдъяссӧ йӧзӧдлӧмаӧсь Изьва районса «Новый север» газетын, республикаса «Радуга», «Йӧлӧга» да «Коми му» газетъясын, республикаса «Войвыв кодзув», «Арт», «Би кинь» журналъясын. 2012-ӧд воын сылӧн гижӧдъясыс пырӧмаӧсь «Ижемский характер», «Стихия — 2», «Сьӧлэм гаже — изьва кыы» небӧгъясӧ.
2015 воын петавлӧма «И воас лун» кывбура асшӧр небӧг. 2016 воын Т. Кирпиченколы сетӧма А.Лужиков нима премия.
Небӧгъяс
- Кирпиченко Т. И воас лун … Кывбуръяс / Ред. Е. В. Козлов. — Сыктывкар: Коми Республикаса гижысь котыр, 2015. — 32 л.б. (Тир. 850 экз.);
- Кирпиченко Т. Ботландиясянь чолӧм! Привет из Ботландии! — Сыктывкар, 2017. (Тир. 300 экз.)[3];
- Кирпиченко Т. Мӧдлапӧлын. На другой стороне. — Сыктывкар, 2017. (Тир. 500 экз.)[4].
Пасйӧдъяс
- ↑ Пархачева Я. Ижемская поэтесса Татьяна Кирпиченко, боровшаяся с острым лейкозом, умерла (рус.). Комиинформ (24 урасьӧм тӧлысь 2017). Шыӧдчан кадпас: 9 кӧч тӧлысь 2025.
- ↑ Баканов И. В Сыктывкаре простились с поэтессой Татьяной Кирпиченко (рус.). Комиинформ (27 урасьӧм тӧлысь 2017). Шыӧдчан кадпас: 9 кӧч тӧлысь 2025.
- ↑ Полина О. Через неделю после смерти Татьяны Кирпиченко вышла в свет ее книга (рус.). Комиинформ (4 рака тӧлысь 2017). Шыӧдчан кадпас: 9 кӧч тӧлысь 2025.
- ↑ Пархачёва Я. Книга ижемки Татьяны Кирпиченко увидела свет спустя полгода после ее трагического ухода из жизни (рус.). Комиинформ (2 ӧшым тӧлысь 2017). Шыӧдчан кадпас: 9 кӧч тӧлысь 2025.
Литература
- Кирпиченко Татьяна Владимировна : [крат, биогр. справка] // Белый бор : лит. альм. Респ. Коми. Сыктывкар, 2014. Вып. 10. С. 359—360.
- Кирпиченко (Ануфриева) Татьяна Владимировна : [крат, биогр. справка] // Перекличка : лит. молодеж. альм. Сыктывкар, 2016. Вып. 3. С. 218.
- Югыд олӧм. Таня Кирпиченко кодралӧм : [воспоминания] / Е. Афанасьева, А. Шомысова, А. Старцева, Л. Ануфриева // Арт = Лад. 2017. No 2. С. 28-30.