Вертеп (Изьва район)

Босьтӧма Рувикиысь
Видлалӧм гижӧд
Сикт
Вертеп
Вертеп
65°17′50″ с. ш. 53°11′44″ в. д.GЯO
Страна Россия
Федерацияса субъект Коми Республика
Муниципальнӧй район Изьва
Сикт овмӧдчӧмин Краснобор
История да география
Джуджда 38 м
Йӧз
Олысь лыд 600[1] морт (2010)
Лыдпаса идентификаторъяс
169473
ОКАТО код 87204860002
ОКТМО код 87604460111
Вертеп (Изьва район) (Россия)
Точка
Вертеп
Red pog.svg
Москва

Вертеп — Коми Республикаын Изьва районса Краснобор сикт овмӧдчӧминӧ пырысь грезд.

Ним артмӧм

Нимыс артмӧма вертеп кывйысь, вежӧртасыс гӧгӧрвоӧдсьӧ, кыдзи «мунны позьтӧм, кустъясӧн да вӧрӧн тырӧм, джуджыд нёдз; вывтас ин, сёнъяса мыльк». Нимыс сетӧ позянлун аддзыны сиктлысь география аслыспӧлӧслунсӧ[2][3].

Гажъяс

Вертеп сиктын быд во моз тӧлысь 14-ӧд лунӧ пасйӧны Спас лун (Вертеп Храм), коми йӧзкостса календарын — Медводдза спас.

Тайӧ гажыс йитчӧма 1900 вося неминучаысь мездысьӧмкӧд[4].
Вертепын 1900 воӧ кувсьӧма уна скӧт. Сиктса йӧз корӧмаӧсь Красноборса вичкоысь попӧс да пуысь вӧчӧмаӧсь крест. Попыс лыддьӧма ваӧ кевмӧм, сэсся резалӧмаӧсь вежа ваӧн скӧтсӧ. Та бӧрын гортса пемӧслӧн усьӧмыс дугдӧма. Тайӧ лунсяньыс керка дорас, кӧні сулаліс крестыс, матігӧгӧрса сиктъясысь кутісны локны йӧз, медым корны Енмыслысь отсӧг.

География

Вертеп меститчӧма Коми Республикаса рытыв-войвылын, Печӧра увтасын, Изьва ю вожлӧн веськыд берегын. Изьва районса юрсиктсянь рытыв-войвывлань 55 гӧгӧр километр ылнаын. Джудждаыс саридз веркӧссянь — 38 метр[5].

Ывласям

Ывласямыс шӧркодь континентальнӧй, тӧлыс — лымъя, кузь да кӧдзыд, гожӧмыс — дженьыд да ыркыд. Медся шоныд тӧлысьӧн лоӧ сора тӧлысь, сынӧдлӧн шӧр температураыс 14,6 °C; медся кӧдзыд тӧлысьын (тӧвшӧр тӧлысь) — −17,4 °C. Вогӧгӧрся шӧркодь енэжваыс — 527 мм.

Кад кытш

Вертеп, кыдз став Коми Республика, пырӧ МСК (москваса кад) час зонаӧ. UTC серти вӧдитчан кадыслӧн вежсьӧмыс лоӧ +3:00[6].

История

Сиктыс лоӧма XVIII нэм шӧрын[7], но XVIII нэмся ревизия лыддьӧгъясын пасйӧдъяс сы йылысь абуӧсь.

Предание серти медводдзаӧн тайӧ инас овмӧдчӧма Киприян нима мужичӧй семьянас. Медводз найӧ сувтӧмаӧсь Шар вожлӧн шуйга берегас, а сэсся вуджӧмаӧсь бурджык инӧ, вескьыд бокас. Збыльысь, Вертепын эм джуджыд ин — Кипра нырд.
Вертеп сикт вӧлі артмӧдӧма XIX нэмлӧн мӧд джынйын. 1873 воын сиктын вӧлі 55 овмӧс, оліс 495 морт; 1905 воын — 86 овмӧс, 800 олысь (375 айлов да 425 ань)[8].
1920 воын Вертеп сиктын вӧлӧма 104 овмӧс да олӧма 589 морт (243 айлов да 346 ань). Пырис Изьва-Печора уездса Краснобор вӧлӧсьтӧ[9].

Олысь лыд

1873 воын — 55 овмӧс, 495 олысь, 1897 воын — 549 олысь (238 мужичӧй, 311 нывбаба), 1905 воын — 86 овмӧс, 800 олысь (375 мужичӧй, 425 нывбаба). 1926 во кежлӧ овмӧсъясыслӧн лыдыс грездас содӧма 127-ӧдз, а сэні олысьяслӧн лыдыс чинӧма 738-ӧдз (342 мужичӧй, 396 нывбаба). 70-80-ӧд воясӧ Вертепын олысьясыслӧн лыдыс чинӧма: 817 мортсянь 1970 воын 766 мортӧдз 1979 воын да 673 мортӧдз (329 мужичӧй, 344 нывбаба, коми) 1989 воын. 1995 воын - 698 морт 189 овмӧсын [10].

