Якша (Мылдін район)

Босьтӧма Рувикиысь
Тайӧ терминыслӧн эмӧсь мӧд вежӧртасъяс, видзӧд Якша.
Посёлок
Якша
Поселок Якша Троицко-Печорский район.jpg
61°49′14″ с. ш. 56°50′03″ в. д.GЯO
Страна  Россия
РФ-са субъект Коми Республика
Муниципальнӧй район Мылдін район
Сикт овмӧдчӧмин Якша
Час кытш UTC+3:00
Йӧз
Олысь лыд
Официал кыв коми, роч
Лыдпаса идентификаторъяс
Телефон код +7 82138
Пошта индекс 169436
ОКАТО код 87236898001
ОКТМО код 87636498101
Якша на карте
Якша
Якша
Чилимдін районУскар кар кытшИнта кар кытшВӧркута кар кытшПечӧра районИзьва районУдора районЕмдін районСыктывдін районСыктыв районЛуздор районКойгорт районКӧрткерӧс районКулӧмдін районМылдін районВуктыл кар кытшСосногорск районУква кар кытшКняжпогост районЯран асвеськӧдлан кытшЯмал-Яран асвеськӧдлан кытшХанты-Вӧгул асвеськӧдлан кытш — ЮграПерым крайСвердловск обласьтАрхангельск обласьтКиров обласьтКострома обласьтВӧлӧгда обласьтЯкша на карте
Описание изображения
Якша
Якша

Якша (рочӧн Якша) — Россиялӧн Коми Республикаын Мылдін районса посёлок, Якша сикт овмӧдчӧминлӧн административнӧй шӧрин.

Ним артмӧм

Татчӧс олысьяс чайтӧны, мый овмӧдчӧминлӧн нимыс артмӧма тотар якша кывйысь — «бур»[2].

Эм легенда: важӧн-важӧн воӧмаӧсь пармаӧ тотара. Налы син водзас сувтӧма нэмӧвӧйся ньыв пуясӧн, ниаясӧн, Печӧра юлӧн сӧдзлунӧн да чӧв-лӧньӧн тырӧм парма. На пиысь ӧти пыдісянь лолыштӧма сӧстӧм сынӧдсӧ да нимкодьпырысь шуӧма: «Якши!» Бур пӧ. Тадзи пӧ артмӧма «Якша» кывйыс. Сӧмын гӧгӧрвотӧм, мый вӧчисны тані тотара да мыйла стӧч тайӧ пельӧсыс налы сэтшӧма воис сьӧлӧм вылас? Мичаинъясыс ю вылын уна.

Якшасаяслы бура тӧдсаӧсь Печӧралӧн кык шуйга вож — Якша да Кирша, налӧн ю вомъясыс ӧта-мӧдсяньыс 80 метр сайынӧсь, заповедниклӧн шӧр усадьбалы паныд.

Кирша да Якша ю нимъяс артмӧмаӧсь Кирилл да Яков тыр нимъясысь. Но позьӧ тырвыйӧ эскӧмӧн шуны, мый шоръяслы нимъяссӧ сетӧмаӧсь тані пристань лоӧм водзвылын. Тайӧ вожъясыс бура тӧдчӧны да вермисны лоны вӧралысьяслы да чери кыйысьяслы география боксянь туйпасъясӧн, кодъяслӧн вӧралан угоддьӧясыс важысянь вӧліны Печӧра ю дорын.

XVIII нэмся 70-ӧд воясӧ артмӧм пристаньсӧ нимтӧмаӧсь Якшаӧн — ӧти шор серти. Тыдалӧ, пристаньсӧ медводдзаысь лӧсьӧдысьлы ёнджыка воис сьӧлӧм вылас тайӧ нимыс. Гашкӧ, сійӧс асьсӧ шуисны Яковӧн, а гашкӧ, кывйыс йитчӧма тотара якша — «бур» кывкӧд.

А. П. Афанасьев серти: Якша — Яков тырвыйӧ ас нимсянь деминутив[3].

