Койгортса ас му туялан музей
Министерство культуры РФ
РФ-са культура министерство
| «Койгортса ас му туялан музей» муниципальнӧй сьӧмкуд культура учреждение | |
|---|---|
 | |
| Лӧсьӧдан кадпас | 1975 |
| Подув пуктысь | Шарапов Павел Прокопьевич |
| Ин | |
| Инпас | 168170, Российская Федерация, Республика Коми, Койгородский район, село Койгородок, улица Советская, дом № 41А |
| Директор | Шарапова Наталья Васильевна |
| Сайт | kojgorodok.ru/about/kult… |
 |
|
Койгортса ас му туялан музей (рочӧн Койгородский краеведческий музей) (дженьыда — «Койгортса ас му туялан музей» МСКУ) — Коми Республикаса муниципальнӧй сьӧмкуд культура учреждение. Меститчӧ Койгорт районса Койгорт сиктын Сӧветскӧй улича кузя 41А №-а керкаын[1].
Койгортса ас му туялан музей — тайӧ Койгорт районын дзик ӧти музей[2].
Музейсӧ восьтӧма 1975 воын[3].
История
Койгортса ас му туялан музейлы подувсӧ вӧлі пуктӧма 1975 вося ӧшым тӧлысь 23-ӧд лунӧ. Музей лӧсьӧдӧм йылысь мӧвпыс — Павел Прокопьевич Шараповлӧн (1907—1994 вояс), коді некымын во чӧж чукӧртіс да корсис предметъяс, фотографияяс, документъяс. Чукӧртӧм материалыс лоис водзӧ лоан музейлӧн экспозициялы подулӧн. Музей кутіс уджавны 1975 вося ода-кора тӧлысьын, Вермӧм лун кежлӧ. Музей восьтігкежлӧ Павел Шарапов дасьтіс Койгорт сиктысь Айму вӧсна Ыджыд тышса ветеранъяс йылысь выставка[3][4].
Музей восьтӧм бӧрын некымын во на Павел Шарапов водзӧ корсис музей фондлы материалъяс[4].
1992 вося вӧльгым тӧлысьын музейсӧ вуджӧдісны Койгорт районса исполкомлӧн культура юкӧнӧ[3].
Быд во Койгорт районын 6000 сайӧ олысь да гӧсьт волывлӧны музейӧ[3].
Организациялӧн площадь: экспозиция-выставкалӧн — 144 м², фонд видзанін — 32 м².
2024 воын Койгортын ас му туялан музейсӧ выльмӧдісны «Культура» национальнӧй проект отсӧгӧн. Манекенъяс, витринаяс, стеллажъяс, стендъяс, радиогид, интерактивнӧй панель да виртуальнӧй реальносьт шлем ньӧбӧм вылӧ федеральнӧй, республиканскӧй да меставывса сьӧмкудъясысь вичмӧдісны матӧ 1,4 миллион шайт[5].
Музей учредитысьӧн лоӧ «Койгорт» муниципальнӧй районса администрациялӧн культураӧн, вынйӧр сӧвмӧдӧмӧн да спортӧн веськӧдланін.
Музейса директор — Шарапова Наталья Васильевна[6].
Экспозицияяс
Ӧні Койгортса ас му туялан музейын петкӧдлӧма некымын тематическӧй экспозиция:
- «Койгорт районса археология»;
- «Сӧвет кад»;
- «ХІХ нэм помын — ХХ нэм заводитчигӧн крестьяналӧн оланног»;
- «Посводз»;
- «Кольӧм кадлысь лист бокъяс листалӧмӧн»;
- «Ме помнита! Ме гордитча!»;
- «Паметь да кад»[4].
Музейын эм выставка зал, кӧні мунӧны недыр кадся выставкаяс да мероприятиеяс[7].
Коллекцияяс
2009 вося тӧвшӧр тӧлысь 1 лун кежлӧ фондлӧн ӧтувъя лыдыс вӧлі 5215 предмет, на лыдысь 2104-ыс — медшӧр фондысь предметъяс. Фондсӧ содтӧны сӧмын козинъяс тшӧт весьтӧ. Музейын эм Кажымса горно-металлургическӧй ӧти заводлӧн — Нювчимса чугун сывдан заводлӧн — изделиеяслӧн коллекция[3].
Ставнас музейын видзӧны 3735 экспонат, на лыдысь медшӧр фондысь — 1460 предмет. Медся дона коллекцияяс: самӧваръяслӧн коллекция — 9 экспонат, бобувъяслӧн коллекция — 144 экспонат, Кажым районса изделиеяслӧн коллекция — 42 экспонат, нумизматика предметъяс — 324 экспонат да прикладнӧй искусство произведениеяс — 80 экспонат.
Удж
Койгортса ас му туялан музей бердын 2008 восянь уджалӧ «Берегиня» ремесленнӧй салон, мыйӧн веськӧдлӧ мастер-художник, Мастеръяслӧн котырӧ пырысь Т. А. Смирнова. Тані котыртӧны районса декоративно-прикладнӧй творчествоын мастеръяслысь экспозицияяс, выставка-вузасьӧмъяс, мастер-классъяс. Салон бердын мунӧны челядькӧд бисер да сюмӧд мичмӧдӧм серти кружокъяс[3].
Быд во музейын мунӧ 12-15 выставка[3].
Музей нуӧдӧ лекцияяс — школаӧдзса челядьлы, школаясын велӧдчысьяслы этнография тема серти музейлӧн коллекцияяс подув вылын занятиеяс. Музейын нуӧдӧны экскурсияяс, медшӧрыс на пиысь — «Койгорт районлӧн история»[7].
Вермӧмъяс да наградаяс
- Регионса да муниципальнӧй музейяс техническӧя могмӧдӧм вылӧ Россия Федерацияса культура министерстволӧн конкурс серти бӧрйӧмын вермысь, «Культура» национальнӧй проект, 2023 во[8].
Пасйӧдъяс
- ↑ Муниципальное бюджетное учреждение культуры «Койгородский краеведческий музей» (рус.). Госкаталог.РФ. Шыӧдчан кадпас: 22 косму тӧлысь 2026.
- ↑ Койгородский краеведческий музей (рус.). ВМузей. Шыӧдчан кадпас: 22 косму тӧлысь 2026.
- ↑ 1 2 3 4 5 6 7 МРУК «Койгородский краеведческий музей» (рус.). Национальный музей Республики Коми. Шыӧдчан кадпас: 22 косму тӧлысь 2026.
- ↑ 1 2 3 Койгородский краеведческий музей (рус.). Культура.РФ. Шыӧдчан кадпас: 22 косму тӧлысь 2026.
- ↑ В Койгородке модернизировали краеведческий музей (рус.). ИА Комиинформ (9 йирым тӧлысь 2024). Шыӧдчан кадпас: 22 косму тӧлысь 2026.
- ↑ Койгородский краеведческий музей (рус.). Официальный сайт муниципального района «Койгородский». Шыӧдчан кадпас: 22 косму тӧлысь 2026.
- ↑ 1 2 Койгородский краеведческий музей (рус.). tourism.rkomi.ru. Шыӧдчан кадпас: 22 косму тӧлысь 2026.
- ↑ Пятёрка победителей: Коми выиграла в конкурсном отборе Минкультуры России на техническое оснащение музеев по нацпроекту, komi.kp.ru (24 йирым тӧлысь 2023). Шыӧдчан кадпас: 21 косму тӧлысь 2026.
 |
|---|
