Медвежка (Чилимдін район)
| Посёлок | |
| Медвежка | |
|---|---|
 | |
| 66°27′28″ с. ш. 52°21′13″ в. д.GЯO | |
| Страна |
 Россия |
| РФ-са субъект | Коми Республика |
| Муниципальнӧй район | Чилимдін |
| Сикт овмӧдчӧмин | Новӧй Бор |
| Час кытш | UTC+3:00 |
| Йӧз | |
| Олысь лыд | |
| Официал кыв | коми, роч |
| Лыдпаса идентификаторъяс | |
| Пошта индекс | 169494 |
| ОКАТО код | 87252825002 |
| ОКТМО код | 87652425106 |
|
|
|
Медвежка (рочӧн Медвежка) — Коми Республикаса Чилимдін районын Новӧй Бор сикт овмӧдчӧминӧ пырысь посёлок.
Ним артмӧм
Посёлокыслӧн нимыс артмӧма медведь «ош» роч кывйысь да -ка топоним артмӧдысь суффиксысь[2].
География
Посёлокыс меститчӧма Коми Республикаса рытыв-войвылын, Новӧй Бор сиктсянь 40 км ылнаын[3].
- Час кытш
Медвежка, кыдз и ставнас Коми Республика, меститчӧ МСК (москваса кад) час кытшын. UTC серти кадыс торъялӧ +3:00 вылӧ[4].
История
Медводз вӧліс Медвежий пӧчинок ді вылын, сійӧс артмӧдіс 1864 воын Чилимдінысь воӧм морт. 1900 воын татчӧ воисны Осташев Логин Иванович и Дуркин Алексей Егорович асланыс семьяясӧн.
1918 воын пасйӧма кыдз Медвежскӧй грезд, кӧні вӧліс 5 керка да 26 олысь, 1926 воын грездын вӧліс 11 керка да 40 морт[3].
Посёлокыс артмис 1930-ӧд воясын, Айму вӧсна Ыджыд тыш водзын, Печӧра юлӧн шуйга берегын кыдзи быдсикас «лёк вӧчысьяслы» овмӧдчанін, кодъяс пукалӧмаӧсь нин ГУЛАГ лагеръясын да кулакалӧм семьяяслы, ыстӧм роч немечьяслы. Тані меститчис Воркутсройлӧн видз-му овмӧс[5].
Тані вӧлі спецкомендатура, неыджыд лыда татчӧс олысьяс. Посёлокса олысьяс вӧдитісны видз-му, заптісны турун, видзисны скӧт, кералісны вӧр. Механизацияыс пӧшти эз вӧв, ставсӧ вӧчлісны ки помысь да вӧв кыскалӧмӧн. Уджыс вӧлі рабскӧй, ичӧтик удждон вылӧ ковмыліс уджавны 4 час асывсянь 8 час рытӧдз. Эз вӧв электричество да радио, уна семья эз ӧти во чӧж овны землянкаясын, кытчӧдз Новӧй Бор сиктын котыртӧм совхоз (Медвежка лои сылӧн отделениеӧн) эз стрӧит аслас уджалысьяслы керкаяс.
1942 воын скӧт картаяс да производственнӧй помещениеяс югдӧдӧм могысь Медвежкаын вӧлі сувтӧдӧма медводдза электростанция.
1944 вося гожӧмын «Новӧй Бор», «Харьяга» да «Медвежка» совхозъясӧ вайисны 317 мобилизуйтӧм сӧветскӧй немечӧс (1947 вося даннӧйяс серти жӧ ставсӧ вайисны 522 мортӧс). 1946 воын вӧлі зэв ыджыд ойдлӧм, и ваӧн босьтӧм Росвино, Денисовка, Абрамовка, Марица грездъясысь йӧзсӧ вайӧдісны Новӧй Борӧ да Медвежкаӧ.
1946 вося моз тӧлыссянь заводитіс уджавны ичӧт школа, бӧрыннас сійӧ лоис кӧкъямыс классаӧн.
1940-од вояс помын воссис пошта, бӧрынджык сэні лоисны телеграф, сберкасса, радиоузел.
1957 вося вӧльгым тӧлысь 29-ӧд лунсянь 1959 вося рака тӧлысь 2-ӧд лунӧдз вӧлі Медвежка сикт сӧветлӧн шӧринӧн.
1950-ӧд вояс помын воссис челядьлы сад, сійӧс тупкисны 1993 воын совхоз бырӧдӧм бӧрын. Посёлокын уджаліс сӧмын кӧкъямыс вося школа, классъясыс вӧліны тырӧсь, велӧдчисны кык сменаӧн, и ставнас татчӧ волывліс 300 гӧгӧр челядь.
1959 воын посёлокын оліс 658 морт, ставыс роч, 1970 воын — 611 морт, 1979 воын — 616 морт, 1989 воын — 337 морт, 1995 воын — 366 морт, 1998 воын — 364 морт[6].
2000 вося рака тӧлысь 1 лунсянь Медвежка школаын бара кутіс уджавны детсад. Велӧданінлы вӧлі сетӧма выль ним — Медвежкаса ичӧт школа-детсад. 2021 вося лӧддза-номъя тӧлысь 11-ӧд лунӧ Медвежкаса ичӧт школа-челядьӧс видзанінсӧ вӧлі бырӧдӧма.
Йӧз
Медводдза овъяс
Инфраструктура
Посёлокын эм школа-сад, ФАП, пошта, Культура керка, библиотека, вузасянінъяс.
Пасйӧдъяс
- ↑ https://rosstat.gov.ru/vpn/2020/Tom1_Chislennost_i_razmeshchenie_naseleniya
- ↑ Афанасьев А. П. Топонимия Республики Коми: Словарь-справочник. — Сыктывкар: Коми книжное издательство, 1996.
- ↑ 1 2 Жеребцов И. Медвежка // Республика Коми. Энциклопедия. Том II. — Сыктывкар: Коми книжное издательство, 1999. — С. 260.
- ↑ Федеральный закон от 03.06.2011 № 107-ФЗ «Об исчислении времени», статья 5 (рус.) (15 сора тӧлысь 2025).
- ↑ Медвежский сельский Дом культуры (рус.). Районный центр культуры, досуга и кино. Шыӧдчан кадпас: 6 вӧльгым тӧлысь 2025.
- ↑ Жеребцов, 2001, с. 295.
- ↑ http://www.perepis2002.ru/content.html?id=11&docid=10715289081460.
- ↑ Всероссийская перепись населения 2010 года. Численность населения городских округов, муниципальных районов, поселений и населённых пунктов.
- ↑ https://rosstat.gov.ru/vpn/2020/Tom1_Chislennost_i_razmeshchenie_naseleniya.
Литература
- Жеребцов И. Л. Населённые пункты Республики Коми: историко-демографический сборник. — Москва: Наука, 2001.
- Жеребцов И. Л. Где ты живешь. Историко-демографический справочник. — Сыктывкар, 2000.
- История Коми с древнейших времен до конца XX века: В 2-х томах. — Сыктывкар, 2004.
- Республика Коми: Энциклопедия: в 3 томах. — Сыктывкар, 1997—2000.
.png)