География

Якша посёлок меститчӧ Якша да Кирша шоръяс вожын, Мылдін административнӧй шӧринсянь 126 км ылнаын[4], Печӧра юлӧн шуйга берегын, Мылдін —Куръя муниципальнӧй тӧдчанлуна транспорт туй да ю костын. Олысьяслӧн юкӧныс меститчӧ Печӧра юлӧн веськыд берегын.

Мутаслӧн рельефыс мылькъя, сійӧс вомӧналӧны джуджыд сёнъяс да нюкӧсъяс, джуджыд берегъяса Печӧра ю. Якша пырӧ Ылі Войвыв районъяс лыдӧ да накӧд ӧткодялӧм местаясӧ[5].

Ывласям

Ывласямыс шӧркодь континентальнӧй, гожӧмыс дженьыд да ыркыдкодь, тӧлыс уна лымъя, кузь да кӧдзыд[6]. Вогӧгӧрся шӧркодь температураыс −1,2 °C, та дырйи тӧвшӧр тӧлысьын шӧркодь температураыс −18 °C, сора тӧлысьын 16 °C. Ломтысян кадколастлӧн кузьтаыс 254 лун, суткинас шӧркодь температураыс −7,40 °C. Зумыд лым эшкын артмӧ шӧркодя йирым тӧлысь 26-ӧд лунӧ да сылӧ ода-кора тӧлысь 14-ӧд лунӧдз. Местаясын лым толаяслӧн шӧркодь джудждаыс воӧ 74 сантиметрӧдз. Медся джуджыд толаяс — 116 см, медся ляпкыд — 38 см[7].

Час кытш

Якша, кыдз и ставнас Коми Республика, меститчӧ МСК (москваса кад) час кытшын. UTC серти кадыс торъялӧ +3:00 вылӧ[8].

История

XVI нэмсянь тайӧ местаясті муніс Камасянь Печӧраӧ вузасян туй. Якша районын тӧварсӧ сӧвтлісны баржаяс вылӧ да мӧдӧдлісны Печӧра кузя увлань, мыйкӧд йитӧдын вочасӧн артмис Якша пристань, а сэсся и овмӧдчӧмин (чердінса купечьяслӧн складъяс, некымын керка, часовня). Асьсӧ посёлоксӧ XX нэм заводитчигӧн лӧсьӧдлӧмаӧсь Перым губернияысь воӧм йӧз[9].

Якшаса пристаньӧ 1840 воӧ волӧм В. В. Латкин гижліс:

«Тані сё гӧгӧр посни амбар, унджыкыс чердінса вузасьысьяслӧн. Эм некымын керка; торъя нин бур купеч Мичуринлӧн керкаыс. Ӧні тані некод оз ов, караульщик семья кындзи, да недыр кад кежлӧ воӧм вина-сур вузалысь кындзи. Медшӧр стрӧйбаясыс меститчӧны веськыд берегын; сэні жӧ эм часовня»[10].

1909 воын — 10 овмӧс, 32 морт, 1925 воын — 14 овмӧс, 56 морт.

1925 вося ода-кора тӧлысь 1 лунӧ Печӧра ю вылын Якша пристаньсӧ Усть-Пожеч (Мамыль) посёлоккӧд да Березовка ю вылын Усть-Еловка пристанькӧд ӧттшӧтш вуджӧдісны Урал обласьтса Вылыс Кама кытшлӧн Ныробскӧй районысь Коми асвеськӧдлан обласьтӧ.

1926 во заводитчигӧн оланінъяслӧн лыддьӧгын Якша пасйӧма кыдзи Мылдін вӧлӧсьтын пристань, Якшаын меститчӧма вӧр лэдзысьяслӧн фельдшер пункт, медводдза тшупӧда школа, краснӧй уголок, милиция участок, ӧта-мӧдлы отсӧг сетан крестьяналӧн комитет, сикт сӧвет.

1927-ӧд воын Якшаын вӧлӧма 8 овмӧс, 43 олысь[11].

