Э. А. Налимова нима Сыктывдін районса история да культура музей

Босьтӧма Рувикиысь

Министерство культуры РФ

Gerb-big.png

Статьяын вӧдитчӧма материалъясӧн Россия Федерацияса Музей фондса канму каталогысь

    
Паськыдджыка
Gerb-icon.png

РФ-са культура министерство

Arrow-Right.png
Gerb-big.png
Статьяын вӧдитчӧма материалъясӧн Россия Федерацияса  Музей фондса канму каталогысь
Паськыдджыка
Э. А. Налимова нима Сыктывдін районса история да культура музей
Музей истории и культуры Сыктывдинского района имени Э.А. Налимовой.jpg
Восьтан кадпас 1999-ӧд вося сора тӧлысь 15-ӧд лун
Инпас Сыктывдинский район, с. Выльгорт, ул. Домны Каликовой, д. 58
Директор Муравьёв Владимир Николаевич

Э. А. Налимова нима Сыктывдін районса история да культура музей (рочӧн Музей истории и культуры Сыктывдинского района имени Э. А. Налимовой) — чужан му туялан музей. Сійӧс восьтісны 1999 вося сора тӧлысь 15-ӧд лунӧ Сыктывдін районса Выльгорт сиктын (Коми Республика) вӧвлӧм начальнӧй школаын. Музейлы подувсӧ пуктіс Налимова Эмилия Алексеевна (1937-2019) — Коми Республикаса культураын нимӧдана уджалысь, Выльгорт сиктса да Сыктывдін районса почёта гражданин. 2007 вося ода-кора тӧлысьын музейлы сетӧма сылы подув пуктысьлысь нимсӧ[1][2].

История

Стрӧйбасӧ, кӧні меститчӧма музейыс, кыпӧдӧма ХХ нэм заводитчигӧн (1913) медводдза коми профессиональнӧй архитектор А. В. Холоповлӧн проект серти. Сійӧ лоӧ архитектура паметникӧн, регион тӧдчанлуна культура озырлун объектӧн. Стрӧйбалысь фасадсӧ да кильчӧсӧ мичмӧдӧма «петук стильӧн» (ХХ нэм заводитчигӧн роч архитектураын национально-романтическӧй стиль). Музейлысь стрӧйбасӧ кыдзи регион тӧдчанлуна культура озырлун объект «Сыктывдін районса Выльгорт сиктын улыс тшупӧда велӧдчанінлӧн кык судтаа пу стрӧйба» капитальнӧя дзоньталісны 2021 воын[3][1].

Музейлӧн фойеын волысьясӧс вочаалӧны ловъя музейса кань Пас, коді босьтіс «Котокультурная столица» ставроссияса перепись премияын «Мяумузейные коты» нимпасын гран-при[4], да музейса чача шыр Музя, коді петкӧдліс музейсӧ Венгрияын, Австрияын, Словакияын, Финляндияын, ветліс Москваӧ, Петыркарӧ, Кардорӧ, Карелияӧ, Тулаӧ[3].

Выставочнӧй залъясын нуӧдӧны Коми Республикаса национальнӧй музейлӧн, Коми Республикаса национальнӧй галереялӧн, «Югӧр» культура водзмӧстчӧмъяс шӧринлӧн, Коми Республикаса ёртасян керкалӧн фондъясысь выставкаяс, котыртӧны Коми Республикаса да Россия Федерацияса частнӧй коллекционеръяслысь, самодеятельнӧй да профессиональнӧй художникъяслысь, киӧн вӧчӧм искусствоса мастеръяслысь выставкаяс. 2022 восянь котыртӧны войтыркостса да россияса тшупӧда выставкаяс[5].

1999 вося ӧшым тӧлыссянь музейын традиция серти нуӧдӧны «Налимов лыддьысьӧмъяс», кодъясӧс сиӧма Василий Петрович да Василий Васильевич Налимовъяслӧн научнӧй династиялы. Лыддьысьӧмъяссӧ нуӧдны мӧвпыштісны Коми муысь просвещение история музейӧн веськӧдлысь М. И. Бурлыкина да Сыктывдін районса история да культура музейлы подув пуктысь Э. А. Налимова. 2005 воын «Налимов лыддьысьӧмъяссӧ» вӧлі сетӧма Россия Федерацияса президент грант кыдз регионлӧн культуралы торъя тӧдчанлуна мероприятиелы.

2003 восянь музей бердын уджалӧ «Сыктывдін районын чужлӧм учёнӧйяслӧн клуб» (веськӧдлысьыс — филология наукаяс кандидат Е.П. Шеболкина).

Музейын збыльмӧдсьӧны «Сыктывдінса рӧдвуж» (2003) да «Колана удж» (2010) муниципалитеткостса проектъяс — Россия Федерацияса Президентлӧн грант конкурсъясын вермысьяс. Музей подув вылын нуӧдӧны республикаса фестиваль — этнокультурнӧй велӧдӧм кузя «Бур мӧвп» методика уджъяслысь конкурс да челядьлы республикаса фестиваль-конкурс «Менам кыв».

