Печӧра районлӧн канпас
| Печӧра районлӧн канпас | |
|---|---|
.gif) | |
| Юӧр | |
| Вынсьӧдӧма | 2011 вося вӧльгым тӧлысь 29-ӧд лунӧ |
| Воддза версияяс | 1985 вося кӧч тӧлысь 15-ӧд лунӧ |
| Автор котыр | |
| Канпаслӧн вежӧртас | Виктор Худяев (Печӧра) |
| Геральдика боксянь лӧсьӧдӧм |
Константин Моченов (Химки) |
| Серпасалысь | Ирина Соколова (Москва) |
| Компьютера дизайн |
Ирина Соколова (Москва) |
| Символика подулалӧм |
Вячеслав Мишин (Москва) |
Печӧра районлӧн канпас (рочӧн Герб Печорского района) — тӧдмалан-инӧда пас, кутшӧмӧс лӧсьӧдӧма да вӧдитчӧны геральдика правилӧяс серти, сійӧ лоӧ дӧрапаскӧд да кыпкӧд тшӧтш, Россия Федерацияын Коми Республикаса Печӧра районлӧн официальнӧй символӧн[1].
Вынсьӧдӧма «Печӧра» муниципальнӧй районса Сӧветлӧн 2011 во вӧльгым тӧлысь 29-ӧд лунся 5-6/64 №-а шуӧмӧн[2].
Муниципальнӧй юкӧнъяслысь официальнӧй символъяс лӧсьӧдӧм да наӧн вӧдитчӧм кузя методика боксянь вӧзйӧмъяс серти (2 юкӧд, VIII юрпас, 45-46 пп.), кутшӧмъясӧс вынсьӧдӧма Россия Федерацияса президент бердын Геральдическӧй сӧветӧн 2006 вося лӧддза-номъя тӧлысь 28-ӧд лунӧ, «Печӧра» районлысь канпассӧ позьӧ вӧчны лӧсьӧдӧм образеца статуса коронаӧн[2].
Канпас гӧгӧрвоӧдӧм
Эзысьӧн да гӧрдӧн вундалӧм эрд вылын — веж коз, сы сайсянь петӧны доръяслань: веськыдвылын — гӧрд гым ньӧв, шуйгавылын — эзысь шевгӧдӧм борд.
Символика подулалӧм
Печӧра районлӧн канпасын фигураяслӧн да рӧмъяслӧн символикаыс унатор петкӧдлӧ.
Канпаслӧн сюжетыс петкӧдлӧ:
• гым ньӧв — энергетикалӧн символ. Районын энергетическӧй промышленносьтса медшӧр предприятиеясӧн лоӧны «ОГК-3» Печораса ГРЭС ВАК, «Комиэнергострой» ВАК;
• веж треугольникъяс (геральдическӧй пирамидаяс) — козлӧн аллегория, пармалӧн да вӧр переработайтан промышленносьтлӧн символ. Районлӧн мутасыс вевттьысьӧма сук вӧръясӧн, кӧні промышленнӧя заптӧны вӧр. Районлӧн мутасын меститчӧма «Югыд ва» канму вӧр-ва национальнӧй парк.
• борд — став сикас транспортлӧн да транспорт индустрияса уджалысьяслӧн символ. Районті мунӧ Войвыв кӧрт туй. Транспорт индустрияса уна предприятие, на лыдын «Комиавиа» КР КУП-лӧн Печӧраса филиал, «Печӧраса ю порт» ВАК, «Печӧраса ю пароходство» СК ВАК, Печӧраса локомотивнӧй депо, «РЖД» ВАК филиаллӧн Войвыв кӧрт туй дирекция — ставныс асланыс логотипъясын вӧдитчӧны бордйӧн.
Рӧм серти гӧгӧрвоӧдӧм:
• еджыд рӧм (эзысь) — сӧстӧмлун, восьсалун, ен мывкыд, бурасьӧм символ;
• гӧрд рӧм — удж, повтӧмлун, олӧм вын, мичлун да гаж пас;
• турунвиж рӧм петкӧдлӧ тулыс, дзоньвидзалун, вӧр-ва, томлун да лача.