1939 воын — 138 морт. 1940-ӧд воясся топография картаясын Якша грездлы воча некутшӧм стрӧйба абу пасйӧма. 1956-ӧд вося лыддьӧгын пасйӧма Якша да Якшинскӧй посёлокъяс. 1950-ӧд вояс помся топография картаяс вылын — Якша (Печӧра юлӧн веськыд берегын) да Якшинскӧй вӧр участок (Печӧра юлӧн шуйга берегын). 1959 воын — 135 морт. 1970 во кежлӧ кыкнан посёлокас олысь лыдыс содіс 802 мортӧдз. 1976 вося лӧддза-номъя тӧлысь 15-ӧд лунӧ Якша да Якшинскӧй посёлокъяссӧ вӧлі ӧтувтӧма Якша посёлокӧ — Якша выль сикт сӧветлӧн шӧрин[12].

И. Я. Кривощеков аслас «Перым губернияса Чердін уездлӧн география—статистика кывчукӧрын» (1914 вося издание) юӧртӧ: Якша — Печӧра ю вылын пристань, Усть-Волосница грездсянь ю кузя 25 верст сайын. Якша, кыдзи судно пристань, артмӧма 1770 во гӧгӧрын Чердінса купеч Валуев отсӧгӧн, сыӧдз пристаньыс вӧлӧма юсяньыс 40 верст вылынджык да шусьылӧма Хорошавкаӧн либӧ Хорошая Бичевкаӧн. Бӧръяыс артмис Печӧра вылын 1700 во гӧгӧрын, сэки сійӧ вӧлі нянь чукӧртан дзик ӧти пунктӧн. Тайӧ жӧ кад кежлас Печӧраын судно плавайтан медводдза пунктсӧ колӧ йитны Безволостная (Тыбъю) ю вомкӧд, мый усьӧ Печӧра юӧ Якшасянь улынджык нин, Вӧлӧгда губерняын, кӧні туялысь В. Н. Латкин 1840 воын аддзывліс вӧвлӧм пристаньысь кольӧм амбаръяслысь туйяссӧ. Официальнӧй мыччӧдъяс серти Якша пристань Тулпан сиктсянь меститчӧ 76 верст сайын, Чердін грездсянь — 192-ын. Ӧні Якшаын 6 крестьяна да 4 купеч овмӧс да Чердінса купеч Алинӧн кыпӧдӧм вичко. Зэв гырысь амбаръяс кодь 90 сайӧ тӧвар склад, кутшӧмъяс нюжӧдчӧмаӧсь Печӧра ю берег пӧлӧн пӧшти верст кузя. 1879 воын нин, индыліс г-н Варопай, Якшаын вӧлі Рӧштводырся ярманга, ӧні сійӧ мунӧ нёль лун чӧж. Ярманга вылӧ вайӧны Печӧра бердса сиктъяс дорысь сёр арын кыйӧм чери. Белдыцкий пасйӧ, мый карса ярмангалӧн оборотыс артавсьӧ 40 сюрсысь оз унджык шайт. Тулыснас ю воссьӧм бӧрын Якшаын йӧзыс торйӧн нин уна, татчӧ локтӧны тӧвйысь паракодъяс да найӧс заводитӧны сӧвтны тӧварӧн. Та могысь чукӧртчӧны матігӧгӧрса сиктъясысь олысьясӧс, зырянаӧс да рочьясӧс (артавсьӧ 500—600 мортӧдз). Найӧс меститӧны торйӧн стрӧитӧм казармаясӧ. Тӧварсӧ сӧвтӧны пырджык кык вежон гӧгӧр, уджыс помасьӧ ода-кора тӧлысь шӧрын. Сӧвтӧм суднояссӧ буксируйтӧны паракодъясӧн Печӧра кывтыд. Пристаньын овлӧ 50 судноӧдз. Гожӧмнас Якша пристань кажитчӧ тыртӧмӧн, кызвыннас тані овлӧны Чердінса купечьяслӧн уджалысьяс. Сӧмын сёр арын пристань заводитӧ ловзьыны, кор кывтыдсянь локтӧны тырӧм караванъяс: чериӧн, мӧс выйӧн, ворваньӧн (саридзса пемӧсъяслӧн сывдӧм гос). Наӧн бара тырӧны амбаръяс. Тӧвся туй лӧсьӧдӧм бӧрын Якшаӧ заводитӧны локны няньӧн, мануфактураӧн, резинаысь вӧчӧмторъясӧн тырӧм додьяс. Якшаын грузъяс ректӧм бӧрын бӧр мунӧны Чердінӧ да Покчаӧ (Чердін дорын) Печӧраса тӧваръясӧн. Якшасӧ ӧні йитӧма Чердінкӧд бур муйӧж туйӧн, кодӧс лӧсьӧдіс Земство, сійӧ сулалӧ кык саридз ковтыс да Йиа океан костын, та вӧсна сылӧн тӧдчанлуныс ыджыд. Сійӧ кутіс ёна сӧвмыны 80-ӧд вояс заводитчигӧн, кор Печӧра ю вылын котыртісны паракодство. 1909 вося юӧръяс серти Якшаын вӧлі 10 овмӧс.