Россияса став йӧзӧс гижалӧм (2010 воын) серти: мужичӧйыс — 51,8 %, нывбабаыс — 48,2 %.

Вояс да олысь лыд
1873 1897 1905 1916 1926 1970 1979 1989 1995 2002 2007 2010
495 549 800 738 817 766 673 698 646 628 600
Олысь лыд
2002[11]2010[12]2020[13]
646↘600↘484
100
200
300
400
500
600
700
2002
2010
2020

Медводдза овъяс

Культура

Сиктын эм клуб — Вертепса йӧзкост традицияяс керка, библиотека да самодеятельнӧй артистъяслӧн «Аддзысьлэмъяс» фольклор котыр.

Велӧдӧм

Сиктын эм ӧкмыс класса школа[14] да челядьӧс видзанін.

Нималана йӧз

• Терентьев Степан Александрович (31.12.1920-?) — Меньжинскӧй нима колхозса председатель. Сы дырйи колхозыс вӧлі миллионерӧн;
• Никулин Николай Егорович (29.04.1932-1993) — нималана гижысь, врач. Чужлӧма Сыктыв районса Волся сиктын. 1949 воын, фельдшерлысь диплом босьтӧм бӧрын, олӧм-ордымыс вайӧдӧма Изьваӧ. Оліс Вертеп сиктын. Уджаліс больничаын, Діюр санаторийын директорӧн, Вертеп медпунктын, ветліс тундраӧ. Николай Егорович гижис висьтъяс, повесьтъяс, кывбуръяс ылі войвывса войтыр — изьватас йылысь. 2008 воын петіс «Изьва муӧ кыскӧ лов» гижӧдъяса сборник[15][16];
• Федина Марина Серафимовна (01.12.1968) — доцент, филология наукаяс кандидат, коми кыв туялысь. Красноборса шӧр школа помалӧм бӧрын велӧдчис Сыктывкарса канму университетын коми филология факультетын. Сы кадсяньыс профессиональнӧй да общественнӧй олӧмыс топыда йитчис коми кывкӧд, велӧдӧмкӧд да культуракӧд;
• Канева Маргарита Павловна (16.03.1944-10.02.2022) — Коми АССР-са культураын нимӧдана уджалысь, 34 во вӧлі сиктса культура керкаын веськӧдлысьӧн[17];
• Рочева Нина Павловна (09.05.1947) — коми кыв да литература велӧдысь, уджвывса ветеран, Рочму Федерацияса йӧз просвещениеын отличник. 30 во уджаліс Вертеп школаын, нуӧдіс ас му туялӧм, фольклор да драма кружокъяс. Пенсия вылӧ петӧм бӧрын Нина Павловна чукӧртіс Николай Егорович Никулинлысь гижӧдъяссӧ да йӧз отсӧгӧн 2008 воӧ лэдзис «Изьва муӧ кыскӧ лов» небӧг;
• Рочев Владимир Парфёнович (01.01.1948) — I класса тракторист-механик, уджаліс Краснобор совхозса Вертеп юкӧнын 35 во. Техника бурмӧдӧм да йӧзлысь уджсӧ кокньӧдӧм могысь пыртіс уна рационализаторскӧй вӧзйӧм. Владимир Парфёновичлысь уджсӧ донъялісны ВДНХ-са медальӧн, коммунистическӧй уджын ударник нимӧн да уна почётнӧй грамотаӧн;
• Филиппов Яков Степанович (10.09.1944-21.07.2014) — история велӧдысь, Вертеп шӧр школаын веськӧдлысь, уджвывса ветеран. Пенсия вылӧ петӧм бӧрын вӧлі Изьваса депутатъяслӧн сӧветын;
• Софронова Анна Петровна (11.02.1968) — Савин нима государственнӧй академическӧй драма театрын ворсысь, культура колледжын да искусствояс колледжын велӧдысь. Чужис Вертеп сиктын, школа помалӧм бӧрын велӧдчис Борис Щукин нима Москваса театральнöй институтын. 1989 восянь Анна Петровналӧн репертуарын кöкъямысдас сайö роль[18][19];
• Терентьева Надежда Павловна (06.08.1950) — уджаліс «Красноборскӧй» совхозса Вертеп юкӧнын лысьтысьысьӧн 40 во. Пырӧдчис машинаӧн лысьтысьӧм кузя районса да республикаса ордйысьӧмъясӧ, вӧлі медводдзаяс лыдын. Наградаяс: «Уна вося бур уджысь», «Ударник пятилетки»;
да с.в.

Тӧдчана инъяс

Варук рӧдник
Варук рӧдникыслӧн сӧдз да сӧстӧм ваыс петӧ Пальник крежысь. Иныс — Вертеп сикт помын, Изьва юлӧн Шар вож берегын. Йӧзыс эскӧны, мый ваыс бурдӧдӧ. Нимтӧма Варвара нывка ним серти, коді аддзис ключсӧ[20].