Дӧрапаслӧн еджыд да гӧрд рӧмъяс вылӧ юксьӧмыс петкӧдлӧ Ылі Войвылын меститчӧм Печӧра районлысь континентальнӧй ывласямсӧ[2].
История
Народнӧй депутатъяслӧн Печӧра карса Сӧвет исполкомлӧн 1980 во кӧч тӧлысь 18-ӧд лунся 436 №-а шуӧм серти вӧлі нуӧдӧма Печӧра карлысь канпас бала лӧсьӧдӧм вылӧ восьса конкурс. Конкурслӧн условиеяс серти, канпас эскизын колӧ вӧлі петкӧдлыны карлысь историческӧй, географическӧй да овмӧс тӧдчанлунсӧ. Серпассӧ колӧ вӧлі вӧчны лаконичнӧйӧн да петкӧдлыны авторлысь медшӧр мӧвпсӧ, вӧдитчыны 3-4 рӧмысь абу унджык. Печӧрасаяс да районса олысьяс окотапырысь пырӧдчисны конкурсӧ. Жюриӧ ыстісны ассьыныс канпас балаяссӧ квайтымын сайӧ морт, кодсюрӧ вӧзйисны кык-куим вариантӧн. Конкурсӧ пырӧдчисны профессиональнӧй серпасасьысьяс, стрӧитчысьяс, архитекторъяс, велӧдчысьяс, промышленнӧй да транспорт предприятиеясын уджалысьяс, военнослужащӧйяс. Канпаслысь ӧткымын вариантсӧ вӧлі йӧзӧдӧма «Ленинец» газетын (01.05.1981, 71-ӧд номер). Конкурслӧн жюри бӧрйис 6 эскиз, сэсся найӧс видлаліс РСФСР-са архитекторъяслӧн котырлӧн Коми организацияса правление. 1983 вося кӧч тӧлысь 15-ӧд лунӧ народнӧй депутатъяслӧн Печӧра карса Сӧветлӧн 7-ӧд сессиялӧн шуӧм серти Печӧра карлысь канпассӧ вӧлі вынсьӧдӧма официальнӧя. Медбурӧн шуисны художник Виктор Худяевлысь уджсӧ[1].
Канпасыс вӧчӧма французскӧй щит вылын. Композицияын шӧр места босьтӧны татшӧм символъяс:
• козлӧн контур — ыджыд вӧр запасъяс да карын вӧр промышленносьтлӧн символ;
• чегъясьӧм гӧрд ньӧв — электроэнергетика (торйӧн кӧ, Печӧраса ГРЭС);
• веськыдвылас кельыдлӧз борд петкӧдлӧ Печӧралысь став транспортнӧй туйясын — ювывса, кӧрт туйвывса да сынӧдса — тӧдчана инсӧ[3];
• «1949» лыдпас петкӧдлӧ кар лӧсьӧдан кадсӧ;
• Вылыс юкӧнас зарни рӧма коми орнамент югыдлӧз фон вылын да улынджык ПЕЧОРА ним;
• Фонас лӧз да гӧрд рӧмыс йитчӧмаӧсь РСФСР-лӧн канпаскӧд[4].
Видзӧд тшӧтш
• Печӧра районлӧн дӧрапас
• Печӧра районлӧн кып
Пасйӧдъяс
- ↑ 1 2 Символика, Муниципальный район «Печора».Официальный сайт. Шыӧдчан кадпас: 6 рака тӧлысь 2025.
- ↑ 1 2 3 Герб муниципального района Печора, Геральдика.ру. Шыӧдчан кадпас: 6 рака тӧлысь 2025.
- ↑ Печора. Герб, НБ РК. Шыӧдчан кадпас: 6 рака тӧлысь 2025.
- ↑ Морозова Е.И. Под сенью золотой птицы. — Сыктывкар: ООО «Коми республиканская типография», 2022.