Здание Никольской церкви, построенной купцами Алиными.jpg
Дом купца Алина Малого-Николая Петровича.jpg
Амбар купцов Алиных.jpg
Купеч Алинъясӧн кыпӧдӧм Никольскӧй вичколӧн стрӧйба (кӧлӧкӧльнясӧ кисьтӧмаӧсь 30-ӧд воясӧ). Тайӧ стрӧйбаас сӧвет кадӧ вӧлі клуб да библиотека Купеч Николай Петрович Алинлӧн керка, ХХ нэм. Ӧні Печӧра—Ылыдзса заповедниклӧн музей Алин купечьяслӧн 90 сайӧ амбарысь кольӧма сӧмын ӧти амбар

Инженер Н. Поповлӧн «Печоро-Северодвинско-Камский водораздел и его пути сообщения, в связи с вопросом об облегчении добычи и вывоза ухтинской нефти» статьяын пасйӧма: Печӧра ю вывті паракодъясыс заводитӧмаӧсь ветлыны 1881 воын. Ӧні Печӧра вылын груз новлӧдлӧм могысь эм 22 кыскан паракод, на пиысь медыджыдыс — 60 вына «Новый» паракод, сійӧ Чердінса купеч А. М. Черныхлӧн. Суднояс ветлӧны Печӧра ю кузя медсясӧ Якша пристаньсянь сылӧн вомӧдзыс. Пристаньсӧ лӧсьӧдӧма Печӧра ю вылын Кама юлӧн Печӧра крайкӧд вузасьӧм могысь, вӧлӧма войдӧр Хорошевка ю вом дорын, мый усьӧ Волосница юысь 30 верст улынджык, но кольӧм нэмся нелямынӧд воясын сійӧс вуджӧдӧма ю кузя улӧджык да шуӧма Якшинскӧйӧн. Тайӧ пристаньыс, мый меститчӧма кызвыннас веськыд берегас да сӧмын ичӧтик юкӧныс — шуйга берегас, артмӧма тӧваръяс видзӧм вылӧ 100 амбарысь да некымын олан керкаысь[13].

Йӧз

1979 воын тані оліс 1380 морт, 1989 воын — 1832 морт (1008 мужичӧй, 824 нывбаба), на лыдын 75 % рочьяс, 1992 воын — 1751 морт, 1995 во заводитчигӧн — 1520 морт[14], 2000 воын — 1445 морт[15].

2013 вося тӧвшӧр тӧлысь 1 лун кежлӧ «Якша» сикт кодь посёлокын оліс 1046 морт[16].

Олысь лыд
2000[17]2010[18]2012[19]2013[20]2014[21]2015[22]
1445↘1025↘978↘911↘878↘852
2016[23]2021[24]
↘831↘755
250
500
750
1000
1250
1500
2012
2021

Медводдза овъяс

• Бурмантов, Лызлов, Езов, Пачгин[25].

Инфраструктура

Медшӧр предприятиеясӧн лоӧны вӧр юкӧнса да коммунальнӧй овмӧсса предприятиеяс.

Видз-му овмӧсыс петкӧдлыссьӧ ас подсобнӧй овмӧсъясын скӧтӧн.

Овмӧдчӧминӧ прӧдукциясӧ вайӧны автомашина транспортӧн.