  • Вертеп сиктын Ниа нырд

    Вертеп сиктын Ниа нырд

  • Вертеп сиктын тӧвся туй

    Вертеп сиктын тӧвся туй

  • Вертеп сиктлӧн Дзоля Вертеп (Райдоз) юкӧн

    Вертеп сиктлӧн Дзоля Вертеп (Райдоз) юкӧн

  • Вертеп сиктлӧн Кыытыд Шор юкӧн

    Вертеп сиктлӧн Кыытыд Шор юкӧн

Ӧшмӧсъяс

  • Жеребцов И. Л. Где ты живешь: Населенные пункты Республики Коми. Историко-демографический справочник. — Сыктывкар, 2000.
  • История Коми с древнейших времен до конца XX века: В 2-х т. / Под общей редакцией А. Ф. Сметанина. — Сыктывкар, 2004.
  • Республика Коми: Энциклопедия. — Сыктывкар, 1997—2000. — Т. 1—3.
  • Республика Коми: Административно-территориальное деление на 1 августа 1992 г. Издание пятое. — Сыктывкар, 1992.
  • Административно-территориальное и муниципальное устройство Республики Коми (на 1 августа 2006 г.). Издание шестое, официальное / ГУ «ТФИ РК». — Сыктывкар, 2006. — 278 с.
  • Изьва мулӧн ин нимъяс. Топонимия Ижемского района / Сост. Е. А. Хозяинова. — Изьва: МБУК «Ижемский районный историко-краеведческий музей», 2013. ISBN 978-5-7934-0535-5.

Ыстӧдъяс

  1. ↑ Всероссийская перепись населения 2010 года. Численность населения городских округов, муниципальных районов, поселений и населённых пунктов. Дата обращения: 29 ӧшым тӧлысь 2014. Архивировано 4 рака тӧлысь 2016 года.
  2. ↑ Топонимический словарь Республики Коми. - В -. Дата обращения: 26 косму тӧлысь 2020. Архивировано 20 вӧльгым тӧлысь 2012 года.
  3. ↑ А. И. Туркин. Топонимический словарь Коми АССР. Сыктывкар: Коми книжное издательство, 1986
  4. ↑ Гажъяс да обрядъяс
  5. ↑ Vertep (англ.). GeoNames.
  6. ↑ Федеральный закон от 03.06.2011 N 107-ФЗ (ред. от 14.04.2023) "Об исчислении времени", статья 5. (3 июня 2011).
  7. ↑ Жеребцов И. Вертеп // Республика Коми. Энциклопедия. Т. 1. — Сыктывкар, 1997. — С. 292.
  8. ↑ Населённые пункты района. Вертеп. Официальный сайт Администрации Ижемского района. Дата обращения: 26 косму тӧлысь 2020. Архивировано 13 тӧвшӧр тӧлысь 2020 года.
  9. ↑ Список населённых мест Архангельской губернии На 1-е мая 1922 г. : С прил. списков населённых мест Мурман. губ., Кем. уезд. Карел. труд. коммуны и Печер. уезда Обл. Коми (Зырян.). Архангельск. 1922. С. 181
  10. ↑ Жеребцов И. Вертеп // Республика Коми. Энциклопедия. Т. 1. — Сыктывкар, 1997. — С. 292.
  11. ↑ http://www.perepis2002.ru/content.html?id=11&docid=10715289081460.К:Рувики:Cite web (не указан язык)
  12. ↑ http://komi.gks.ru/wps/wcm/connect/rosstat_ts/komi/resources/2d66df004e30e856b59eff3bf8d20d64/2.3.+Численность+населения+городских+округов%2C+муниципальных+районов%2C+поселений+и+населенных+пунктов.doc.К:Рувики:Cite web (не указан язык)
  13. ↑ https://rosstat.gov.ru/vpn/2020/Tom1_Chislennost_i_razmeshchenie_naseleniya.К:Рувики:Cite web (не указан язык)
  14. ↑ МБОУ "Вертепская ООШ"
  15. ↑ Ижемский районный историко-краеведческий музей. Твои люди, Ижма
  16. ↑ Изьватас йылысь. Нималана изьватас.
  17. ↑ Ижемский районный историко-краеведческий музей. Заслуженные работники культуры Коми АССР.
  18. ↑ Колледж искусств Республики Коми: преподаватели
  19. ↑ Ижемский районный историко-краеведческий музей: Твои люди, Ижма
  20. ↑ Изьва район. Туризм да нималанаторъяс
Краснобор сиктувса оланінъяс Coat of arms of the Komi Republic Flag of the Komi Republic
Ӧнія оланінъяс:

Вертеп • Діюр • Краснобор • Пустыня • Ыргӧншар •

Босьтӧма "https://kv.ruwiki.ru/w/index.php?title=Вертеп_(Изьва_район)&oldid=221007"-ысь