Сыктывдінса музей пырӧдчӧ «Россияса музей маршрутъяс» проектӧ.

Музейса фондъяс

2023 во кежлӧ музейса фондын вӧлі 12589 единица, на лыдын медшӧр фондысь эмторъяслӧн лыдыс — 11122 единица, научно-вспомогательнӧй фондысь эмторъяслӧн лыдыс — 2067 единица. Экспозиция ыдждаыс — 672 м²[5].

Экспозицияяс

Пырся экспозицияяс меститчӧмаӧсь 15 неыджыд залын.

Этнография зал

Тані эмӧсь Вӧлӧгда губернияса Усть-Сысольск да Яренск уездъясса (ӧні - Коми Республикаса Сыктывдін район) коми-зыряналӧн ХІХ нэм помын - ХХ нэм заводитчигӧн вӧдитчанторъяс, му вӧдитан, чери кыян, вӧралан кӧлуй, а сідзжӧ ХХ нэм заводитчигӧн вӧчӧм фотографияяс, кӧні петкӧдлӧма Выльгорт сиктса олысьясӧс.

Видз-му овмӧс да медицина промышленносьтлӧн история зал

Залын петкӧдлӧма Сыктывдін районын промышленносьт да видз-му овмӧс сӧвмӧмлысь история. Экспозицияын петкӧдлӧма уджалысьяслӧн семьяяслысь, заводса цехъяслысь фотографияяс, XVIII нэмын стрӧитӧм Нювчимса чугун кисьтан заводысь художественнӧй литьёӧн вӧчӧмторъяс. Ӧткымын материал сиӧма районса гырысь предприятиеяслӧн историялы (Ленин ордена «Сыктывкарса» совхоз да мукӧд).

Велӧдан да наука зал

Экспозицияын петкӧдлӧма Коми Республикаса Сыктывдін районын чужлӧм нималана учёнӧйяс йылысь материалъяс: К. Ф. Жаков, В. П. Налимов, В. В. Налимов, А. С. Сидоров, С. И. Худяев, А.Г. Порошкин, А.И. Ладанов, Е.И. Кириченко. 2014 воын вӧлі лэдзӧма «Я жизнь науке отдаю. Учёные земли Сыктывдинской» диск, кӧні чукӧртӧма музейса фондъясысь районса учёнӧйяс, а сідзжӧ Сыктывдін районын дыр уджалысьяс йылысь юӧр.

Культура да искусство зал

Тані петкӧдлӧма коми йӧзкостса шылада инструментъяслысь коллекция. Сійӧс вӧлі чукӧртӧма учёнӧй-фольклорист, Нювчим посёлокын чужлӧм морт П. И. Чисталёв. Тані жӧ петкӧдлӧма мастер-балалаечник С. И. Налимовлӧн; СССР-са нимйӧза артистка Г. П. Сидоровалӧн; Россияса нимйӧза артистка, Коми Республикаса канму опера да балет театрса медшӧр режиссёр И. П. Бобраковалӧн личнӧй кӧлуй, награднӧй документъяслӧн копияяс, фотоматериалъяс.

Боевӧй Слава зал

Ӧти юкӧдын йӧзӧдӧма Выльгорт сиктын чужлӧм Сӧветскӧй Союзса Герой Н. В. Оплеснин йылысь материалъяс, а сідзжӧ корсьысян отрядъясӧн боевӧй тышъяс мунанінъясысь сетӧмторъяс, эмӧсь фронтвывса письмӧяс, фотографияяс, документъяс, Айму дорйысьяслысь личнӧй кӧлуй, награднӧй материалъяс.

Вӧр-ва зал

Коллекцияын петкӧдлӧма Сыктывдін районса быдмӧг-пӧткаӧс.

2017 воын воссис «Семьяса гусяторъяса да легендаяса жыр» да «Музей музейын» серпасасянін. Жырйын эм Выльгортса Шеболкинъяслӧн ыджыд семьялӧн мебель, гортса кӧлуй да дозмук. Серпас галереяын петкӧдлӧма нималана коми художник С. А. Торлоповлысь да Коми Республикаса самодеятельнӧй художникъяслысь серпасъяссӧ.

«Став Сыктывдін» экспозиция вылын меститӧма Сыктывдін районса 13 сиктса овмӧдчӧмин йылысь юӧр, Сыктывдін районлӧн карта, сылӧн история да геральдика[3].