Якша сикт овмӧдчӧминса муниципальнӧй юкӧнын мыйтакӧ меститчӧ Печӧра-Ылыдзса канму вӧр-ва биосфернӧй заповедник, кӧні олӧны шоча паныдасьлысь кыян вӧрпа (низь, вурд, анча, ондатра). Сідзжӧ тані олӧны йӧраяс, дикӧй кӧръяс, ошъяс.

Заповедник пырӧ ӧтувъя национальнӧй озырлун объектъяс лыдӧ. 1985 воын сійӧс пыртӧма биосфернӧй резервацияяслӧн войтыркостса везйӧ, кӧні петкӧдлӧма мирса вӧр-ва медшӧр экосистемаяссӧ. 1995 воын Печӧра-Ылыдзса заповедник да «Югыд ва» национальнӧй парк, кодъясӧс ӧтувтісны Комилӧн вӧрзьӧдлытӧм вӧръяс ӧтувъя ним улын, лоисны Россияса медводдза вӧр-ва объектъясӧн, кодъясӧс пыртӧма ЮНЕСКО-лӧн ставмирса вӧр-ва да культура озырлун лыддьӧгӧ.

Йӧра ферма

1949 воын Якша посёлокын котыртӧма мирын медводдза опытнӧй йӧра ферма[26].

Нималӧ и калий да магний совъяслӧн Якшаса куйлӧд.

Тӧдчана эмторъяс

Меставывса тӧдчанлуна история да культура памятникъяс:

  • Якша посёлок шӧрын, овмӧдчӧминса администрациядорса скверын — 1941—1945 воясся Айму вӧсна Ыджыд тышын сӧветскӧй войтырӧн фашистскӧй Германияӧс Вермӧмсянь 40 во тырӧмлы сиӧм Слава памятник;
  • Печӧра веськыд берегын сувтӧдӧма стела — Перымса Губчеклӧн 3-ӧд армияса отрядысь, мыйӧн веськӧдліс Михаил Голубев, 1919 вося йирым тӧлысь 5-ӧд лунӧ пӧгибнитӧм 50 красногвардеечлы паметник[27].

Археология памятникъяс:

  • Ош пещера важ йӧзлӧн оланін. Меститчӧ Печӧра юлӧн веськыд берегын, Ыджыд Шожым ю вомсянь вылынджык да Уньядін сиктсянь 90 км гӧгӧр вылӧджык, Печӧра-Ылыдзса заповедник мутасын. Сэтысь аддзӧмаӧсь бипур колясъяс, 700 сайӧ изйысь вӧчӧмтор да важся пемӧсъяслысь зэв уна лы. 1961—1962 воясӧ сійӧс восьтіс В. И. Канивец да Б. И. Гуслицер. Оланіныс артмӧма вюрмскӧй кадӧ (25 сюрс во сайын).
  • Канинса пещера святилище. Меститчӧ Печӧра юлӧн веськыд берегын, Шайтановка грездсянь рытыв-лунвылын. Аддзӧма бипур колясъяс, изйысь, лыысь, ыргӧнысь, эзысьысь, кӧртысь, стеклӧысь, сёйысь вӧчӧмторъяс, гортса да вӧрса пемӧсъяслысь лыяс. Восьтіс 1959 воын В. И. Канивец да Б. И. Гуслицер. Аддзӧмторъясыс лӧсялӧны куим эпохалы — ыргӧн-бронза, водз кӧрт, шӧр нэм.

Геология памятникъяс:

