Чёрный Николай Михайлович
| Чёрный Николай Михайлович | |
|---|---|
 | |
| Чужан лун | 1953 вося ода-кора тӧлысь 7-ӧд лун |
| Чужанін | Выльгорт сикт, Сыктывдін район, Коми Республика |
| Канму |
 СССР →  Россия |
| Мыйся уджыс | генеральный директор |
| Ошканпасъяс да премияяс |
|
Чёрный Николай Михайлович (1953 вося ода-кора тӧлысь 7-ӧд лун, Коми Республикаса Сыктывдін районлӧн Выльгорт сикт) — «Чипан видзан Зеленечса фабрика» акционер котырлӧн генеральнӧй директор, Коми Республикаса Уджвывса Герой, Коми Республикаса Почёта гражданин (2021).
Коми Республикаса Юралысьлӧн 2021 во моз тӧлысь 6 лунся 99 №-а Индӧдӧн сетӧма «Почёта гражданин» Коми Республикаса медвылыс почет ним[1].
Олантуй
Н. М. Чёрный чужис 1953 вося ода-кора тӧлысь 7-ӧд лунӧ Коми Республикаса Сыктывдін районлӧн Пичипашня грездын (ӧні пырӧ Выльгорт сиктӧ).
Помаліс Сыктывкарса видз-му овмӧс техникум. 1971 воын пырис уджавны «Сыктывкарса» чипан видзан фабрикаӧ механикӧн. 1976 восянь — старшӧй инженер-сантехник, 1988 восянь — коммерция да овмӧс кузя директорӧс вежысь, 1993 восянь — медшӧр инженер. 1995 воын заводитіс веськӧдлыны Зеленечса чипан видзан фабрикаӧн[2].
1992 воын сійӧ помаліс Кировса видз-му овмӧс институт, босьтіс «зоотехния» специальносьт серти «зооинженер» квалификация. Николай Михайлович 20 сайӧ во уна сикас чинын уджаліс «Сыктывкарса» чипан видзан фабрикаын[3].
25 воысь дырджык нин Николай Михайлович веськӧдлӧ Коми Республикаса агропромышленнӧй юкӧнын тӧдчана предприятиеӧн — «Чипан видзан Зеленечса фабрика» акционер котырӧн. Николай Михайловичӧс директорӧн индісны 90-ӧд воясӧ. Сэки кризис вӧсна предприятиеыс дугдыліс нин уджавны, сійӧс шуисны банкротӧн. Финансӧвӧй да экономика боксянь сьӧкыд кадӧ Николай Михайлович вермис колана ногӧн котыртны чипан видзан фабрикалысь уджсӧ, видзны уджалан местаяссӧ да водзӧ сійӧс сӧвмӧдны[3].
2008 воын чипан видзан фабрика дорӧ йитісны «Порсь видзан Зеленечса комплекс». Сійӧ сідзжӧ вӧлі банкроталӧм выйын. Дженьыд кадӧн Николай Михайлович вермис капитальнӧя дзоньтавны уджалан цехъяссӧ, могмӧдны комплекссӧ вылыс технологияа оборудованиеӧн. 2016 воын кризисыс инмис и «Сыктывкарса» чипан видзан фабрикалы. Н. М. Черныйлӧн вӧзйӧм серти сійӧс тшӧтш йитісны сыӧн веськӧдлан агропромышленнӧй комплекс дорӧ. Вежсьӧмъяс бӧрын чипан видзан фабрика лоис Коми Республикаса медыджыд видз-му овмӧс производительӧн, пырис странаса медбур предприятиеяс лыдӧ да Россия Федерацияса система артмӧдысь предприятиеяслӧн списокӧ. Сэні вӧчӧм прӧдукциясӧ пасйӧма россияса да войтыркостса уна наградаӧн[3].
Николай Михайлович Чёрный — бур юрнуӧдысь, опыта видз-му овмӧс нуӧдысь, уджсӧ бура тӧдысь, веськыд морт. Видз-му овмӧс сӧвмӧдӧмысь, куим предприятие выльмӧдӧмысь Н. М. Чёрныйӧс пасйӧма канму да ведомствоса уна сикас наградаӧн[3].
Наградаяс
• «Агропромышленнӧй комплекс» нимпасынын «Вося менеджер — 2003» ставроссияса конкурсын лауреат (2003);
• «Россияса агропромышленнӧй комплекс сӧвмӧдӧмӧ пай пуктӧмысь» зарни медаль,
• «Айму водзын заслугаясысь» II степеня орденлӧн медаль (2012),
• «Россиялӧн агропромышленнӧй комплексса почёта уджалысь» ним (2010),
• «Россия Федерациялӧн видз-му овмӧсса нимӧдана уджалысь» ним,
• Россия Федерацияса Веськӧдлан котырлӧн Аттьӧалӧм (2016),
• «Коми Республикаса нимӧдана уджалысь» ним,
• Сыктывдін районса Почёта гражданин (2006),
• Коми Республикаса Почёта гражданин,
• Коми Республикаса Уджвывса Герой[4].
Пасйӧдъяс
- ↑ Вячеславу Худяеву и Николаю Черному присвоено высшее почётное звание Республики Коми «Почётный гражданин», Официальный сайт Республики Коми. Шыӧдчан кадпас: 24 рака тӧлысь 2025.
- ↑ Чёрный Николай Михайлович, Сыктывдинская централизованная библиотечная система. Шыӧдчан кадпас: 24 рака тӧлысь 2025.
- ↑ 1 2 3 4 Книга почёта Республики Коми
- ↑ Гендиректор «Зеленецкой» Николай Черный стал Героем труда Коми, bnkomi. Шыӧдчан кадпас: 24 рака тӧлысь 2025.
Литература
- Перова, Л. Кандидаты на звание почетного гражданина республики / Лина Перова // Республика. — 2021. — 7 июня (№ 62). — С. 7 : фот.
- Королёва, О. Чем богаты ‒ тем и рады / Ольга Королёва ; Анастасия Одинцова // Наша жизнь. ‒ 2018. ‒ 23 авг. (№ 34). ‒ С. 12 : фот.
- Под крыло «Зеленецкой» переходит Сыктывкарская птицефабрика // Наша жизнь. ‒ 2016. ‒ 10 нояб. (№ 45). ‒ С. 2.
- Элита бизнеса Республики Коми : информационно-аналитическое издание / ред. И. Стукалов, Пер. А. Хибенкова. ‒ Сыктывкар : Государственный комитет РК по статистике, 2001. ‒ 227 с. ‒ англ.