Галерея

  • Выльгорт музей.jpg
  • Выльгорт музей1.jpg
  • Выльгорт музей8.jpg
  • Выльгорт музей7.jpg
  • Выльгорт музей6.jpg
  • Выльгорт музей4.jpg
  • Выльгорт музей3.jpg
  • Выльгорт музей2.jpg
  • Выльгорт музей9.jpg

Директоръяс

• Налимова Эмилия Алексеевна — музейлы подув пуктысь;
• Чередова Валентина Валентиновна — музейлӧн медводдза директор (1999-2001);
• Игнатов Николай Модестович (2002-2011);
• Полина Татьяна Валериевна (2012-2016);
• Муравьёв Владимир Николаевич — музейлӧн ӧнія директор (2016 восянь)[6].

Наградаяс

• «Важ пемӧсъяслӧн му либӧ Ловзьӧм ящеръяс!» проект шедӧдіс музей удж юкӧнын Коми Республикаса Юралысьлысь грант. Проект лоис вермысьӧн «Туриндустрияса лидеръяс-2018» республиканскӧй конкурсын «Коми Республика мутасын туризм юкӧнын медбур музей проект» нимпасын (2018);
• «Менам кыв» проект лоис вермысьӧн «Коми Республикаса коми да национальнӧй культура шӧринъяслӧн медбур этносоциальнӧй проект» республикаса конкурсын, национальнӧй традицияяслы да семейнӧй донаторъяслы, Россия Федерацияса историко-культурнӧй гӧгӧртас да кывъяс видзӧмлы сиӧм методическӧй дасьтӧмъяслӧн ставроссияса конкурсын вермысьӧн(2021);
• «Миян му» АНО-лӧн «"Налимъяслӧн" Петыркарысь Выльгортӧ мастерлӧн чужанінӧ ветлӧм» регионкостса проект лоис вермысьӧн Коми Республикаса Юралысьлӧн грантъяс серти конкурсын (2022);
• Сыктывдінса музей ӧтув пырис Россияса этнографическӧй музейяслӧн ассоциацияӧ да Россияса музейяслӧн союзӧ (2022 во);
• Сыктывдінса музей босьтіс Коми Республикаса муниципальнӧй музейяс пӧвстын 1 места (2022);
• «"Прометейкӧд ветлігӧн" музейно-музыкальнӧй экспедиция» войтыркостса проект лоис вермысьӧн гражданскӧй йӧзкотыр сӧвмӧдӧм вылӧ Коми Республикаса Юралысьлысь грантъяс конкурсын (2023 во).
• «Миян йӧз» музей проект лоис Культураын водзмӧстчӧмъяс Президент фондса вермысьӧн (2023);
• «Чудъяслӧн сарствоӧ ӧдзӧс» музей проект лоис Культураын водзмӧстчӧмъясн Президент фондса вермысьӧн (2024);
• «Ыбса рай» проект босьтіс культура да искусство юкӧнын уджалысь социальнӧй нырвизя абу коммерческӧй организацияяслы Коми Республикаса сьӧмкудйысь субсидия (2024).

Пасйӧдъяс

  1. ↑ 1 2 Музей истории и культуры Сыктывдинского района имени Э.А. Налимовой. Культура.РФ. Шыӧдчан кадпас: косму тӧлысь 2024.
  2. ↑ Муниципальное бюджетное учреждение культуры "Сыктывдинское музейное объединение". Госкаталог. Шыӧдчан кадпас: 4 рака тӧлысь 2025.
  3. ↑ 1 2 3 Музей истории и культуры Сыктывдинского района имени Эмилии Алексеевны Налимовой. Муниципальное бюджетное учреждение культуры "Сыктывдинское музейное объединение". Шыӧдчан кадпас: 7 косму тӧлысь 2024.
  4. ↑ Елена Туркина. «Вот я – кот. А чего добился ты?»: чем известен на всю Россию музейный кот Пас из Сыктывдинского района // Комсомольская правда : газета. — 2024. — 26 рака тӧлысь.
  5. ↑ 1 2 Музей истории и культуры Сыктывдинского района им. Э. А. Налимовой. Сыктывдинская централизованная библиотечная система. Шыӧдчан кадпас: 7 косму тӧлысь 2024.
  6. ↑ История. Шыӧдчан кадпас: 26 ода-кора тӧлысь 2025.

Литература

• Бурлыкина М. И. Музейная муза Эмма Налимова. Выльгорт, 2020. 309 с. // Жизнь Земли. — 2021. — № 1.
• Судьбы творцов Российской науки и культуры. Том 6-й / Авт.-Сост. И.В. Ильин, А.В. Сурин, В.А. Гвозданный, Г.Ф. Беляева. М.: Полиграф сервис, 2020. 578 С. ISBN 978-86388-350-2 // Жизнь Земли. — 2021. — № 1.

Ыстӧгъяс

• Муниципальное бюджетное учреждение культуры «Сыктывдинское музейное объединение» Сыктывдинская централизованная библиотечная система

Босьтӧма "https://kv.ruwiki.ru/w/index.php?title=Э._А._Налимова_нима_Сыктывдін_районса_история_да_культура_музей&oldid=474149"-ысь