  • Из сюръяяс — останечьяс («Бӧлбанъяс»). Вынсьӧдӧма Коми АССР-са Министръяс Сӧветлӧн 1973 во рака тӧлысь 5-ӧд лунся 91 №-а шуӧмӧн. Меститчанін: Мань-Пупу-Нер гӧралӧн рытыввыв пӧкат, Ичӧт Печӧра да Ылыдзса Егра-Ляга юяслӧн ва юкланін.
  • Иорданскӧй карстовӧй сён. Вынсьӧдӧма Коми АССР-са Министръяс Сӧветлӧн 1973 во рака тӧлысь 5-ӧд лунся 91 №-а шуӧмӧн. Меститчанін: Ичӧт Печӧра ю, веськыд берег (ӧнія берегсянь 500 м ылнаын), Ыджыд Шожым ю вомсянь 16 км вылынджык.
  • Йиа пещера. Вынсьӧдӧма Коми АССР-са Министръяс Сӧветлӧн 1973 во рака тӧлысь 5-ӧд лунся 91 №-а шуӧмӧн. Меститчӧ Туфовӧй пещерасянь неылын: Ичӧт Печӧралӧн веськыд берегын, Ыджыд Шожым ю вомсянь вылынджык.
  • Ош пещера. Вынсьӧдӧма Коми АССР-са Министръяс Сӧветлӧн 1973 во рака тӧлысь 5-ӧд лунся 91 №-а шуӧмӧн. Меститчанін: Ичӧт Печӧра юлӧн веськыд берег (ӧнія берегсянь 500 м ылнаын), Ыджыд Шожым ю вомсянь 16 км вылынджык, Иорданскӧй сёнйын. Пещераыс Печӧраса Уралын медся ыджыд тӧдса пещера (туялӧма 480 м гӧгӧр).
  • Туфовӧй пещера. Вынсьӧдӧма Коми АССР-са Министръяс Сӧветлӧн 1973 во рака тӧлысь 5-ӧд лунся 91 №-а шуӧмӧн. Меститчанін: Ичӧт Печӧра юлӧн веськыд берег (ӧнія берегсянь 500 м ылнаын), Ыджыд Шожым ю вомсянь 16 км вылнаын.
  • Печӧра ю йыв вӧр-ва памятник. Котыртӧма Коми АССР-са Министръяс Сӧветлӧн 1989 во кӧч тӧлысь 26-ӧд лунся 193 №-а шуӧмӧн. Вӧр-ва памятникыс сулалӧ Печӧра-Я-Тальях-Сяхль гӧра вылын (манси кывйысь — Печӧраӧс чужтысь гӧра), 676 м вылнаын, йылын 1 километрын. Лӧсьӧдӧма сійӧс сы могысь, медым видзны 1981 воын аддзӧм Европаса Асыв-Войвыв медыджыд юлысь артманінсӧ, кӧні сувтӧдӧма чугунысь плита, мый индӧ ю заводитчӧмсӧ.

Историческӧй местаяс:

  • Якшаса пристань. Купечьяслӧн 90 склад меститчанін.
  • Усть-Еловкалань тракт, мый йитӧ Печӧра да Волга системаясса юяс[28].

