Инталӧн канпас
| Инталӧн канпас | |
|---|---|
_(1982).svg) | |
| Детальяс | |
| Вынсьӧдӧма | 1982 вося рака тӧлысь 24-ӧд лунӧ |
| Серпасалысь | Ариф Аль Оглы Байрамов |
Инта муниципальнӧй кытшлӧн канпас (рочӧн Герб Инты) — тӧдмалан-инӧда пас, кутшӧмӧс лӧсьӧдӧма да вӧдитчӧны геральдика правилӧяс серти, сійӧ лоӧ дӧрапаскӧд тшӧтш, Россия Федерацияын Коми Республикаса Инта муниципальнӧй кытшлӧн да Инта карлӧн официальнӧй символӧн[1].
Вынсьӧдӧма народнӧй депутатъяслӧн Инта кар сӧветса исполкомлӧн 1982 вося рака тӧлысь 24-ӧд лунся 67/10 №-а шуӧмӧн[2] кыдзи Инта карлӧн канпас, выльысь вынсьӧдӧма «Инта» кар кытшса муниципальнӧй юкӧнса Сӧветлӧн 2008 во вӧльгым тӧлысь 25-ӧд лунся I-18/19 №-а шуӧмӧн кыдзи Инта кар кытшлӧн канпас да Коми Республикаса «Инта» муниципальнӧй кытшлӧн Сӧветлӧн 2024 во косму тӧлысь 24-ӧд лунся IV-31/3 №-а шуӧмӧн кыдзи Инта муниципальнӧй кытшлӧн канпас[3].
Канпас гӧгӧрвоӧдӧм
Канпаслӧн формаыс — уліас кык пельӧса французскӧй щит. Щит йылас — карлӧн ним «ИНТА».
Символика подулалӧм
Канпасын петкӧдлӧма карлысь став символсӧ.
Канпаслӧн сюжетыс петкӧдлӧ:
• Терриконлӧн пӧкатыс петкӧдлӧ из шом перъян промышленносьт. Из шом куйлӧдъяс йылысь медводдза юӧръяс воисны 1912 воын на татчӧс Петруньса кресьтянин Сорвачёвсянь, коді аддзис из шом петанінъяс Ыджыд Инта да Неча юяс вылысь. Медводдза кык изшом шахтасӧ вӧлі лӧсьӧдӧма война водзвылын 1940 воын, а 1943 воын вӧлі мӧдӧдӧма из шомлысь медводдза эшелон кытшалӧм Ленинградӧ.
• Веськыдвыв пельӧсын ва сетан башня — Инталӧн медшӧр архитектура нималантор. Готика стиля башнясӧ вӧлі стрӧитӧма 1950-ӧд вояс шӧрын. Кодзула башнялӧн джудждаыс 54,4 метра (20 судта). Башнясӧ вӧчӧма шведса политзаключённӧй Артур Тамвелиус.
• Войвыв кӧр петкӧдлӧ татчӧс олысьяслысь медшӧр удж — кӧр видзӧм. Интаын, кык вонас ӧтчыдысь, тувсов ӧткузя луна-вояӧ нуӧдӧны кӧр видзысьяслысь гаж.
• Востым петкӧдлӧ, мый карыс сулалӧ войвылын, вой кытш дорын (география координатаяс: 66°02` в. ш. 60°08` а. д.), кӧні тшӧкыда позьӧ аддзыны войся енэжысь уна рӧма востым[4].
Рӧм серти гӧгӧрвоӧдӧм:
• Канпасын гижӧд, фигураяслӧн да предметъяслӧн контуръяс — эзысь рӧма-рудӧсь, югыдӧсь.
• Вылыс юкӧнлӧн фон, кӧні куйлӧ гижӧд, башня да кӧр серпас — эзысь рӧма, пемыд.
• Изшом терриконлӧн фон — пемыдруд, пӧшти сьӧд.
• Символлӧн улыс юкӧныс — югыдлӧз, петкӧдлӧ лым.
• Общӧй фон, кӧні петкӧдлӧма башня да востым — лӧз.
• Канпаслӧн лӧнь, кӧдзыд рӧма гаммаыс петкӧдлӧ карлысь кӧдзыд ывласям[5].
Видзӧд тшӧтш
• Инталӧн дӧрапас
• Инталӧн кып
Пасйӧдъяс
- ↑ Инта. Общая информация, Официальный сайт МО "Инта" Республики Коми. Шыӧдчан кадпас: 5 рака тӧлысь 2025.
- ↑ Морозова Е.И. Под сенью золотой птицы. — Сыктывкар: ООО «Коми республиканская типография», 2022.
- ↑ Герб муниципального округа «Инта», Геральдика.ру. Шыӧдчан кадпас: 5 рака тӧлысь 2025.
- ↑ Инта. Символика, НБ РК. Шыӧдчан кадпас: 5 рака тӧлысь 2025.
- ↑ Символы города, Интинский краеведческий музей. Шыӧдчан кадпас: 5 рака тӧлысь 2025.