Мылдін районлӧн канпас
| Мылдін районлӧн канпас | |
|---|---|
 | |
| Юӧр | |
| Вынсьӧдӧма | 2011 вося ӧшым тӧлысь 16-ӧд лунӧ |
| РФ-са канму геральдика регистрын номер | 2009 |
| Автор котыр | |
| Александр Жидков (Мылдін п.). | |
Мылдін районлӧн канпас (рочӧн Герб Троицко-Печорского района) — тӧдмалан-инӧда пас, кутшӧмӧс лӧсьӧдӧма да вӧдитчӧны геральдика правилӧяс серти, сійӧ лоӧ Россия Федерацияын Коми Республикаса Мылдін районлӧн официальнӧй символӧн[1].
Вынсьӧдӧма кыкысь: Мылдін районса Сӧветлӧн 2005 вося ӧшым тӧлысь 22-ӧд лунся 24/230 №-а Шуӧмӧн[2] да 2011 вося ӧшым тӧлысь 16-ӧд лунӧ «Мылдін» кар овмӧдчӧминлӧн Сӧветса депутатъяслӧн шуӧмӧн[1].
Пыртӧма Россия Федерацияса канму геральдика регистрӧ 2009 № улын[2].
Канпас гӧгӧрвоӧдӧм
Канпасыс — гӧрд щит. Сэні зарни национальнӧй орнаментӧн помасьӧм веж му вылын сулалӧ зарни йӧра, коді бергӧдчӧма шуйгавылӧ. Щитлӧн вӧльнӧй юкӧнын — Коми Республикалӧн канпас[3].
Символика подулалӧм
Канпаслӧн сюжетыс петкӧдлӧ:
Ӧнія Мылдін районса мутасӧ йӧзыс овмӧдчӧмаӧсь XVII нэмын, кор 1674 воын Печӧра да Войвыв Мылва ӧтлаасянінын вӧлӧма вит керкаа овмӧдчӧмин Печӧра погостӧн. Мылдін нимсӧ сетісны бӧрынджык. Тайӧ вежӧмсӧ йитӧны Трӧича манастыр йылысь легендакӧд. Йӧз висьталӧм серти, сійӧс кыпӧдлӧма Коми муӧс пыртысь Перымса Степанлӧн наследникъясысь ӧти[4].
Канпасыс символическӧя петкӧдлӧ овмӧдчӧминлысь историясӧ да сылысь аслыспӧлӧслунсӧ:
• креста вичко юр — символизируйтӧ Трӧича манастыр Вежа Трӧичалы сиӧм вичкоӧн;
• гӧрд шонді — татчӧс инъяслӧн мичлун символ, Коми Республикалӧн асыввыв мудоръясын овмӧдчӧминлӧн меститчӧмлӧн символ, кодъяс вочаалӧны асывсӧ республикаса уна мукӧд олысьысь водзджык;
• «Мылдін» кар овмӧдчӧминлӧн канпаслӧн коз йывъясӧн да лапъясӧн вӧчӧм юрыс да помыс петкӧдлӧны Коми Республикаса вужвойтырлысь национальнӧй серсӧ да сэк жӧ петкӧдлӧны татчӧс вӧръяслысь озырлунсӧ. Козйыс — выльмӧдчӧмлӧн, Выль вося кыпыдлунлӧн да нэмӧвӧйся олӧмлӧн пас[1].
Канпас вылын йӧраыс петкӧдлӧ районса ӧти нималанатор йылысь — мирын медводдза опытнӧй йӧра ферма йылысь, мый вӧлі лӧсьӧдӧма 1949 воын Якша посёлокын. Уна дас во чӧж россияса учёнӧйяс тані экспериментируйтісны велӧдны морт дорӧ йӧраӧс. Заповедникса учёнӧйяслысь опытсӧ пыдди пуктӧны оз сӧмын миян странаын, но и суйӧр сайын[1].
Пасйӧдъяс
- ↑ 1 2 3 4 Символика. Герб (рус.). Администрация МР «Троицко-Печорский». Шыӧдчан кадпас: 9 кӧч тӧлысь 2025.
- ↑ 1 2 Герб Троицко-Печорского района, Геральдикум, Союз геральдистов России. Шыӧдчан кадпас: 9 кӧч тӧлысь 2025.
- ↑ Морозова Е.И. Под сенью золотой птицы. — Сыктывкар: ООО «Коми республиканская типография», 2022.
- ↑ Троицко-Печорский район. История (рус.). Администрация МР «Троицко-Печорский». Шыӧдчан кадпас: 9 кӧч тӧлысь 2025.