Пасйӧдъяс

  1. ↑ https://11.rosstat.gov.ru/vpn2020
  2. ↑ Якша. Официальный сайт МБУК Троицко-Печорский районный музей Республика Коми. Шыӧдчан кадпас: 5 вӧльгым тӧлысь 2025.
  3. ↑ Афанасьев А. П. Топонимия Республики Коми: Словарь-справочник. — Сыктывкар: Коми книжное издательство, 1996.
  4. ↑ История поселка Якша. Официальный сайт администрации сельского поселения «Якша». Шыӧдчан кадпас: 5 вӧльгым тӧлысь 2025.
  5. ↑ О муниципальном образовании. Официальный сайт администрации сельского поселения «Якша». Шыӧдчан кадпас: 5 вӧльгым тӧлысь 2025.
  6. ↑ О муниципальном образовании. Официальный сайт администрации сельского поселения «Якша». Шыӧдчан кадпас: 5 вӧльгым тӧлысь 2025.
  7. ↑ Городское поселение «Троицко-Печорск». Генеральный план. Обоснование. Пояснительная записка. Том 2. Федеральная государственная информационная система территориального планирования (2016). Шыӧдчан кадпас: 5 вӧльгым тӧлысь 2025.
  8. ↑ Федеральный закон от 03.06.2011 № 107-ФЗ «Об исчислении времени», статья 5 (рус.) (15 сора тӧлысь 2025).
  9. ↑ Якша. Официальный сайт МБУК Троицко-Печорский районный музей Республика Коми. Шыӧдчан кадпас: 5 вӧльгым тӧлысь 2025.
  10. ↑ История поселка Якша. Официальный сайт администрации сельского поселения «Якша». Шыӧдчан кадпас: 5 вӧльгым тӧлысь 2025.
  11. ↑ История поселка Якша. Официальный сайт администрации сельского поселения «Якша». Шыӧдчан кадпас: 5 вӧльгым тӧлысь 2025.
  12. ↑ Якша. Официальный сайт МБУК Троицко-Печорский районный музей Республика Коми. Шыӧдчан кадпас: 5 вӧльгым тӧлысь 2025.
  13. ↑ Якша. Официальный сайт МБУК Троицко-Печорский районный музей Республика Коми. Шыӧдчан кадпас: 5 вӧльгым тӧлысь 2025.
  14. ↑ Жеребцов И. Л. Где ты живешь: Населенные пункты Республики Коми. Историко-демографический справочник. — Москва: Наука, 2001. — 580 с. — ISBN 5-02-008421-2.
  15. ↑ Якша. Официальный сайт МБУК Троицко-Печорский районный музей Республика Коми. Шыӧдчан кадпас: 5 вӧльгым тӧлысь 2025.
  16. ↑ О муниципальном образовании. Официальный сайт администрации сельского поселения «Якша». Шыӧдчан кадпас: 5 вӧльгым тӧлысь 2025.
  17. ↑ Троицко-Печорский район. Троицко-Печорск. Краткая справка.
  18. ↑ Всероссийская перепись населения 2010 года. Численность населения городских округов, муниципальных районов, поселений и населённых пунктов.
  19. ↑ Численность населения Российской Федерации по муниципальным образованиям. Таблица 35. Оценка численности постоянного населения на 1 января 2012 года.
  20. ↑ Численность населения Российской Федерации по муниципальным образованиям на 1 января 2013 года. — М.: Федеральная служба государственной статистики Росстат, 2013. — 528 с. (Табл. 33. Численность населения городских округов, муниципальных районов, городских и сельских поселений, городских населённых пунктов, сельских населённых пунктов).
  21. ↑ Оценка численности населения по городским округам, муниципальным районам, поселениям и городским населённым пунктам Республики Коми на 1 января 2014 года.
  22. ↑ Численность населения Российской Федерации по муниципальным образованиям на 1 января 2015 года.
  23. ↑ Численность населения Российской Федерации по муниципальным образованиям на 1 января 2016 года.
  24. ↑ https://11.rosstat.gov.ru/vpn2020.
  25. ↑ Якша. Официальный сайт МБУК Троицко-Печорский районный музей Республика Коми. Шыӧдчан кадпас: 5 вӧльгым тӧлысь 2025.
  26. ↑ О муниципальном образовании. Официальный сайт администрации сельского поселения «Якша». Шыӧдчан кадпас: 5 вӧльгым тӧлысь 2025.
  27. ↑ О муниципальном образовании. Официальный сайт администрации сельского поселения «Якша». Шыӧдчан кадпас: 5 вӧльгым тӧлысь 2025.
  28. ↑ Якша. Официальный сайт МБУК Троицко-Печорский районный музей Республика Коми. Шыӧдчан кадпас: 5 вӧльгым тӧлысь 2025.

Литература

  • Жеребцов И. Л. Где ты живешь: Населенные пункты Республики Коми. Историко-демографический справочник. — Сыктывкар: Коми книжное издательство, 1994. — 272 с. — ISBN 5-7555-0488-1.
  • Республика Коми: Административно-территориальное деление на 1 августа 1992 г. Издание пятое. — Сыктывкар, 1992.
  • Республика Коми: Энциклопедия. — Сыктывкар: Коми книжное издательство, 1997—2000. — Т. 1—3.
  • Административно-территориальное и муниципальное устройство Республики Коми (на 1 августа 2006 г.). Издание шестое, официальное. — Сыктывкар: ГУ «ТФИ РК», 2006. — С. 278.

Ыстӧгъяс

Босьтӧма "https://kv.ruwiki.ru/w/index.php?title=Якша_(Мылдін_район)&oldid=482380"-ысь